Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre—Tun-anang Edisyon  |  Marso 2014

Pasidunggi ang mga Tigulang

Pasidunggi ang mga Tigulang

“Magpakita ka ug pagtamod sa tawong tigulang.”LEV. 19:32.

1. Unsa ang makapasubong kahimtang sa katawhan karon?

DILI gusto ni Jehova nga ang mga tawo mag-antos sa epekto sa pagkatigulang. Sa kasukwahi, katuyoan niya nga ang mga lalaki ug babaye magtagamtam ug hingpit nga panglawas sa Paraiso. Apan karon “ang tibuok kalalangan duyog nga nagpadayon sa pag-agulo ug anaa sa kasakitan.” (Roma 8:22) Unsa kahay bation sa Diyos dihang iyang makita nga nag-antos ang mga tawo sa epekto sa sala? Dugang pa, daghang tigulang ang napasagdan sa panahong gikinahanglan nila ang dugang pag-atiman.Sal. 39:5; 2 Tim. 3:3.

2. Nganong mapasalamaton ang mga Kristohanon nga may mga tigulang sa ilang kongregasyon?

2 Ang katawhan ni Jehova mapasalamaton nga may mga tigulang sa ilang kongregasyon. Kita nakabenepisyo sa ilang kaalam ug nadasig sa ilang panig-ingnan sa pagtuo. Daghan kanato ang kabanay sa maong minahal nga mga tigulang. Apan, kabanay man nato sila o dili, interesado kita sa ilang kaayohan. (Gal. 6:10; 1 Ped. 1:22) Kitang tanan makabenepisyo sa pagsusi sa panglantaw sa Diyos sa mga tigulang. Hisgotan usab nato ang mga responsabilidad sa mga membro sa pamilya ug sa kongregasyon maylabot sa atong minahal nga mga tigulang.

“AYAW AKO ISALIKWAY”

3, 4. (a) Unsa ang gihangyo sa magsusulat sa Salmo 71 ngadto kang Jehova? (b) Unsay mahimong ihangyo sa mga tigulang sa kongregasyon ngadto sa Diyos?

3 Ang magsusulat sa Salmo 71:9 nangamuyo sa Diyos: “Ayaw ako isalikway sa panahon sa akong pagkatigulang; sa diha nga ang  akong kusog maluya na, ayaw ako pagbiyai.” Mopatim-aw nga kini nga salmo maoy sumpay sa Salmo 70, nga may superskripsiyon nga “Iya ni David.” Busa lagmit si David ang mihangyo diha sa Salmo 71:9. Siya nag-alagad sa Diyos sukad sa iyang pagkabatan-on hangtod sa pagkatigulang, ug gigamit siya ni Jehova sa paghimog dagkong butang. (1 Sam. 17:33-37, 50; 1 Hari 2:1-3, 10) Bisan pa niana, si David mibati nga kinahanglan niyang hangyoon si Jehova nga padayon siyang pakitaag pabor.Basaha ang Salmo 71:17, 18.

4 Daghan karon ang sama kang David. Bisan pa sa pagkatigulang ug sa “malisod nga mga adlaw,” sila padayong nagdayeg sa Diyos sa labing maayo nga ilang maarangan. (Eccl. 12:1-7) Daghan kanila ang dili na makahimo sa tanan nilang mahimo kaniadto, lakip na diha sa ministeryo. Apan sila usab makapangamuyo kang Jehova nga sila padayong panalanginan ug atimanon. Ang maong matinumanong mga tigulang makaseguro nga tubagon sa Diyos ang ilang mga pag-ampo. Nahibalo kita niana kay si Jehova nag-inspirar kang David sa pag-ampo bahin sa samang mga butang.

5. Unsay panglantaw ni Jehova sa matinumanong mga tigulang?

5 Ang Kasulatan tin-awng nag-ingon nga gipabilhan gayod ni Jehova ang matinumanong mga tigulang ug iyang gidahom nga sila pasidunggan sa iyang mga alagad. (Sal. 22:24-26; Prov. 16:31; 20:29) “Atubangan sa buhok nga ubanon motindog ka, ug magpakita ka ug pagtamod sa tawong tigulang, ug kahadlokan mo ang imong Diyos. Ako mao si Jehova,” matod sa Levitico 19:32. Oo, ang pagpasidungog sa mga tigulang sa kongregasyon maoy seryosong responsabilidad dihang gisulat ang maong mga pulong, ug hangtod karon. Apan komosta ang pag-atiman kanila? Kang kinsa kanang responsabilidad?

RESPONSABILIDAD SA PAMILYA

6. Unsang ehemplo ang gipakita ni Jesus kon bahin sa pag-atiman sa ginikanan?

6 Ang Pulong sa Diyos nag-ingon: “Pasidunggi ang imong amahan ug ang imong inahan.” (Ex. 20:12; Efe. 6:2) Gipakita ni Jesus nga importante kaayo kini nga sugo dihang iyang gisaway ang mga Pariseo ug eskriba nga wala mag-atiman sa ilang mga ginikanan. (Mar. 7:5, 10-13) Si Jesus mismo nagpakitag maayong ehemplo. Pananglitan, dihang hapit na siyang mamatay sa estaka, gipiyal ni Jesus ang pag-atiman sa iyang inahan, nga lagmit balo na niadtong panahona, ngadto sa iyang minahal nga tinun-ang si Juan.Juan 19:26, 27.

7. (a) Unsang prinsipyo ang gihatag ni apostol Pablo bahin sa pagtagana sa panginahanglan sa mga ginikanan? (b) Unsay konteksto sa mga pulong ni Pablo?

7 Si Pablo giinspirar sa pagsulat nga ang mga magtutuo angayng magtagana sa ilang kaugalingong panimalay. (Basaha ang 1 Timoteo 5:4, 8, 16.) Tagda ang konteksto sa gisulat ni Pablo kang Timoteo. Gihisgotan ni Pablo kon kinsa ang angay ug dili angayng hatagag pinansiyal nga tabang sa kongregasyon. Tin-aw niyang giingon nga ang magtutuong mga anak, apo, ug ubang paryente sa tigulang nga mga babayeng balo mao ang may pangunang responsabilidad sa pag-atiman kanila. Sa ingon, dili mabug-atan sa pinansiyal ang kongregasyon. Sa susama, ang usa sa mga paagi nga ang mga Kristohanon karon nagpakitag “diyosnong pagkamahinalaron” mao ang pagtagana sa materyal nga panginahanglan sa ilang paryente.

8. Nganong ang Bibliya wala maghatag ug espesipikong mga instruksiyon maylabot sa pag-atiman sa tigulang nga mga ginikanan?

8 Sa simpleng pagkasulti, obligasyon sa hingkod nang mga anak ang pagseguro nga matagan-an ang materyal nga panginahanglan sa ilang mga ginikanan. Bisag ang gihisgotan ni Pablo mao ang magtutuong mga paryente, ang mga ginikanan nga dili Saksi dili usab angayng pasagdan. Dili managsama ang paagi sa mga anak sa pag-atiman tungod sa managlahi nga kahimtang. Managlahi ang mga panginahanglan, kinaiya, ug kahimtang  sa panglawas sa mga tigulang. Ang pipila ka tigulang daghag anak; ang uban usa ray anak. Ang pipila dunay madawat gikan sa gobyerno, ang uban wala. Lainlain usab ang gusto sa matag usa nga atimanonon. Busa dili maalamon o mahigugmaon nga sawayon ang paagi nga gihimo sa usa sa pag-atiman sa tigulang nga mga paryente. Total, si Jehova magpanalangin ug magpalampos sa bisan unsang Kasulatanhong desisyon, sama sa iyang gihimo sukad sa panahon ni Moises.Num. 11:23.

9-11. (a) Unsang lisod nga mga kahimtang ang giatubang sa pipila? (Tan-awa ang hulagway sa panid 20.) (b) Nganong ang hingkod nang mga anak dili angayng magdali-dali sa pagbiya sa bug-os panahong pag-alagad? Iilustrar.

9 Kon ang mga ginikanan ug anak layo sa usag usa, mahimong hagit ang pagtaganag gikinahanglang tabang ngadto sa tigulang nga mga ginikanan. Ang mga anak tingali kinahanglang moduaw dayon sa ilang ginikanan kay kini natumba, napiang, o may seryosong problema. Human niana, lagmit nagkinahanglan silag tabang—temporaryo o kaha sulod sa taas nga panahon. *

10 Ang bug-os panahong mga alagad kinsa layo sa ilang ginikanan tungod sa ilang teokratikanhong mga asaynment lagmit mas malisdan sa paghimog desisyon. Ang mga Bethelite, misyonaryo, ug nagapanawng magtatan-aw nag-isip gayod sa ilang asaynment ingong bililhon, usa ka panalangin gikan kang Jehova. Apan kon masakit ang ilang mga ginikanan, lagmit ang ilang unang reaksiyon mao, ‘Kinahanglan ming mobiya sa among asaynment ug mouli aron atimanon ang among ginikanan.’ Bisan pa niana, maalamon nga mag-ampo ug mamalandong kon mao ba gyod kanay gikinahanglan o gusto sa mga ginikanan. Dili angayng magdali-dali sa pagbiya sa mga pribilehiyo sa pag-alagad kay basig wala kana kinahanglana. Ang problema ba sa panglawas temporaryo lang? May pipila ba sa kongregasyon sa ilang ginikanan nga malipayng motabang?Prov. 21:5.

11 Pananglitan, tagda ang kahimtang sa duha ka managsoon nga nag-alagad layo sa ilang lugar. Ang usa maoy misyonaryo sa South America, ug ang lain nagtrabaho sa hedkuwarter, sa Brooklyn, New York. Ang ilang tigulang nga mga ginikanan nagkinahanglag tabang. Sila ug ang ilang mga asawa miduaw sa ilang mga ginikanan sa Japan aron masusi kon unsang tabang ang ilang mahatag ug kon sa unsang paagi kana himoon. Ang magtiayon sa South America naghunahuna nga mobiya sa ilang asaynment aron mouli. Dayon gitawgan sila sa koordinetor sa lawas sa mga ansiyano sa kongregasyon sa ilang ginikanan. Gihisgotan sa maong mga ansiyano ang kahimtang ug gusto nilang magpadayon ang mga misyonaryo sa ilang asaynment kutob sa mahimo. Gipabilhan sa mga ansiyano ang pag-alagad sa maong magtiayon ug determinado silang buhaton ang tanan sa pagtabang kanila sa pag-atiman sa ilang ginikanan. Mapasalamaton ang tibuok pamilya sa maong mahigugmaong tabang.

12. Unsay angayng tinoon sa Kristohanong pamilya maylabot sa ilang pagpilig paagi sa pag-atiman?

12 Bisan unsa mang paagi ang himoon sa usa ka Kristohanong pamilya sa pag-atiman sa panginahanglan sa tigulang nga mga ginikanan, angayng tinoon sa tanan nga ang ilang mga desisyon magpasidungog sa ngalan sa Diyos. Dili gayod nato gustong mahisama sa mga lider sa relihiyon sa adlaw ni Jesus. (Mat. 15:3-6) Buot nato nga ang atong mga desisyon magpasidungog sa Diyos ug sa kongregasyon.2 Cor. 6:3.

RESPONSABILIDAD SA KONGREGASYON

13, 14. Nganong makahinapos kita gikan sa Kasulatan nga ang mga kongregasyon andam moatiman sa mga tigulang?

13 Dili tanan ang makatabang sa bug-os panahong mga ministro sa paaging gihisgotan  sa ibabaw. Apan tin-aw sa kahimtang nga mitungha sa unang siglo nga ang mga kongregasyon andam moatiman sa mga panginahanglan sa sulondan nga tigulang nga mga igsoon. Ang Bibliya naghisgot bahin sa kongregasyon sa Jerusalem nga “walay usa taliwala kanila ang nanginahanglan.” Wala kana magpasabot nga ang tanan kanila adunahan. Dayag nga ang pipila kanila kabos, apan ‘gihimo ang pagpang-apod-apod ngadto sa matag usa, sumala sa iyang kinahanglanon.’ (Buh. 4:34, 35) Sa ulahi, dihay mitunghang problema. Gikataho nga ang pipila ka ‘babayeng balo nataligam-an sa adlaw-adlaw nga pagpang-apod-apod’ sa pagkaon. Busa ang mga apostoles nagtudlo ug kuwalipikadong mga lalaki nga maoy magtino nga matagan-an ang mga balo sa ilang panginahanglan. (Buh. 6:1-5) Tinuod nga ang adlaw-adlaw nga pagpang-apod-apod maoy temporaryong kahikayan aron matagan-an ang panginahanglan niadtong nahimong mga Kristohanon sa Pentekostes 33 C.E., kinsa nagpabilin una sa Jerusalem aron mapalig-on sa espirituwal. Bisan pa niana, ang sanong sa mga apostoles nagpakita nga ang kongregasyon makatabang sa pag-atiman sa kabos nga mga igsoon.

14 Sumala sa nahisgotan na, si Pablo naghatag kang Timoteo ug mga instruksiyon nga naghisgot sa mga sirkumstansiya diin ang Kristohanong mga balo mahimong kuwalipikado nga hatagag materyal nga tabang gikan sa kongregasyon. (1 Tim. 5:3-16) Ang inspiradong magsusulat sa Bibliya nga si Santiago miila usab sa Kristohanong obligasyon nga atimanon ang mga ilo, balo, ug ang uban nga anaa sa kasakitan o nanginahanglan. (Sant. 1:27; 2:15-17) Si apostol Juan miingon usab: “Si bisan kinsa nga adunay mga kahinguhaan sa kinabuhi niining kalibotana ug makita ang iyang igsoon nga nanginahanglan ug bisan pa niana magsira sa pultahan sa iyang malumong pagkamabination nganha kaniya, unsaon man sa gugma sa Diyos sa pagpabilin diha kaniya?” (1 Juan 3:17) Kon ang indibiduwal nga mga Kristohanon may obligasyon ngadto sa mga kabos, dili ba ingon usab niana ang kongregasyon?

Kon may mahitabong aksidente, sa unsang paagi makatabang ang kongregasyon? (Tan-awa ang parapo 15 ug 16)

15. Unsang mga butanga ang mahimong malangkit sa pag-atiman sa mga tigulang?

15 Sa pipila ka dapit, ang gobyerno nagtaganag pensiyon, materyal nga hinabang, ug kaabag sa pag-atiman sa mga tigulang. (Roma 13:6) Sa ubang dapit, walay ingon niana nga serbisyo. Busa, ang gidak-on sa tabang nga kinahanglang ihatag sa mga paryente ug kongregasyon ngadto sa mga tigulang nagdepende sa kahimtang. Kon ang magtutuong mga anak layo sa ilang ginikanan, mahimong makaapektar kana sa gidak-on sa tabang nga mahatag sa mga  anak. Ang mga anak maayong makigkomunikar sa mga ansiyano sa kongregasyon sa ilang mga ginikanan aron matino nga ang tanan nakasabot sa kahimtang sa pamilya. Pananglitan, ang mga ansiyano makatabang sa mga ginikanan nga mahibalo ug makabenepisyo sa mga programa sa gobyerno sa ilang lugar. Tingali may mamatikdan usab silang mga situwasyon—sama sa mga bayranan nga wala pa maatiman o tambal nga wala mainom—nga ilang masulti sa hingkod nang mga anak. Ang bukas ug klarong komunikasyon tali sa mga anak ug mga ansiyano makapugong nga dili mograbe ang situwasyon ug makatabang sa pagkaplag ug praktikal nga mga solusyon. Kon dunay naa sa duol nga makatabang o makatambag sa mga anak nga layo sa ilang ginikanan, mamenosan ang kabalaka sa pamilya.

16. Sa unsang paagi gitabangan sa pipila ka Kristohanon ang mga tigulang sa kongregasyon?

16 Tungod sa ilang gugma sa tigulang nga mga igsoon, ang pipila ka Kristohanon mihatag sa ilang panahon ug kusog aron maatiman ang mga panginahanglan niini kutob sa maarangan. Ilang gipaneguro nga mapakitaag dugang interes ang mga tigulang sa kongregasyon. Ang ubang igsoon magbahin sa mga buluhaton ug magpuli-pulig atiman sa mga tigulang. Kay dili itugot sa ilang kahimtang nga mosulod sa bug-os panahong pag-alagad, sila malipayng motabang sa mga anak nga makapabilin sa ilang asaynment. Pagkamaayong tinamdan ang gipakita sa maong mga igsoon! Siyempre, ang pagkamatinabangon sa mga igsoon wala magpahigawas sa mga anak sa ilang responsabilidad sa paghimo sa ilang maarangan para sa ilang mga ginikanan.

PASIDUNGGI ANG MGA TIGULANG PINAAGIG MAKAPALIG-ONG MGA PULONG

17, 18. Sa unsang paagi makaapektar ang tinamdan dihang mag-atiman ug mga tigulang?

17 Mas daling atubangon ang lisod nga kahimtang kon huptan sa mga tigulang ug sa nag-atiman kanila ang positibong tinamdan. Sa pipila ka kahimtang, ang pagkatigulang makapahigawad o makapaguol pa gani. Busa angay kang maningkamot pag-ayo nga pasidunggan ug dasigon ang tigulang nga mga igsoon pinaagi sa paghisgot kanunay sa makapalig-ong mga butang. Angayng komendahan kadtong nagmatinumanon kang Jehova. Si Jehova dili malimot sa ilang nahimo sa pag-alagad kaniya, ug mao man usab ang mga isigka-Kristohanon.Basaha ang Malaquias 3:16; Hebreohanon 6:10.

18 Dugang pa, ang adlaw-adlawng mga buluhaton mahimong mas dali kon ang mga tigulang ug ang nag-atiman kanila makamaong mopakatawa. (Eccl. 3:1, 4) Kadaghanang tigulang naningkamot nga dili sila mahimong sobra ka pugoso. Sila nahibalo nga mas daghan ang motagad ug moduaw nila kon maayo sila. Ang mga moduaw sagad moingon, “Miduaw ko aron dasigon ang tigulang nga higala, pero ako hinuon ang nadasig.”Prov. 15:13; 17:22.

19. Unsay makatabang sa mga bata ug tigulang sa pagpabiling lig-on bisan sa lisod nga mga panahon?

19 Gipangandoy nato ang panahon dihang mawala na ang pag-antos ug ang mga epekto sa pagkadili-hingpit. Samtang wala pa kana, angayng ipunting sa mga alagad sa Diyos ang ilang paglaom sa usa ka dumalayong kaugmaon. Kita nahibalo nga ang pagtuo sa mga saad sa Diyos maoy angkla sa mga panahon sa kalisdanan o kasakitan. Tungod sa maong pagtuo, ‘kita dili moangka, apan bisan pa kon ang atong pagkatawo sa gawas nagakahugo, tino nga ang atong pagkatawo sa sulod ginabag-o sa adlaw-adlaw.’ (2 Cor. 4:16-18; Heb. 6:18, 19) Apan gawas sa paghupot ug lig-ong pagtuo sa mga saad sa Diyos, unsay makatabang nimo sa paghimo sa mga responsabilidad sa pag-atiman sa mga tigulang? Hisgotan sa sunod nga artikulo ang pipila ka praktikal nga mga sugyot.

^ par. 9 Ang sunod nga artikulo maghisgot sa pipila ka paagi sa pag-atiman nga mahimong pilion sa mga tigulang ug sa ilang mga anak.