Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) MAYO 2015

 GIKAN SA AMONG ARCHIVES

Gugma ang Nagpadagan sa Kapeteriya

Gugma ang Nagpadagan sa Kapeteriya

ANG pagpangaon nga magkauban diha sa lamesa ni Jehova maoy espesyal nga bahin sa atong pagsimba. Dihang ang katawhan sa Diyos magtigom alang sa espirituwal nga kombira, ang pag-ambitay ug materyal nga pagkaon sagad makadugang sa kalipay.

Niadtong Septiyembre 1919, ang mga Estudyante sa Bibliya nagpahigayon ug walo ka adlawng kombensiyon sa Cedar Point, Ohio, U.S.A. Ang mga hotel maoy magtaganag sak-anan ug pagkaon alang sa mga delegado, apan linibo ang nangabot, nga mas daghan pa kay sa gidahom. Tungod sa kadaghan sa delegado, nangatras ang mga waiter ug waitress. Ang naproblema nga tagdumala sa kapeteriya nangayog tabang sa batan-ong mga delegado, ug daghan ang miboluntaryo. Usa nila si Sadie Green. Siya nahinumdom: “Unang higayon nako to nga mag-waitress, pero lingaw kaayo mi.”

Sierra Leone, 1982

Sa misunod nga katuigan, ang kahikayan sa kapeteriya sa kombensiyon nagpaposible nga malipayong makaalagad ang daghang boluntaryo sa ilang mga igsoon. Ang pagtrabaho uban sa mga isigkamagtutuo nakatabang usab sa daghang batan-on nga mohimog espirituwal nga mga tumong. Si Gladys Bolton nakaboluntaryo sa kapeteriya niadtong 1937 nga kombensiyon. “Daghan kog nailaila gikan sa ubang lugar,” siya miingon, “ug nakadungog ko kon giunsa nila pagbuntog ang ilang mga problema. Sukad niadto, nangandoy ko nga mahimong payunir.”

Usa sa tumatambong nga si Beulah Covey miingon: “Ang dedikasyon sa mga boluntaryo naghimo sa maong kahikayan nga hapsay kaayo.” Pero may mga problema usab kini. Pananglitan, niadtong 1969, pag-abot ni Angelo Manera sa Dodger Stadium sa Los Angeles, California, ayha pa niya mahibaloi nga naasayn diay siya ingong cafeteria servant. Siya miingon, “Puwerte gyod nakong kurata!” Apil sa pagpangandam sa maong kombensiyon ang pagkalot ug halos tunga sa kilometro nga kanalkanal alang sa tubo sa gas paingon sa kosina!

Frankfurt, Germany, 1951

Niadtong 1982, sa Sierra Leone, kinahanglan unang hawanan sa kugihang mga boluntaryo ang uma ug dayon magtukod ug kapeteriya gamit ang nabatonan nilang materyales. Niadtong 1951, sa Frankfurt, Germany, ang maayo mangitag paagi nga mga igsoon nangabang ug tren nga magtaganag  alisngaw o steam alang sa 40 ka kaldero. Sulod sa usa ka oras, 30,000 ka pagkaon ang ilang gisilbi. Aron mogaan ang trabaho sa 576 ka tighugas, ang mga tumatambong nagdalag kaugalingong kutsilyo ug tenedor. Sa Yangon, Myanmar, gamayng sili lang ang gibutang sa mahunahunaong mga kosinero sa pagkaon nga alang sa mga delegadong gikan sa lainlaing nasod.

“SILA MANGAON NGA NAGTINDOG”

Niadtong 1950, panalangin para kang Annie Poggensee ang pagtindog sa taas, nabulad sa adlaw nga linya sa kapeteriya sa kombensiyon sa United States. Siya miingon: “Nalingaw kog paminaw sa estorya sa duha ka sister nga nagbarko gikan sa Europe.” Giestorya nila kon sa unsang paagi gitabangan sila ni Jehova nga makatambong. “Walay molabaw sa kalipay niadtong duha ka sister,” si Annie miingon. “Balewala ra nila ang kainit ug ang paghulat ug dugay diha sa linya.”

Seoul, Korea, 1963

Diha sa daghang dagkong kombensiyon, ang dagkong tolda sa kapeteriya may linya sa lamesa diin magtindog ang mangaon aron dali ra silang mahuman ug makapuli ang uban. Unsaon pagpakaon ang linibo para sa paniudto? Usa ka dili Saksi ang nakaingon: “Lahi gyod na nga relihiyon. Sila mangaon nga nagtindog.”

Ang mga sundalo ug gobyerno nakadayeg sa ka paspas ug ka organisado nga ilang nakita. Human sa inspeksiyon sa atong kapeteriya sa Yankee Stadium sa New York City, giawhag sa trabahante sa United States Army si Major Faulkner sa British War Department nga mohimog samang inspeksiyon. Busa niadtong 1955, sila sa iyang asawa mitambong sa “Madaogong Gingharian” nga Asembliya sa Twickenham, England. Nakita niya nga gugma ang nagpadagan sa maong kapeteriya.

Sulod sa daghang dekada, ang kinabubut-ong mga boluntaryo mahigugmaong nagtaganag makapahimsog ug baratong pagkaon sa mga tumatambong. Apan kining dakong buluhaton nagkinahanglag daghang boluntaryo nga motrabahog daghang oras ug masayloan pa gani ang pipila o tibuok programa. Sa ulahing bahin sa 1970, gipasimple ang kahikayan sa pagtaganag pagkaon sa kombensiyon. Sugod sa 1995, ang mga delegado giawhag sa pagdalag kaugalingong pagkaon. Tungod niini, ang mga boluntaryo kaniadto sa kapeteriya nakapahimulos na sa espirituwal nga programa ug pagpakig-uban sa mga igsoon. *

Gipabilhan gayod ni Jehova kadtong makugihong nag-alagad sa ilang mga isigkamagtutuo! Gihandom gihapon sa pipila ang malipayong mga pagboluntaryo sa maong mga kapeteriya. Pero usa ra ang segurado: Gugma gihapon ang pangunang sangkap sa atong mga kombensiyon.—Juan 13:34, 35.

^ par. 12 Siyempre, daghan pag kahigayonan aron makaboluntaryo diha sa ubang departamento sa kombensiyon.

Pagkat-og Dugang

ANG BANTAYANANG TORRE (TUN-ANANG EDISYON)

Ginatigom ni Jehova ang Iyang Malipayong Katawhan

Unsay kaamgiran sa mga pista diha sa Bibliya ug sa kombensiyon sa mga Saksi ni Jehova? Nganong maayo nga motambong kita niana?