Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) OKTUBRE 2013

Sila Kinabubut-ong Nagtanyag sa Ilang Kaugalingon sa Pilipinas

Sila Kinabubut-ong Nagtanyag sa Ilang Kaugalingon sa Pilipinas

MGA napulo ka tuig sa miagi, ang magtiayong si Gregorio ug Marilou, nga kapig 30 anyos niadtong panahona, nagpayunir sa Manila samtang full-time nga nagtrabaho. Dili kadto sayon, apan sila milampos. Dayon si Marilou napromot ingong manedyer sa bangko nga iyang gitrabahoan. “Maayo mig trabaho maong komportable kaayo ang among kinabuhi,” matod niya. Kay hayahay ra sa pinansiyal, midesisyon silang magpatukod sa ilang gipangandoy nga balay sa usa ka nindot nga lokasyon, nga mga 19 kilometros sidlakan sa Manila. Gikontrata nila ang usa ka kompaniya nga magtukod sa ilang balay, nga bayaran nilag binulan sulod sa napulo ka tuig.

“GIBATI NAKO NGA AKONG GIKAWATAN SI JEHOVA”

Si Marilou miingon: “Dako kaayong panahon ug kusog ang gikinahanglan sa akong bag-ong posisyon maong nimenos ang akong kadasig sa espirituwal nga mga kalihokan. Gibati nako nga akong gikawatan si Jehova.” Siya mipatin-aw: “Wala na nako mahatag kang Jehova ang panahon nga akong gisaad sa pag-alagad kaniya.” Kay naguol sa maong situwasyon, nag-estorya si Gregorio ug Marilou bahin  sa direksiyon sa ilang kinabuhi. Si Gregorio miingon: “Gusto ming mohimog kausaban pero wala mi mahibalo kon unsay eksaktong buhaton. Among giestoryahan kon sa unsang paagi mas bug-os namong magamit ang among kinabuhi sa pag-alagad kang Jehova, ilabina nga wala miy anak. Dayon nag-ampo mi kang Jehova alang sa giya.”

Niadtong panahona, nakadungog mig daghang pakigpulong bahin sa pag-alagad diin mas dako ang panginahanglan alang sa mga magmamantala sa Gingharian. “Gibati namo nga kadto ang tubag ni Jehova sa among mga pag-ampo,” matod ni Gregorio. Miampo ang magtiayon alang sa dugang pagtuo aron makabatog kaisog sa paghimog hustong mga desisyon. Apan dakong babag ang ilang gipatukod nga balay. Nakahatag na silag tulo ka tuig nga bayad. Unsa kahay ilang himoon? Si Marilou miingon: “Kon among kanselahon ang kontrata, mabalewala ang tanan namong nabayad, nga dako-dako nang kantidad. Apan kinahanglan ming mopili kon amo bang unahon ang kabubut-on ni Jehova o ang among kaugalingong mga tinguha.” Kay ilang gipamalandong ang giingon ni Pablo bahin sa pagkaandam nga mawad-an sa tanang butang, ilang gikanselar ang kontrata sa balay, miundang sa ilang trabaho, gibaligya ang kadaghanan sa ilang kabtangan, ug mibalhin sa usa ka hilit nga baryo sa Palawan, nga mga 480 kilometros habagatan sa Manila.—Filip. 3:8.

ILANG ‘NAKAT-ONAN ANG SEKRETO’

Sa wala pa mobalhin, nangandam na si Gregorio ug Marilou sa pagkinabuhing simple. Apan pag-abot didto, ang ilang kinabuhi mas simple pa kay sa ilang gidahom. “Nakurat mi,” matod ni Marilou. “Way koryente ug modernong mga gamit. Imbes maglung-ag sa rice cooker, kinahanglan pa ming mamughag kahoy aron makaluto. Usahay mingawon ko sa kinabuhi sa siyudad, sama sa pagsuroy sa mall ug pagpangaon sa gawas.” Apan kanunay nilang gipahinumdoman ang ilang kaugalingon kon nganong namalhin sila, ug wala madugay naka-adjust ra sila. Si Marilou miingon: “Karon malingaw kong magsud-ong sa katahom sa kinaiyahan, apil ang hayag nga mga bituon sa kagabhion. Labaw sa tanan, makapalipayng makita ang kalipay sa mga tawo dihang amo silang sangyawan. Pinaagi sa pag-alagad dinhi, among ‘nakat-onan ang sekreto’ kon unsaon nga magmakontento.”—Filip. 4:12.

“Dili ikatandi ang kalipay nga makita ang pag-uswag sa kongregasyon. Ang among kinabuhi karon mas makahuloganon na.”—Gregorio ug Marilou

Si Gregorio miasoy: “Pag-abot namo dinhi, upat lang ang Saksi. Lipay kaayo sila dihang mopakigpulong ko kada semana ug duyogan nakog gitara ang pag-awit sa mga alawiton sa Gingharian.” Sulod lang sa usa ka tuig, ang gamayng grupo nahimong kongregasyon nga may 24 ka magmamantala. Si Gregorio mipadayon: “Natandog kaayo mi sa gugma nga gipakita sa kongregasyon.” Sa kapig unom ka tuig nga pag-alagad niining hilit nga dapit, sila miingon: “Dili ikatandi  ang kalipay nga makita ang pag-uswag sa kongregasyon. Ang among kinabuhi karon mas makahuloganon na.”

“AKONG NATILAWAN UG NAKITA NGA SI JEHOVA MAAYO!”

Sa Pilipinas, halos 3,000 ka igsoon ang namalhin sa mga lugar nga dakog panginahanglan sa mga magmamantala sa Gingharian. Mga 500 niana mga tagsaanong sister. Usa kanila si Karen.

Karen

Si Karen, nga mga 25 anyos na karon, nagdako sa Baggao, Cagayan. Sa tin-edyer pa, naghunahuna na siyang magpalapad sa iyang ministeryo. Siya miingon: “Gusto kong moalagad sa dapit nga mas dakog panginahanglan sa mga magsasangyaw kay mubo na lang ang nahibiling panahon ug kinahanglang madungog sa tanang matang sa tawo ang mensahe sa Gingharian.” Bisag gidasig siya sa ubang membro sa iyang pamilya nga mokuhag taas nga edukasyon imbes mobalhin sa hilit nga dapit aron mosangyaw, si Karen miampo kang Jehova alang sa giya. Nakig-estorya sab siya sa mga igsoong nag-alagad sa hilit nga dapit. Sa edad nga 18, mibalhin siya sa dapit nga mga 64 kilometros gikan sa ilaha.

Lakip sa teritoryo sa gamayng kongregasyon nga gitabangan ni Karen mao ang bukirong dapit ubay sa Dagat Pasipiko. Si Karen nahinumdom: “Gikan sa Baggao paingon sa bag-ong kongregasyon, tulo ka adlaw ming magbaktas, motungas ug molugsong mi sa mga bukid, ug kapin sa 30 ka beses motabok sa mga suba.” Siya midugang: “Aron maadtoan ang ubang Bible study, magbaktas kog unom ka oras, matulog sa balay sa estudyante, ug pagkaugma magbaktas na pod ug unom ka oras pauli.” Nakawang ba ang iyang mga paghago? “Usahay manakit ang akong mga bitiis pero,” si Karen mipahiyom, “miabot ug 18 ang akong Bible study. Akong natilawan ug nakita nga si Jehova maayo!”—Sal. 34:8.

“NAKAKAT-ON KONG MAS MOSALIG KANG JEHOVA!”

Sukhi

Unsay nagtukmod kang Sukhi, sister nga kapig 40 anyos ug taga United States, nga mobalhin sa Pilipinas? Sa 2011, mitambong siyag sirkitong asembliya diin may giinterbiyong magtiayon. Ilang giasoy nga gibaligya nila ang ilang mga kabtangan aron mobalhin sa Mexico ug motabang sa pagsangyaw didto. Si Sukhi miingon: “Tungod adto nga interbiyo, nakahunahuna kog mga tumong nga wala nako sukad mahunahunai.” Pagkahibalo ni Sukhi, nga Indian ug kaliwat, nga dakog panginahanglan ang Punjabi nga teritoryo sa Pilipinas, midesisyon siyang mobalhin ug motabang. Duna bay mga babag?

“Ang pagdesisyon kon unsay ibaligya o dili mas lisod kay sa akong gidahom,” matod ni Sukhi. “Gawas pa, human sa 13 ka tuig nga komportableng nagpuyo sa akong apartment, temporaryo kong miipon sa akong pamilya pero dili sama ka komportable sa  akong pagpuyo niadto. Bisag lisod, nakatabang kadto nga maandam ko sa pagkinabuhing simple.” Unsang mga hagit ang iyang naatubang sa Pilipinas? “Ang kinalisorang hagit mao ang akong kahadlok sa mga insekto ug ang akong kamingaw sa pamilya. Nakakat-on kong mas mosalig kang Jehova!” Nagmahay ba siya? Si Sukhi mipahiyom ug miingon: “Kita giingnan ni Jehova, ‘Sulayi ako, kon dili ko ba ibubo nganha kaninyo ang panalangin.’ Nakita nako nga tinuod kana dihang giingnan ko sa akong gisangyawan, ‘Kanus-a ka mobalik? Daghan pa kog pangutana.’ Makapalipay kaayo nga makatabang sa mga tawong gigutom sa espirituwal!” (Mal. 3:10) Si Sukhi midugang: “Sa pagkatinuod, lisod gyod ang pagdesisyon nga mobalhin. Pero dihang nakadesisyon na ko, makapahingangha kaayo kon sa unsang paagi kana gipaposible ni Jehova para nako.”

“NABUNTOG NAKO ANG AKONG KAHADLOK”

Kaniadto si Sime, minyong brader nga karon kapig 35 anyos, miadto sa Middle East aron manarbaho. Samtang tua didto, ang giingon sa magtatan-aw sa sirkito ug ang pakigpulong sa usa ka membro sa Nagamandong Lawas nakadasig kaniya nga unahon si Jehova sa iyang kinabuhi. “Pero nabalaka kaayo kong biyaan ang akong trabaho,” matod ni Sime. Bisan pa niana, siya mibiya sa iyang dakog suweldong trabaho ug mibalik sa Pilipinas. Karon, si Sime ug ang iyang asawa nga si Haidee, nag-alagad sa Davao del Sur, diin nagkinahanglag mga magmamantala nga mokobre sa dakong teritoryo. Si Sime miingon: “Nagpasalamat gyod ko nga nabuntog nako ang akong kahadlok nga mawad-ag trabaho ug akong giuna si Jehova. Wala nay mas makapalipay nga kinabuhi kay sa paghatag kang Jehova sa imong kinamaayohan!”

Sime ug Haidee

“NAGHATAG KINI KANAMOG DAKONG KALIPAY!”

Dihang nasayran ni Ramilo ug Juliet, magtiayong payunir ug kapig 30 anyos, nga nagkinahanglag tabang ang kongregasyon nga mga 30 kilometros lang gikan sa ilaha, sila miboluntaryo nga motabang. Busa kada semana, mag-ulan man o dili, si Ramilo ug Juliet kadaghan magmotor paingon sa tigom ug pagsangyaw. Bisag lisod ang biyahe agi sa libaongong mga dalan ug mga hanging bridge, malipayon sila nga ilang gipalapad ang ilang ministeryo. Si Ramilo miingon: “Kami sa akong asawa nagdumalag 11 ka Bible study! Daghag sakripisyo ang pag-alagad sa dapit nga mas dako ang panginahanglan, pero naghatag kini kanamog dakong kalipay!”—1 Cor. 15:58.

Juliet ug Ramilo

Gusto ka bang mahibalog dugang bahin sa pag-alagad sa mga lugar nga mas dako ang panginahanglan sa mga magmamantala sa Gingharian, diha man sa imong nasod o sa ubang nasod? Kon mao, pakig-estorya sa inyong magtatan-aw sa sirkito ug basaha ang artikulong “Ikaw ba ‘Makaadto sa Macedonia’?” sa Agosto 2011 nga gula sa Atong Ministeryo sa Gingharian.

Pagkat-og Dugang

Unsa nga mga Tunghaan ang Gitagana Para sa mga Payunir?

Unsang espesyal nga pagbansay ang gitagana para sa mga payunir nga bug-os panahon sa pagsangyaw?