Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) MAYO 2013

 SUGILANON SA KINABUHI

Kon Nganong ang Among Kinabuhi May Tinuod nga Katuyoan

Kon Nganong ang Among Kinabuhi May Tinuod nga Katuyoan

DIHANG natawo ang akong anak nga si Gary niadtong 1958, namatikdan nako nga morag duna siyay diperensiya. Naabtag napulo ka bulan ang mga doktor sa pagdayagnos sa iyang sakit, ug lima pa ka tuig ayha kini nakompirmar sa mga espesyalista sa London. Nadugangan ang akong kaguol dihang nasayran ko nga si Louise, nga manghod ni Gary ug siyam ka tuig, may mga simtomas usab nga mas grabe pa kay kang Gary.

“Ang imong duha ka anak may LMBB syndrome, * sakit nga dili matambalan,” malulotong miingon ang mga doktor. Niadtong panahona, wala pa kaayoy nahibaloan bahin sa maong sakit. Talagsaon ra kining sakita, nga mapanunod kon ang ginikanan parehong may depektosong gene. Ug gibanabana sa usa ka bag-ong pagtuon nga 1 sa matag 125,000 ka tawo sa Britain may LMBB syndrome, ug daghan pa ang duna niini apan dili kaayo grabe. Lakip sa mga simtomas niini ang pagkahalap sa panan-aw nga moresulta sa pagkabuta, sobrang katambok, sobrang mga tudlo sa kamot ug tiil, hinayng pagtubo, problema sa paglihok sa mga parte sa lawas, diabetes, artraytis, ug mga problema sa kidney. Busa lisod gyod ang pag-atiman sa akong mga anak.

SI JEHOVA ANG AMONG “LUWAS NGA HATAAS NGA DAPIT”

Niadtong bag-o pa kong minyo, may Saksi ni Jehova nga nagsangyaw nako ug akong nasabtan dayon nga kamatuoran ang iyang gitudlo. Apan ang akong bana dili interesado. Tungod sa iyang trabaho, pirme ming magbalhinbalhin maong wala gyod ko makatambong ug tigom. Bisan pa niana, padayon kong nagbasa sa Bibliya ug nag-ampo kang Jehova. Nakahupay gyod nako ang akong nabasa nga ‘si Jehova mahimong luwas nga hataas nga dapit alang sa dinaogdaog [ug] luwas nga hataas nga dapit sa mga panahon sa kasakit’ ug siya ‘dili gayod mobiya niadtong mangita kaniya’!—Sal. 9:9, 10.

Si Gary dili kaayo makakita, mao nga pagka-sayis anyos, amo siyang gipaeskuyla sa usa ka boarding school sa habagatang baybayon sa England aron mahatagag espesyal nga edukasyon. Dihang duna siyay kabalak-an, pirme siyang manawag sa telepono maong ako siyang matudloan sa pipila ka pangunang mga prinsipyo sa Bibliya. Pipila ka tuig human matawo si Louise, nasakit kog multiple sclerosis ug fibromyalgia. Pagka-16 anyos ni Gary, siya mipauli sa balay. Apan nagkahalap ang iyang panan-aw ug nabuta sa 1975. Duha ka tuig sa ulahi, gibiyaan mi sa akong bana.

Human sa pagpauli ni Gary, nakig-uban mi sa usa ka mahigugmaong kongregasyon ug nabawtismohan ko sa 1974. Nalipay ko dihang may ansiyanong mitabang kaniya aron masagubang ang mga kausaban sa iyang lawas niadtong tin-edyer siya. Ang ubang igsoon usab mitabang nako sa mga buluhaton sa balay ug sa ulahi, lima kanila gisuweldohan sa usa ka lokal nga ahensiya aron mahimong among caregiver. Panalangin gayod kadto!

Si Gary padayong miuswag sa kamatuoran ug nagpabawtismo niadtong 1982. Kay gusto niyang  mag-oksilyare payunir, giubanan nako siya sa pagsangyaw sulod sa daghang tuig. Nalipay kaayo siya dihang gipangutana sa among magtatan-aw sa sirkito, “Gary, nganong dili nimo sulayang magregular payunir?” Kini nakadasig kaniya, ug siya natudlong regular payunir niadtong 1990.

Kaduha na mapulihi ang bat-ang ni Gary, ang una niadtong 1999 ug ang ikaduha niadtong 2008. Apan mas grabe ang sakit ni Louise. Siya natawong buta, ug dihang nakita ko nga sobrag tudlo ang usa sa iyang tiil, akong naila nga duna sab siyay sakit nga LMBB. Human sa mga pag-eksamin, nadiskobrehan nga daghan sa iyang organo depektoso kaayo. Sulod sa daghang tuig, kadaghan siya makaagig dagkong operasyon, ug lima niini sa iyang kidney. Sama kang Gary, siya sab may diabetes.

Kay nasayod sa mga problema nga posibleng motungha sa operasyon, gipatin-aw daan ni Louise sa mga siruhano, anestesiyologo, ug mga opisyal sa ospital kon nganong dili siya magpaabonog dugo. Tungod niini, maayo ang iyang relasyon sa tanang nag-atiman kaniya sa ospital.

MAY KATUYOAN ANG AMONG KINABUHI

Sa balay, puliki mi sa pagsimba kang Jehova. Niadtong wala pay mga CD, DVD, ug mga rekording sa www.jw.org, mogugol kog daghang oras aron basahan si Gary ug Louise. Karon, makasunod na mi sa eskedyul sa pagtuon sa Bibliya matag semana ug makakomento na sa mga tigom.

Mapasalamaton kaayo mi sa bililhong mga kamatuoran sa inspiradong Pulong ni Jehova!

Usahay memoryahon ni Gary ang iyang mga komento, ug iyang ihatag nga ekstemporanyo ang iyang asaynment sa Teokratikanhong Tunghaan. Siya gitudlong ministeryal niadtong 1995, ug puliki kanunay sa Kingdom Hall sa pag-abiabi sa mga igsoon ug sa pagtabang sa sound system.

Ang mga igsoon mag-uban kang Gary sa pagsangyaw, nga sagad magtulod sa iyang wheelchair kay siya gi-artraytis. Usa kanila mitabang kaniya sa pag-Bible study sa usa ka interesado. Nadasig usab ni Gary ang usa ka sister nga dili aktibo sa 25 ka tuig. Ang interesado ug ang sister tigtambongan na sa mga tigom.

Niadtong nuybe anyos si Louise, gitudloan siya sa iyang lola sa paggansilyo. Ako ug ang usa sa among mga caregiver nagtudlo usab kaniyag pagpamorda. Kay ganahan kaayong mogansilyo, siya manghimog dekolor nga mga habol para sa mga bata ug mga tigulang sa kongregasyon. Maghimo usab siyag mga greeting card nga may gagmayng mga sticker. Nalipay kaayo ang mga gihatagan niyag kard. Niadtong tin-edyer pa, nakakat-on si Louise sa pagtayp. Karon, gamit ang mosulti nga computer, kanunay siyang mag-email sa iyang mga higala. Siya nagpabawtismo sa edad nga 17. Dihang may espesyal nga kampanya, kami mag-oksilyare payunir. Sama kang Gary, si Louise nagmemoryag mga teksto sa pagpahayag sa iyang pagtuo sa gisaad sa Diyos nga kalibotan diin “ang mga mata sa mga buta mabuka” ug “walay pumoluyo nga moingon: ‘Ako masakiton.’”—Isa. 33:24; 35:5.

Mapasalamaton kaayo mi sa bililhong mga kamatuoran sa inspiradong Pulong ni Jehova! Ang among kasingkasing natugob sa pagpabili sa mahigugmaong tabang sa among kongregasyon. Kay kon wala kini, daghang buluhaton ang dili namo mahimo. Ug labaw sa tanan, ang among kinabuhi may tinuod nga katuyoan tungod sa tabang ni Jehova.

^ par. 5 Ang Laurence-Moon-Bardet-Biedl syndrome gibase sa mga ngalan sa upat ka doktor nga nakadiskobre niini. Kining sakita mapanunod kon ang ginikanan parehong may depektosong gene. Karon, sagad gitawag kinig Bardet-Biedl syndrome. Kini dili matambalan.