Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) DISYEMBRE 2012

Nahinumdom Ka Ba?

Nahinumdom Ka Ba?

Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:

Sa unsang paagi nato malikayan ang kalayo sa walay pugong nga sinultihan?

Angay natong susihon ang atong kasingkasing. Imbes manaway sa atong igsoon, susihon nato kon nganong ingon niana ang atong tinamdan. Tungod ba kay gusto natong isipon kita sa uban nga mas maayo kaniya? Ang pagpanaway makahaling sa dili maayong situwasyon.—8/15, panid 21.

Sa unsang paagi gipakita sa Balaod ang panglantaw sa Diyos sa mga babaye?

Ang Israelinhong mga babaye may dakong kagawasan, ug sila may kahigayonang makabatog edukasyon. Sila gipasidunggan ug gitahod, ug gipanalipdan ang ilang katungod.—9/1, panid 5-7.

Samtang nagkaduol ang adlaw ni Jehova, unsang mga hitabo ang moabot?

Dunay pagsinggit ug “Kalinaw ug kasegurohan!” Atakehon ug laglagon sa mga nasod ang Dakong Babilonya. Atakehon ang katawhan sa Diyos. Mahitabo ang gubat sa Armagedon, dayon itambog sa kahiladman si Satanas ug ang iyang mga demonyo.—9/15, panid 4.

Unsay mga benepisyo sa wala nato pagkahibalo kon kanus-a moabot ang kataposan?

Ang wala pagkahibalo sa eksaktong adlaw o oras magpadayag kon unsay naa sa atong kasingkasing. Kini maghatag kanatog kahigayonan nga mapalipay ang kasingkasing sa Diyos. Kini magdasig kanato nga gamiton ang atong kinabuhi sa pag-alagad sa Diyos ug sa pagtabang sa uban. Kini motabang kanato nga bug-os mosalig sa Diyos ug sa iyang Pulong. Makakat-on usab kita gikan sa mga pagsulay ug molig-on ang atong pagtuo.—9/15, panid 24-25.

Unsaon nato paggamit ang Genesis 3:19 sa pagpangatarongan niadtong nagtuo sa impiyerno?

Ang teksto nag-ingon nga sa dihang mamatay si Adan, siya mobalik sa abog. Kini wala mag-ingon nga siya moadto sa nagkalayong impiyerno.—10/1, panid 13.

Kinsay gisimbolohan sa “pito ka bituon” sa tuong kamot ni Jesus sa Pinadayag 1:16, 20?

Kini nagsimbolo sa dinihogang mga ansiyano, ug nagtumong usab sa tanang ansiyano sa kongregasyon.—10/15, panid 14.

Unsay buhaton sa pamilya nga dunay utang?

Ang magtiayon angayng maggahin ug panahon aron prangka ug kalmadong hisgotan ang ilang utang. Makatabang kon tinoon nila ang ilang badyet. Mahimo ba nilang padak-an ang ilang kita o menosan ang galastohan sa pamilya? Kinahanglang tinoon kon unsay unahon ug bayad, nga tingali hangyoon ang giutangan nga usbon ang mga kondisyon sa pagbayad. Apan kinahanglan silang magmakataronganon ug magbatog hustong panglantaw sa salapi. (1 Tim. 6:8)—11/1, panid 19-21.

Sa Isaias 50:4, 5, sa unsang paagi si Jesus nagmapainubsanon?

Gihisgotan sa teksto nga kadtong may “dila sa mga tinudloan . . . [dili] moliko sa sukwahing direksiyon.” Si Jesus nagpaubos pinaagi sa pagpamati pag-ayo sa gitudlo sa iyang Amahan. Gusto kaayo niyang makakat-on gikan kang Jehova, nga naniid pag-ayo sa pagpaubos sa Diyos dihang nagpakitag kaluoy sa makasasalang katawhan.—11/15, panid 11.

Sa unsang paagi ang usa ka selyo sa Estonia nagpamatuod sa integridad sa mga Saksi ni Jehova?

Sa 2007, giluwatan sa National Post Office ang usa ka selyo nga naghandom sa mga biktima ilalom sa pagmando ni Stalin sa Estonia. Ang numerong 382 sa selyo nagtumong sa gidaghanon sa mga Saksi ug sa ilang mga anak nga gidala ngadto sa mga kampo sa pinugos nga pagtrabaho sa Siberia, Russia sa 1951.—12/1, panid 27-28.