Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) DISYEMBRE 2014

Siya “Nahibalo sa Dalan”

Siya “Nahibalo sa Dalan”

NATAPOS ni Guy Hollis Pierce, membro sa Nagamandong Lawas sa mga Saksi ni Jehova, ang iyang yutan-ong kinabuhi niadtong Martes, Marso 18, 2014. Sa edad nga 79, natuman ang iyang paglaom nga mabanhaw ingong usa sa mga igsoon ni Jesus.—Heb. 2:10-12; 1 Ped. 3:18.

Si Guy Pierce natawo sa Auburn, California, U.S.A., sa Nobyembre 6, 1934, ug nabawtismohan niadtong 1955. Nagminyo sila sa iyang hinigugmang asawa, si Penny, sa 1977 ug nakabaton ug mga anak. Ang iyang kasinatian sa pagdumalag pamilya nakatabang kaniya nga mahisamag amahan sa uban. Sa 1982, siya ug si Penny nagpayunir, ug sa 1986 nag-alagad siya ingong circuit overseer sa United States sulod sa 11 ka tuig.

Sa 1997, si Guy ug Penny Pierce nahimong membro sa pamilyang Bethel sa United States. Si Brader Pierce nag-alagad sa Service Department, ug pagka 1998 siya giasayn nga motabang sa Personnel Committee sa Nagamandong Lawas. Ang pagkatudlo ni Brader Pierce ingong membro sa Nagamandong Lawas gipahibalo niadtong Oktubre 2, 1999, sa tinuig nga miting sa Watch Tower Bible and Tract Society of Pennsylvania. Sa di pa dugayng katuigan, siya nag-alagad sa Personnel Committee, Writing Committee, Publishing Committee, ug Coordinators’ Committee.

Ang mga tawo nga lainlaig kagikan ug kultura ganahan niya kay siya mapahiyomon ug makamaong mopakatawa. Apan ang mga hiyas nga ilabinang giapresyar nila mao ang iyang pagkamahigugmaon, pagkamapainubsanon, pagtahod sa matarong nga mga balaod ug prinsipyo, ug ang iyang lig-ong pagtuo kang Jehova. Alang kang Guy Pierce, mas may purohan pa nga dili mosubang ang adlaw kay sa dili matuman ang mga saad ni Jehova, ug gusto niyang mahibalo niana ang tibuok kalibotan.

Si Brader Pierce kugihan kaayo sa pag-alagad kang Jehova, nga sayo magsugod ug trabaho ug sagad gabii na kaayo moundang. Nagabiyahe siya sa tibuok kalibotan aron dasigon ang mga igsoon, ug naghatag siyag panahon sa matag membro sa pamilyang Bethel nga gustong magpatambag ug magpatabang kaniya. Bisag daghang tuig na ang milabay, ang iyang mga isigkamagtutuo mahinumdom gihapon sa iyang pagkamaabiabihon, pagkamahigalaon, ug sa iyang Kasulatanhong pagdasig.

Seguradong mingawon kaniya ang iyang asawa ug unom ka anak, maingon man ang iyang mga apo ug apo sa tuhod. Ang atong igsoon ug minahal nga higala aduna usay daghang espirituwal nga anak. Si Mark Sanderson, nga membro usab sa Nagamandong Lawas, mao ang naghatag sa pakigpulong bahin sa patay alang kang Brader Pierce sa Brooklyn Bethel niadtong Sabado, Marso 22, 2014. Lakip sa iyang gihisgotan mao ang langitnong paglaom ni Brader Pierce ug gibasa niya ang mga pulong ni Jesus: “Sa balay sa akong Amahan adunay daghang puloy-anan. . . . Kon ako moadto ug mag-andam ug dapit alang kaninyo, ako moanhi pag-usab ug pagadawaton ko kamo nganhi kanako, aron nga kon asa ako kamo atua usab. Ug kon asa ako moadto kamo nahibalo sa dalan.”—Juan 14:2-4.

Tinuod, mingawon gayod kita kang Brader Pierce. Apan, nalipay kita kay siya “nahibalo sa dalan” sa iyang permanenteng “puloy-anan.”