Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) PEBRERO 2015

 GIKAN SA AMONG ARCHIVES

“Usa ka Hinungdanon Kaayong Panahon”

“Usa ka Hinungdanon Kaayong Panahon”

NIADTONG 1870 usa ka gamayng grupo sa Pittsburgh (Allegheny), Pennsylvania, U.S.A., ang misugod pagsusi sa Kasulatan. Gipangunahan ni Charles Taze Russell, sila nagtuon bahin sa lukat ni Kristo ug sa wala madugay ilang nasabtan ang kahinungdanon niini diha sa katuyoan ni Jehova. Nalipay kaayo sila sa pagkahibalo nga tungod sa lukat nahimong posible ang kaluwasan, bisan niadtong wala pa makadungog bahin kang Jesus! Tungod sa ilang apresasyon, natukmod sila sa paghandom sa kamatayon ni Jesus kada tuig.—1 Cor. 11:23-26.

Gipatik ni Brader Russell ang Zion’s Watch Tower, nga nagpasiugda sa lukat ingong kinadak-ang pamatuod sa gugma sa Diyos. Ang Watch Tower nagtawag sa panahon sa Memoryal sa kamatayon ni Kristo ingong “usa ka hinungdanon kaayong panahon” ug nag-awhag sa mga magbabasa sa pagsaulog niana sa Pittsburgh o sa pribadong mga dapit. “Bisag duna lay duha o tulo nga managsamag pagtuo”—o bisag usa—sa diwa ang Ginoo anaa sa ilang taliwala.

Kada tuig, nagkadaghan ang nangadto sa Pittsburgh alang sa Memoryal. “Mainiton kang abiabihon dinhi,” nag-ingon ang imbitasyon. Gani, ang mga Estudyante sa Bibliya andam nga mopasaka ug mopakaon sa ilang mga igsoon sa pagtuo. Sa 1886, “Usa ka Dakong Panagkatigom” ang gipahigayon sulod sa pipila ka adlaw human sa Memoryal. “Tambong kamo,” nag-awhag ang Watch Tower, “uban ang kasingkasing nga nahupngan sa gugma alang sa Agalon ug sa iyang mga igsoon ug sa iyang kamatuoran.”

Tsart alang sa pagpasa sa mga emblema sa Memoryal sa London Tabernacle

Sulod sa ubay-ubayng katuigan, ang mga Estudyante sa Bibliya sa Pittsburgh nagpahigayon ug mga kombensiyon alang niadtong nagtuo sa lukat nga nangadto didto aron motambong sa Memoryal. Samtang nagkadaghan ang mga Estudyante sa Bibliya, nagkadaghan usab ang nanambong sa Memoryal sa tibuok kalibotan. Si Ray Bopp sa ecclesia (kongregasyon) sa Chicago nahinumdom nga sa katuigan sa 1910, gidangtag pipila ka oras ang pagpasa sa mga emblema ngadto sa gatosan nga nanambong kay halos tanan nakig-ambit niana.

Unsa nga mga emblema ang gigamit? Bisag nahibalo sila nga si Jesus migamit ug bino panahon sa Panihapon sa Ginoo, dihay higayon nga ang Watch Tower nagsugyot nga mogamit ug duga sa bag-ong pinupo nga ubas o linutong pasas, aron dili matental kadtong “mahuyang sa unod.” Apan, may bino usab alang niadtong mibati nga “angayng gamiton ang gipaaslom nga bino.” Sa ulahi nasabtan sa mga Estudyante sa Bibliya nga ang walay sambog nga pulang bino mao ang haom nga simbolo sa dugo ni Jesus.

Papel ug lapis nga gipasa gikan sa usa ka selda ngadto sa lain aron irekord ang mitambong sa Memoryal sa usa ka prisohan sa Nicaragua

Ang paghandom sa kamatayon ni Jesus naghatag ug kahigayonan sa pagpamalandong. Apan sa pipila ka kongregasyon masulub-on ang mga igsoon, ug dihang matapos ang programa, ang tanan manglakaw  nga way tingogtingog. Apan ang librong Jehovah niadtong 1934 nag-ingon nga ang Memoryal angayng saulogon, dili “sa kasubo” tungod sa masakit nga kamatayon ni Jesus, kondili “sa kalipay” tungod sa iyang pagmando ingong Hari sukad sa 1914.

Mga igsoon sa Mordvinia, Russia, nagtigom diha sa kampo sa pinugos nga pagtrabaho sa pagsaulog sa Memoryal, 1957

Sa tuig 1935 nahitabo ang dakong kausaban nga nakaapektar sa pagsaulog sa Memoryal, kay gipatin-aw ang kahulogan sa “dakong pundok” (KJ), o “dakong panon,” sa Pinadayag 7:9. Una pa niadto, giisip sa mga alagad ni Jehova kining grupoha ingong dedikadong mga Kristohanon nga dili kaayo masiboton. Karon kining dakong panon gipaila ingong matinumanong mga magsisimba nga naglaom nga mabuhi sa paraisong yuta. Human niini nga pagpatin-aw ug human sa maampingong pagsusi sa kaugalingon, si Russell Poggensee miingon: “Wala ipaila ni Jehova pinaagi sa iyang balaang espiritu nga ako may langitnong paglaom.” Si Brader Poggensee—ug daghan pang maunongon nga sama kaniya—mihunong sa pagpakig-ambit sa mga emblema apan nagpadayon sa pagtambong sa Memoryal.

Niining “hinungdanon kaayong panahon,” ang espesyal nga mga kahikayan sa pagsangyaw naghatag sa tanan ug maayong kahigayonan sa pagpakita sa ilang apresasyon alang sa lukat. Ang usa ka Bulletin sa 1932 nag-awhag sa mga Kristohanon nga dili sila angayng mogawi ingong mga “Memorial saints,” mga umalambit apan wala magamantala sa mensahe sa kamatuoran. Sa 1934, ang Bulletin nag-awhag sa mga igsoon sa “pag-oksilyare,” nga nangutana: “May 1,000 ba nga makaaplay panahon sa Memoryal?” Maylabot sa mga dinihogan, ang Informant nag-ingon: “Mabug-os lamang ang ilang kalipay pinaagi sa pagpamatuod bahin sa Gingharian.” Sa ngadtongadto, ingon usab niana ang bation niadtong may yutan-ong paglaom kon sila magpamatuod bahin sa Gingharian. *

Samtang gibartolina, si Harold King nagsulat ug mga balak ug awit bahin sa Memoryal

Alang sa tanang katawhan ni Jehova, ang Memoryal mao ang labing sagradong gabii sa tibuok tuig. Ila kining gisaulog bisan pa sa malisod nga mga kahimtang. Sa 1930, si Pearl English ug ang iyang igsoon, si Ora, mibaktas ug mga 80 kilometros aron motambong sa Memoryal. Samtang gibartolina didto sa China, ang misyonaryong si Harold King nagsulat ug mga balak ug awit bahin sa Memoryal ug naghimog mga emblema gamit ang black currant ug kan-on nga humay. Sa Eastern Europe, Central America, ug Africa, ang maisogong mga Kristohanon naghandom sa kamatayon ni Jesus bisan pa sa gubat o mga pagdili. Bisag asa kita o unsay atong kahimtang, kita magtigom aron sa pagpasidungog kang Jehova nga Diyos ug kang Jesu-Kristo sa hinungdanong panahon sa Memoryal.

^ par. 10 Sa ulahi, ang Bulletin gitawag ug Informant, karon Atong Ministeryo sa Gingharian.

Pagkat-og Dugang

Minilyon ang Motambong—Ikaw?

Ikaw kinasingkasing nga giimbitar sa mga Saksi ni Jehova sa pakigpulong nga maghisgot kon sa unsang paagi ka makabenepisyo sa kinabuhi ug kamatayon ni Jesus. Ang Memoryal himoon sa tibuok kalibotan sa Biyernes, Abril 3, 2015.