Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre—Tun-anang Edisyon  |  Oktubre 2012

Sila Kinabubut-ong Nagtanyag sa Ilang Kaugalingon—Sa Brazil

Sila Kinabubut-ong Nagtanyag sa Ilang Kaugalingon—Sa Brazil

PIPILA ka tuig sa miagi, si Rúbia, nga 30 anyos na karon, miduaw kang Sandra, nga nagpayunir sa gamayng kongregasyon sa habagatang Brazil. Sa iyang pagduaw, dunay nakatandog pag-ayo kang Rúbia nga nakapausab sa iyang kinabuhi. Unsa kini? Atong paasoyon si Rúbia.

“DILI KO MAKATUO SA AKONG NADUNGOG”

“Gikuyog ko ni Sandra sa iyang Bible study. Samtang nag-study, ang babaye miingon: ‘Sandra, naay tulo ka babaye sa akong gitrabahoan nga gustong magpa-Bible study, pero ako silang giingnan nga maghulat una sila kay puno na imong eskedyul ning tuiga.’ Dili ko makatuo sa akong nadungog. Ang mga tawo nga gustong makaila kang Jehova kinahanglan pang maghulat aron matun-an sa Bibliya!  Sa akong kongregasyon, maglisod kog pangita bisag usa lang ka study. Diha mismo sa balay sa maong babaye, gibati nako ang dakong tinguha nga tabangan ang mga tawo sa iyang lungsod. Wala madugay, mibiya ko sa dakong siyudad nga akong gipuy-an ug mibalhin sa gamayng lungsod diin si Sandra nagpayunir.”

Unsay resulta? Si Rúbia miingon: “Sulod lang sa duha ka bulan, 15 na ang akong Bible study. Ug wala madugay, parehas na kong Sandra nga naay listahan sa mga tawong naghulat nga magpa-study!”

NAAGHAT SA PAGHUNAHUNA SA IYANG MINISTERYO

Si Diego, nga kapig 20 anyos na karon, mibisita sa pipila ka payunir sa Prudentópolis, gamayng lungsod sa habagatang Brazil. Dako kaayo kadtog epekto kaniya kay naaghat siya sa paghunahuna sa iyang ministeryo. Siya miingon: “Sa akong kongregasyon, mosangyaw ra kog pipila ka oras kada bulan. Pero sa dihang miduaw ko sa maong mga payunir ug nadungog ang ilang mga eksperyensiya, akong nakita nga malipayon kaayo sila samtang ako walay kadasig sa ministeryo. Gusto kong ingon pod unta niana ka malipayon ang akong kinabuhi.” Human niadto, nagpayunir si Diego.

Sama ni Diego, ikaw ba usa ka batan-ong Saksi nga nagasangyaw ug nagatambong sa mga tigom, apan mibating rutina na lang ug dili kaayo makapainteres ang ministeryo? Kon mao, makahimo ka bag kausaban sa imong kinabuhi aron masinati ang kalipay sa pag-alagad sa dapit nga mas dako ang panginahanglan? Natural lang nga mahadlok kang mobiya sa imong komportableng kinabuhi. Apan daghang batan-on ang mihimo niana. Giusab nila ang ilang mga tumong ug tinguha aron bug-os pang makaalagad kang Jehova. Tagda ang kasinatian ni Bruno.

“MAESTRO” O MINISTRO?

Pipila ka tuig sa miagi, si Bruno, 28 anyos na karon, nagtungha sa usa ka iladong eskuylahan sa musika aron mahimong “maestro,” o konduktor sa orkestra. Kay maayo man kaayo siya sa musika, kadaghan  siyang gidapit nga magdumala ug symphony orchestra. Dako gyod ang iyang purohan nga mahimong sikat nga “maestro.” Apan si Bruno miingon: “Akong gibati nga morag dunay kulang sa akong kinabuhi. Gipahinungod na nako ang akong kinabuhi kang Jehova apan nahibalo ko nga wala nako mahatag kaniya ang tanan, mao nga nakonsensiya ko. Giampo ko kini kang Jehova ug nakig-estorya pod ko sa eksperyensiyadong mga igsoon. Human mamalandong, midesisyon ko nga unahon ang ministeryo, miundang ko sa pag-eskuylag musika, ug nagpayunir ko sa dapit nga dako ang panginahanglan sa mga magwawali.” Unsay resulta sa iyang desisyon?

Si Bruno mibalhin sa lungsod sa Guapiara (mga 7,000 ang populasyon), nga mga 260 kilometros gikan sa siyudad sa São Paulo. Lahi kaayo kini sa iyang naandan. Siya miingon: “Mibalhin ko sa gamayng balay nga walay repridyeretor, TV, o Internet. Pero ang akong gibalhinan dunay prutasan ug garden sa gulay, nga wala sa akong gipuy-an kaniadto!” Samtang nagpayunir sa gamayng kongregasyon didto, siya magmotorsiklo kas-a kada semana nga magdalag pagkaon, tubig, ug literatura aron mosangyaw sa lagyong mga lugar. Daghang tawo niining mga dapita ang wala pa sukad masangyawi. Matod niya: “Miabot ug 18 ang akong Bible study. Makapalipay kaayong makita sila nga mihimog kausaban sa ilang kinabuhi!” Siya midugang: “Ako nang nakaplagan kon unsay kulang sa akong kinabuhi—ang dakong kalipay sa pag-una sa Gingharian. Dili gyod nako ni bation kon ako pang giuna ang materyalistikong mga tumong.” Unsay iyang trabaho sa Guapiara? Si Bruno mipahiyom ug miingon: “Nagtudlo kog paggitara.” Busa mora gihapon siyag “maestro.”

“KINAHANGLAN GYOD KONG MAGPABILIN”

Si Mariana, nga karon hapit nang mag-30 anyos, susamag situwasyon ni Bruno. Bisag dako siyag suweldo ingong abogada, dili siya malipayon. Siya miingon: “Sama kog ‘naggukod sa hangin.’ ” (Eccl. 1:17) Daghang igsoon nagdasig niya nga magpayunir. Human kini palandonga, siya ug ang iyang mga amiga  nga si Bianca, Caroline, ug Juliana midesisyon nga motabang sa usa ka kongregasyon sa Barra do Bugres, hilit nga lungsod duol sa Bolivia ug libolibo ka kilometros gikan sa ilang lugar. Unsay sunod nga nahitabo?

Matod ni Mariana: “Tulo ra unta ko ka bulan dinhi. Apan sa hapit na kong mobiya, 15 na ang akong Bible study! Siyempre, nagkinahanglan pa silag dugang tabang aron mouswag sa kamatuoran. Mao nga dili nako masulti nila nga mouli na ko. Kinahanglan gyod kong magpabilin.” Ug kanay iyang gihimo ug sa tulo niya ka amiga. Gibati ni Mariana nga mas mapuslanon karon ang iyang kinabuhi. Siya miingon: “Nindot kaayong bation nga gigamit ko ni Jehova sa pagtabang sa mga tawo sa pagbag-o sa ilang kinabuhi. Malipayon ko nga nagamit nako ang akong panahon ug kusog sa mas mapuslanong paagi.” Gihubit ni Caroline ang gibati nilang upat sa pag-alagad kang Jehova: “Inighigda nako sa magabii, bation nako ang dakong katagbawan kay gigamit nako ang akong kinabuhi alang sa Gingharian. Nakapokus ko sa pagtabang sa akong mga Bible study. Makapalipay gayod nga makita ang ilang pag-uswag. Tinuod gayod kining mga pulonga: ‘Tilawi ug tan-awa ninyo nga si Jehova maayo.’ ”—Sal. 34:8.

Seguradong nalipay si Jehova nga makita ang nagkadaghang batan-on sa tibuok kalibotan nga ‘nagtanyag sa ilang kaugalingon nga kinabubut-on’ sa pagsangyaw sa maayong balita sa Gingharian diha sa hilit nga mga dapit! (Sal. 110:3; Prov. 27:11) Dagaya gayod silang gipanalanginan ni Jehova.—Prov. 10:22.