Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre (Tun-anang Edisyon)  |  Oktubre 2014

 SUGILANON SA KINABUHI

Ang Akong Pag-alagad sa Gingharian

Ang Akong Pag-alagad sa Gingharian

Niadtong 1947, ang Katolikong mga pari sa Santa Ana, El Salvador, nagpatunghag kasamok batok sa mga Saksi. Samtang ang mga igsoon nagpahigayon sa ilang senemanang Pagtuon sa Bantayanang Torre, ang mga batang lalaki nanglabayg dagkong bato sa abli nga pultahan sa balay sa mga misyonaryo. Unya miabot ang prosesyon nga gipangunahan sa mga pari. Ang pipila nagdalag mga sulo; ang uban nagpas-an ug mga santos. Sulod sa duha ka oras, ilang gibato ang maong balay samtang sila naninggit: “Mabuhi ang Birhen!” ug, “Hinaot mamatay si Jehova!” Tuyo nila nga mahadlok ang mga misyonaryo ug mamahawa sa lungsod. Nahibalo ko, sanglit usa ako sa mga misyonaryo nga mitambong sa maong tigom 67 ka tuig kanhi. *

DUHA ka tuig una sa maong panghitabo, kami ni Evelyn Trabert, ang akong kaubang misyonarya, migraduwar sa ikaupat nga klase sa Watchtower Bible School of Gilead, nga kaniadto nahimutang duol sa Ithaca, New York. Giasayn mi sa Santa Ana. Apan sa dili pa nako ipadayon ang mubong asoy bahin sa akong duolag 29 ka tuig nga pag-alagad ingong misyonarya, ako unang isugilon kon nganong misulod ko sa maong buluhaton.

AKONG ESPIRITUWAL NGA PANULONDON

Ang akong ginikanan, si John ug Eva Olson, nagpuyo sa Spokane, Washington, U.S.A., sa 1923, ang tuig nga ako natawo. Sila mga Lutheran apan wala modawat sa pagtulon-an sa simbahan bahin sa impiyernong kalayo, sanglit sukwahi kini sa ilang pagtuo nga ang Diyos gugma. (1 Juan 4:8) Si Papa nagtrabaho sa panaderya, ug usa ka gabii niana giingnan siya sa iyang kauban sa trabaho nga ang Bibliya wala magtudlo nga ang impiyerno usa ka dapit sa pagsakit. Wala madugay ang akong ginikanan nagtuon uban sa mga Saksi ni Jehova ug ilang nakat-onan kon unsay tinuod nga gitudlo sa Bibliya bahin sa kinabuhi human sa kamatayon.

Nuybe anyos pa lang ko adto, apan nahinumdom ko nga namati ko sa akong ginikanan samtang malipayon silang nag-estorya bahin sa ilang bag-ong nakat-onan sa Bibliya. Misamot ang ilang kalipay dihang sila nakakat-on sa ngalan sa matuod nga  Diyos, si Jehova, ug nahigawas sa makapalibog nga doktrina sa Trinidad. Nakat-onan usab nako kining maanindot nga Kasulatanhong mga pagtulon-an, ang ‘kamatuoran nga magpagawas sa usa.’ (Juan 8:32) Busa, wala gyod ko sukad laayi sa pagtuon sa Bibliya, hinuon ganahan kaayo kong magsusi sa Pulong sa Diyos. Bisag maulawon ko, miuban ko sa akong ginikanan sa pagsangyaw. Nabawtismohan sila sa 1934. Sa 1939, sa edad nga 16, nahimo sab kong bawtismadong alagad ni Jehova.

Uban ni Mama ug Papa sa 1941 nga asembliya sa St. Louis, Missouri

Sa ting-init sa 1940, gibaligya sa akong ginikanan ang among balay, ug kaming tulo nagpayunir sa Coeur d’Alene, Idaho. Nag-abang mig apartment ibabaw sa talyer. Ang among balay mao usab ang tigomanan. Niadto, pipila lang ka kongregasyon ang may Kingdom Hall, busa magtigom sila sa pribadong mga balay o inabangang mga lawak.

Pagka 1941, nanambong mig asembliya sa St. Louis, Missouri. Ang Dominggo maoy “Adlaw sa mga Bata,” ug kadtong nag-edad ug 5 ngadto sa 18 gipalingkod atubangan sa plataporma. Sa hapit nang matapos ang iyang pakigpulong, si Brader Joseph F. Rutherford miingon: “Kamong tanan nga . . . mga bata . . . nga miuyon sa pagsugot sa Diyos ug sa iyang Hari, palihog manindog!” Nanindog ming tanan. Dayon siya miingon: “Tan-awa, kapin sa 15,000 ka bag-ong mga saksi sa Gingharian!” Tungod niana milig-on ang akong desisyon nga magpayunir.

MGA ASAYNMENT SA AMONG PAMILYA

Pipila ka bulan human sa asembliya sa St. Louis, ang among pamilya mibalhin sa habagatang California. Didto, sa siyudad sa Oxnard, ang among asaynment mao ang pagtukod ug kongregasyon. Nagpuyo mi sa gamayng treyler nga may usa lang ka katre. Ang akong “katre” mao ang among lamesa—lahi kaayo niadtong duna pa koy kaugalingong kuwarto!

Sa hapit na mi moabot sa California, giatake sa Japan ang Pearl Harbor sa Hawaii, sa Disyembre 7, 1941. Pagkaugma, ang United States miapil sa Gubat sa Kalibotan II. Sanglit may mga submarino sa mga Hapon nga nagpatrolya sa baybayon sa California, ang mga awtoridad nagpatuman ug blackout. Busa kinahanglan namong pagngon ang mga suga inigkagabii. Makatabang kini aron walay makitang target ang mga Hapon.

Pipila ka bulan sa ulahi, sa Septiyembre 1942, mitambong mi sa Bag-ong Kalibotan nga Teokratikanhong Asembliya sa Cleveland, Ohio. Naminaw mi samtang si Brader Nathan H. Knorr naghatag sa pakigpulong nga “Kalinaw—Molungtad Kaha Kini?” Iyang gisaysay ang Pinadayag kapitulo 17, nga naghubit sa usa ka “mapintas nga mananap” nga “mao kaniadto, apan dili mao karon, hinunoa hapit nang mogula gikan sa kahiladman.” (Pin. 17:8, 11) Gipatin-aw ni Brader Knorr nga ang “mapintas nga mananap” mao ang Liga sa Kanasoran nga nahanaw niadtong 1939. Gitagna sa Bibliya nga ang Liga pagapulihan, ug sundan sa usa ka yugto sa kalinaw. Ug tuod man niadtong 1945, natapos ang Gubat sa Kalibotan II. Human niana, ang “mananap” mitungha pag-usab ingong United Nations. Dayon ang mga Saksi ni Jehova nagpasangkad sa ilang buluhatong pagsangyaw, ug pagkadako sa pag-uswag sukad niadto!

Akong diploma sa Gilead

Ang maong tagna nakatabang nako nga masabtan kon unsay mahitabo sa umaabot. Dihang gipahibalo nga ang Gilead School magsugod pagkasunod tuig, napukaw ang akong tinguha nga mahimong misyonarya. Sa 1943, giasayn ko nga magpayunir sa Portland, Oregon. Niadtong panahona, mogamit mi ug ponograpo sa pagpatokar sa mga sermon diha sa  pultahan sa mga tagbalay, ug dayon motanyag mig mga literatura sa Bibliya bahin sa Gingharian sa Diyos. Nianang tibuok tuig, nagsige kog hunahuna bahin sa misyonaryong pag-alagad.

Sa 1944, nalipay ko sa pagkadawat ug imbitasyon sa Gilead uban sa akong amiga nga si Evelyn Trabert. Sulod sa lima ka bulan, gisaysay sa among mga instruktor kon sa unsang paagi mi magmalipayon sa among pagtuon sa Bibliya. Nakadayeg mi sa ilang pagkamapainubsanon. Usahay, dihang mangaon mi, ang maong mga brader mao ang mag-waiter. Migraduwar mi niadtong Enero 22, 1945.

AKONG ASAYNMENT INGONG MISYONARYA

Kami ni Evelyn, uban ni Leo ug Esther Mahan, miabot sa among asaynment sa El Salvador sa Hunyo 1946. Nakita namo nga ang uma “puti na aron anihon.” (Juan 4:35) Ang panghitabo nga gihisgotan sa sinugdan nagpakita nga suko kaayo ang mga pari. Usa lang ka semana una niana, gihimo namo ang among unang sirkitong asembliya sa Santa Ana. Among gianunsiyo ang pakigpulong publiko ug dako ang among kalipay kay duolag 500 ang mitambong. Imbes mahadlok ug mamahawa sa lungsod, mas determinado na hinuon ming magpabilin ug motabang sa matinud-anog kasingkasing nga mga tawo. Bisag gidid-an sa mga pari ang mga tawo sa pagbasa sa Bibliya ug pipila lang ang makapalit niana, daghan ang gustong mahibalo sa kamatuoran. Gipabilhan nila ang among pagtuon ug Spanish aron matudloan sila bahin sa matuod nga Diyos, si Jehova, ug bahin sa iyang maanindot nga saad sa pagpasig-uli sa Paraiso sa yuta.

Lima kami sa among klase sa Gilead ang gipadala sa El Salvador. Wala ngadto sa tuo: Si Evelyn Trabert, Millie Brashier, Esther Mahan, ako, ug si Leo Mahan

Si Rosa Ascencio maoy usa sa akong unang mga gitun-an sa Bibliya. Dihang nagsugod siya pagtuon, iyang gibulagan ang lalaki nga iyang kapuyo. Dayon ang maong lalaki misugod pagtuon sa Bibliya. Sila nagminyo, dayon nagpabawtismo, ug nahimong masibotong mga Saksi ni Jehova. Si Rosa mao ang unang payunir nga taga Santa Ana. *

Si Rosa may gamayng tindahan. Kon mosangyaw siya, isira niya kini ug mosalig nga itagana ni Jehova ang iyang panginahanglan. Inig-abli niya sa tindahan human sa pipila ka oras, magpanon ang mga kustomer. Siya nakasinati mismo sa kamatuoran sa Mateo 6:33 ug nagpabiling matinumanon hangtod sa kamatayon.

Usa ka higayon niana, giadto sa pari ang tag-iya sa balay nga giabangan namong unom ka misyonaryo ug gibaharan kini nga kon dili mi niya papahawaon, siya ug ang iyang asawa ipalagpot sa simbahan. Ang tag-iya sa balay, nga usa ka iladong negosyante, daan nang wala ganahi sa panggawi sa mga pari ug wala magpadala sa bahad. Giingnan pa gani niya ang pari nga wala siya mahadlok nga ipalagpot sa simbahan. Gipasaligan mi niya nga puwede ming mopuyo sa iyang balay bisag unsa ka dugay nga gusto namo.

NA-SAKSI ANG USA KA TINAMOD NGA TAWO

Ang branch office gitukod sa 1955

Sa kaulohang siyudad, sa San Salvador, giestadihan sa laing misyonarya ang asawa sa usa ka inhenyero  nga si Baltasar Perla. Ang maong maayog-kasingkasing nga tawo nawad-ag pagtuo sa Diyos kay iyang nakita ang pagkasalingkapaw sa mga lider sa relihiyon. Dihang kinahanglan nang magtukod ug branch office, si Baltasar, bisag wala pa sa kamatuoran, mitanyag nga siya ang magdisenyo ug magtukod sa pasilidad, ug dili siya magpabayad.

Human makauban ang mga Saksi sa maong proyekto, si Baltasar nakombinsir nga nakaplagan niya ang matuod nga relihiyon. Siya nabawtismohan sa Hulyo 22, 1955, ug ang iyang asawa, si Paulina, misunod wala madugay. Ang ilang duha ka anak matinumanong nag-alagad usab kang Jehova. Ang iyang anak, si Baltasar, Jr., nag-alagad sa Brooklyn Bethel sulod na sa 49 ka tuig, diin siya nagsuportar sa nagauswag nga tibuok kalibotang pagsangyaw ug karon nag-alagad ingong membro sa United States Branch Committee. *

Dihang gisugdan namo pagpahigayon ang mga kombensiyon sa San Salvador, si Brader Perla mitabang kanamo aron magamit ang usa ka dakong gymnasium. Sa sinugdan, gamay lang ang naokupar nga mga lingkoranan; apan sa tabang ni Jehova, nag-anam mi ka daghan matag tuig hangtod napuno namo ang gymnasium, ug sa ulahi dili na mi paigo! Sa maong malipayong mga kombensiyon, makita nako ang kanhi nakong mga Bible study. Handurawa ang akong gibati dihang ipailaila nila nako ang akong “mga apo”—bag-ong mga nabawtismohan nga ilang giestadihan!

Si Brader F. W. Franz nakig-estorya sa mga misyonaryo panahon sa usa ka kombensiyon

Sa usa ka asembliya, usa ka brader ang miduol ug miingon nga may itug-an siya nako. Wala ko makaila niya, ug naghunahuna ko kon kinsa siya. Siya miingon, “usa ako sa mga batang lalaki nga nanglabay kaninyog mga bato sa Santa Ana.” Karon nag-alagad na usab siya kang Jehova. Hilabihan gayod ang akong kalipay! Tungod niana, kombinsido ako nga ang bug-os panahong ministeryo mao ang labing magantihong karera nga mahimong pilion sa usa.

Ang unang sirkitong asembliya nga among gitambongan sa El Salvador

MAKAPALIPAY NGA MGA DESISYON

Sulod sa duolag 29 ka tuig, padayon kong nag-alagad ingong misyonarya sa El Salvador, una sa siyudad sa Santa Ana, dayon sa Sonsonate, sunod sa Santa Tecla, ug sa kataposan sa San Salvador. Sa  1975, human sa makadaghang pagpamalandong ug pag-ampo, nakadesisyon ko nga moundang sa pagkamisyonarya ug mouli sa Spokane. Ang akong matinumanon, tigulang nang mga ginikanan nagkinahanglan sa akong tabang.

Human mamatay si Papa sa 1979, giatiman nako si Mama, nga nagkaluya usab. Paglabay sa walo ka tuig, siya namatay sa edad nga 94. Sulod nianang malisod nga panahon, mibati gayod ako ug kakapoy ug kaluya sa emosyon. Tungod sa stress, gitugkan kog sakit kaayo nga likoslikos. Apan pinaagi sa pag-ampo ug sa mahigugmaong pagsapnay ni Jehova kanako, ako nakalahutay sa maong pagsulay. Samag si Jehova miingon, ‘hangtod sa imong pagkaubanon, ako magdala, magpas-an, ug maghatag kanimog kaikyasan.’—Isa. 46:4.

Sa 1990, mibalhin ko sa Omak, Washington. Didto, mibati na sab ko nga mapuslanon ko sa teritoryo nga nagsultig Spanish, ug ubay-ubay sa akong Bible study ang nabawtismohan. Ug kay dili na man nako maatiman ang akong balay sa Omak, pagka-Nobyembre 2007, mibalhin ko sa usa ka apartment sa kasikbit nga lungsod, sa Chelan, Washington. Mapasalamaton kaayo ko kay giatiman ko pag-ayo sa mga igsoon sa Spanish nga kongregasyon dinhi. Kay ako lang ang tigulang nga Saksi dinhi, “gisagop” ko nila ingong ilang “apohan.”

Bisag gipili nako nga dili magminyo ug magbaton ug pamilya aron bug-os kong makaalagad nga walay kabaldahan, daghan kog espirituwal nga anak. (1 Cor. 7:34, 35) Nasayod ko nga sa pagkakaron, dili gyod nako mabatonan ang tanan. Busa giuna nako ang mas hinungdanon—ang akong dedikasyon sa pag-alagad kang Jehova sa bug-os kasingkasing. Sa bag-ong kalibotan, daghan na unyag panahon sa paghimo sa tanang makapalipayng kalihokan. Ang akong paboritong teksto mao ang Salmo 145:16, nga nagpasalig kanato nga si Jehova ‘magtagbaw sa tinguha sa tanang buhing butang.’

Daw wala ko matigulang tungod sa pagpayunir

Sa edad nga 91, medyo maayo pa ang akong panglawas, busa padayon kong nagpayunir. Tungod niini mibati ko nga daw wala ko matigulang ug nga may katuyoan gayod ang akong kinabuhi. Dihang miabot ko sa El Salvador, mao pa lay pagsugod sa buluhatong pagsangyaw. Bisan pa sa way hunong nga pagsupak ni Satanas, karon kapig 39,000 na ang magmamantala sa maong nasod. Kini nakapalig-on gayod sa akong pagtuo. Dayag nga ang balaang espiritu ni Jehova nagpaluyo sa mga paningkamot sa Iyang katawhan!

^ par. 4 Tan-awa ang 1981 Yearbook of Jehovah’s Witnesses, panid 45-46.

^ par. 19 1981 Yearbook, panid 41-42.

^ par. 24 1981 Yearbook, panid 66-67, 74-75.