Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) AGOSTO 2014

 GIKAN SA AMONG ARCHIVES

Ang “Eureka Drama” Nakatabang sa Daghan nga Makakaplag sa Kamatuoran sa Bibliya

Ang “Eureka Drama” Nakatabang sa Daghan nga Makakaplag sa Kamatuoran sa Bibliya

“EUREKA!” Kana nga pulong nagkahulogag “Nakaplagan na nako!” Sa ika-19ng siglo, sa California, U.S.A., mao kini ang isinggit sa usa ka minero dihang makakita siyag bulawan. Apan si Charles Taze Russell ug ang iyang kaubang mga Estudyante sa Bibliya, nakakaplag ug usa ka butang nga mas bililhon—ang kamatuoran sa Bibliya. Ug gusto gayod nila kanang ipaambit sa uban.

Sa ting-init sa 1914, minilyon diha sa dagkong siyudad ang midugok sa pagtan-aw sa “Photo-Drama of Creation,” usa ka otso oras nga pelikula nga gihimo sa International Bible Students Association (I.B.S.A.). Kining binase sa Bibliya nga presentasyon may maanindot nga pelikula, daghag kolor nga mga slide, makaiikag nga pag-asoy (narration), ug maayong klasikal nga musika. Gipakita niini ang kahimtang sa tawo sugod sa paglalang hangtod sa kataposan sa Usa ka Libo ka Tuig nga Pagmando ni Jesu-Kristo.—Pin. 20:4. *

Apan komosta kadtong nagpuyo sa gagmayng lungsod ug baryo? Aron ang tanang tawo nga gutom sa kamatuoran makakita niana, sa Agosto 1914 giluwatan sa I.B.S.A. ang “Eureka Drama”—usa ka madaladalang bersiyon sa “Photo-Drama” nga walay salida. Adunay tulo ka matang nga kapilian, ang matag usa mabatonan sa daghang pinulongan: Ang set nga “Eureka X” may kompletong rekording sa narration ug musika. Ang set nga “Eureka Y” naundan sa tanang rekording ug mga slide nga nindot ug kolor. Ug ang “Eureka Family Drama,” nga gidisenyo alang sa pamilya, naundan sa piniling narration ug mga awit. Mapalit usab ang dili mahalon nga mga ponograpo ug projector.

Usa ka projector ang gigamit sa pagpasalida sa daghag kolor nga mga slide

Bisag walay projector o dakong telon, mapasalida gihapon kini sa mga Estudyante sa Bibliya diha sa kabaryohan, busa ang mensahe sa Gingharian nakaabot sa bag-ong mga teritoryo. Ang set nga “Eureka X,” nga audio lang, mahimong patokaron sa adlaw o sa gabii. Ang slide projector sa “Eureka Y” mapaandar bisag walay koryente, gamit ang carbide lamp. “Mapasalida namo ang pelikula sa halos tanang dapit,” matod sa report diha sa Finnish nga Watch Tower. Tinuod gayod kadto!

Imbes mag-abang ug dagkong teatro, ang mapaagihong mga Estudyante sa Bibliya sagad makakitag libreng mga pasilidad, sama sa mga lawak sa eskuylahan, korte, estasyon sa tren, ug bisan gani sa mga sala sa dagkong balay. Daghan sa mga pagpasalida gihimo  diha sa gawas sa balay, gamit ang usa ka puting habol nga gibitay diha sa bungbong sa kamalig. Si Anthony Hambuch misulat: “Ang mga mag-uuma naghimog usa ka gamayng estadyum diha sa ilang prutasan, gamit ang daghang troso diin ang mga tawo makalingkod ug makapahimulos sa programa.” Ang grupo ni Anthony Hambuch nga nagpasalida sa “Eureka” migamit ug karwahe alang sa ilang mga galamiton sa pagpasalida, bagahe, ug kasangkapan sa pagkamping ug pagluto.

Usahay, gamay ra ang manan-aw sa “Eureka,” apan usahay gatosan. Sa United States, 400 ang nanan-aw sa salida diha sa eskuylahan sa usa ka lungsod nga 150 ang molupyo. Sa ubang dapit, ang pipila mobaktas ug walo ka kilometros aron motan-aw sa “Eureka Drama.” Sa Sweden, ang mga silingan ni Charlotte Ahlberg nga nagtigom diha sa iyang gamayng balay “natandog pag-ayo” sa pagkadungog nila sa mga rekording. Mga 1,500 ang nanan-aw sa salida diha sa usa ka hilit nga minahan sa Australia. Ang Watch Tower nagreport nga diha sa mga eskuylahan sa hayskul ug kolehiyo, “ang mga propesor ug mga estudyante nakadayeg sa mga letrato ug sa atong nindot kaayong mga rekording.” Ang “Eureka Drama” popular kaayo bisan sa mga dapit nga may mga sinehan.

PAG-UGMAD SA INTERES

Ang “Eureka Drama” nahimong usa ka mapuslanong galamiton sa “Class Extension Work,” diin ang mga klase sa Estudyante sa Bibliya nagpadalag mga mamumulong aron magsugod ug bag-ong mga klase. Dili matino ang gidaghanon sa nakakita sa “Eureka Drama.” Daghang set sa “Drama” ang kanunayng gigamit. Apan, 14 lang sa 86 ka grupo nga nagpasalida sa “Drama” ang regular nga nagreport niadtong 1915. Bisan pa niana, gipakita sa report sa hinapos sa tuig nga kapig usa ka milyon ang nakatan-aw sa “Drama.” Mga 30,000 ang mihangyo ug literatura sa Bibliya.

Ang “Eureka Drama” dili tingali kaayo halandomon nga bahin sa kasaysayan, apan gikan sa Australia ngadto sa Argentina, gikan sa South Africa ngadto sa British Isles, India, ug sa Caribbean, minilyon ang lagmit nakatan-aw niining talagsaong pelikula. Daghan kanila ang nakakaplag sa kamatuoran sa Bibliya—nga bililhon pa kay sa bulawan—ug sa diwa nakasinggit ug “Eureka!”

^ par. 4 Tan-awa ang “Gikan sa Among Archives—Ang 100 ka Tuig nga Pelikula nga Nagpalig-on sa Pagtuo” sa Ang Bantayanang Torre, Pebrero 15, 2014, panid 30-32.