Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) ENERO 2014

100 ka Tuig nga Pagmando sa Gingharian—Unsay Epekto Niini Kanimo?

100 ka Tuig nga Pagmando sa Gingharian—Unsay Epekto Niini Kanimo?

“Dako ug katingalahan ang imong mga buhat, Jehova nga Diyos, . . . Hari nga walay kataposan.”PIN. 15:3.

1, 2. Unsay himoon sa Gingharian sa Diyos, ug nganong makasalig kita nga moabot ang Gingharian?

SA BUKID duol sa Capernaum sa tingpamulak sa 31 C.E., gitudloan ni Jesus ang iyang mga sumusunod sa pag-ampo: “Paanhia ang imong gingharian.” (Mat. 6:10) Karon, daghan ang nagduhaduha kon moabot ba gyod ang Gingharian. Apan makasalig kita nga tubagon sa Diyos ang atong sinserong mga pag-ampo nga moabot ang iyang Gingharian.

2 Gamiton ni Jehova ang Gingharian sa paghiusa sa iyang pamilya sa langit ug sa yuta. Kana nga katuyoan matuman gayod. (Isa. 55:10, 11) Gani, si Jehova nahimo nang Hari sa atong adlaw! Ang makaiikag nga mga hitabo sa milabayng 100 ka tuig nagpamatuod niini. Ang Diyos naghimog dagko ug kahibulongang mga buhat alang sa iyang minilyong maunongong mga alagad. (Zac. 14:9; Pin. 15:3) Apan ang pagkahimong Hari ni Jehova lahi sa pag-abot sa Gingharian sa Diyos nga gitudlo ni Jesus nga atong iampo. Sa unsang paagi kini magkalahi, ug unsay epekto niini kanato?

MILIHOK ANG HARI NGA GIENTRONO NI JEHOVA

3. (a) Kanus-a ug asa naentrono si Jesus ingong Hari? (b) Unsaon nimo pagpamatuod nga ang Gingharian natukod sa 1914? (Tan-awa ang footnote.)

3 Sa hinapos sa ika-19ng siglo, nasabtan sa mga alagad sa Diyos ang tagna nga gisulat ni Daniel mga 2,500 ka tuig kanhi: “Sa mga adlaw nianang mga haria ang Diyos sa langit magatukod ug usa ka gingharian nga dili gayod malumpag.” (Dan. 2:44) Dugay nang giingon  sa mga Estudyante sa Bibliya nga hinungdanong tuig ang 1914. Niadtong panahona, daghan ang positibog panglantaw sa umaabot. Matod sa usa ka magsusulat: “Ang kalibotan sa 1914 punog paglaom ug mga saad.” Apan sa hinapos nianang tuiga, mibuto ang Gubat sa Kalibotan I, ug natuman ang tagna sa Bibliya. Ang misunod nga mga kagutom, linog, kamatay, ug ang pagkatuman sa ubang tagna sa Bibliya nagpamatuod gayod nga si Jesu-Kristo nagmando na sa langit niadtong 1914 ingong Hari sa Gingharian sa Diyos. * Pinaagi sa pag-entrono niya sa iyang Anak ingong Mesiyanikong Hari, si Jehova nahimong Hari sa bag-ong diwa!

4. Unsay gihimo dayon sa bag-ong naentronong Hari, ug kinsay sunod niyang gihatagag pagtagad?

4 Ang unang gihimo sa bag-ong naentronong Hari mao ang pagpakiggubat kang Satanas, ang pangunang Kaaway sa iyang Amahan. Gitambog ni Jesus ug sa iyang mga manulonda ang Yawa ug ang mga demonyo dinhi sa yuta. Kini miresultag dakong pagmaya sa langit apan grabeng pag-antos sa yuta. (Basaha ang Pinadayag 12:7-9, 12.) Dayon, gihatagag pagtagad sa Hari ang iyang mga sakop sa yuta aron sa pagdalisay, pag-edukar, ug pag-organisar kanila sa pagbuhat sa kabubut-on sa Diyos. Atong hisgotan kon sa unsang paagi ang ilang positibong sanong niining tulo ka buluhaton sa Gingharian maoy maayong panig-ingnan kanato karon.

GIDALISAY SA MESIYANIKONG HARI ANG IYANG MAUNONGONG MGA SAKOP

5. Unsang paghinlo ang nahitabo tali sa 1914 ug sa sayong bahin sa 1919?

5 Human hinloi sa naentronong Hari ang langit sa daotang impluwensiya ni Satanas ug sa iyang mga demonyo, gisugo ni Jehova si Jesus sa pagsusi ug pagdalisay sa espirituwal nga kahimtang sa iyang mga sumusunod sa yuta. Gihubit kini ni propetang Malaquias ingong espirituwal nga paghinlo. (Mal. 3:1-3) Gipakita sa kasaysayan nga nahitabo kini tali sa 1914 ug sa sayong bahin sa 1919. * Aron mahimong bahin sa pamilya ni Jehova, kita angayng hinlo, o balaan. (1 Ped. 1:15, 16) Kinahanglang dili kita mahugawan sa bakak nga relihiyon o sa politika.

6. Sa unsang paagi gitagana ang espirituwal nga pagkaon, ug nganong gikinahanglan nato kini?

6 Dayon gigamit ni Jesus ang iyang awtoridad ingong Hari sa pagtudlog “matinumanon ug maalamong ulipon.” Kini nga ulipon regular nga magtaganag makapahimsog nga espirituwal nga pagkaon sa tanang sakop sa “usa ka panon” nga giatiman ni Jesus. (Mat. 24:45-47; Juan 10:16) Sukad sa 1919, ang gamayng grupo sa dinihogang mga brader maunongong nagtuman sa bug-at nga responsabilidad sa pagpakaon sa “mga sulugoon sa panimalay.” Sila nagtaganag dagayang espirituwal nga pagkaon aron molig-on ang atong pagtuo. Kini motabang kanato nga mas determinadong magpabiling hinlo sa espirituwal, moral, mental, ug pisikal. Kini usab nag-edukar ug nagtabang kanato nga bug-os makigbahin sa labing importanteng buluhaton sa tibuok kalibotan karon. Gipahimuslan mo ba kini nga mga tagana?

GIEDUKAR SA HARI ANG IYANG MGA SAKOP SA PAGSANGYAW SA TIBUOK KALIBOTAN

7. Unsang importanteng buluhaton ang gisugdan ni Jesus sa yuta, ug hangtod kanus-a kini magpadayon?

7 Dihang gisugdan ni Jesus ang iyang ministeryo, siya miingon: “Kinahanglan nga sa ubang siyudad usab ipahayag ko ang maayong balita sa gingharian sa Diyos, tungod kay alang niini gipadala ako.” (Luc. 4:43) Sulod sa tulo ug tunga ka tuig, kini ang prayoridad ni Jesus. Gitudloan niya ang iyang mga tinun-an: “Sa inyong pagpanglakaw,  pagwali, nga magaingon, ‘Ang gingharian sa mga langit haduol na.’” (Mat. 10:7) Human sa iyang pagkabanhaw, gitagna ni Jesus nga ipakaylap sa iyang mga sumusunod kini nga mensahe “hangtod sa kinalay-ang dapit sa yuta.” (Buh. 1:8) Siya misaad kanila nga iyang paluyohan kining importanteng buluhaton hangtod sa atong adlaw.Mat. 28:19, 20.

8. Sa unsang paagi gidasig sa Hari ang iyang mga sakop sa yuta sa pagsangyaw?

8 Pagka-1919, ang “maayong balita sa gingharian” mas lapad nag kahulogan. (Mat. 24:14) Ang Hari nagmando na sa langit, ug iyang gitigom ang gamayng grupo sa nahinloang mga sakop sa yuta. Sila misanong dayon sa tin-awng instruksiyon ni Jesus: Isangyaw sa tibuok yuta ang maayong balita sa Gingharian nga gitukod sa Diyos! (Buh. 10:42) Pananglitan, halos 20,000 ka tigpaluyo sa Gingharian ang mitambong sa internasyonal nga kombensiyon sa Cedar Point, Ohio, U.S.A., sa Septiyembre 1922. Handurawa lang ang ilang kahinam dihang si Brader Rutherford mipakigpulong sa temang “Ang Gingharian,” ug miingon: “Tan-awa, ang Hari nagmando! Kamo ang iyang mga magwawali. Busa imantala, imantala, imantala, ang Hari ug ang iyang gingharian.” Agig sanong, 2,000 ka delegado ang nakigbahin sa espesyal nga “Adlaw sa Pag-alagad,” diin ang pipila mibiyahe pa ganig mga 72 kilometros gikan sa lugar sa kombensiyon alang sa pagsangyaw. Kay nadasig, usa ka delegado miingon: “Dili gyod nako malimtan ang awhag nga imantala ang Gingharian ug ang kasibot sa mga nanambong!” Kini usab ang gibati sa daghan.

9, 10. (a) Unsang mga tunghaan ang giorganisar aron bansayon ang mga magmamantala sa Gingharian? (b) Sa unsang paagi ka nakabenepisyo niini nga pagbansay?

9 Pagka-1922, kapin sa 17,000 ka magmamantala sa Gingharian ang nagsangyaw diha sa 58 ka kayutaan sa tibuok kalibotan. Apan nagkinahanglan silag pagbansay. Sa unang siglo, ang Tinudlong Hari naghatag sa iyang mga tinun-an ug tin-awng mga instruksiyon kon unsay isangyaw, kon asa, ug kon unsaon kini paghimo. (Mat. 10:5-7; Luc. 9:1-6; 10:1-11) Sa susama, gipaneguro ni Jesus nga ang tanang nakigbahin karon sa pagsangyaw sa Gingharian makadawat ug mga instruksiyon ug mga galamiton aron epektibong makasangyaw. (2 Tim. 3:17) Pinaagi sa Kristohanong kongregasyon, gibansay ni Jesus ang iyang mga sakop sa pagministeryo. Ang usa ka paagi mao ang Teokratikanhong Tunghaan sa Ministeryo, nga gihimo sa kapig 111,000 ka kongregasyon sa tibuok kalibotan. Kay nabansay niini, kapin sa pito ka milyong magwawali karon ang makasangyaw ug makatudlo sa paaging makapainteres “sa tanang matang sa katawhan.”Basaha ang 1 Corinto 9:20-23.

10 Giorganisar usab ang ubang tunghaan sa Bibliya aron bansayon ang mga ansiyano, payunir, dili minyong brader, magtiayon, membro sa Branch Committee ug ilang asawa,  nagapanawng magtatan-aw ug ilang asawa, ug mga misyonaryo. * Agig apresasyon, ang mga estudyante sa usa ka klase sa Bible School for Christian Couples miingon: “Tungod sa espesyal nga pagbansay nga among nadawat, mas milalom ang among gugma kang Jehova ug mas kuwalipikado ming motabang sa uban.”

11. Sa unsang paagi nakalahutay ang mga magmamantala sa Gingharian bisan sa mga pagsupak?

11 Kining kaylap nga pagsangyaw sa Gingharian ug pagpanudlo nakita ni Satanas. Sa direkta ug malinglahong paagi, iyang giatake ang mensahe sa Gingharian ug ang mga mensahero niini aron mahunong ang buluhaton. Apan dili molampos ang iyang mga paningkamot. Gihimo ni Jehova ang iyang Anak nga “labaw kaayo sa tanang kagamhanan ug awtoridad ug gahom ug pagkaginoo.” (Efe. 1:20-22) Ingong Hari, gigamit ni Jesus ang iyang awtoridad sa pagpanalipod ug paggiya sa iyang mga tinun-an aron maseguro nga matuman ang kabubut-on sa iyang Amahan. * Ang maayong balita padayong gisangyaw, ug minilyong matinud-anog kasingkasing nga mga tawo ang natudloan sa mga paagi ni Jehova. Pagkadakong pribilehiyo nga makigbahin niining dakong buluhaton!

GIORGANISAR SA HARI ANG IYANG MGA SAKOP ALANG SA MAS DAKONG BULUHATON

12. Hisgoti ang pipila ka pagdalisay nga gihimo sa organisasyon sukad nga natukod ang Gingharian.

12 Sukad natukod ang Gingharian sa 1914, gipauswag sa Hari ang paagi sa pag-organisar sa katawhan sa Diyos sa pagbuhat sa kabubut-on sa iyang Amahan. (Basaha ang Isaias 60:17.) Niadtong 1919, dunay gitudlong direktor sa pag-alagad diha sa matag kongregasyon aron manguna sa pagsangyaw. Pagka-1927, giorganisar ang pagpamalaybalay kada Dominggo. Sa 1931, gisagop sa mga tigpaluyo sa Gingharian ang Kasulatanhong ngalang mga Saksi ni Jehova, nga nakadasig kanila alang sa mas dakong buluhaton. (Isa. 43:10-12) Sa 1938, ang mga brader nga nanguna sa kongregasyon wala na gipili pinaagig pagbotar apan gitudlo na sa teokratikanhong paagi. Sa 1972, ang pagdumala sa kongregasyon giasayn na ngadto sa lawas sa mga ansiyano imbes sa usa lang ka magtatan-aw sa kongregasyon. Ang tanang kuwalipikadong brader gidasig nga kab-oton ang pribilehiyo sa pagkahimong ‘magbalantay sa panon sa Diyos nga ubos sa ilang pag-atiman.’ (1 Ped. 5:2) Sa 1976, ang Nagamandong Lawas giorganisar ngadto sa unom ka komite aron sa pagdumala sa buluhaton sa Gingharian sa tibuok kalibotan. Sukad niadto, ang tinudlong Hari ni Jehova padayong nag-organisar sa mga sakop sa Gingharian sa teokratikanhong paagi.

13. Sa unsang paagi nakaapektar sa imong kinabuhi ang nahimo sa 100 ka tuig nga pagmando sa Gingharian?

 13 Tagda ang nalampos sa Mesiyanikong Hari sa iyang unang 100 ka tuig nga pagmando. Iyang gihinloan ang usa ka katawhan alang sa ngalan ni Jehova. Iyang gigiyahan ang pagsangyaw sa maayong balita sa Gingharian diha sa 239 ka kayutaan ug giedukar ang minilyong tawo bahin sa mga paagi ni Jehova. Iyang gihiusa ang kapin sa pito ka milyong maunongong sakop, nga andam mobuhat sa kabubut-on sa iyang Amahan. (Sal. 110:3) Oo, dako ug kahibulongan ang nahimo ni Jehova pinaagi sa Mesiyanikong Gingharian. Gani, duna pay mas makaiikag nga mga hitabo sa umaabot!

ANG UMAABOT NGA MGA PANALANGIN SA MESIYANIKONG GINGHARIAN

14. (a) Unsay atong gihangyo sa Diyos dihang kita mag-ampo: “Paanhia ang imong gingharian”? (b) Unsa ang atong tinuig nga teksto sa 2014, ug nganong haom kini?

14 Bisag gientrono ni Jehova ang iyang Anak nga si Jesu-Kristo ingong Mesiyanikong Hari niadtong 1914, dili pa kadto ang bug-os nga tubag sa atong giampo nga “paanhia ang imong gingharian.” (Mat. 6:10) Gitagna sa Bibliya nga si Jesus “magapangdaog taliwala sa [iyang] mga kaaway.” (Sal. 110:2) Ang gobyerno sa tawo nga kontrolado ni Satanas nagasupak gihapon sa Gingharian. Dihang mag-ampo kita nga moabot ang Gingharian, atong gihangyo sa Diyos nga wagtangon sa Mesiyanikong Hari ug sa iyang kaubang mga hari ang pagmando sa tawo ug ang mga supak sa Gingharian. Kini magtuman sa tagna sa Daniel 2:44 nga ang Gingharian sa Diyos “magadugmok ug magatapos niining tanang gingharian.” Laglagon niini ang politikal nga mga kaaway sa Gingharian. (Pin. 6:1, 2; 13:1-18; 19:11-21) Duol na kaayo kining mahitabo. Busa haom gayod ang tinuig nga teksto sa 2014 nga mabasa sa Mateo 6:10: “Paanhia ang imong gingharian.” Karong tuiga ang ika-100 nga anibersaryo sa pagkatukod sa Gingharian sa Diyos sa langit!

Ang tinuig nga teksto sa 2014: “Paanhia ang imong gingharian.”Mateo 6:10

15, 16. (a) Unsang makaiikag nga mga hitabo ang matuman sulod sa 1,000 ka tuig nga pagmando ni Kristo? (b) Unsa ang kataposang himoon ni Jesus ingong Mesiyanikong Hari, ug unsay kahulogan niana bahin sa katuyoan ni Jehova alang sa tanan niyang linalang?

15 Human laglagon sa Mesiyanikong Hari ang mga kaaway sa Diyos, iyang itambog si Satanas ug ang mga demonyo ngadto sa kahiladman sulod sa 1,000 ka tuig. (Pin. 20:1-3) Kay wala nay daotang impluwensiya, tabangan dayon sa Gingharian ang katawhan aron makabenepisyo sa halad lukat ni Jesus ug wagtangon ang mga epekto sa sala ni Adan. Banhawon sa Hari ang minilyong natulog sa kamatayon, ug mag-organisar siyag tibuok kalibotang programa sa pagtudlo kanila bahin kang Jehova. (Pin. 20:12, 13) Ang tibuok yuta mahimong paraiso sama sa tanaman sa Eden. Ang tanang matinumanong tawo mahingpit na.

16 Human sa Usa ka Libo ka Tuig nga Pagmando ni Kristo, matuman na ang katuyoan sa Mesiyanikong Gingharian. Dayon itugyan ni Jesus ang Gingharian ngadto sa iyang Amahan. (Basaha ang 1 Corinto 15:24-28.) Dili na kinahanglang may magpataliwala kang Jehova ug sa iyang mga anak sa yuta. Ang tanang anak sa Diyos sa langit ug sa yuta mahiusa na sa ilang langitnong Amahan ingong bahin sa iyang unibersohanong pamilya.

17. Unsay determinado nimong buhaton alang sa Gingharian?

17 Ang makaiikag nga mga hitabo sa 100 ka tuig nga pagmando sa Gingharian nagpasalig kanato nga kontrolado ni Jehova ang mga butang ug matuman ang iyang katuyoan sa yuta. Hinaot padayon kitang magmaunongon kaniya, ug imantala ang Hari ug ang iyang Gingharian. Makasalig kita nga hapit nang tubagon ni Jehova ang atong kinasingkasing nga pag-ampo: “Paanhia ang imong gingharian”!

^ par. 10 Tan-awa ang Septiyembre 15, 2012, gula sa Ang Bantayanang Torre, panid 13-17, “Teokratikanhong mga Tunghaan—Pamatuod sa Gugma ni Jehova.”

^ par. 11 Bahin sa legal nga mga kadaogan diha sa lainlaing nasod, tan-awa ang Bantayanang Torre sa Disyembre 1, 1998, panid 19-22.