Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) AGOSTO 2013

 GIKAN SA AMONG ARCHIVES

Nalipay ang Hari!

Nalipay ang Hari!

NAHITABO kadto sa Agosto 1936, didto sa Swaziland Royal Kraal, o compound. Si Robert ug George Nisbet nagpatokar diha sa ilang sound car ug mga rekording sa musika ug mga pakigpulong ni Brader J. F. Rutherford. Nalipay si Haring Sobhuza II pagkadungog niini. Si George miingon: “Gusto niyang paliton ang record player, mga rekording sa musika ug pakigpulong, hasta ang trompa!”

Si Robert naulawng miingon nga dili kini puwedeng ibaligya. Ngano? Kay duna nay tag-iya ang maong mga gamit. Ang Hari gustong mahibalo kon kinsa.

Kini ang tubag ni Robert, “Gipanag-iya kini sa laing Hari.” Dayon nangutana si Sobhuza kon kinsa ang maong Hari. “Si Jesu-Kristo, ang Hari sa Gingharian sa Diyos,” matod ni Robert.

“Ah, bantogan siya nga Hari,” may pagtahod nga giila ni Sobhuza. “Dili nako kuhaon ang bisan unsa nga iyang gipanag-iya.”

Si Robert misulat: ‘Nakadayeg kaayo ko sa kinaiya sa Kinalabwang Pangulo, si Haring Sobhuza. Bisag maayo siyang mo-Iningles, dili siya hambogiro o garbosong manulti. Prangka siya ug mahigalaon. Mga 45 minutos ming nag-estoryahay diha sa iyang opisina, samtang si George nagpatokar ug musika sa gawas.

‘Pagkahapon,’ matod ni Robert, ‘miadto mi sa The Swazi National School ug nindot kaayo ang among kasinatian. Among gisangyawan ang prinsipal, ug siya namati dayon. Dihang amo siyang giingnan nga duna miy dalang record player ug buot namong magpatokar ug mga rekording diha sa eskuylahan, misugot siya ug gipatawag ang halos 100 ka estudyante ug gipalingkod sila sa yuta nga may mga sagbot aron mamati. Gisultihan mi nga kadto maoy eskuylahan sa hayskul nga nagtudlo sa mga lalaki ug agrikultura, pag-garden, pagpamanday, pagpanukod, Iningles, ug arithmetic; ug nagtudlo sa mga babaye ug nursing, mga buluhaton sa balay, ug uban pang praktikal nga trabaho.’ Ang lola sa Kinalabwang Pangulo maoy nagpatukod sa eskuylahan. *

Mga estudyante sa hayskul sa Swaziland nga naminaw sa pakigpulong niadtong 1936

Sukad pa sa 1933, ganahan nang maminaw si Haring Sobhuza sa mga payunir nga nagaduaw sa Royal Kraal. Kas-a, gitapok pa gani niya ang iyang 100 ka badigard aron maminaw sa rekording sa mensahe sa Gingharian. Siya nag-subscribe sa  atong mga magasin ug midawat sa uban natong literatura. Wala madugay, ang Hari duna nay librarya sa halos tanan natong basahon! Gani panahon sa Gubat sa Kalibotan II, iya kining gitipigan bisan pag ang atong mga basahon gibando sa gobyerno sa Britanya, nga maoy nagmando sa ilang nasod.

Sa daghang katuigan, padayong giabiabi ni Haring Sobhuza II sa Royal Kraal sa Lobamba ang mga Saksi, nga nagpatawag pa gani sa mga pastor aron makapaminaw sa atong mga pakigpulong. Kas-a, samtang gihisgotan sa lokal nga brader nga si Helvie Mashazi ang Mateo kapitulo 23, usa ka grupo sa mga pastor ang nangasuko. Sila mitindog ug gipugos siya sa pagpalingkod. Apan gibadlong sila sa Hari ug giingnan si Brader Mashazi nga mopadayon. Giingnan usab sa Hari ang mga nanambong nga isulat ang tanang teksto nga gihisgotan sa pakigpulong!

Sa laing higayon, human makadungog sa pakigpulong sa usa ka payunir nga brader, upat ka pastor ang miingon: “Sukad karon dili na mi mga pastor kondili mga Saksi ni Jehova na.” Dayon ilang gipangutana ang payunir kon duna ba siyay dalang mga libro nga sama sa nabatonan sa Hari.

Sukad sa dekada sa 1930 hangtod sa iyang kamatayon sa 1982, ang Hari nagtahod sa mga Saksi ni Jehova ug wala motugot nga sila lutoson tungod sa pagdumili sa pagsunod sa mga rituwal sa mga Swazi. Mao nga ang mga Saksi mapasalamaton kaayo kaniya ug nasubo sa iyang kamatayon.

Sa pagsugod sa 2013, duna nay kapin sa 3,000 ka magmamantala sa Swaziland. Kay kapin lang sa usa ka milyon ang populasyon sa nasod, ang ratio maoy 1 ka magmamantala sa matag 384 ka tawo. Kapin sa 260 ka payunir ang nag-alagad diha sa 90 ka kongregasyon, ug 7,496 ang mitambong sa Memoryal sa 2012. Busa makadahom pa kitag dugang pag-uswag sa umaabot. Tin-aw nga nakapahilunag maayong pundasyon ang mga nanangyaw sa Swaziland sa dekada sa 1930.—Gikan sa among archives sa South Africa.

^ par. 8 The Golden Age, Hunyo 30, 1937, panid 629.