Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) AGOSTO 2013

Si Jehova ‘sa Adlaw-Adlaw Nagapas-an sa Akong Luwan’

Si Jehova ‘sa Adlaw-Adlaw Nagapas-an sa Akong Luwan’

Bisan pa sa grabeng mga sakit nga morag dili nako maagwanta, gibati nako ang pagpaluyo sa atong mahigugmaong langitnong Amahan. Ug malipayon kong nag-alagad kang Jehova ingong payunir sa kapig 20 na ka tuig.

Ako natawo sa 1956 nga may depekto sa taludtod nga gitawag ug spina bifida. Tungod niana, maglisod kog lakaw ug naa koy ubang seryosong problema sa panglawas.

Sa wala pa ko matawo, usa ka magtiayong misyonaryo sa mga Saksi ni Jehova ang nag-Bible study sa akong mga ginikanan. Sa bata pa ko, pipila lang ang magmamantala nga nagpuyo sa among lungsod sa Usakos, Namibia. Kay wala may kongregasyon, hisgotan lang namo ingong pamilya ang nakaeskedyul nga tun-an sa mga tigom. Sa edad nga siyete, ako gi-urostomy—operasyon aron himoan kog artipisyal nga gawasanan sa ihi. Pag-edad nakog 14, nasakit kog patol. Kay layo kaayo ang eskuylahan sa hayskul ug kinahanglan sab kong atimanon sa akong ginikanan, wala ko kahuman ug eskuyla.

Bisan pa niana, gipalig-on nako ang akong espirituwalidad. Kaniadto, daghan sa atong publikasyon ang wala pa mahubad sa pinulongang Afrikaans. Mao nga nagtuon ko sa pagbasag Iningles aron matun-an nako ang uban natong libro. Ako nahimong magmamantala ug nabawtismohan sa edad nga 19. Sa misunod nga upat ka tuig, daghan kog problema sa panglawas ug sa emosyon. Dugang pa, kay magkaila ra halos tanan sa among lungsod, maulaw kong mosangyaw maong dili ko dasig.

Dihang nag-edad kog kapig 20, kami namalhin sa South Africa, ug sa unang higayon, sakop na ko sa usa ka kongregasyon. Makapalipay gayod kadto! Apan kinahanglan na sab kong operahan—niining higayona magpa-colostomy.

Sa ulahi, usa ka magtatan-aw sa sirkito ang nagpakigpulong bahin sa pagpayunir. Nadasig ko sa iyang pakigpulong. Nasayod ko nga dili maayo ang akong panglawas, pero nakita nako kon giunsa ko pagtabang ni Jehova latas sa daghang kalisdanan. Busa miaplay ko ingong regular payunir. Pero tungod sa akong mga problema sa panglawas, wala aprobahi sa mga ansiyano ang akong aplikasyon.

Bisan pa niana, naningkamot kong buhaton ang akong maarangan sa ministeryo. Sa tabang sa akong inahan ug sa uban, nakab-ot nako ang oras sa payunir sulod sa unom ka bulan. Pamatuod kadto nga desidido kong magpayunir ug dili babag ang akong mga problema sa panglawas. Miaplay na sab ko, ug kana giaprobahan niadtong Septiyembre 1, 1988.

Ingong payunir, pirme nakong masinati ang tabang ni Jehova. Imbes magsigeg hunahuna sa akong kahimtang, nagpokus ko sa pagtudlo sa kamatuoran ngadto sa uban. Kini nanalipod, nagbansay, ug nagtabang nakong mouswag sa espirituwal. Nalipay kaayo ko nga nakatabang ug pipila ka tawo nga magpahinungod ug magpabawtismo.

Dili gihapon maayo ang akong panglawas. Apan si Jehova ‘sa adlaw-adlaw nagapas-an sa akong luwan.’ (Sal. 68:19) Siya nagtabang nako dili lang aron makalahutay kondili aron magmalipayon usab sa kinabuhi!