Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) PEBRERO 2013

 Gikan sa Among Archives

Sakto Kaayo ang Pag-abot sa “Dili Malimtan” nga Drama

Sakto Kaayo ang Pag-abot sa “Dili Malimtan” nga Drama

“DILI MALIMTAN!” Kini ang giingon sa daghan bahin sa “Creation Drama.” Sakto kaayo ang pag-abot niini, ug kadtong nakakita wala gyod malimot sa maong salida. Oo, nakahatag kinig dakong kadayeganan kang Jehova sa wala pa magsugod ang mapintas nga pagpanglutos ni Hitler sa katawhan sa Diyos didto sa Europe. Apan unsa ang “Creation Drama”?

Librong Schöpfung (Creation) nga gibasehan sa ngalan sa bag-ong drama

Niadtong 1914, ang hedkuwarter sa mga alagad ni Jehova sa Brooklyn, New York, U.S.A., nagpasalida sa “Photo-Drama of Creation.” Kini maoy otso oras nga kombinasyon sa mga slide ug pelikula, nga may kolor ug tingog. Minilyon sa tibuok kalibotan ang nakakita niini. Ang mas mubo nga bersiyon—ang “Eureka Drama”—gipasalida usab sa 1914. Apan sa katuigang 1920, ang mga slide, film, ug projector medyo nadaot na sa sigeg gamit. Pero daghan pa ang gustong motan-aw sa “Photo-Drama.” Pananglitan, ang mga taga-Ludwigsburg, Germany, nangutana, “Kanus-a ninyo ipasalida pag-usab ang ‘Photo-Drama’?” Unsa kahay himoon sa mga igsoon?

Aron mapasalida pag-usab ang Drama, ang mga hawas sa pamilyang Bethel sa Magdeburg, Germany, namalit ug mga film sa usa ka news agency sa Paris, France, sa katuigan sa 1920. Namalit sab silag mga slide sa mga graphics company sa Leipzig ug Dresden. Kini gitapo sa daang mga slide sa “Photo-Drama” nga puwede pang magamit.

Si Brader Erich Frost, nga usa ka maayong musikero, maoy nagkomposo sa musika alang sa mga film ug slide. Ang ubang bahin sa estorya sa Drama gibase sa librong Creation. Mao nga ang bag-ong bersiyon sa “Photo-Drama” ginganlan ug “Creation Drama.”

Ang bag-ong Drama parehas ug gitas-on sa “Photo-Drama”—otso oras—ug gipasalida ang matag bahin niini sa sunodsunod nga mga gabii. Kini nagpakita sa makapahinganghang mga detalye sa mga adlaw sa paglalang, nagrepaso sa kasaysayan sa Bibliya ug sa sekular nga mga hitabo, ug nagpakita nga ang bakak nga relihiyon nagpakyas sa katawhan. Ang “Creation Drama” gipasalida sa Austria, Germany, Luxemburg, Switzerland, ug sa mga dapit nga dunay nagsultig German.

Si Erich Frost ug ang iyang gikomposo para sa “Creation Drama”

Si Erich Frost miingon: “Panahon sa mga pagpasalida sa Drama, giawhag nako ang akong mga kauban, ilabina niadtong apil sa orkestra, nga duolon ang mga nanan-aw diha sa ilang lingkoranan panahon sa intermisyon aron tanyagan sa atong nindot  nga mga libro ug pulyeto. Mas daghan mig napanagtag nga mga literatura niining paagiha kay sa pagpamalaybalay.” Nahinumdom si Johannes Rauthe, kinsa nag-organisar sa pagpasalida niini sa Poland ug sa dapit nga gitawag karon ug Czech Republic, nga daghan sa mga nanan-aw naghatag sa ilang adres aron sila maduaw. Nagmabungahon gayod ang pagduaw kanila.

Bisan sa dekada sa 1930, puno gihapon ang mga lugar nga gipasalidahan sa “Creation Drama,” ug ang mga tawo kanunayng maghisgot bahin sa mga Saksi ni Jehova. Pagka-1933, halos usa ka milyon na ang nakatan-aw sa mga salida nga giorganisar sa branch office sa Germany. Si Käthe Krauss nahinumdom: “Para makatan-aw sa Drama, matag adlaw sulod sa lima ka adlaw, magbaktas mig 10 kilometros paingon sa gipasalidahan, agi sa mga kakahoyan, mga bungtod, ug mga walog.” “Tungod sa ‘Creation Drama,’ naugmad nako ang gugma sa kamatuoran,” matod ni Else Billharz.

Si Alfred Almendinger miasoy nga human makatan-aw sa Drama ang iyang inahan, siya “nahingangha pag-ayo maong mipalit kinig Bibliya ug gipangita ang pulong ‘purgatoryo.’” Kay wala man niya kini makit-i sa iyang Bibliya, mibiya ang iyang inahan sa ilang simbahan ug dayon nagpabawtismo. “Daghan ang nakadangat sa kamatuoran tungod sa ‘Creation Drama,’” miingon si Erich Frost.—3 Juan 1-3.

Samtang gidugokan ang “Creation Drama,” mikaylap pod sa Europe ang impluwensiya sa Nazismo. Sugod sa 1933, gibando ang buluhaton sa mga Saksi sa Germany. Sukad niadto hangtod natapos ang ikaduhang gubat sa kalibotan sa 1945, ang mga alagad ni Jehova sa Europe grabeng gilutos. Si Erich Frost napriso ug walo ka tuig. Sa ulahi, siya nag-alagad sa Bethel sa Wiesbaden, Germany. Sakto kaayo ang pag-abot sa dili malimtan nga “Creation Drama.” Nagpalig-on kini sa pagtuo sa daghang Kristohanon nga hapit nang makasinatig mga pagsulay panahon sa Gubat sa Kalibotan II!—Gikan sa among archives sa Germany.

 

Pagkat-og Dugang

Ang 100 Anyos nga Pelikula nga Nagpalig-on sa Pagtuo

Karong tuiga ang ika-100 nga anibersaryo sa “Photo-Drama of Creation,” nga gidisenyo aron palig-onon ang pagtuo diha sa Bibliya ingong Pulong sa Diyos.