Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) NOBYEMBRE 2013

Ang Pag-alagad sa Diyos Maoy Iyang Tambal!

Ang Pag-alagad sa Diyos Maoy Iyang Tambal!

Dihang ang duha ka payunir gipasulod sa usa ka balay sa Kenya, nakurat sila pagkakita sa gamayng tawo nga naghigda sa katre. Gamay kaayo ang iyang lawas ug mga bukton. Samtang ilang gisulti kaniya ang saad sa Diyos nga “ang bakol mosaka ingon sa laking osa,” ang lalaki mingisi.Isa. 35:6.

Nahibaloan sa mga payunir nga si Onesmus natawo nga may osteogenesis imperfecta, o brittle bone disease. Ang iyang kabukogan gabok, nga daling mabali bisag maduot lag gamay. Kay wala pay tambal o epektibong terapiya niini, nahibalo si Onesmus nga tibuok kinabuhi siyang mag-wheelchair ug mag-antos sa kasakit.

Si Onesmus midawat ug pagtuon sa Bibliya. Pero dili mosugot ang iyang inahan nga motambong siyag tigom kay basin mabalian siya ug mag-antos ug samot. Busa girekord sa mga brader ang mga tigom, ug paminawon kini ni Onesmus sa balay. Human sa lima ka bulan nga pagtuon, midesisyon si Onesmus nga motambong sa mga tigom bisag delikado sa iyang panglawas.

Misamot ba ang pag-antos ni Onesmus tungod sa iyang pagtambong sa mga tigom? Wala, maayo hinuon ang epekto. “Panahon sa mga tigom, morag namenosan pa gani ang sakit nga akong gibati,” nahinumdom si Onesmus. Para niya, ang iyang bag-ong nakaplagang paglaom maoy rason nga miarang-arang ang iyang pamati. Ang inahan ni Onesmus nakamatikod sa kausaban sa tinamdan sa iyang anak ug nalipay pag-ayo. Mao nga midawat kinig pagtuon sa Bibliya ug miingon, “Ang pag-alagad sa Diyos maoy tambal sa akong anak.”

Wala madugay, si Onesmus nahimong di-bawtismadong magmamantala. Sa ulahi, siya nabawtismohan ug karon nag-alagad ingong ministeryal. Bisag dili makalakaw ug dili niya magamit ang iyang usa ka bukton, gusto ni Onesmus nga mag-alagad kang Jehova kutob sa iyang maarangan. Gusto niyang mag-oksilyare payunir pero nagduhaduha siyang moaplay. Ngano? Kay nahibalo siya nga mag-agad siya sa laing tawo nga motulod sa iyang wheelchair. Gisulti niya kini sa mga igsoon ug misaad sila nga tabangan siya. Tungod niana, naka-oksilyare payunir si Onesmus.

Gusto na sab ni Onesmus nga mag-regular payunir pero nagduhaduha na pod siya. Pero dihay inadlawng teksto nga nakadasig niya. Gikan kini sa Salmo 34:8: “Tilawi ug tan-awa ninyo nga si Jehova maayo.” Human kana palandonga, siya midesisyon nga magregular payunir. Siya karon mosangyaw kaupat kada semana ug may pipila ka Bible study nga nagmauswagon sa espirituwal. Sa 2010, nakaeskuyla siya sa Pioneer Service School. Lipay kaayo si Onesmus kay instruktor niya kadtong usa sa duha ka brader nga unang miduaw niya!

Karon, si Onesmus hapit nang mag-40 anyos. Namatay na ang iyang mga ginikanan, pero giatiman sa mga igsoon sa kongregasyon ang iyang adlaw-adlawng panginahanglan. Mapasalamaton kaayo siya sa tanang panalangin nga iyang natagamtam karon, ug naghinamhinam sa adlaw dihang “walay pumoluyo nga moingon: ‘Ako masakiton.’”Isa. 33:24.