Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) HUNYO 2013

Mga Ansiyano—Mapalagsik ba Ninyo “ang Gikapoy nga Kalag”?

Mga Ansiyano—Mapalagsik ba Ninyo “ang Gikapoy nga Kalag”?

Medyo gikulbaan si Angela, * dalagang sister nga kapig 30 anyos. Siya nagpaabot sa mga ansiyano nga moduaw niya. Unsa kahay ilang isulti? Tinuod, wala siya makatambong ug pipila ka tigom kay gikapoy sa iyang tibuok adlawng trabaho sa pag-atiman ug mga tigulang. Gawas niini, nabalaka pod siyag maayo sa panglawas sa iyang inahan.

Kon ikaw ang moduaw kang Angela, unsaon kaha nimo pagdasig kining “gikapoy nga kalag”? (Jer. 31:25) Apan una sa tanan, unsaon nimo pagpangandam aron makapalagsik ang imong pagduaw?

PALANDONGA ANG KAHIMTANG SA IMONG IGSOON

Usahay, kitang tanan kapoyon tungod sa trabaho o sa pag-atiman sa teokratikanhong mga responsabilidad. Pananglitan, si propeta Daniel “gikapoy” dihang nakakitag panan-awon nga dili niya masabtan. (Dan. 8:27) Unsay nakatabang kaniya? Gipadala sa Diyos ang manulonda nga si Gabriel aron ipatin-aw kaniya ang panan-awon ug pasaligan siya nga nadungog ni Jehova ang iyang mga pag-ampo. Giingnan usab siya sa manulonda nga siya “tilinguhaon kaayo” kang Jehova. (Dan. 9:21-23) Sa ulahi, laing manulonda ang nagsultig susamang makapadasig nga mga pulong nga nagpalig-on sa gikapoy nga propeta.—Dan. 10:19.

Sa dili pa moduaw, konsideraha ang kahimtang sa imong isigkamagtutuo

Sa susama, sa dili pa moduaw sa usa ka isigkamagtutuo nga gikapoy o naluya, palandonga una ang iyang kahimtang. Unsay iyang mga problema? Nganong nakapaluya kini kaniya? Unsa ang iyang maayong mga hiyas? “Nagpokus ko sa maayong mga hiyas  sa mga igsoon,” matod ni Richard, nga kapig 20 ka tuig nang ansiyano. “Sa pagkonsiderar pag-ayo sa ilang kahimtang una moduaw,” siya midugang, “mas dali kong makahunahunag pagdasig nga haom kanila.” Kon may laing ansiyano nga mouban kanimo sa pagduaw, maayong hisgotan una ninyo ang kahimtang sa igsoon.

TABANGI ANG IGSOON NGA MOBATING KOMPORTABLE

Lagmit mouyon ka nga sagad maulaw ang usa ka igsoon sa pagpahayag sa iyang gibati. Pananglitan, ang imong igsoon malisdan tingali sa pagpakig-estorya sa mga ansiyano nga moduaw. Unsay imong mahimo aron komportable siyang makig-estorya kaninyo? Makatabang ang imong mahigalaong pahiyom ug ang pipila ka makapadasig nga pulong. Dihang moduaw, sagad kini ang unang isulti sa kapig 40 ka tuig nang ansiyano nga si Michael: “Abi nimo, ang usa sa kinanindotang mga pribilehiyo sa ansiyano mao ang pagduaw sa mga igsoon sa ilang balay ug ang pagsinati kanila. Mao nga naghinamhinam gyod kong moduaw nimo niining adlawa.”

Mahimo nimong sugdan ang pagduaw pinaagig kinasingkasing nga pag-ampo. Mahimo nimong hisgotan sa pag-ampo ang maayong mga hiyas sa igsoon, sama sa pagtuo, gugma, o pagkamalahutayon. Kini ang gihimo ni apostol Pablo dihang nag-ampo alang sa iyang mga igsoon. (1 Tes. 1:2, 3) Dihang mag-ampo uban sa imong igsoon niining paagiha, imong gitabangan siya ug ang imong kaugalingon nga makabaton ug hustong tinamdan sa maong pagduaw. Kini moresulta sa makapadasig nga panag-estorya. Ang imong pag-ampo makahupay usab sa igsoon. “Usahay, malimot ta sa atong maayong nahimo,” miingon si Ray, usa ka dugay nang ansiyano. “Busa makapahupay gyod kon may magpahinumdom kanato niana.”

PAGHATAG UG ESPIRITUWAL NGA GASA

Sama kang Pablo, makahatag ka usab ug “espirituwal nga gasa” pinaagig usa ka punto sa Kasulatan, bisag usa lang ka teksto. (Roma 1:11) Pananglitan, ang naluyang igsoon  basin mibating walay pulos, sama sa salmista nga gitandi ang iyang kaugalingon sa mikuyos nga “botelya nga panit nga gipaasohan.” (Sal. 119: 83, 176) Human kana ipatin-aw sa mubo, mahimo nimo siyang pasaligan nga nasayod kang wala niya “kalimti” ang mga sugo sa Diyos.

Sa susama, ang ilustrasyon bahin sa nawala nga sensilyong drakma mahimong makatandog sa kasingkasing sa usa ka sister nga dili na aktibo sa kongregasyon o nawad-ag kadasig sa pag-alagad. (Luc. 15:8-10) Ang nawala nga sensilyo posibleng bahin sa mahalong kuwentas nga hinimo sa daghang sensilyong plata. Pinaagi sa paghisgot niana nga ilustrasyon, lagmit maamgohan sa sister nga siya maoy bililhong bahin sa Kristohanong kongregasyon. Dayon mahimo nimong ipasiugda nga nahangawa pag-ayo si Jehova kaniya ingong usa sa iyang gagmayng mga karnero.

Sagad ang atong mga igsoon ganahang moestorya bahin sa ilang nabasa nga mga teksto. Busa likayi nga ikaw lang ang magsigeg estorya! Human mabasa ang bersikulo nga haom sa ilang kahimtang, pagpilig pulong o prase ug dayon pakomentoha sila niana. Pananglitan, human mabasa ang Salmo 23:3, ang ansiyano makapangutana, “Duna na bay mga higayon nga mibati kang gipabaskog ni Jehova?” Kini nga pangutana moresulta sa panag-estorya nga makapadasig sa usag usa.—Roma 1:12.

Sagad ang atong mga igsoon ganahang moestorya bahin sa ilang nabasa nga mga teksto

Makadasig ka usab sa imong igsoon pinaagi sa paghisgot ug karakter sa Bibliya nga susama niyag kahimtang. Ang usa nga magul-anon kaayo lagmit madasig sa kasinatian ni Ana o ni Epafrodito, nga may mga higayong nagmagul-anon apan bililhon gihapon sa mga mata ni Jehova. (1 Sam 1:9-11, 20; Filip. 2:25-30) Kon itugot sa kahimtang, hisgoti ang pipila ka maayong panig-ingnan sa Bibliya.

PADAYONG MAGPAKITAG INTERES KANILA

Imong ikapakita nga tinuod ang imong kahangawa sa imong mga igsoon pinaagi sa padayong pagpakitag interes kanila. (Buh. 15:36) Sa dili pa molakaw, puwede nimo silang dapiton sa pagsangyaw uban nimo. Tagda ang ginahimo sa usa ka dugay nang ansiyano nga si Bernard dihang makita pag-usab ang igsoon nga iyang naduaw. Mataktikanhon niya kining pangutan-on bahin sa iyang gihatag nga tambag, “Komosta, nakatabang ba?” Pinaagi sa pagpakitag personal nga interes, mahibaloan nimo kon nagkinahanglan pa siyag dugang tabang.

Mas kinahanglan karon sa atong mga igsoon nga mobating ikaw nahangawa, nakasabot, ug nagmahal kanila. (1 Tes. 5:11) Busa sa dili pa moduaw, palandonga ang ilang kahimtang. Iampo kang Jehova ang imong pagduaw. Pagpilig haom nga mga teksto nga imong gamiton. Sa ingon, makakita kag hustong mga pulong nga makapalagsik sa “gikapoy nga kalag”!

^ par. 2 Mga ngalan giilisan.