Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) ENERO 2015

Magpasalamat Kang Jehova ug Ikaw Pagapanalanginan

Magpasalamat Kang Jehova ug Ikaw Pagapanalanginan

“Magpasalamat kamo kang Jehova, kay siya maayo.”—SAL. 106:1.

1. Nganong takos si Jehova sa atong pagpasalamat?

SI Jehova, ang Maghahatag sa “matag maayong gasa ug matag hingpit nga regalo,” takos gayod sa atong pagpasalamat. (Sant. 1:17) Ingong atong mahigugmaong Magbalantay, siya nagtagana sa tanan natong panginahanglan, sa pisikal ug espirituwal. (Sal. 23:1-3) Siya ang “atong dalangpanan ug kusog”—ilabina panahon sa kasakitan! (Sal. 46:1) Seguradong mouyon gayod kita sa gisulat sa salmista: “Magpasalamat kamo kang Jehova, kay siya maayo; kay ang iyang mahigugmaong-kalulot hangtod man sa panahong walay tino.”—Sal. 106:1.

Atong tinuig nga teksto sa 2015: “Magpasalamat kamo kang Jehova, kay siya maayo.”—Salmo 106:1

2, 3. (a) Unsa ang mga kapeligrohan kon dili nato pabilhan ang atong mga panalangin? (b) Unsang mga pangutana ang atong tagdon niining artikuloha?

2 Nganong hinungdanon nga hisgotan nato ang pagpasalamat kang Jehova? Sama sa gitagna, niining kataposang mga adlaw nagkadaghan ang dili mapasalamaton. (2 Tim. 3:2) Daghan ang walay pagpabili sa ilang mga panalangin. Kay naimpluwensiyahan sa komersiyo ug paanunsiyo, minilyon ang nanglimbasog aron makabatog mas daghan pa imbes makontento sa ila nang nabatonan.  Mahimong maimpluwensiyahan usab kita sa maong tinamdan. Sama sa karaang mga Israelinhon, posible nga mahimo kitang dili mapasalamaton ug dili mapabilhon sa atong maayong relasyon kang Jehova ug sa mga panalangin nga atong nadawat gikan kaniya.—Sal. 106:7, 11-13.

3 Tagda usab ang mahitabo kon makasinati kitag grabeng mga pagsulay. Sa maong mga panahon, basin maluya ta ug dili na nato maapresyar ang atong mga panalangin. (Sal. 116:3) Busa, sa unsang paagi nato maugmad ug mahuptan ang pagkamapasalamaton? Unsay makatabang nato sa pagpabiling positibo ilalom sa grabeng mga pagsulay? Atong tan-awon.

“DAGHANG BUTANG ANG IMONG NABUHAT, OH JEHOVA”

4. Sa unsang paagi nato mahuptan ang pagkamapasalamaton?

4 Kon gusto natong maugmad ug mahuptan ang pagkamapasalamaton, kinahanglan natong ilhon ug pamalandongon ang atong mga panalangin gikan kang Jehova ug isipon nga kana maoy tungod sa iyang dakong gugma kanato. Dihang gihimo kana sa salmista, siya nahingangha pag-ayo sa daghang katingalahang buhat ni Jehova.—Basaha ang Salmo 40:5; 107:43.

5. Unsay atong makat-onan kang apostol Pablo maylabot sa pag-ugmad sa pagkamapasalamaton?

5 Daghan tag makat-onan kang Pablo labot sa pag-ugmad sa pagkamapasalamaton. Dayag nga iyang gipamalandong ang iyang mga panalangin, kay kanunay siyang nagpahayag ug kinasingkasing nga mga pasalamat. Nahibalo si Pablo nga kanhi siya “usa ka tigpasipala ug maglulutos ug tawong bagis.” Busa, nagpasalamat siya nga bisan pa sa iyang kasal-anan kaniadto, ang Diyos ug si Kristo nagpakita kaniyag kaluoy ug nagpiyal kaniyag usa ka ministeryo. (Basaha ang 1 Timoteo 1:12-14.) Gipabilhan usab pag-ayo ni Pablo ang iyang isigka-Kristohanon ug sagad nagpasalamat siya kang Jehova tungod sa ilang maayong mga hiyas ug pagkamatinumanon. (Filip. 1:3-5, 7; 1 Tes. 1:2, 3) Ug dihang si Pablo nag-atubag mga pagsulay, nagpasalamat dayon siya kang Jehova sa tukma sa panahong tabang nga iyang nadawat gikan sa iyang espirituwal nga mga igsoon. (Buh. 28:15; 2 Cor. 7:5-7) Busa, dili ikatingala nga ang mga sinulat ni Pablo nagdasig sa mga Kristohanon: ‘Magmapasalamaton kamo . . . nga magtinambagay sa usag usa sa tanang kaalam, ug magaawit ug mga salmo ug mga alawiton ug mga awit nga espirituhanon uban ang pagkamapasalamaton.’—Col. 3:15-17, Ang Biblia, PBS.

PAGPAMALANDONG UG PAG-AMPO—MAKATABANG SA PAGPABILING MAPASALAMATON

6. Unsay ilabina nimong gipasalamatan kang Jehova?

6 Unsaon nato pagsundog ang panig-ingnan ni Pablo? Sama kaniya, kinahanglan natong pamalandongon kon unsay nahimo ni Jehova alang kanato. (Sal. 116:12) Kon pangutan-on ka, ‘Unsang mga panalangin ang imong gipasalamatan kang Jehova?’ unsay imong itubag? Iapil ba nimo ang imong bililhong relasyon kang Jehova? O ang kapasayloan nga imong nadawat tungod sa imong pagpakitag pagtuo sa halad lukat ni Kristo? Nganlan ba nimo ang mga igsoon nga mitabang nimo panahon sa kalisdanan? Siyempre, dili nimo kalimtan ang imong minahal nga kapikas ug mga anak. Ang pagpamalandong sa maong maanindot nga mga panalangin gikan sa imong mahigugmaong Amahan, si Jehova, magtukmod kanimo sa pagpasalamat kaniya kada adlaw.—Basaha ang Salmo 92:1, 2.

7. (a) Nganong angay tang magpasalamat diha sa pag-ampo? (b) Sa unsang paagi ka makabenepisyo sa pagpasalamat kang Jehova diha sa pag-ampo?

7 Kon ang atong mga panalangin kanunayng anaa sa atong hunahuna ug kasingkasing, matukmod kita sa pagpasalamat kang  Jehova diha sa pag-ampo. (Sal. 95:2; 100:4, 5) Alang sa daghan, ang pag-ampo maoy usa lang ka paagi sa pagpangayo sa Diyos ug mga butang. Apan, nahibalo kita nga si Jehova malipay dihang kita magpasalamat kaniya sa atong nabatonan. Mabasa nato sa Bibliya ang daghang kinasingkasing nga pag-ampo sa pagpasalamat, lakip nianang kang Ana ug Ezequias. (1 Sam. 2:1-10; Isa. 38:9-20) Busa sundoga kadtong matinumanong mga alagad kinsa nagmapasalamaton. Oo, pasalamati si Jehova diha sa pag-ampo alang sa mga panalangin nga imong nadawat. (1 Tes. 5:17,  18) Daghag benepisyo ang paghimo niana. Mapalig-on ka, mas molalom ang imong gugma kang Jehova, ug mas masuod ka kaniya.—Sant. 4:8.

Unsang mga panalangin ang imong gipasalamatan kang Jehova? (Tan-awa ang parapo 6, 7)

8. Unsay makapawala sa atong apresasyon sa tanang nahimo ni Jehova alang kanato?

8 Kon dili ta mag-amping, dali rang mawala ang atong apresasyon sa pagkamaayo ni Jehova. Ngano? Kay atong napanunod ang kiling sa pagkadili-mapasalamaton. Tagda kini: Ang atong unang ginikanan, si Adan ug Eva, gipapuyo sa paraiso. Sila gitagan-an sa tanan nilang panginahanglan ug may paglaom nga mabuhing malinawon sa walay kataposan. (Gen. 1:28) Apan wala nila pabilhi ang ilang mga panalangin. Sila mahakogong nagtinguhag dugang pa. Ingong resulta, nawala kanila ang tanan. (Gen. 3:6, 7, 17-19) Kay nagkinabuhi kita sa kalibotan nga dili mapasalamaton, posible usab nga mahimo tang dili mapabilhon sa tanang nahimo ni Jehova alang kanato. Tingali dili na nato mapabilhan ang atong suod nga relasyon kaniya. Basig mawala ang atong apresasyon sa pribilehiyo nga mahimong bahin sa tibuok kalibotang panag-igsoonay. Mahimong malinga kita sa mga butang niining kalibotana nga hapit nang mahanaw. (1 Juan 2:15-17) Aron malikayan ang maong lit-ag, angay natong pamalandongon ang atong mga panalangin ug kanunayng pasalamatan si Jehova sa pribilehiyo nga nahimo tang iyang katawhan.—Basaha ang Salmo 27:4.

DIHANG MAGSAGUBANG UG MGA PAGSULAY

9. Dihang magsagubang ug grabeng mga pagsulay, nganong angay natong pamalandongon ang atong mga panalangin?

9 Ang pagkamapasalamaton makatabang nato sa pagsagubang sa grabeng mga pagsulay. Tingali maluya kita sa makapasubong mga situwasyon nga kalit makapausab sa atong kinabuhi, sama sa pagluib sa kapikas, grabeng sakit, kamatayon sa minahal, o usa ka dakong katalagman. Nianang mga panahona,  ang pagpamalandong sa atong mga panalangin makapahupay ug makapalig-on kanato. Tagda ang mosunod nga mga eksperyensiya.

10. Sa unsang paagi nakabenepisyo si Irina sa pagpamalandong sa iyang mga panalangin?

10 Si Irina *, usa ka regular payunir sa North America, naminyo sa usa ka ansiyano kinsa nagluib ug nag-abandonar kaniya ug sa ilang mga anak. Unsay nakatabang kang Irina sa pagpadayon sa pag-alagad kang Jehova? Siya miingon: “Mapasalamaton ko sa pag-atiman ni Jehova kanako. Pinaagi sa pagpamalandong sa akong mga panalangin kada adlaw, nakita nako nga usa gayod ka pribilehiyo nga mailhan ug mahalon sa atong mapanalipdanon nga langitnong Amahan. Nahibalo ko nga dili gyod ko niya biyaan.” Bisag nakasinati si Irina ug daghang makapasubong kahimtang, ang iyang malipayong tinamdan nakatabang niya sa paglahutay ug siya nakadasig sa uban.

11. Unsay nakatabang kang Kyung-sook sa pagsagubang sa grabeng sakit?

11 Si Kyung-sook, nga nagpuyo sa Asia, nagpayunir uban sa iyang bana sulod sa kapig 20 ka tuig. Sa kalit lang, siya nadayagnos nga may grabeng kanser sa baga ug gitagalag tulo hangtod sa unom ka bulan. Bisag siya ug ang iyang bana nakasinati nag daghang pagsulay, dagko ug gagmay, wala kaayo silay problema sa panglawas. Siya miingon: “Kini nga sakit nakapaguol kaayo nako. Mibati ko nga nawala kanako ang tanan, ug nahadlok kaayo ko.” Unsay nakatabang kang Kyung-sook sa pagsagubang niana? Siya miingon: “Kada gabii sa dili pa matulog, moadto ko sa rooftop sa among balay ug mag-ampog kusog nga maghisgot ug lima ka butang nga akong gipasalamatan nianang adlawa. Dayon mapalig-on ko, ug matukmod ko sa pagpahayag sa akong gugma kang Jehova.” Sa unsang paagi nakabenepisyo si Kyung-sook sa iyang pag-ampo kada gabii? Siya miingon: “Naamgohan nako nga si Jehova magpalig-on kanato panahon sa mga pagsulay ug nga mas daghan ang mga panalangin sa atong kinabuhi kay sa mga pagsulay.”

Uban sa iyang naluwas nga igsoong si John (Tan-awa ang parapo 13)

12. Unsay nakapahupay kang Jason human mamatay ang iyang asawa?

12 Si Jason, nga Bethelite sa Africa, bug-os panahong nag-alagad sulod na sa kapig 30 ka tuig. Siya miingon: “Pito ka tuig kanhi, namatay ang akong asawa, ug sakit kaayo kadto. Makapaguol kaayo ang pagsigeg hunahuna sa iyang kahimtang samtang nakigbisog sa kanser.” Unsay nakatabang kang Jason? Siya miingon: “May higayon nga gihinumdoman nako ang usa ka malipayong panahon nga nagkauban mi sa akong asawa, ug gipasalamatan nako si Jehova niana. Nahupayan ko, busa sukad niadto kanunay na nakong pasalamatan si Jehova sa among malipayong mga kagahapon. Ang pagkamapasalamaton dakog epekto sa akong panglantaw. Mobati gihapon kog kamingaw, apan ang pagpasalamat kang Jehova tungod sa maayong kaminyoon ug sa pribilehiyo sa pag-alagad kaniya uban sa kapikas nga may halalom nga gugma kaniya nakapausab sa akong panglantaw.”

“Mapasalamaton kaayo ko nga si Jehova ang akong Diyos.”—Sheryl

13. Unsay nakatabang kang Sheryl sa pagsagubang sa kamatayon sa halos tanan sa iyang pamilya?

13 Dihang mihapak ang Super Typhoon Yolanda sa Visayas sa hinapos sa 2013, si Sheryl, nga 13 anyos lang niadto, halos nawad-an sa tanan. Siya miingon: “Naguba ang among balay, ug halos tanan sa among pamilya nangamatay.” Ang iyang ginikanan ug tulo ka igsoon namatay tungod sa kusog nga storm surge. Unsay nakatabang kang Sheryl sa pagsagubang sa maong trahedya nga dili mawad-ag paglaom? Siya nagmapasalamaton ug naghunahuna gihapon sa iyang mga panalangin. “Nakita nako ang tanan nga gihimo sa mga igsoon aron mahupay ug madasig kadtong nanginahanglag  tabang. Nahibalo ko nga ang mga igsoon sa tibuok kalibotan nag-ampo alang kanako.” Siya midugang: “Mapasalamaton kaayo ko nga si Jehova ang akong Diyos. Siya kanunayng magtagana sa atong panginahanglan.” Oo, kon mapasalamaton kita sa atong mga panalangin, dili kita malumsan sa kaguol. Ang pagkamapasalamaton makatabang kanato sa paglahutay sa bisan unsang kalisdanan nga atong maatubang.—Efe. 5:20; basaha ang Filipos 4:6, 7.

“ALANG KANAKO, AKO MAGASADYA KANG JEHOVA”

14. Unsang makapalipay nga paglaom ang atong gipaabot? (Tan-awa ang hulagway sa sinugdan sa artikulo.)

14 Latas sa kasaysayan, ang katawhan ni Jehova mapasalamaton sa ilang mga panalangin. Pananglitan, human maluwas gikan sa kamot ni Paraon ug sa iyang mga kasundalohan didto sa Pulang Dagat, ang mga Israelinhon nagpahayag sa ilang kalipay pinaagig mga awit sa pagdayeg ug pasalamat. (Ex. 15:1-21) Karon, lakip sa mga panalangin nga atong gipabilhan pag-ayo mao ang atong seguradong paglaom nga maluwas gikan sa tanang kasakit ug kagul-anan. (Sal. 37:9-11; Isa. 25:8; 33:24) Handurawa kon unsay atong bation dihang laglagon na ni Jehova ang tanan niyang kaaway ug pasudlon kita sa malinawon ug matarong nga bag-ong kalibotan. Pasalamatan gayod nato si Jehova nianang adlawa!—Pin. 20:1-3; 21:3, 4.

15. Unsay determinado nimong buhaton sa tibuok tuig?

15 Naghinamhinam kita sa daghang espirituwal nga panalangin nga ihatag ni Jehova kanato sa tuig 2015. Siyempre, makasinati usab kitag mga pagsulay. Bisan unsa man kana, kita nahibalo nga dili gayod kita biyaan ni Jehova. (Deut. 31:8; Sal. 9:9, 10) Siya padayong magtagana sa tanan natong gikinahanglan aron sa pag-alagad kaniya nga matinumanon. Hinaot nga magmadeterminado kita sa pagsundog sa tinamdan ni Habacuc, kinsa miingon: “Bisan ang kahoyng igos dili mamulak, ug walay bunga ang mga paras; ang buhat sa kahoyng olibo mapakyas, ug ang mga hinagdang uma dili mopatunghag pagkaon; ang panon sa karnero mahimulag sa toril, ug wala nay panon sa baka sa mga alad; apan, alang kanako, ako magasadya kang Jehova; magmalipayon ako sa Diyos sa akong kaluwasan.” (Hab. 3:17, 18) Busa, sa tibuok tuig, hinaot nga pamalandongon nato ang atong mga panalangin ug matukmod kita sa pagsunod sa tambag sa atong tinuig nga teksto sa 2015: “Magpasalamat kamo kang Jehova, kay siya maayo.”—Sal. 106:1.

^ par. 10 Ang ubang ngalan niining artikuloha giusab.

Pagkat-og Dugang

“Magmabinantayon Labot sa mga Pag-ampo”

Nganong ang matuod nga mga Kristohanon kinahanglang padayong mag-ampo? Kinsay makabenepisyo kon imong iampo ang uban?