Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) NOBYEMBRE 2013

 GIKAN SA AMONG ARCHIVES

“Mora Kog Bao nga Dala-dala Pirme ang Balay”

“Mora Kog Bao nga Dala-dala Pirme ang Balay”

SA SIYAM ka adlaw nga dinaliang kampanya niadtong Agosto ug Septiyembre 1929, kapin sa 100,000 ka magwawali ang nagsangyaw sa United States. Nakapanagtag silag 250,000 ka libro ug bokleta. Apil sa mga magwawali ang mga 1,000 ka colporteur. Kusog kaayo silang midaghan! Ang Bulletin * nag-ingon nga “halos dili katuohan” nga mitriple ang gidaghanon sa mga payunir gikan sa 1927 hangtod sa 1929.

Sa hinapos sa 1929, nahugno ang ekonomiya sa nasod. Sa Black Tuesday—Oktubre 29, 1929—mius-os pag-ayo ang prisyo sa mga stock sa New York Stock Exchange. Kini nakapahugno sa ekonomiya sa kalibotan, nga miresulta sa Great Depression. Linibo ka bangko ang nabangkrap. Nahunong ang trabaho sa kaumahan. Nanirado ang dagkong pabrika. Minilyon ang nawad-ag trabaho. Sa 1933, matag adlaw 1,000 ka balay sa United States ang naembargo.

Giunsa pagsagubang sa bug-os panahong mga magwawali ang maong krisis? Ang usa ka solusyon mao ang de-ligid nga balay. Kay walay abang ug bayranang buhis, ang de-ligid nga balay o treyler nakatabang sa mga payunir nga makapadayon sa ilang ministeryo nga gamay ray galastohan. * Ug panahon sa kombensiyon, kini nagsilbing libreng puy-anan. Sa 1934, ang Bulletin naghatag ug detalyadong plano sa paghimog gamay apan komportableng de-ligid nga balay. Kini dunay sistema sa tubig, lutoanan, mapilo nga katre, ug insulasyon para sa katugnaw.

Ang mga magwawali sa tibuok kalibotan maayo mangitag paagi sa paghimog de-ligid nga balay. “Si Noe walay kasinatian sa paghimog arka,” miingon si Victor Blackwell, “ug wala sab koy kasinatian o ideya sa paghimog treyler.” Apan nakahimo siya.

House car nga gisakay sa dakong bangka panahon sa ting-ulan sa India

Si Avery ug Lovenia Bristow may de-ligid nga balay. Matod ni Avery, “Mora kog bao nga dala-dala pirme ang balay.” Ang mga Bristow nagpayunir uban nila Harvey ug Anne Conrow, nga ang bungbong sa ilang treyler gipapilitan ug tar-paper. Kada balhin nila, ang mga piraso sa papel matangtang. Matod ni Avery, “Sukad masukad wala pay treyler nga sama niadto, ug bisan karon!” Pero miingon si Avery nga ang mga Conrow ug ang ilang duha ka anak nga lalaki mao “ang labing malipayong pamilya nga imong makita.” Si Harvey Conrow misulat, “Walay nakulang namo. Mibati ming luwas samtang nag-alagad kang Jehova ug iya ming giatiman pag-ayo.” Ang pamilyang Conrow dungang mieskuyla sa Gilead School ug giasayn sa Peru ingong mga misyonaryo.

Ang mga Battaino nagpayunir usab. Pagkahibalo ni Giusto ug Vincenza nga mahimo na silang ginikanan, gihimo nilang balay ang ilang 1929 Model A Ford nga trak. Kini “morag nindot nga hotel” kon itandi sa mga tolda nga ilang gipuy-an kaniadto. Uban ang ilang batang anak nga babaye, nagpadayon sila sa ilang gimahal nga asaynment —ang pagsangyaw ngadto sa mga Italyano sa United States.

Daghan ang namati sa maayong balita, apan ang mga pobre ug walay trabaho panagsa lang makaamot alang sa mga literatura sa Bibliya. Pero lainlaing butang ang ibarter nila sa mga literatura. Duha ka payunir ang nakalistag 64 ka lainlaing butang nga gihatag sa mga interesado. Ang listahan samag “imbentaryo sa tindahan.”

Si Fred Anderson nakasangyaw sa usa ka mag-uuma nga gustong mokuhag mga libro ug mihangyo nga bayloan niya kinig antiyohos sa iyang inahan. Sa sunod nga uma, usa ka lalaki ang gusto sab mokuhag literatura pero miingon, “Dili ko makabasa kay wala koy antiyohos.” Apan dihang iyang gisukod ang antiyohos sa iyang silingan, mabasa na niya ang mga libro. Mihatag dayon siyag donasyon para sa mga libro ug sa antiyohos.

Si Herbert Abbott magdala-dalag tangkal sa manok diha sa iyang sakyanan. Kon tulo o upat ka manok na ang gibarter, ibaligya niya kini sa merkado, ug ang halin ipalit niyag gasolina. “Mahutdan ba mi usahay ug kuwarta? Oo,” siya misulat, “pero wala kana makapahunong namo. Basta naa ray gasolina ang sakyanan, mopadayon ra mi ug mosalig kang Jehova.”

Ang pagsalig kang Jehova ug lig-ong determinasyon maoy nakatabang sa iyang katawhan niadtong lisod nga mga tuig. Kas-a dihang nagbagyo, ang treyler ni Maxwell ug Emmy Lewis natunga kay natumbahag kahoy, pero maayo na lang kay nakagawas dayon sila. Si Maxwell misulat: “Dili kadto babag, mga insidente lang. Wala gyod mi sukad maghunahuna nga moundang. Dako pa ang buluhaton, ug gusto namong mopadayon.” Tungod sa ilang determinasyon ug tabang sa mahigugmaong mga higala, si Maxwell ug Emmy nakahimo pag-usab ug de-ligid nga balay.

Niining lisod nga mga panahon, ang minilyong masibotong mga Saksi ni Jehova nagpakita usab ug susamang pagsakripisyo sa kaugalingon. Sama sa maong mga payunir, determinado kitang magpadayon sa pagsangyaw hangtod moingon si Jehova nga ang buluhaton natapos na.

^ par. 3 Karon gitawag nga Atong Ministeryo sa Gingharian.

^ par. 5 Niadtong panahona, kadaghanan sa mga payunir wala mokuhag sekular nga trabaho. Pero makakuha silag mga literatura sa ubos nga kantidad ug gamiton ang kontribusyon sa napanagtag nga mga basahon para sa ilang adlaw-adlawng galastohan.