Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) HULYO 2013

 SUGILANON SA KINABUHI

Andam Moalagad Kang Jehova, Bisan Asa

Andam Moalagad Kang Jehova, Bisan Asa

Wala pa ko sukad makasangyaw nga mag-inusara. Sa matag higayon nga mogawas ko sa kanataran, mangurog ang akong mga tuhod sa kakulba. Unya ang mga tawo sa teritoryo dili pa gyod maminaw. Ang uban isog kaayo ug manghulga nga kulatahon ko. Sa akong unang bulan sa pagpayunir, usa lang ka bokleta ang akong napahimutang!—Markus.

NAHITABO kadto sa 1949, kapin sa 60 ka tuig na ang milabay. Apan dili diha nagsugod ang akong asoy. Ang akong amahan, si Hendrik, maoy tighimog sapatos ug hardinero sa Donderen, gamayng baryo sa amihanan sa Drenthe, Netherlands. Didto ko natawo sa 1927, ug ako ang ikaupat sa pito ka magsoon. Ang among balay naa sa daplin sa dalan nga dili sementado. Kadaghanan sa among silingan mga mag-uuma, ug ganahan kaayo ko sa akong kinabuhi sa uma. Sa 1947, sa nag-edad kog 19, nasayran nako ang kamatuoran pinaagi sa among silingan nga si Theunis Been. Sa una nako siyang nakaila, dili ko ganahan kang Theunis. Pero human sa Gubat sa Kalibotan II, nahimo siyang Saksi ni Jehova, ug mas mahigalaon na siya. Natingala ko kay nausab siya, maong naminaw ko niya dihang naghisgot siya bahin sa paraisong yuta nga gisaad sa Diyos. Gidawat dayon nako ang kamatuoran, ug nahimo ming managhigala sukad niadto. *

Nagsugod kog sangyaw niadtong Mayo 1948. Pagkasunod bulan, sa Hunyo 20, nabawtismohan ko sa kombensiyon sa Utrecht. Sa Enero 1, 1949, ako nagpayunir ug giasayn sa Borculo, sa sidlakan sa Netherlands, diin may gamayng kongregasyon. Kinahanglan kong mobiyaheg mga 130 kilometros aron makaabot didto, mao nga nagbisikleta ko. Abi nakog 6 ka oras lang ang biyahe, pero tungod sa kusog nga ulan ug hangin, naabtan kog  12 ka oras, bisag nagtren na ko sa kataposang 90 kilometros! Gabii na kaayo ko nakaabot sa balay sa pamilyang Saksi nga akong puy-an samtang magpayunir didto.

Human sa gubat, diyutay rag butang ang mga tawo. Usa ra ang akong amerkana ug pantalon—dako kaayong amerkana ug mubo kaayong pantalon! Sa ako nang gihisgotan sa sinugdan, naglisod ko sa akong unang bulan sa Borculo, pero gipanalanginan ko ni Jehova ug daghang Bible study. Human sa siyam ka bulan, giasayn ko sa Amsterdam.

GIKAN SA BARYO NGADTO SA SIYUDAD

Gikan sa baryo, mibalhin ko sa Amsterdam, ang kinadak-ang siyudad sa Netherlands. Mabungahon kaayo ang akong ministeryo. Sa unang bulan, mas daghan kog napahimutang nga literatura kay sa miaging siyam ka bulan sa Borculo. Wala madugay, duna na koy labing menos walo ka Bible study. Human matudlo ingong congregation servant (gitawag karon nga koordinetor sa lawas sa mga ansiyano), gihatagan kog eskedyul nga mopakigpulong. Gikulbaan kaayo ko kay wala pa ko sukad makahatag ug pakigpulong! Pero nahuwasan ko kay dihang duol na ang akong eskedyul, gibalhin ko sa laing kongregasyon. Wala ko mahibalo nga paglabay sa mga tuig, mohatag diay kog kapin sa 5,000 ka pakigpulong!

Si Markus (tuo) nagsangyaw sa dalan duol sa Amsterdam sa 1950

Sa Mayo 1950, giasayn ko sa Haarlem. Dayon nakadawat kog imbitasyon nga moalagad sa sirkitong buluhaton. Tulo ka gabii kong halos walay tulog. Akong giingnan ang usa ka brader sa sangang buhatan, si Robert Winkler, nga morag dili ko kuwalipikado, pero siya miingon: “Pil-api lang ang aplikasyon. Makakat-on ra ka.” Wala madugay human niadto, gibansay ko sulod sa usa ka bulan ug nagsugod sa pag-alagad ingong circuit servant (magtatan-aw sa sirkito). Sa usa ka kongregasyon nga akong giduaw, nailaila nako si Janny Taatgen, bibohon nga payunir nga may dakong gugma kang Jehova ug masakripisyohong tinamdan. Kami nagminyo sa 1955. Pero sa dili pa ko mopadayon, iasoy una ni Janny kon sa unsang paagi siya nahimong payunir ug kon sa unsang paagi mi nagkaila.

PAG-ALAGAD INGONG MAGTIAYON

Janny: Onse anyos ko dihang na-Saksi ang akong inahan sa 1945. Iyang nakat-onan nga kinahanglang tudloan niya sa Bibliya ang iyang tulo ka anak. Pero kay supak man si Papa, magtuon mi kon wala siya sa balay.

Ang unang tigom nga akong natambongan mao ang kombensiyon sa The Hague sa 1950. Pagkasunod semana, mitambong kog tigom sa Kingdom Hall sa unang higayon sa Assen, Drenthe. Suko kaayo si Papa ug gipalayas ko sa balay. Giingnan ko ni Mama, “Nahibalo na ka kon asa ka puwedeng mopuyo.” Nahibalo ko nga ang iyang gitumong mao ang mga igsoon sa kongregasyon. Mipuyo  una ko sa pamilyang Saksi nga duol sa amoa, pero gilisodlisod gihapon ko ni Papa maong mibalhin ko sa kongregasyon sa Deventer, Overijssel, nga mga 95 kilometros ang gilay-on. Pero kay menor de edad pa man ko, nagkaproblema si Papa sa mga awtoridad sa iyang pagpalayas nako. Ingong resulta, iya kong gipapauli. Bisag wala gyod modawat sa kamatuoran ang akong amahan, sa ulahi gitugotan na ko niya nga motambong sa tanang tigom ug mosangyaw.

Si Janny (tuo) nga nag-vacation pioneer sa 1952

Pagbalik nako sa amoa, si Mama grabeng nasakit mao nga akoy nag-atiman sa tanang buluhaton sa balay. Bisan pa niana, padayon kong miuswag sa espirituwal ug nagpabawtismo sa 1951 sa edad nga 17. Sa 1952, human maayo si Mama, miaplay ko ingong vacation pioneer (oksilyare) sulod sa duha ka bulan kauban sa tulo ka sister. Nagpuyo mi sa houseboat ug nagsangyaw sa duha ka lungsod sa Drenthe. Pagka-1953, ako nagregular payunir. Paglabayg usa ka tuig, miduaw sa kongregasyon ang magtatan-aw sa sirkito. Si Markus kadto. Among gibati nga mas malamposon ming makaalagad kang Jehova ingong magtiayon maong nagminyo mi sa Mayo 1955.—Eccl. 4:9-12.

Sa among kasal sa 1955

Markus: Human sa kasal, kami giasayn ingong payunir sa Veendam, Groningen. Nagpuyo mi sa gamayng kuwarto nga dos-por-tres metros ang sukod. Pero kini gipanindot ug gihimo ni Janny nga komportable. Kada gabii, among ipadaplin ang among lamesa ug duha ka gamayng silya aron iplastar ang kama nga gihipos diha sa bungbong.

Human sa unom ka bulan, giasayn mi sa nagapanawng buluhaton didto sa Belgium. Niadtong 1955, mga 4,000 lang ang magmamantala sa maong nasod. Karon, unom na ka pilo ang maong gidaghanon! Sa Flanders, sa amihanan sa Belgium, ang pinulongan sa mga tawo parehas sa Netherlands. Pero lahi ang ilang tono maong naglisod mi sa sinugdan.

Janny: Nagkinahanglan gyod ug sakripisyo ang nagapanawng buluhaton. Magbisikleta mi dihang moduaw sa mga kongregasyon ug moestar sa balay sa mga igsoon. Kay walay kaugalingong balay, hangtod Lunes mi moestar sa balay sa igsoon ug Martes na mogikan paingon sa sunod nga kongregasyon. Bisan pa niana, giisip namo kanunay nga panalangin ang pag-alagad kang Jehova.

Markus: Sa primero wala miy kaila sa mga kongregasyon, pero ang mga igsoon buotan ug maabiabihon kaayo. (Heb. 13:2) Sulod sa daghang tuig, kadaghan namo naduaw ang tanang kongregasyon sa Belgium nga Dutch ang pinulongan. Daghan kaayo ang among panalangin. Pananglitan, nailhan namo ang halos tanang igsoon sa Dutch nga distrito, ug gimahal namo sila pag-ayo. Nakita namo ang gatosan ka bata nga nanagko, mihamtong sa espirituwal, nagpahinungod kang Jehova, ug nag-una sa intereses sa Gingharian. Makapalipay kaayo nga daghan kanila matinumanong nag-alagad kang Jehova nga bug-os panahon. (3 Juan 4) Kini  nakadasig kanamo nga magpadayon sa pag-alagad kang Jehova nga tibuok kasingkasing.—Roma 1:12.

LISOD NGA KAHIMTANG UG TINUOD NGA PANALANGIN

Markus: Sukad nga naminyo mi, gusto kaayo namong makaeskuyla sa Gilead School. Kada adlaw, magtuon mig Iningles labing menos usa ka oras. Pero dili sayon nga magtuon pinaagi lag libro, maong mibakasyon mi sa England aron mabansay sa pag-Iningles samtang magsangyaw didto. Sa kataposan, sa 1963, nakadawat mig sobre gikan sa hedkuwarter sa Brooklyn. Dunay sulat para nako ug ang usa para kang Janny. Ako gidapit nga moeskuyla sa napulo ka bulan nga espesyal nga klase sa Gilead. Ang kurso magpokus sa pagbansay sa mga brader ug sa paghatag kanilag instruksiyon bahin sa mga kahikayan sa organisasyon. Busa sa 100 ka estudyante, 82 niana mga brader.

Janny: Sa sulat nga akong nadawat nianang adlawa, giingnan ko nga mainampoong palandongon kon mosugot ba kong magpabilin sa Belgium samtang si Markus mag-eskuyla sa Gilead. Sa tinuod lang, nahigawad ko sa sinugdan kay morag wala panalangini ni Jehova ang akong mga paningkamot. Pero gipahinumdoman nako ang akong kaugalingon sa katuyoan sa Gilead School—tabangan ang mga estudyante sa pagpalampos sa buluhatong pagsangyaw sa maayong balita sa tibuok yuta. Mao nga misugot kong magpabilin sa Belgium, ug ako giasayn ingong espesyal payunir sa siyudad sa Ghent. Partner nako si Anna ug Maria Colpaert nga dugay nang mga espesyal payunir.

Markus: Aron mapraktis sa pagsultig Iningles, gipaadto ko sa Brooklyn lima ka bulan una magsugod ang klase. Giasayn ko sa Shipping ug sa Service Department. Samtang nag-alagad sa hedkuwarter ug nagtabang sa pagpadalag mga literatura sa Asia, Europe, ug South America, mas nakita nako ang atong internasyonal nga panag-igsoonay ug mas napabilhan kini. Dili ko malimot kang Brader A. H. Macmillan, nga usa ka pilgrim (nagapanawng magtatan-aw) sa panahon ni Brader Russel. Siya tigulang ug bungol-bungol na. Pero regular gihapon siyang motambong sa tanang tigom sa kongregasyon. Makapadasig kaayo ang iyang ehemplo, ug kini nagtudlo kanako nga dili gyod angayng balewalaon ang pagpakig-uban sa mga igsoon.—Heb. 10:24, 25.

Janny: Kada semana, daghang beses ming magsinulatay ni Markus. Gimingaw kaayo mi sa usag usa! Bisan pa niana, nalingaw si Markus sa iyang pag-eskuyla sa Gilead, ug malipayon kaayo ko sa akong ministeryo. Pagbalik ni Markus gikan sa United States, duna koy 17 ka Bible study! Lisod kaayong magkalagyo sulod sa 15 ka bulan, pero gipanalanginan ni Jehova ang among mga sakripisyo. Sa pag-uli ni Markus, daghang oras nga nalangan ang eroplano. Pag-abot niya, kami nanghilak ug naggaksanay. Sukad niadto, pirme na ming mag-uban.

MAPASALAMATON SA MATAG PRIBILEHIYO SA PAG-ALAGAD

Markus: Pagbalik nako gikan sa Gilead sa Disyembre 1964, kami giasayn sa Bethel. Abi namog permanente na kadto nga asaynment. Human sa tulo lang ka bulan, kami giasayn sa distritong buluhaton sa Flanders. Dihang si Aalzen ug Els Wiegersma gipadala sa Belgium ingong mga misyonaryo,  sila giasayn sa distritong buluhaton. Mao nga kami ni Janny gitawag pag-usab sa Bethel, ug ako giasayn sa Service Department. Gikan sa 1968 hangtod 1980, kadaghan mabag-o ang among asaynment—kon dili sa Bethel, sa sirkitong buluhaton. Dayon gikan sa 1980 hangtod 2005, nag-alagad ko pag-usab ingong magtatan-aw sa distrito.

Bisag pirmeng mabag-o ang among asaynment, wala mi malimot sa among saad kang Jehova nga moalagad kaniya nga bug-os kalag. Malipayon kaayo mi sa matag asaynment nga gihatag kanamo kay nahibalo kami nga alang kana sa pagpauswag sa intereses sa Gingharian.

Janny: Nalipay kaayo kong makauban kang Markus sa Brooklyn sa 1977 ug sa Patterson sa 1997, dihang siya dugang gibansay ingong membro sa Branch Committee.

SI JEHOVA NAHIBALO SA AMONG PANGINAHANGLAN

Markus: Sa 1982, si Janny gioperahan ug naulian ra. Tulo ka tuig sa ulahi, gitanyagan mi sa kongregasyon sa Louvain nga mopuyo sa apartment ibabaw sa ilang Kingdom Hall. Sa unang higayon sulod sa 30 ka tuig, karon lang mi nakabaton ug kaugalingong puy-anan. Kada Martes dihang moduawg kongregasyon, kadaghan ko magsaka kanaog sa 54 ka ang-ang nga hagdanan aron inaog ang among mga dad-onon! Maayo na lang nga pagka-2002, gibalhin mi sa apartment sa ubos. Pag-edad nakog 78, kami giasayn sa lungsod sa Lokeren ingong mga espesyal payunir. Nalipay kaayo mi sa maong pribilehiyo kay makasangyaw gihapon mi kada adlaw.

“Kombinsido mi nga dili importante kon asa mag-alagad o unsang pribilehiyo ang ihatag kanamo, kondili, kon kinsay among gialagaran”

Janny: Tanantanan, kami nakagugol ni Markus ug kapin sa 120 ka tuig sa bug-os panahong pag-alagad! Nasinati gyod namo nga tinuod ang gisaad ni Jehova nga ‘dili kami pagabiyaan’ ug ‘walay makulang kanamo’ kon matinumanon kaming mag-alagad kaniya.—Heb. 13:5; Deut. 2:7.

Markus: Sa batan-on pa, among gipahinungod ang among kinabuhi kang Jehova. Wala mi mangandoy ug dagkong mga butang para sa among kaugalingon. Andam ming modawat sa bisan unsang asaynment nga itanyag kanamo kay kombinsido mi nga dili importante kon asa mag-alagad o unsang pribilehiyo ang ihatag kanamo, kondili, kon kinsay among gialagaran.

^ par. 5 Paglabay sa mga tuig, na-Saksi usab ang akong amahan, inahan, magulang nga babaye, ug duha ka igsoong lalaki.