Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) HUNYO 2013

 SUGILANON SA KINABUHI

Ang Pagsugot Kang Jehova Miresultag Daghang Panalangin

Ang Pagsugot Kang Jehova Miresultag Daghang Panalangin

“Pagkanindot sa atong nakat-onan kang Noe!” miingon ang akong amahan. “Si Noe misugot kang Jehova ug nahigugma sa iyang pamilya, ug silang tanan naluwas sa Lunop kay ang ilang pamilya misulod sa arka.”

KANAY usa sa akong mga mahinumdoman kang Papa, nga mapainubsanon ug kugihang tawo. Importante kaayo niya ang hustisya maong nadani dayon siya sa mensahe sa Bibliya dihang nadungog niya kini niadtong 1953. Sukad niadto, naningkamot siya nga itudlo kanamo ang iyang mga nakat-onan. Sa sinugdan, dili mabiyaan sa akong inahan ang mga tradisyon sa Katoliko. Apan sa ulahi, gidawat na niya ang mga pagtulon-an sa Bibliya.

Lisod para sa akong mga ginikanan nga tudloan mi. Si Mama dili kaayo kamaong mobasa, ug si Papa puliki sa pagpanguma. Tungod sa kakapoy, usahay makatulog si Papa panahon sa among pagtuon. Apan nagbunga gyod ang iyang mga paningkamot. Motabang sab ko sa pagtudlo sa akong mga manghod kay akoy kinamagulangan. Apil sa akong gitudlo ang kanunayng isulti ni Papa, nga si Noe nahigugma sa iyang pamilya ug nagmasinugtanon sa Diyos. Ganahan kaayo ko niini nga estorya! Wala madugay, tigtambongan na ming tanan sa Kingdom Hall sa Roseto degli Abruzzi, usa ka siyudad sa baybayon sa Adriatic sa Italy.

Niadtong 1955 sa 11 anyos pa lang ko, kami ni Mama mibiyaheg layo agi sa mga kabukiran paingon sa Roma aron motambong ug kombensiyon sa unang higayon. Sukad niadto, espesyal kaayo para nako ang mga kombensiyon.

Pagkasunod tuig, ako nagpabawtismo ug dayon nagregular payunir. Sa 17 anyos ko, nahimo kong espesyal payunir sa Latina, habagatan sa Roma ug mga 300 kilometros gikan sa amoa. Bag-o kadto nga siyudad maong dili ra magtagad ang mga tawo dihang may modawat sa mensahe sa Bibliya. Nalipay kaayo mi sa akong partner nga payunir kay nakapanagtag mig daghang literatura sa Bibliya. Pero kay batan-on pa man ko, gimingaw kaayo ko sa amoa! Bisan pa niana, gusto nakong tumanon ang akong asaynment.

Sa among kasal

Sa ulahi, giasayn ko sa Milan aron motabang sa pagpangandam alang sa “Walay Kataposang Maayong Balita” nga Internasyonal nga Asembliya sa 1963. Panahon sa kombensiyon, miboluntaryo ko uban ang daghang igsoon ug lakip  kanila si Paolo Piccioli, usa ka batan-ong brader nga taga-Florence. Sa ikaduhang adlaw sa kombensiyon, mihatag siyag nindot nga pakigpulong bahin sa pagkatagsaanon. Nakaingon ko, ‘Di gyod magminyo ni nga brader.’ Apan human sa kombensiyon, kami nagsinulatay. Among nakita nga kami parehog tumong, may dakong gugma kang Jehova, ug matinguhaon sa pagsugot kaniya. Nagminyo mi ni Paolo sa 1965.

NAKIGDISKUSYON SA MGA PARI

Napulo ka tuig kong regular payunir sa Florence. Makapalipayng makita ang pag-uswag sa mga kongregasyon, ilabina sa mga batan-on. Ganahan kaayo mi ni Paolo nga makig-estorya kanila bahin sa espirituwal nga mga butang ug maglingawlingaw pod uban nila, nga sagad makigdula si Paolo ug soccer. Siyempre gusto nakong makauban ang akong bana, pero nakita nako nga gikinahanglan pod siya sa mga batan-on ug sa mga pamilya sa kongregasyon.

Malipay kong maghinumdom sa among daghang Bible study kaniadto. Usa kanila si Adriana, kinsa nagpaambit sa iyang nakat-onan ngadto sa duha ka pamilya. Ilang gihikay nga makigkita sa usa ka pari aron hisgotan ang pipila ka doktrina sama sa Trinidad ug imortalidad sa kalag. Tulo ka obispo ang miabot, apan ang ilang mga eksplinasyon makapalibog ug nagkasumpaki. Namatikdan dayon sa among mga Bible study nga ang ilang gitudlo sukwahi sa tin-aw nga mga pagtulon-an sa Bibliya. Ingong resulta, 15 ka membro sa maong mga pamilya ang nahimong Saksi.

Ang atong paagi sa pagsangyaw lahi na kaayo karon. Kaniadto, si Paolo nahimong “eksperto” sa pagpakigdebate, ug daghan siyag nakadebate nga mga pari. Nahinumdom ko sa usa niini, nga atubangan sa mga dili Saksi. Klaro nga gikunsabo sa mga magsusupak ang pipila sa nanambong sa pagsuknag mga pangutana nga maulawan si Paolo. Apan nausab ang dagan sa diskusyon. Dihay nangutana kon husto ba nga ang simbahan mag-apil-apil sa politika, ingon sa dugay nang ginahimo niini. Ang mga pari naglisod sa pagtubag. Dayon, kalit nga napalong ang suga ug nahunong ang diskusyon. Pipila ka tuig sa ulahi, among nahibaloan nga giplano diay ang pagpalong sa suga engkasog magkalisod ang mga pari.

BAG-ONG MGA ASAYNMENT

Sa napulo ka tuig na ming minyo ni Paolo, gidapit mi alang sa sirkitong buluhaton. Maayog trabaho si Paolo maong nalisdan mi sa pagdesisyon. Apan human mamalandong ug mag-ampo, among  gidawat ang asaynment. Malipayon ming nakig-uban sa mga pamilyang nag-abiabi namo. Sa magabii, sagad grupo ming magtuon, ug dayon tabangan ni Paolo ang mga bata sa ilang homwork ilabina kon mathematics. Si Paolo himasa usab ug ganahang mopaambit sa makapainteres ug makapadasig nga mga butang nga iyang nabasa. Matag Lunes, sagad manangyaw mi sa mga lungsod nga way Saksi, ug dapiton ang mga tawo sa pakigpulong pagkagabii.

Ganahan kaayo ming makig-uban sa mga batan-on, nga sagad si Paolo makigdula kanilag soccer

Human sa duha ka tuig sa sirkitong buluhaton, gidapit mi nga moalagad sa Bethel sa Roma. Si Paolo giasayn sa pag-atiman sa legal nga mga butang ug ako sa Magazine Department. Dili sayon ang pagbag-og asaynment, pero determinado ming magmasinugtanon. Makapalipay kaayong makita ang anam-anam nga pagdako sa sangang buhatan ug ang pagdaghan sa mga Saksi sa Italy. Niadtong panahona, legal nang giila ang mga Saksi ni Jehova sa Italy. Malipayon kaayo mi sa among pag-alagad sa Bethel.

Gimahal ni Paolo ang iyang trabaho sa Bethel

Sa unang mga tuig sa 1980 samtang nag-alagad mi sa Bethel, nahimong kontrobersiyal sa Italy ang usa ka kaso labot sa atong baroganan sa dugo. Usa ka magtiayong Saksi ang sayop nga giakusahan nga maoy hinungdan sa kamatayon sa ilang anak nga babaye kay wala nila paabonohig dugo. Apan sa pagkatinuod, kini namatay tungod sa seryosong sakit sa dugo nga komon sa Italy ug sa dug-ol nga mga nasod. Ang mga igsoon sa Bethel mitabang sa mga abogado sa magtiayon. Gipanagtag ang leaflet ug ang usa ka espesyal nga edisyon sa Pagmata! aron mahibalo ang mga tawo sa tinuod nga situwasyon ug masabtan ang gitudlo sa Pulong sa Diyos bahin sa dugo. Niadtong mga bulana, daghang adlaw nga si Paolo motrabahog 16 oras nga way pahulay. Naningkamot gyod ko nga suportahan siya niadtong panahona.

LAING DAKONG KAUSABAN

Sa 20 ka tuig na ming minyo, dihay wala damhang hitabo. Ako 41 anyos na ug si Paolo 49 dihang ako siyang giingnan nga morag mabdos ko. Kini ang gisulat ni Paolo sa iyang diary nianang adlawa: “Pag-ampo: Kon tinuod kini, tabangi mi nga magpabilin sa bug-os panahong pag-alagad, dili mapasagdan ang among espirituwalidad, ug mahimong maayong mga ginikanan. Labaw sa tanan, tabangi ko nga mapadapat ang bisan 1 lang ka porsiyento sa akong gipamulong sa entablado sulod sa milabayng 30 ka tuig.” Akong nakita nga gitubag gyod ni Jehova ang iyang pag-ampo, ug ang akoa.

Pagkatawo ni Ilaria, dako kaayog nausab sa among kinabuhi. Tinuod may mga panahong  naluya mi, sama sa giingon sa Proverbio 24:10: “Naluya ka ba sa adlaw sa kasakit? Ang imong kusog diyutay ra.” Apan padayon ming nagdinasigay sa usag usa.

Si Ilaria pirmeng moingon nga nalipay siya nga ang iyang mga ginikanan Saksi ug payunir samtang siya nagdako. Wala siya sukad mobating gipasagdan; siya nagdako sa mahigugmaong pamilya. Sa maadlaw, ako iyang kuyog. Sa magabii inig-uli ni Paolo, makigdula siya kang Ilaria ug motabang sa iyang homwork. Gihimo niya kadto bisag daghan pa siyag tiwasong trabaho, maong usahay maabtan siyag alas dos o alas tres sa kadlawon. Si Ilaria pirmeng moingon, “Si Papa ang akong best friend.”

Aron matabangan si Ilaria nga buhaton kon unsay husto, kinahanglang dili mi magbag-obag-o sa among pagtudlo ug usahay mohatag ug bug-at nga disiplina. Kas-a dihang nakigdula siya sa iyang amiga, duna siyay gihimong dili maayo. Gamit ang Bibliya, among gipatin-aw kon nganong dili husto ang iyang gihimo. Dayon amo siyang gipa-sorry sa iyang amiga sa among atubangan.

Matod ni Ilaria nga naugmad niya ang gugma sa ministeryo tungod sa kadasig sa iyang mga ginikanan. Karon nga minyo na siya, mas nasabtan niya ang kahinungdanon sa pagsugot kang Jehova ug sa pagsunod sa Iyang giya.

NAGMASINUGTANON BISAN PANAHON SA KAGUL-ANAN

Sa 2008, nasayran ni Paolo nga duna siyay kanser. Sa sinugdan morag maulian ra si Paolo sa iyang sakit, ug gipalig-on pa ko niya. Nangita mig hanas kaayong mga doktor nga moatiman niya. Sa among tag-as nga mga pag-ampo ni Ilaria, gihangyo namo si Jehova nga tabangan mi nga magpabiling lig-on. Sakit kaayong makita nga nagkaluya ang akong bana nga kanhi himsog ug laski. Siya namatay sa 2010, ug makapaguol kaayo kadto. Hinuon makapahupay ang paghunahuna sa among nalampos sulod sa 45 ka tuig. Gihatag namo kang Jehova ang among kinamaayohan, ug nasayod ko nga dili niya kalimtan ang among nahimo. Mahinamon kong nagpaabot sa pagkabanhaw ni Paolo, sama sa gisaad ni Jesus sa Juan 5:28, 29.

“Ako gihapon kadtong bata nga ganahan kaayo sa estorya ni Noe. Wala mausab ang akong determinasyon”

Ako gihapon kadtong bata nga ganahan kaayo sa estorya ni Noe. Wala mausab ang akong determinasyon. Buot nakong sundon si Jehova, bisan unsa pay iyang isulti. Segurado ko nga ang bisan unsang problema, sakripisyo, o pagkawala sa minahal gamay ra kaayo kon itandi sa dagayang panalangin nga ihatag sa atong mahigugmaong Diyos. Nasinati ko na kini, ug makasalig mo nga dili gyod makawang ang inyong pagsugot kang Jehova.