Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre—Tun-anang Edisyon  |  Mayo 2013

Tumana ang Imong Papel Ingong Tig-ebanghelyo

Tumana ang Imong Papel Ingong Tig-ebanghelyo

“Himoa ang buluhaton sa usa ka tig-ebanghelyo, tumana sa bug-os ang imong ministeryo.”2 TIM. 4:5.

1. Nganong si Jehova mao ang una ug kinalabwang Tig-ebanghelyo?

ANG tig-ebanghelyo maoy usa nga nagasultig maayong balita. Ang una ug kinalabwang Tig-ebanghelyo mao si Jehova nga Diyos. Human mirebelde ang atong unang ginikanan, gipahayag dayon ni Jehova ang maayong balita nga pagalaglagon ang serpente, si Satanas nga Yawa. (Gen. 3:15) Latas sa kasiglohan, giinspirar ni Jehova ang pipila ka matinumanong lalaki nga detalyadong isulat kon sa unsang paagi mahinloan ang iyang ngalan gikan sa mga pasipala, kon sa unsang paagi mawagtang ang tanang kadaot nga gipahinabo ni Satanas, ug kon sa unsang paagi mabatonan pag-usab sa katawhan ang kahigayonan nga mabuhi sa walay kataposan nga giwala ni Adan ug Eva.

2. (a) Unsay papel sa mga manulonda sa buluhatong pag-ebanghelyo? (b) Unsang sumbanan ang gihatag ni Jesus alang sa mga tig-ebanghelyo?

2 Ang mga manulonda maoy mga tig-ebanghelyo usab. Sila nagsultig maayong balita ug nagtabang sa uban sa pagpakaylap niini. (Luc. 1:19; 2:10; Buh. 8:26, 27, 35; Pin. 14:6) Komosta si Miguel nga arkanghel? Samtang nagpuyo sa yuta ingong si Jesus, naghatag siyag sumbanan alang sa mga tawong tig-ebanghelyo. Giuna ni Jesus sa iyang kinabuhi ang pagpakaylap sa maayong balita!—Luc. 4:16-21.

3. (a) Unsang maayong balita ang atong ginasangyaw? (b) Ingong mga tig-ebanghelyo, unsang mga pangutana ang makapainteres kanato?

3 Gisugo ni Jesus ang iyang mga tinun-an nga mahimong mga tig-ebanghelyo. (Mat. 28:19, 20; Buh. 1:8) Giawhag ni apostol Pablo ang iyang isigkamagbubuhat nga si Timoteo: “Himoa ang buluhaton sa usa ka tig-ebanghelyo, tumana sa bug-os ang imong ministeryo.” (2 Tim. 4:5) Ingong mga sumusunod ni Jesus, unsang maayong balita ang atong ginasangyaw? Lakip niini ang makapalig-ong kamatuoran nga ang atong langitnong Amahan, si Jehova, nahigugma kanato. (Juan 3:16; 1 Ped. 5:7) Ang usa ka hinungdanong  paagi nga gipakita ni Jehova ang iyang gugma maoy pinaagi sa iyang Gingharian. Mao nga malipay kita sa pagsulti sa uban nga sila mahimong higala sa Diyos kon sila magpasakop sa iyang Gingharian, mosugot kaniya, ug mobuhat kon unsay matarong. (Sal. 15:1, 2) Sa pagkatinuod, katuyoan ni Jehova nga wagtangon ang tanang inhustisya ug pag-antos. Wagtangon usab niya ang kasakit tungod sa dili maayong mga kasinatian. Pagkamaayong balita kana! (Isa. 65:17) Kay mga tig-ebanghelyo man kita, atong tagdon ang tubag niining duha ka importanteng pangutana: Nganong kinahanglang madungog sa mga tawo karon ang maayong balita? Ug sa unsang paagi molampos kita sa pagtuman sa atong papel ingong mga tig-ebanghelyo?

NGANONG KINAHANGLANG MADUNGOG SA MGA TAWO ANG MAAYONG BALITA?

Ang epektibong mga pangutana makatabang sa mga tawo sa pagsusi kon nganong nagtuo sila sa ilang gituohan

4. Unsang dili tinuod nga mga butang ang isulti usahay sa mga tawo bahin sa Diyos?

4 Ibutang ta nga may miingon kanimo nga ang inyong pamilya giabandonar sa imong amahan. Dayon kadtong nag-angkong nakaila kaniya miingon nga siya way pagtagad, dili makigkomunikar, ug mapintas. Basin kombinsihon ka pa sa uban nga wala nay pulos nga pangitaon nimo ang imong amahan kay patay na kini. Sa susama, daghan ang gisultihan ug ingon niini bahin sa Diyos. Sila gitudloan nga ang Diyos mapintas o usa ka misteryo, nga imposibleng mailhan. Pananglitan, gitudlo sa pipila ka relihiyosong lider nga silotan sa Diyos ang daotang mga tawo diha sa usa ka dapit sa pagsakit sa walay kataposan. Gibasol sa uban ang Diyos nga maoy hinungdan sa pag-antos gumikan sa mga kalamidad. Ug bisan tuod parehong namatay niana ang maayo ug daotang mga tawo, giisip gihapon kini nga silot gikan sa Diyos.

Ang mga pangutana makabukas sa ilang hunahuna ug kasingkasing sa pagdawat sa kamatuoran

5, 6. Unsay epekto sa teoriya sa ebolusyon ug sa bakak nga mga doktrina nganha sa mga tawo?

5 Ang uban moinsistir nga ang Diyos wala maglungtad. Tagda pananglit ang teoriya sa ebolusyon. Kadtong nagtuo niini miingon nga walay Maglalalang ug ang kinabuhi wala gidisenyo. Gani miingon ang uban nga ang tawo gikan sa mananap, maong dili ikatingala kon ang usa bayolente o hakog. Sila mangatarongan nga normal lang nga daogdaogon sa mga malupigon ang mga huyang. Maong dili ikatingala nga daghan ang nagtuong dili gayod mawala ang inhustisya. Busa, kadtong nagtuo sa ebolusyon walay tinuod nga paglaom.

6 Tin-aw nga ang teoriya sa ebolusyon ug ang bakak nga mga doktrina nakapasamot sa kagul-anan nga naagoman sa katawhan niining kataposang mga adlaw. (Roma 1:28-31; 2 Tim. 3:1-5) Kini nga mga pagtulon-an dili maayong balita. Hinunoa tungod niini, sumala sa giingon ni apostol Pablo, ang mga tawo “anaa sa kangitngit sa kaisipan, ug nahimulag sa kinabuhi nga iya sa Diyos.” (Efe. 4:17-19) Dugang pa, ang teoriya sa ebolusyon ug ang bakak nga mga doktrina nakababag sa mga tawo sa pagdawat sa maayong balita nga gikan sa Diyos.—Basaha ang Efeso 2:11-13.

Ang mga pangutana makatabang usab kanila nga mangatarongan aron makahimog hustong mga konklusyon

7, 8. Unsa ang bugtong paagi aron bug-os masabtan sa mga tawo ang maayong balita?

7 Aron mapasig-uli sa Diyos, ang mga tawo kinahanglang makombinsir una nga naglungtad si Jehova ug dunay maayong mga rason sa pagpakigsuod kaniya. Makatabang kita kanila sa pagkuha sa maong kahibalo pinaagi sa pagdasig kanila nga susihon ang kalalangan. Kon tun-an sa mga tawo ang kalalangan uban ang bukas nga hunahuna, ilang makita ang kaalam ug gahom sa Diyos. (Roma 1:19, 20) Para matabangan silang masabtan nga ang matag kahibulongang butang gilalang sa Diyos, mahimo natong gamiton ang mga brosyur nga Gilalang ba ang Kinabuhi? ug The Origin of Life—Five Questions Worth Asking. Apan ang pagtuon sa kalalangan dili igo aron matubag ang pipila ka pangutana nga sagad gikalibgan sa mga tawo, sama sa: Nganong gitugotan man sa Diyos ang pag-antos? Nganong gilalang sa Diyos ang Yuta? Nahingawa ba ang Diyos kanako ingong indibiduwal?

8 Ang bugtong paagi aron bug-os masabtan  sa mga tawo ang maayong balita bahin sa Diyos ug sa iyang katuyoan mao ang pagtuon sa Bibliya. Pribilehiyo gayod nato ang pagtabang sa mga tawo nga matubag ang ilang mga pangutana! Apan aron maabot ang ilang kasingkasing, dili igo ang paghatag lang ug impormasyon; kinahanglang kombinsihon usab nato sila. (2 Tim. 3:14) Kon atong sundogon ang panig-ingnan ni Jesus, mas makombinsir nato sila. Nganong malamposon man kaayo si Jesus? Kay siya migamit ug mga pangutana sa epektibong paagi. Sa unsang paagi nato siya masundog?

ANG MALAMPOSONG TIG-EBANGHELYO MOGAMIT UG EPEKTIBONG MGA PANGUTANA

9. Aron makatabang sa mga tawo sa espirituwal nga paagi, unsay kinahanglan natong himoon?

9 Sama ni Jesus, nganong angay kitang mogamit ug mga pangutana dihang magsangyaw? Tagda kini: Ang imong doktor miingon nga duna siyay maayong balita kanimo. Matambalan niya ang imong sakit kon magpaopera ka. Tingali tuohan nimo siya. Apan komosta kon siya misaad niana nga wala una mangutana bahin sa imong panglawas? Seguradong dili ka mosalig niya. Bisag unsa pa ka hanas ang doktor, kinahanglang mangutana una siya nimo ug susihon ang imong mga simtomas ayha mosugyot ug paagi sa pagtambal. Sa susama, aron makatabang sa mga tawo sa pagdawat sa maayong balita sa Gingharian, kinahanglang hanas kitang mogamit ug epektibong mga pangutana. Matabangan lang nato sila kon mahibalo kita sa ilang espirituwal nga kahimtang.

Aron maabot ang kasingkasing sa atong mga gisangyawan, kinahanglang kombinsihon nato sila

10, 11. Unsay atong malampos kon atong sundogon ang paagi ni Jesus sa pagpanudlo?

10 Si Jesus nasayod nga ang maayong pagkapili nga mga pangutana dili lang makatabang sa magtutudlo nga mailhan ang iyang estudyante kondili mag-aghat usab kini sa estudyante sa paghunahuna ug sa pagsulti sa iyang opinyon. Pananglitan, dihang gustong tudloan ni Jesus ang iyang mga tinun-an sa pagpaubos, misukna una siyag makapukaw sa hunahuna nga pangutana. (Mar. 9:33) Aron matudloan si Pedro nga mangatarongan base sa mga prinsipyo, si Jesus misuknag pangutana ug naghatag ug kapiliang mga tubag. (Mat. 17:24-26) Sa laing okasyon, dihang gusto ni Jesus nga madayag kon unsay naa sa kasingkasing sa iyang mga tinun-an, siya misuknag mga pangutana nga makatabang nila sa pagsulti sa ilang tinuod nga gibati. (Basaha ang Mateo 16:13-17.) Pinaagi niini, si Jesus wala lang basta maghatag ug impormasyon. Iyang natandog ang kasingkasing sa mga tawo, nga nagdasig kanila nga molihok uyon sa maayong balita.

11 Kon sundogon nato si Jesus sa paggamit ug epektibong mga pangutana, tulo ka butang ang atong malampos. Masayran nato ang kinamaayohang paagi sa pagtabang sa mga tawo, matubag nato ang posibleng mga pagtutol, ug matudloan nato ang mga mapainubsanon kon sa unsang paagi sila makabenepisyo. Matikdi ang tulo ka situwasyon nga nagpakita kon unsaon paggamit sa mga pangutana sa epektibong paagi.

12-14. Unsaon nimo pagtabang sa imong anak nga makabatog kompiyansa sa pagpaambit sa maayong balita? Paghatag ug pananglitan.

12 Situwasyon 1: Isip ginikanan, unsay imong buhaton kon ang imong tin-edyer nga anak moingon nga nalisdan siya sa pagdepensa sa iyang pagtuo bahin sa paglalang ngadto sa iyang klasmet? Seguradong buot nimo siyang tabangan nga makabatog kompiyansa sa pagpaambit sa maayong balita. Busa imbes sawayon siya o sugyotan dayon, sundoga si Jesus sa pagsuknag mga pangutana nga  makatabang kaniya sa pagpahayag sa iyang hunahuna. Sa unsang paagi?

13 Human basaha uban sa imong anak ang pipila ka bahin sa brosyur nga The Origin of Life—Five Questions Worth Asking, pangutan-a siya kon unsang mga argumento ang nakapainteres pag-ayo kaniya. Dasiga siya sa paghunahuna kon nganong nakombinsir siya nga dunay Maglalalang ug kon nganong buot niyang buhaton ang kabubut-on sa Diyos. (Roma 12:2) Pasaligi ang imong anak nga dili ra man sayop kon dili mo parehas ug mga rason.

14 Ipatin-aw kaniya nga dihang makigsulti siya sa iyang klasmet, mahimo niyang sundogon ang imong paagi sa pagpangutana kaniya. Sa ato pa, iyang isaysay ang pipila ka impormasyon bahin sa kalalangan ug dayon mosuknag pangutana nga makapahunahuna sa iyang klasmet. Pananglitan, mahimo niyang ipabasa sa iyang klasmet ang kahon sa panid 21 sa brosyur nga Origin of Life. Dayon mangutana ang imong anak, “Mouyon ka ba nga dili gihapon matupngan sa teknolohiya sa computer karon ang kapasidad sa DNA sa pagpondog impormasyon?” Lagmit oo ang itubag sa iyang klasmet. Unya makapangutana ang imong anak, “Kon dili kana mahimo sa mga eksperto sa computer, nganong nahimo kini sa DNA nga wala man kiniy utok?” Aron makabatog kompiyansa ang imong anak sa pagpaambit sa iyang pagtuo, himoang regular ang inyong praktis sesyon. Kon imo siyang mabansay sa paggamit ug epektibong mga pangutana, matabangan nimo siya sa pagtuman sa iyang papel ingong tig-ebanghelyo.

15. Sa unsang paagi makagamit kitag mga pangutana sa pagtabang sa usa ka ateyista?

15 Situwasyon 2: Sa atong pagsangyaw, makahibalag kitag mga tawong nagduhaduha kon dunay Diyos o dili pa gani motuog Diyos. Pananglitan, basin may moingon nga siya usa ka ateyista. Imbes tugotang maputol ang pakig-estorya, matinahoron kitang mangutana kon dugay na ba siyang dili motuog Diyos  ug nganong kana ang iyang pagtuo. Human paminawon ang iyang tubag ug pasalamatan kana, makapangutana kita kon puwede bang mobasag materyal nga nagpamatuod nga gilalang ang kinabuhi. Kon bukas ang hunahuna sa tagbalay, lagmit mosugot siya. Dayon mahimo natong itanyag ang brosyur nga Gilalang ba ang Kinabuhi? o ang The Origin of Life—Five Questions Worth Asking. Ang mataktikanhong mga pangutana nga malulotong gisukna mahisamag yawi nga magbukas sa kasingkasing sa usa sa pagdawat sa maayong balita.

16. Nganong angay natong tabangan ang estudyante nga dili lang basahon ang mga tubag diha sa libro?

16 Situwasyon 3: Dihang magdumalag pagtuon sa Bibliya, lagmit ipabasa lang nato sa estudyante ang mga tubag diha sa libro. Apan kon kanay atong buhaton, mababagan nato ang iyang espirituwal nga pag-uswag. Ngano? Kay kon basahon lang sa estudyante ang iyang mga tubag nga walay pagpamalandong, posibleng dili molig-on ang iyang pagtuo. Basin mahisama siyag dahon nga malaya sa kainit sa adlaw, nga maluya sa mga pagsupak. (Mat. 13:20, 21) Aron malikayan kana, kinahanglan natong pangutan-on ang estudyante kon unsay iyang gibati sa iyang nakat-onan. Sayra kon kombinsido ba siya niana. Labaw sa tanan, pasultiha siya kon nganong siya miuyon o wala mouyon niana. Dayon tabangi siyang mangatarongan base sa Kasulatan aron ngadtongadto siya mismo makahimog hustong mga konklusyon. (Heb. 5:14) Kon atong gamiton ang mga pangutana sa epektibong paagi, molig-on ang pagtuo sa atong mga gitun-an ug makabarog sila dihang may mosupak o magpahisalaag kanila. (Col. 2:6-8) Unsa pay atong mahimo sa pagtuman sa atong papel ingong mga tig-ebanghelyo?

ANG MALAMPOSONG MGA TIG-EBANGHELYO MAGTINABANGAY

17, 18. Dihang magsangyaw, sa unsang paagi mo magtinabangay sa imong partner?

17 Gipadala ni Jesus ang iyang mga tinun-an sa pagsangyaw nga tinagurha. (Mar. 6:7; Luc. 10:1) Sa ulahi, si apostol Pablo naghisgot ug “mga isigkamagbubuhat” nga “naningkamot kiliran sa kiliran uban [kaniya] diha sa maayong balita.” (Filip. 4:3) Agig pagsundog sa maong sumbanan, gisugdan niadtong 1953 sa mga magmamantala sa Gingharian ang pagbansay sa uban diha sa ministeryo.

18 Dihang magsangyaw, sa unsang paagi mo magtinabangay sa imong partner? (Basaha ang 1 Corinto 3:6-9.) Sundi sa imong Bibliya ang mga teksto nga basahon sa imong partner. Isentro ang imong pagtagad kaniya ug sa tagbalay samtang sila mag-estorya. Paminaw pag-ayo kay basig kinahanglan kang motabang sa imong partner sa pagtubag sa pagsupak. (Eccl. 4:12) Apan hinumdomi kini: Ayaw pagsagbat samtang epektibong nangatarongan ang imong partner sa tagbalay. Kon mosagbat ka, basin mabalda ang imong partner ug maglibog na hinuon ang tagbalay. Usahay, haom ra tingaling moapil ka sa panaghisgot. Apan kon duna kay isulti, mub-a lang kini. Dayon, ang imong partner na ang mopadayon sa pagsaysay.

19. Unsay angay natong hinumdoman, ug ngano?

19 Sa unsang paagi mo magtinabangay sa imong partner samtang magpaingon sa sunod nga balay? Nganong dili gamiton ang maong panahon sa paghisgot ug mga paagi sa pagpauswag sa inyong presentasyon? Pag-amping nga ang inyong mga komento dili makapahiubos o makainsulto sa mga tawo diha sa teritoryo. Likayi usab nga hisgotan ang negatibong kinaiya sa mga igsoon. (Prov. 18:24) Hinumdomi nga kita maoy mga sudlanang kulonon. Gipakita ni Jehova ang iyang dakong kalulot pinaagi sa paghatag kanatog pribilehiyo sa pagsangyaw sa maayong balita. (Basaha ang 2 Corinto 4:1, 7.) Busa hinaot pabilhan nato ang maong pribilehiyo pinaagi sa paghatag sa atong kinamaayohan sa pagtuman sa atong papel ingong mga tig-ebanghelyo.