Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) HULYO 2015

Sa Unsang Paagi Mas Mapatahom Nimo ang Espirituwal nga Paraiso?

Sa Unsang Paagi Mas Mapatahom Nimo ang Espirituwal nga Paraiso?

“Akong himayaon ang mismong dapit sa akong mga tiil.”—ISA. 60:13.

AWIT: 102, 75

1, 2. Sa unsa mahimong nagtumong ang terminong “tumbanan sa tiil” diha sa Hebreohanong Kasulatan?

SI Jehova nga Diyos haom nga mipahayag: “Ang mga langit mao ang akong trono, ug ang yuta mao ang tumbanan sa akong tiil.” (Isa. 66:1) Maylabot sa “tumbanan sa [iyang] tiil,” siya miingon usab: “Akong himayaon ang mismong dapit sa akong mga tiil.” (Isa. 60:13) Unsaon niya kana paghimo? Ug unsay kahulogan niini alang kanato nga nagpuyo sa ‘tumbanan sa tiil’ sa Diyos?

2 Gawas nga kini nagtumong sa yuta, ang terminong “tumbanan sa tiil” gigamit usab sa simbolikong paagi diha sa Hebreohanong Kasulatan sa paghubit sa karaang templo nga gigamit sa mga Israelinhon. (1 Cron. 28:2; Sal. 132:7) Ang templo nahimutang sa yuta ug matahom gayod sa mga mata ni Jehova kay kini nagsilbing sentro sa matuod nga pagsimba. Busa kini naghimaya sa dapit sa mga tiil ni Jehova.

3. Unsa ang dakong espirituwal nga templo sa Diyos, ug kanus-a kini nagsugod?

3 Karon ang sentro sa matuod nga pagsimba dili na ang literal nga templo sa yuta. Hinunoa, may espirituwal nga templo nga labawng naghimaya kang Jehova kay sa bisan unsang tinukod. Usa kini ka kahikayan nga nagpaposible nga mapasig-uli ang mga tawo  ngadto sa Diyos pinaagi sa pagkasaserdote ug halad ni Jesu-Kristo. Nagsugod kini niadtong 29 C.E. dihang gibawtismohan si Jesus ug gidihogan ingong Hataas nga Saserdote sa dakong espirituwal nga templo ni Jehova.—Heb. 9:11, 12.

4, 5. (a) Giunsa paghubit sa Salmo 99 ang determinasyon sa matuod nga mga magsisimba ni Jehova? (b) Unsay atong ipangutana sa kaugalingon?

4 Ingong apresasyon sa kahikayan sa espirituwal nga templo, kita nagdayeg kang Jehova pinaagi sa pagpaila sa iyang ngalan ug kita nagbayaw kaniya tungod sa iyang mahigugmaong tagana nga lukat. Pagkamakapalipay nga kapig walo ka milyong matuod nga Kristohanon ang aktibong naghimaya kang Jehova karon! Dili sama sa relihiyosong mga tawo, kinsa may sayop nga panghunahuna nga ilang dayegon ang Diyos inigsaka na nila sa langit, ang tanang Saksi ni Jehova nahibalo nga kinahanglan siyang dayegon karon ug dinhi sa yuta.

5 Pinaagi niana, atong gisundog ang ehemplo sa matinumanong mga alagad ni Jehova nga gihubit sa Salmo 99:1-3, 5. (Basaha.) Sumala sa maong salmo, si Moises, Aaron, ug Samuel bug-os nga misuportar sa kahikayan sa matuod nga pagsimba. (Sal. 99:6, 7) Karon, una mahimong mga saserdote kauban ni Jesus sa langit, ang nahibilin sa iyang dinihogang mga igsoon matinumanong nag-alagad diha sa yutan-ong sawang sa espirituwal nga templo. Milyonmilyong “ubang mga karnero” ang maunongong nagsuportar kanila. (Juan 10:16) Bisag magkalahig paglaom, ang duha ka grupo nagkahiusa sa pagsimba kang Jehova dinhi sa tumbanan sa iyang tiil. Apan ingong indibiduwal, angay natong pangutan-on ang kaugalingon, ‘Bug-os ba kong nagsuportar sa kahikayan ni Jehova alang sa putli nga pagsimba?’

KINSA ANG NAG-ALAGAD SA ESPIRITUWAL NGA TEMPLO SA DIYOS?

6, 7. Unsang problema ang mitungha taliwala sa unang mga Kristohanon, ug unsay kinahanglang mahitabo gatosan ka tuig sa ulahi?

6 Wala ray usa ka siglo human matukod ang Kristohanong kongregasyon, ang gitagnang apostasya mitungha. (Buh. 20:28-30; 2 Tes. 2:3, 4) Human niadto, nag-anam ka lisod ang pag-ila kon kinsa ang tinuod nga nag-alagad sa Diyos sa iyang espirituwal nga templo. Paglabay sa gatosan ka tuig, gitin-aw kana ni Jehova pinaagi sa bag-ong naentronong Hari, si Jesu-Kristo.

7 Pagka-1919, klarong nailhan ang mga inuyonan ni Jehova ug ang nag-alagad sa iyang espirituwal nga templo. Sila kinahanglang lunsayon sa espirituwal aron mahimong mas dalawaton ang ilang pag-alagad sa Diyos. (Isa. 4:2, 3; Mal. 3:1-4) Ang nakita ni apostol Pablo sa panan-awon gatosan ka tuig ang milabay nagsugod pagkatuman sa limitadong paagi.

8, 9. Unsa ang “paraiso” nga nakita ni Pablo sa panan-awon?

8 Mabasa nato ang panan-awon ni Pablo sa 2 Corinto 12:1-4. (Basaha.) Ang panan-awon ni Pablo gitawag ug usa ka pinadayag. Bahin kadto sa mahitabo sa umaabot, dili sa nagakahitabo sa iyang adlaw. Dihang si Pablo ‘gisakgaw ngadto sa ikatulong langit,’ unsa nga “paraiso” ang iyang nakita? Ang paraiso nga gihisgotan ni Pablo may literal, espirituwal, ug langitnong katumanan nga ang tanan mahitabo sa umaabot. Mahimo kining magtumong sa umaabot nga literal o yutan-ong Paraiso. (Luc. 23:43) Mahimong magtumong sab kini sa espirituwal nga paraiso nga bug-os matagamtam sa bag-ong kalibotan. Dugang pa, mahimo kining magtumong sa maanindot nga kahimtang sa langit sa “paraiso sa Diyos.”—Pin. 2:7.

9 Apan, nganong miingon man si Pablo nga  siya “nakadungog ug dili-ikabungat nga mga pulong nga dili subay sa balaod nga isulti sa usa ka tawo”? Dili pa kadto panahon nga ipatin-aw niya ang detalye sa kahibulongang mga butang nga iyang nakita sa panan-awon. Pero karon subay na sa balaod o puwede nang isulti sa uban ang mga panalanging natagamtam sa katawhan sa Diyos!

10. Nganong dili parehas ang mga terminong “espirituwal nga paraiso” ug “espirituwal nga templo”?

10 Ang ekspresyong “espirituwal nga paraiso” nahimo nang bahin sa atong teokratikanhong bokabularyo. Kini naghubit sa atong talagsaon, dagaya sa espirituwal nga kahimtang nga pinaagi niana atong natagamtam ang malinawong relasyon uban sa Diyos ug sa atong mga igsoon. Siyempre, dili kita angayng mohinapos nga parehas ra ang “espirituwal nga paraiso” ug “espirituwal nga templo.” Ang espirituwal nga templo mao ang kahikayan sa Diyos sa matuod nga pagsimba. Ang espirituwal nga paraiso tin-awng nagpaila kon kinsa ang inuyonan sa Diyos ug nag-alagad kaniya sa espirituwal nga templo karon.—Mal. 3:18.

11. Unsang pribilehiyo ang atong nabatonan maylabot sa espirituwal nga paraiso?

11 Makapalipay ang pagkahibalo nga sukad sa 1919, gitugotan ni Jehova ang dili hingpit nga mga tawo sa pagtabang kaniya sa pag-ugmad, pagpalig-on, ug pagpalapad sa espirituwal nga paraiso sa yuta! Nakigbahin ka ba niining maanindot nga buluhaton? Nagpalihok ba kini kanimo sa pagpadayon sa pagtabang kang Jehova sa paghimaya o pagpatahom sa ‘dapit sa iyang mga tiil’?

MAS GIPATAHOM ANG ORGANISASYON NI JEHOVA

12. Unsang pagsalig ang nabatonan natong tanan maylabot sa katumanan sa Isaias 60:17? (Tan-awa ang hulagway sa sinugdan sa artikulo.)

12 Ang talagsaong kausaban maylabot sa yutan-ong bahin sa organisasyon ni Jehova gitagna sa Isaias 60:17. (Basaha.) Ang mga batan-on o bag-ohan nakabasa bahin sa ebidensiya niana nga mga kausaban o nakadungog bahin niana. Apan dako gayong pribilehiyo alang sa mga igsoon nga nakasinati mismo niana! Dili ikatingala nga kombinsido sila nga pinaagi sa iyang naentronong Hari, si Jehova nagagiya sa Iyang organisasyon! Sila nahibalo nga may basehanan ang ilang pagsalig, ug nabatonan usab nato ang maong pagsalig. Ang pagpamati sa ilang mga eksperyensiya magpalig-on sa atong pagtuo ug pagsalig kang Jehova.

13. Sumala sa Salmo 48:12-14, unsay atong obligasyon?

13 Kita man dugay na sa kamatuoran o bag-ohan pa, kinahanglan natong isulti sa uban ang bahin sa organisasyon ni Jehova. Milagro gayod ang paglungtad sa espirituwal nga paraiso taliwala niining daotan, korap, ug walay gugmang kalibotan! Ang kahibulongang mga butang bahin sa organisasyon ni Jehova, o “Zion,” ug ang kamatuoran bahin sa espirituwal nga paraiso kinahanglang malipayong ipaambit “ngadto sa umaabot nga kaliwatan.”—Basaha ang Salmo 48:12-14.

14, 15. Unsang organisasyonal nga mga kausaban ang gihimo human sa 1970, ug nganong mapuslanon kana?

14 Sa milabayng katuigan, ang kauban natong mga edaran nakasinati mismo sa organisasyonal nga mga kausaban nga nakadugang sa katahom sa yutan-ong bahin sa organisasyon ni Jehova. Ilang nahinumdoman dihang ang mga kongregasyon may alagad sa kongregasyon imbes lawas sa mga ansiyano, dihang ang mga nasod may alagad sa sangang buhatan inay Branch Committee, ug dihang ang direksiyon naggikan sa presidente sa Watch Tower Society imbes sa Nagamandong Lawas sa mga Saksi ni Jehova. Bisag kining tanang debotadong mga brader  gipaluyohan sa matinumanong mga asistant, usa lang ka tawo ang mohimog mga desisyon sa kongregasyon, sa mga branch office, ug sa world headquarters. Human sa 1970, gihimo ang mga kausaban aron grupo sa mga ansiyano ang may responsabilidad sa pagdumala imbes usa ra ka tawo.

15 Mapuslanon ba kini nga mga kausaban? Oo. Ngano? Tungod kay ang maong mga kausaban gibase sa mas tin-awng pagsabot bahin sa sumbanan diha sa Kasulatan. Imbes usa lang ka tawo ang mohimog mga desisyon, ang maayong mga hiyas sa tanang “gasa nga mga lalaki” nga gitagana ni Jehova naghatag ug kaayohan sa organisasyon.—Efe. 4:8; Prov. 24:6.

Si Jehova nagtagana sa tanang tawo sa giya nga ilang gikinahanglan (Tan-awa ang parapo 16, 17)

16, 17. Unsang di pa dugayng mga kausaban ang imong gipabilhan, ug ngano?

16 Hunahunaa usab ang di pa dugayng mga kausaban, sama sa kausaban sa dagway, unod, ug paagi sa pag-apod-apod sa atong mga publikasyon. Makapalipay gayod ang pagtanyag ug praktikal, makapadani, ug maanindot nga mga basahon diha sa ministeryo! Ug dihang gigamit nato ang bag-ong teknolohiya sa pagpakaylap sa kamatuoran, sama sa jw.org nga website, atong gipakita nga gusto gayod ni Jehova nga itagana sa tanang tawo ang giya nga ilang gikinahanglan.

17 Dili sab nato kalimtan ang kaayohan sa gihimong kausaban aron kita makagahig panahon para sa Pamilyahanong Pagsimba o sa personal nga pagtuon. Gipabilhan usab nato ang mga kausaban maylabot sa mga programa sa asembliya ug kombensiyon. Nagkanindot kini matag tuig! Ug mapasalamaton gayod kita sa pagbansay nga gitagana sa atong teokratikanhong mga tunghaan. Niining tanang kausaban, klaro nga si Jehova ang naggiya sa iyang organisasyon ug mas gipatahom niya ang espirituwal nga paraiso nga atong natagamtam karon!

 SA UNSANG PAAGI MAS MAPATAHOM NIMO ANG ESPIRITUWAL NGA PARAISO?

18, 19. Sa unsang paagi mas mapatahom nato ang espirituwal nga paraiso?

18 Kadungganan gayod nato nga gitugotan kita ni Jehova sa pagtabang kaniya nga mas mapatahom ang atong espirituwal nga paraiso. Gibuhat nato kana pinaagi sa masibotong pagsangyaw sa maayong balita sa Gingharian ug sa paghimog dugang mga tinun-an. Matag higayon nga gitabangan nato ang usa ka tawo nga mahimong alagad sa Diyos, kita nakatabang sa pagpalapad sa espirituwal nga paraiso.—Isa. 26:15; 54:2.

19 Mas mapatahom usab nato ang atong espirituwal nga paraiso pinaagi sa padayong pagpauswag sa atong Kristohanong personalidad. Nianang paagiha, gihimo nato ang paraiso nga mas makapadani sa uban. Labaw pa sa kahibalo bahin sa Bibliya, sagad ang atong kahinlo ug pagkamakigdaiton ang unang makadani sa mga tawo ngadto sa organisasyon ug dayon sa Diyos ug kang Kristo.

Ikaw makatabang sa pagpalapad sa espirituwal nga paraiso (Tan-awa ang parapo 18, 19)

20. Kaharmonya sa Proverbio 14:35, unsay determinado natong buhaton?

20 Malipay gayod si Jehova ug si Jesus nga makita ang atong matahom nga espirituwal nga paraiso karon! Ang atong kalipay sa pagtabang nga mas mapatahom kini maoy pasiuna sa kalipay nga atong bation sa ulahi dihang motabang kita sa paghimo sa yuta nga usa ka literal nga paraiso. Hinumdoman nato ang giingon sa Proverbio 14:35: “Ang kahimuot sa usa ka hari anaa sa alagad nga nagabuhat uban ang hait nga salabotan.” Hinaot nga kanunay kitang magbatog hait nga salabotan samtang maningkamot kita nga mas mapatahom ang espirituwal nga paraiso!