Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) MAYO 2014

Sunda ang Bulawanong Lagda Diha sa Imong Ministeryo

Sunda ang Bulawanong Lagda Diha sa Imong Ministeryo

“Ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.”—MAT. 7:12.

1. Hinungdanon ba ang atong pagtratar sa mga tawo diha sa ministeryo? Paghatag ug pananglitan. (Tan-awa ang hulagway.)

PIPILA ka tuig ang milabay, usa ka Kristohanong magtiayon sa Fiji nangimbitar sa mga tawo sa pagtambong sa Memoryal sa kamatayon ni Jesus. Samtang nakig-estorya sa usa ka babaye sa gawas sa iyang balay, kalit lang miulan. Gipahulam sa brader ug payong ang babaye samtang siya ug ang iyang asawa nagsalo sa usa ka payong. Nalipay kaayo ang magtiayon kay ang babaye mitambong sa Memoryal. Miingon ang babaye nga wala kaayo siyay mahinumdoman sa gisulti sa maong magtiayon, apan nakadayeg siya sa ilang pagtratar kaniya maong mitambong siya. Nganong maayo ang impresyon sa maong babaye? Tungod kay gisunod sa magtiayon ang sagad gitawag ug Bulawanong Lagda.

2. Unsa ang Bulawanong Lagda, ug unsaon nato kini pagpadapat?

2 Unsa ang Bulawanong Lagda? Kana mao ang tambag nga gihatag ni Jesus dihang siya miingon: “Ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” (Mat. 7:12) Unsaon nato pagpadapat ang maong lagda?  Una, pangutan-on nato ang atong kaugalingon, ‘Kon ako ang gisangyawan, unsang pagtratar ang gusto nako?’ Ikaduha, paningkamoti nga trataron siya sa maong paagi.—1 Cor. 10:24.

3, 4. (a) Ipatin-aw kon nganong ang Bulawanong Lagda dili lang mapadapat sa atong pagpakiglabot sa mga isigkamagtutuo. (b) Unsay atong hisgotan niini nga artikulo?

3 Sagad ipadapat nato ang Bulawanong Lagda diha sa atong pagpakiglabot sa mga isigkamagtutuo. Apan wala moingon si Jesus nga ipadapat lang kini ngadto sa atong mga igsoon. Hinunoa dihang gisulti niya ang Bulawanong Lagda, siya naghisgot kon unsaon nato pagtratar ang tanang tawo, lakip na ang atong mga kaaway. (Basaha ang Lucas 6:27, 28, 31, 35.) Busa kon angay natong ipadapat ang Bulawanong Lagda ngadto sa atong mga kaaway, labi na gyod nato kining ipadapat kon mosangyaw ta sa mga tawo—diin daghan tingali kanila ang “hustong nakiling alang sa kinabuhing walay kataposan”!—Buh. 13:48.

4 Hisgotan nato karon ang upat ka pangutana nga angay natong hinumdoman dihang makigbahin sa ministeryo: Kinsa ang akong kaestorya? Asa ko nakig-estorya nila? Kanus-a ang labing maayong panahon nga makig-estorya sa mga tawo? Unsaon nako sila pag-estorya? Ato unyang makita nga ang maong mga pangutana makatabang kanato nga masabtan ang pagbati sa atong gisangyawan ug kon unsaon nato sila pagpakig-estorya.—1 Cor. 9:19-23.

KINSA ANG AKONG KAESTORYA?

5. Unsay mahimo natong ipangutana sa kaugalingon?

5 Sa atong ministeryo, lainlaing indibiduwal ang atong maestorya, ug sila managlahig kagikan ug mga problema. (2 Cron. 6:29) Dihang makig-estorya, pangutan-a ang imong kaugalingon: ‘Kon ako ang maong tawo, unsang pagtratar ang gusto nako? Ganahan kaha ko kon iya dayon kong hukman? O mas gusto nakong ilhon una ko niya?’ Kining mga pangutanaha makatabang nato sa pagtratar sa atong kaestorya ingong indibiduwal.

6, 7. Unsay angay natong buhaton kon may masangyawan ta nga nasuko o morag way batasan?

6 Pananglitan, ang mga Kristohanon naningkamot sa pagpadapat sa tambag sa Bibliya nga ‘himoon ang atong sinultihan nga kanunayng madanihon.’ (Col. 4:6) Apan kay dili man kita hingpit, usahay may masulti ta sa uban nga atong basolan sa ulahi. (Sant. 3:2) Kon mahitabo na—tingali kay gisapot ta nianang adlawa—dili nato gustong tawgon tang “way batasan.” Manghinaot ta nga makasabot ra sila nato. Dili ba ingon usab niana ang angay natong pagtratar sa uban?

7 Kon may masangyawan ta nga nasuko o morag way batasan, dili ba mas maayong sabton nato siya? May problema kaha siya sa trabahoan o sa eskuylahan? Duna kaha siyay grabeng sakit? Daghang tagbalay nga nasuko sa unang pagduaw sa mga Saksi ang nakig-estorya ra sa ulahi kay gipakitaag kalumo ug pagtahod.—Prov. 15:1; 1 Ped. 3:15.

8. Nganong angay natong isangyaw ang mensahe sa Gingharian sa “tanang matang sa katawhan”?

8 Sangyawan nato ang tanang matang sa tawo. Pananglitan, sa miaging pipila ka tuig, kapig 60 ka eksperyensiya ang napatik sa serye sa Bantayanang Torre nga “Ang Bibliya Makabag-o sa Kinabuhi.” Gihisgotan niining mga artikuloha ang mga tawo nga kanhi kawatan, palahubog, membro sa gang, o adik. Ang uban maoy mga politiko, lider sa relihiyon, o mga tawong interesado lang sa ilang karera. Ang pipila imoral ug kinabuhi. Apan silang tanan nakadungog sa maayong balita, nagpa-Bible study,  nagbag-o, ug nakadangat sa kamatuoran. Busa, dili kita angayng maghunahuna nga ang pipila ka tawo dili na gyod modawat sa mensahe sa Gingharian. (Basaha ang 1 Corinto 6:9-11.) Ang “tanang matang sa katawhan” mahimong mosanong sa maayong balita.—1 Cor. 9:22.

ASA KO NAKIG-ESTORYA SA MGA TAWO?

9. Nganong angay natong tahoron ang panimalay sa uban?

9 Kasagaran sangyawan nato ang mga tawo diha sa ilang balay. (Mat. 10:11-13) Hinungdanon kanato ang atong balay, busa malipay kita kon tahoron sa uban ang atong panimalay ug propidad. Gusto nato nga luwas ug may pribasiya kita niining dapita. Busa dihang mosangyaw sa mga tawo, angay natong ipakita ang samang pagtahod sa ilang panimalay.—Buh. 5:42.

10. Sa unsang paagi nato malikayan nga matahap ang uban dihang kita magsangyaw?

10 Sanglit kaylap kaayo ang krimen sa kalibotan karon, daghang tagbalay ang matahapon sa mga estranyo. (2 Tim. 3:1-5) Angay kitang mag-amping aron dili sila matahap nato. Pananglitan, nanuktok ta sa pultahan. Kon walay motubag, basig matental ta nga molili sa bentana o molibot sa tugkaran. Sa inyong teritoryo, matahap kaha ang tagbalay kon imo nang buhaton? Unsa kahay hunahunaon sa mga silingan? Tinuod, kinahanglan tang maningkamot nga masangyawan ang tanan. (Buh. 10:42) Gusto gayod natong ipakaylap ang usa ka positibong mensahe, ug maayo ang atong motibo. (Roma 1:14, 15) Bisan pa niana, maalamong likayan ang bisan unsa nga makapatahap sa mga tawo sa atong teritoryo. Si apostol Pablo misulat: “Wala gayod kami maghatag ug bisan unsa nga hinungdan sa pagkapandol, aron nga ang among ministeryo dili kakitaan ug sayop.” (2 Cor. 6:3) Ang mga tawo sa atong teritoryo mahimong madani sa kamatuoran kon tahoron nato ang ilang panimalay ug propidad.—Basaha ang 1 Pedro 2:12.

Hinaot nga kanunay natong tahoron ang propidad ug pribasiya sa tagbalay (Tan-awa ang parapo 10)

KANUS-A ANG LABING MAAYONG PANAHON NGA MAKIG-ESTORYA SA MGA TAWO?

11. Nganong maapresyar nato kon tahoron sa uban ang atong panahon?

11 Ingong mga Kristohanon, kadaghanan kanato puliki kaayo. Aron mahimo ang atong mga obligasyon, kinahanglan natong magtakdag mga prayoridad ug planohon pag-ayo ang atong eskedyul. (Efe. 5:16; Filip. 1:10) Kon may makabalda sa atong eskedyul, tingali mahigawad ta. Busa maapresyar nato kon tahoron sa uban ang atong panahon, nga mosabot nga limitado lang ang panahon nga atong mahatag nila. Sa unsang paagi ang Bulawanong Lagda motabang nato sa pagtahod sa panahon sa mga tawo nga atong gisangyawan?

12. Unsaon nato pagtino kon kanus-a ang labing maayong panahon sa pagpakig-estorya sa mga tawo sa atong teritoryo?

12 Angay natong tinoon kon kanus-a ang labing maayong panahon sa pagpakig-estorya sa tagbalay. Kanus-a sila sagad anaa sa balay? Kanus-a sila lagmit madinawaton? Maayo kon atong ipasibo ang atong eskedyul aron maestorya sila sa maong mga panahon. Sa pipila ka dapit, mas mabungahon ang pagpamalaybalay sa hapon o gabii. Kon tinuod kana sa inyong teritoryo, makaeskedyul ka ba usahay sa pagsangyaw nianang mga orasa? (Basaha ang 1 Corinto 10:24.) Makaseguro kita nga panalanginan ni Jehova ang atong mga sakripisyo aron makasangyaw sa labing maayong panahon diha sa atong teritoryo.

13. Unsaon nato pagpakitag pagtahod sa tagbalay?

13 Unsaon pa nato pagpakitag pagtahod sa tagbalay? Kon interesado ang tagbalay, angay nato siyang sangyawan apan  dili kaayo kita magdugay. Basig naa siyay giplanong himoon anang orasa nga importante para niya. Kon moingon siya nga puliki siya, mahimo tang moingon nga dili ra ta magdugay—ug angay nato kanang tumanon. (Mat. 5:37) Sa dili pa molakaw, maayong pangutan-on ang tagbalay kon kanus-a siya puwedeng duawon pag-usab. Nakita sa ubang magmamantala nga epektibo ang pag-ingon: “Malipay kong moduaw nimo pag-usab. Okey lang ba kon motawag o mo-text ko daan una moanhi?” Dihang ipasibo nato ang atong eskedyul sa panahon nga kombenyente sa mga tawo sa teritoryo, gisundog nato ang panig-ingnan ni Pablo, kinsa ‘wala mangita sa iyang kaugalingong kaayohan kondili nianang sa daghan, aron nga sila mangaluwas.’—1 Cor. 10:33.

UNSAON NAKO PAGPAKIG-ESTORYA SA MGA TAWO?

14-16. (a) Nganong angay natong isulti sa tagbalay ang tuyo sa atong pagduaw? Iilustrar. (b) Unsa nga paagi ang nakitang epektibo sa usa ka nagapanawng magtatan-aw?

14 Handurawa nga may nanawag nimo sa telepono apan dili ka pamilyar sa iyang tingog. Wala ka kaila niya, apan nangutana siya kon unsay imong gustong pagkaon. Nahibulong ka kon kinsa siya ug kon unsa gyoy iyang tuyo. Aron dili siya maulawan, tingali ato siyang estoryahon kadiyot, dayon taposon nato ang estorya. Sa laing bahin, handurawa nga ang nanawag nagpaila sa iyang kaugalingon, nagsulti nga ang iyang trabaho nalangkit sa nutrisyon, ug matinahorong miingon nga duna siyay impormasyon nga makatabang nimo. Lagmit  mas mainteres ka. Sa pagkatinuod, ganahan ta kon isulti dayon sa mga tawo ang ilang tuyo sa mataktikanhong paagi. Sa unsang paagi nato mapakita ang samang pagtahod diha sa atong ministeryo?

15 Sa daghang teritoryo, kinahanglan natong isulti sa tagbalay kon nganong miduaw ta. Tinuod, bililhon ang gidala natong impormasyon. Apan ibutang ta nga wala ta magpaila ug basta na lang natong sugdan ang presentasyon sa pangutanang sama niini: “Kon makasulbad kag usa ka problema sa kalibotan, unsay imong sulbaron?” Ang tumong sa pangutana maoy aron mahibaloan ang gihunahuna sa atong kaestorya ug dayon gamiton ang Bibliya sa panaghisgot. Apan basin matingala ang tagbalay: ‘Kinsa man ning tawhana, ug nganong nangutana man siya ini?’ Busa paningkamotan nato nga mahimong komportable ang tagbalay sa pagpakig-estorya nato. (Filip. 2:3, 4) Unsaon nato kana paghimo?

16 Nakita sa usa ka nagapanawng magtatan-aw nga epektibo ang mosunod nga paagi: Human matimbaya ang tagbalay, iya kining tunolan ug tract nga Gusto Ka Bang Mahibalo sa Kamatuoran? ug moingon: “Gihatagan namo niini ang mga tawo sa inyong lugar. Gihisgotan niini ang unom ka pangutana nga gisukna sa daghang tawo. Imo ning kopya.” Ang brader miingon nga ang kadaghanan komportableng makig-estorya dihang mahibalo sila sa atong tuyo. Tungod niana, mas sayon ang pagpadayon sa panaghisgot. Dayon pangutan-on sa nagapanawng magtatan-aw ang tagbalay: “Hain niini nga mga pangutana ang imo nang nasukna?” Kon ang tagbalay mopili ug usa, buksan sa brader ang tract ug hisgotan kon unsay giingon sa Bibliya bahin niana. Kon dili mopili ang tagbalay, ang brader ang mopilig pangutana ug ipadayon ang panaghisgot sa paagi nga dili maulawan ang tagbalay. Siyempre, daghag paagi sa pagsugod ug panaghisgot. Sa ubang dapit, kinahanglan natong sundon ang pipila ka kostumbre sa pagtimbaya una nato isulti ang atong tuyo. Hinungdanon nga magmapailin-ilinon kita sa atong presentasyon aron ganahang maminaw ang mga tawo sa atong teritoryo.

PADAYONG SUNDA ANG BULAWANONG LAGDA DIHA SA IMONG MINISTERYO

17. Unsa ang pipila ka paagi nga atong masunod ang Bulawanong Lagda diha sa ministeryo?

17 Nan, unsa ang pipila ka paagi nga atong masunod ang Bulawanong Lagda diha sa atong ministeryo? Atong isipon nga lainlain ang kahimtang sa matag tagbalay. Atong tahoron ang iyang panimalay ug propidad. Maningkamot kitang mosangyaw sa panahon nga ang mga tawo sagad anaa sa ilang balay ug mas andam maminaw. Ug atong ipaambit ang mensahe sa paaging magustohan sa mga tawo diha sa atong teritoryo.

18. Unsa ang mga kaayohan kon atong trataron ang mga tawo sa atong teritoryo sa paaging gusto natong trataron kita?

18 Daghag kaayohan kon atong trataron ang mga tawo sa teritoryo sa paaging gusto natong trataron kita. Kon kita magmatinahoron ug magmasinabtanon, atong mapalamdag ang atong kahayag, mapakita nga hinungdanon ang mga prinsipyo sa Bibliya, ug mahimaya ang atong langitnong Amahan. (Mat. 5:16) Mas daghang tawo ang lagmit madani sa kamatuoran kon tahoron nato sila. (1 Tim. 4:16) Modawat man o dili ang mga tawo sa mensahe sa Gingharian, malipayon kita kay nahibalo nga gibuhat nato ang atong maarangan sa pagpalampos sa atong ministeryo. (2 Tim. 4:5) Atong sundogon si apostol Pablo, kinsa misulat: “Gihimo ko ang tanang butang tungod sa maayong balita, aron ako mahimong mag-aambit niini sa uban.” (1 Cor. 9:23) Hinaot kanunay natong sundon ang Bulawanong Lagda diha sa atong ministeryo.