Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) ABRIL 2013

Sila Kinabubut-ong Nagtanyag sa Ilang Kaugalingon—Sa Mexico

Sila Kinabubut-ong Nagtanyag sa Ilang Kaugalingon—Sa Mexico

MAKAPADASIG gayod nga nagkadaghan ang mga Saksi nga nagpasimple sa ilang kinabuhi aron mapalapad ang ilang ministeryo. (Mat. 6:22) Unsang mga kausaban ang ilang gihimo? Unsang mga hagit ang ilang giatubang? Aron atong masayran, ilailahon nato ang pipila nga nag-alagad karon sa Mexico.

“KINAHANGLAN MING MOHIMOG KAUSABAN”

Si Dustin ug Jassa nga taga-United States gikasal sa Enero 2007. Human niana, napalit nila ang dugay na nilang gipangandoy nga sailboat nga maoy ilang gipuy-an. Ila kining gipondo duol sa Astoria, Oregon, U.S.A.—nindot kaayo nga lungsod nga gilibotag mga bungtod nga daghag kakahoyan ug mga bukid nga naputos sa snow ang taluktoknga duol ra sa Pacific Ocean. Miingon si Dustin, “Nindot kaayo ang view bisan asa ka motan-aw!” Abi nilag simple na ang ilang kinabuhi, nga nagsalig kang Jehova. ‘Total, nagpuyo ra mi sa 7.9 metros nga sailboat, nagtrabahog partaym, nagtabang sa kongregasyon nga langyawg pinulongan, ug mag-oksilyare payunir panagsa,’ matod nila. Pero wala madugay sila nakaamgo nga ila diayng gilimbongan ang ilang kaugalingon. “Imbes motabang sa kongregasyon, nagsige na lang hinuon mig ayo sa among sailboat,” miingon si Dustin.  “Nahibalo mi nga kon gusto gyod namong unahon si Jehova, kinahanglan ming mohimog kausaban.”

Miingon pod si Jassa: “Sa wala pa ko maminyo, nagpuyo ko sa Mexico ug nagtabang sa Iningles nga kongregasyon. Ganahan kaayo ko didto, ug gusto kong mobalik.” Aron madasig sila sa pag-alagad sa laing nasod, panahon sa ilang pamilyahanong pagsimba, si Dustin ug Jassa magbasag kasinatian sa mga igsoong mibalhin sa laing nasod nga daghan ang interesado. (Juan 4:35) “Gusto pod namong maeksperyensiyahan kana,” matod ni Dustin. Sa dihang gibalitaan sila sa ilang mga higala sa Mexico nga may bag-ong grupo nga naporma nga nanginahanglag tabang, si Dustin ug Jassa midesisyon dayon. Miundang sila sa ilang trabaho, gibaligya ang sailboat, ug mibalhin sa Mexico.

“ANG KINAMAAYOHANG BUTANG NGA AMONG GIHIMO”

Si Dustin ug Jassa mibalhin sa lungsod sa Tecomán, duol gihapon sa Pacific Ocean pero 4,345 kilometros habagatan sa Astoria. Si Dustin miingon nga lahi sa ilang gigikanan nga bugnaw ang klima ug kabukiran ang makita, sa Tecomán init kaayo ug halos mga punoan sa lemon ray makita. Sa primero naglisod silag pangitag trabaho. Kay nagdaginot, kan-on ra ug beans ang ilang ginakaon kaduha sa usa ka adlaw sulod sa daghang semana. “Sa hapit na ming gisumhan sa among ginakaon,” matod ni Jassa, “gihatagan mi sa among mga Bible study ug mangga, saging, kapayas, ug siyempre daghan kaayong lemon!” Sa ulahi, nakakita silag trabaho sa Internet, nga magtudlog Iningles sa mga taga-Taiwan. Ang ilang kita igo na sa ilang adlaw-adlawng panginahanglan.

Unsay gibati ni Dustin ug Jassa niini nga kausaban sa ilang kinabuhi? “Ang among pagbalhin mao ang kinamaayohang butang nga among gihimo,” sila miingon. “Mas milig-on pa ang among relasyon kang Jehova ug ang among panagtiayon. Kada adlaw magkauban mi sa daghang buluhaton—pagsangyaw, paghisgot kon unsaon pagtabang sa among mga Bible study, ug pagpangandam sa tigom. Wala na pod kaayo miy problema karon.” Sila midugang: “Mas naapresyar namo ang giingon sa Salmo 34:8, ‘Tilawi ug tan-awa ninyo nga si Jehova maayo.’”

NGANONG DAGHAN ANG NAGBOLUNTARYO?

Kapin sa 2,900 ka Saksi ni Jehova—minyo ug tagsaanon, nga daghan kanila nag-edad ug mga 20 ngadto sa 30—namalhin sa mga lugar sa Mexico nga dako ang panginahanglan. Nganong ila kining  gihimo? Ang pipila kanila naghatag ug tulo ka rason. Unsa kini?

Leticia ug Hermilo

Aron ipakita ang gugma kang Jehova ug sa mga tawo. Si Leticia nabawtismohan sa edad nga 18. Siya miingon: “Dihang nagpahinungod ko kang Jehova, nahibalo ko nga kinahanglan kong moalagad kaniya nga bug-os kasingkasing ug kalag. Busa aron ipakita ang akong dakong gugma kang Jehova, gusto nakong mogugol ug dugang panahon ug kusog diha sa ministeryo.” (Mar. 12:30) Si Hermilo, nga nabana ni Leticia, kapin pa lang sa 20 ang edad dihang mibalhin siya sa dapit nga mas dako ang panginahanglan. Siya miingon: “Nakaamgo ko nga ang pagtabang sa uban nga matagan-an ang ilang espirituwal nga panginahanglan mao ang labing maayong paagi sa pagpakitag gugma sa mga tawo.” (Mar. 12:31) Busa mibiya siya sa dakong siyudad sa Monterrey diin siya nagtrabaho sa bangko ug haruhayg kinabuhi, ug mibalhin sa usa ka gamayng lungsod.

Essly

Aron mobatig tinuod ug dumalayon nga kalipay. Human sa iyang bawtismo, si Leticia miuban sa eksperyensiyadong payunir nga sister sa pagsangyaw sa hilit nga lungsod sulod sa usa ka bulan. Si Leticia nahinumdom: “Nalipay kaayo ko kay daghan ang interesado sa mensahe sa Gingharian. Human sa usa ka bulan, nakaingon ko, ‘Kini ang gusto nakong himoon sa akong kinabuhi!’” Si Essly, dalaga nga kapig 20 anyos, nakadesisyon sa pagbalhin tungod usab sa kalipay nga iyang nakita niadtong anaa niining matanga sa pag-alagad. Sa hayskul pa siya, daghan siyag naestoryang dasig nga mga Saksi nga nag-alagad sa mga lugar nga mas dakog panginahanglan. Matod niya, “Gusto nako silang sundogon kay nakita nakong malipayon sila.” Daghang sister ang sama kang Essly. Gani sa Mexico, kapin sa 680 ka dalaga ang nag-alagad sa mga dapit nga mas dako ang panginahanglan. Maayo gayod silang panig-ingnan sa mga batan-on ug edaran!

Aron makabaton ug makapatagbawng kinabuhi. Paggraduwar ni Essly sa hayskul, gitanyagan siyag eskolarsip sa unibersidad. Gidasig siya sa ubang batan-on sa pagdawat niana aron duna siyay mahuman nga kurso, maayong trabaho, awto, ug makasuroy sa ubang lugar. Pero wala niya sunda ang ilang tambag. Matod ni Essly: “Daghan sa akong Kristohanong mga higala nangagpas niana, ug akong namatikdan nga wala na nila unaha ang espirituwal nga mga tumong. Nakita usab nako nga daghan silag problema samtang puliki sa mga kalihokan niining kalibotana. Gusto kong  bug-os moalagad kang Jehova samtang batan-on pa.”

Racquel ug Phillip

Si Essly mikuhag mugbong kurso nga makatabang niyang makakitag trabaho nga makasuportar sa iyang pagpayunir, ug dayon mibalhin siya sa usa ka lugar nga dako ang panginahanglan. Gitun-an niya ang lisod nga mga pinulongan sa mga lumad nga Otomi ug Tlapaneco. Karon, human sa tulo ka tuig niyang pagsangyaw sa hilit nga mga dapit, siya miingon: “Makapalipay ug makapatagbaw gayod ang pag-alagad sa dapit nga mas dako ang panginahanglan. Labaw sa tanan, mas nasuod ko kang Jehova.” Kana sab ang gibati ni Phillip ug Racquel, magtiayon nga kapig 30 ang edad ug taga-United States. “Dali ra kaayong mausab ang kahimtang sa kalibotan mao nga daghan ang mibatig walay kasegurohan. Pero ang pag-alagad sa dapit nga daghan pa ang maminaw sa mensahe sa Bibliya naghimo sa among kinabuhi nga mas makahuloganon. Makapatagbaw kaayo kini!”

KON UNSAON PAG-ATUBANG ANG MGA HAGIT

Verónica

Siyempre, dunay mga hagit ang pag-alagad sa laing dapit. Usa niana ang pinansiyal nga panginahanglan. Aron matagan-an kana, kinahanglang andam kang mopasibo sa kahimtang sa lugar nga imong balhinan. Si Verónica, usa ka eksperyensiyadong payunir, miingon: “Sa usa ka dapit nga akong gialagaran, nagluto ug namaligya kog baratong pagkaon. Sa laing dapit, namaligya kog panapton ug nangorteg buhok. Sa pagkakaron, manglimpiyo kog balay ug magtudlo sa bag-ong mga ginikanan kon unsaon pagpakigkomunikar sa ilang mga anak.”

Dili gyod sayon ang pagpasibo sa laing mga kultura ug kostumbre ilabina kon magpuyo ka uban sa mga lumad sa hilit nga lugar. Mao kanay nahitabo kang Phillip ug Racquel dihang nag-alagad sila sa lugar nga Nahuatl ang pinulongan. “Lahi kaayo ang ilang kultura,” miingon si Phillip. Unsay nakatabang nila? “Nagpokus mi sa ilang maayong mga hiyas—suod ang ilang pamilya, sinsero silang makiglabot sa uban, ug manggihatagon.” Matod usab ni Racquel: “Daghan mig nakat-onan sa pagpuyo ug sa pag-alagad uban sa mga igsoon didto.”

KON UNSAON NIMO PAGPANGANDAM

Kon gusto kang moalagad sa hilit nga mga dapit diin dako ang panginahanglan, unsaon nimo pagpangandam? Ang mga igsoong nakasulay na niini miingon: Sa dili ka pa mobalhin, pasimpleha na ang imong kinabuhi ug magmakontento. (Filip. 4:11, 12) Unsa pa? Si Leticia miingon: “Ang akong gipili nga trabaho mao kanang dili makababag nako kon kinahanglan kong mobalhin sa laing lugar.” Matod ni Hermilo: “Nagtuon ko sa pagluto, paglaba, ug pagplansa.” Miingon sab si Verónica: “Sa didto pa ko sa amoa, motabang ko sa pagpanghinlo ug nagtuon ko sa paglutog simpleng potahe pero sustansiyado. Nagtuon sab ko sa pagdaginot.”

Amelia ug Levi

Si Levi ug Amelia nga taga-United States ug walo ka tuig nang minyo nag-asoy kon sa unsang paagi ang espesipikong pag-ampo nakatabang nila sa pagpangandam sa pag-alagad sa Mexico. Si Levi miingon: “Among gikuwenta kon pilay magasto aron makaalagad sa laing nasod sa usa ka tuig ug dayon nag-ampo mi kang Jehova nga makatigom mi nianang kantidara.” Sulod sa pipila ka bulan, ilang natigom ang kantidad nga ilang giampo, ug mibalhin dayon sila. Siya mipadayon: “Gitubag ni Jehova ang among espesipikong pag-ampo, busa kinahanglang molihok sab mi.” Si Amelia midugang: “Abi namog usa ka tuig lang mi diri, pero pito ka tuig na mi dinhi, ug wala miy planong mohawa! Personal gyod namong nasinati ang tabang ni Jehova. Adlaw-adlaw namong makita ang iyang kaayo.”

Adam ug Jennifer

Hinungdanon sab kaayo ang pag-ampo matod ni Adam ug Jennifer, magtiayong taga-United States nga mibalhin sa Mexico ug nagsangyaw sa mga nagsultig Iningles. Sila misugyot: “Ayaw na paghulat ug perpektong higayon. Iampo kang Jehova ang imong tinguha, ug lihok uyon niana. Pasimpleha ang imong kinabuhi, sulati ang sangang buhatan sa nasod nga imong adtoan, ug human matimbang-timbang ang tanan, balhin dayon!” * Kon imo kining himoon, seguradong matagamtam nimo ang daghang panalangin ug malipayong kinabuhi.

^ par. 21 Alang sa dugang impormasyon, tan-awa ang artikulong “Ikaw ba ‘Makaadto sa Macedonia’?” sa Agosto 2011 nga Atong Ministeryo sa Gingharian.

Pagkat-og Dugang

Unsa nga mga Tunghaan ang Gitagana Para sa mga Payunir?

Unsang espesyal nga pagbansay ang gitagana para sa mga payunir nga bug-os panahon sa pagsangyaw?