Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) SEPTIYEMBRE 2016

Ang Imo Bang Sininaan Naghimaya sa Diyos?

Ang Imo Bang Sininaan Naghimaya sa Diyos?

“Himoa ang tanang butang alang sa kahimayaan sa Diyos.”—1 COR. 10:31.

AWIT: 34, 61

1, 2. Nganong ang mga Saksi ni Jehova dunay taas nga sukdanan sa sininaan? (Tan-awa ang hulagway sa sinugdan sa artikulo.)

“DAGHAN ang kaswal ra ug sinina, ilabina kay igang,” matod sa usa ka mantalaan sa Holland bahin sa miting sa mga lider sa relihiyon. “Dili ingon niana sa kombensiyon sa mga Saksi ni Jehova. . . . Ang bata ug edarang mga lalaki nag-amerkana ug nagkorbata, ug ang sinina sa bata ug edarang mga babaye . . . dili mugbo, pero dili sab kinaraan.” Oo, ang mga Saksi ni Jehova sagad dayegon tungod sa pagsul-ob ug “mahapsay nga sinina, uban ang pagkamakasaranganon ug maayong panghunahuna . . . sa paagi nga nahiangay [kanila] nga nagpaila nga masimbahon sa Diyos.” (1 Tim. 2:9, 10) Si apostol Pablo naghisgot bahin sa mga babaye, pero ang maong sukdanan mapadapat usab sa Kristohanong mga lalaki.

2 Ang maayong sukdanan sa sininaan importante kanato ingong katawhan ni Jehova, ug importante sab kana sa Diyos nga atong ginasimba. (Gen. 3:21) Ang giingon sa Kasulatan bahin sa sinina ug pamostura nagpakita nga ang Soberano sa uniberso dunay maayong sukdanan maylabot sa besti alang sa iyang matuod nga mga magsisimba. Busa ang atong sinina ug pamostura dili angayng magdepende kon unsa ray atong gusto. Kinahanglang  tagdon usab kon unsay dalawaton sa Soberanong Ginoong Jehova.

3. Unsay atong makat-onan bahin sa sininaan diha sa Balaod sa Diyos ngadto sa mga Israelinhon?

3 Pananglitan, sa Balaod sa Diyos ngadto sa mga Israelinhon, may mga lagda nga nanalipod kanila batok sa imoral kaayong pagkinabuhi sa mga nasod sa palibot. Ang Balaod nagpakita nga dili gayod dalawaton kang Jehova ang sininaan nga dili na mailhan ang kalainan tali sa lalaki o babaye—nga gitawag karong unisex fashion. (Basaha ang Deuteronomio 22:5.) Sa sugo sa Diyos, tin-aw natong makita nga wala siya mahimuot sa estilo sa sinina nga makapahimo sa lalaki nga babaye tan-awon, makapahimo sa babaye nga lalaki tan-awon, o lisod mailhan kon ang usa lalaki ba o babaye.

4. Unsay makatabang sa mga Kristohanon sa paghimog maayong desisyon bahin sa sininaan?

4 Ang Pulong sa Diyos dunay mga prinsipyo nga makatabang sa mga Kristohanon sa paghimog maayong desisyon bahin sa sininaan. Kana mapadapat bisan asa sila magpuyo, bisan unsay ilang kultura, o bisan unsay klima. Wala ta magkinahanglag detalyadong listahan kon unsang mga estilo sa sinina ang dalawaton ug dili. Hinunoa, kita gigiyahan sa mga prinsipyo sa Kasulatan nga nagtugot gihapon kanato sa pagpili kon unsay atong isul-ob. Atong konsiderahon ang pipila ka prinsipyo sa Bibliya nga makatabang nato sa pag-ila kon unsay “maayo ug dalawaton ug hingpit nga kabubut-on sa Diyos” dihang mamilig isul-ob.—Roma 12:1, 2.

“AMONG GINAREKOMENDAR ANG AMONG KAUGALINGON NGA MGA MINISTRO SA DIYOS”

5, 6. Unsay angayng epekto sa atong sininaan ngadto sa uban?

5 Si apostol Pablo giinspirar sa pagpasiugda sa kaimportante sa prinsipyo nga makita sa 2 Corinto 6:4. (Basaha.) Ang atong pamostura magpaila kon kinsa kita. Daghan ang mohukom ug mohimog opinyon pinaagi sa ilang “makita.” (1 Sam. 16:7) Busa, ingong mga ministro sa Diyos, atong nasabtan nga dili lang ta basta mosul-ob ug sinina nga komportable o gusto nato. Ang mga prinsipyo nga atong nakat-onan sa Pulong sa Diyos angayng magpalihok kanato nga likayan ang pagsul-ob ug sinina nga fitting ug seksi kaayo. Lakip niana ang mga sinina diin makita o mahulma ang pribadong mga parte sa lawas. Ayaw tugoti nga ang uban mobating dili komportable o molingiw tungod sa imong sininaan.

6 Kon kita hapsay, hinlo, desente, ug maayog pamostura, lagmit mas tahoron ta sa mga tawo ingong mga ministro sa Soberanong Ginoong Jehova. Ug tingali madani sila sa Diyos nga atong ginasimba. Dugang pa, makadayeg sila sa organisasyon nga atong girepresentahan. Ingong resulta, lagmit mas maminaw ang mga tawo sa atong nagaluwas ug kinabuhing mensahe.

7, 8. Kanus-a ilabinang magsul-ob kitag haom nga sinina?

7 Obligasyon nato sa atong balaang Diyos, sa mga igsoon, ingon man sa mga tawo sa teritoryo ang pagsul-ob ug sinina nga makapahimo sa atong mensahe nga dalawaton ug makahatag ug kahimayaan kang Jehova. (Roma 13:8-10) Tinuod gayod kana ilabina dihang makigbahin kita sa Kristohanong mga buluhaton, sama sa pagtambong ug tigom o pagsangyaw. Ang atong sininaan kinahanglang “nahiangay sa mga [tawo] nga nagpaila nga masimbahon sa Diyos.” (1 Tim. 2:10) Siyempre, dunay mga sinina nga haom sa usa ka lugar, pero dili haom sa ubang dapit. Busa, kinahanglang konsiderahon sa katawhan ni Jehova sa tibuok kalibotan ang lokal nga mga kostumbre aron dili makapandol.

Ang estilo ba sa imong sinina makahatag ug pagtahod sa Diyos nga imong girepresentahan? (Tan-awa ang parapo 7, 8)

8 Basaha ang 1 Corinto 10:31. Kon motambong  tag mga asembliya ug kombensiyon, ang atong sininaan kinahanglang haom ug desente imbes mosundog sa naghinobrang estilo nga komon sa kalibotan karon. Bisan dihang kita mo-check in o mo-check out sa hotel, ingon man dihang maglingawlingaw sa dili pa ug pagkahuman sa sesyon sa kombensiyon, atong likayan ang pagsul-ob ug sobra ka kaswal o lago nga sinina. Sa ingon, mapasigarbohon tang magpaila nga Saksi ni Jehova ug duna tay kompiyansa nga mosangyaw kon may kahigayonan.

9, 10. Nganong ang Filipos 2:4 makaapektar sa atong sininaan?

9 Basaha ang Filipos 2:4. Nganong angayng tagdon sa mga Kristohanon ang epekto sa ilang sininaan nganha sa isigkamagsisimba? Ang usa ka rason mao nga ang katawhan sa Diyos naningkamot sa pagpadapat sa tambag sa Bibliya: “Patya ang inyong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana.” (Col. 3:2, 5) Dili nato gustong malisdan ang atong mga isigkamagtutuo sa pagsunod nianang tambaga. Ang mga igsoon nga mibiya na sa imoral nga pagkinabuhi tingali padayon pang nakigbisog sa makasasalang hilig. (1 Cor. 6:9, 10) Dili nato gustong malisdan sila sa ilang pagpakigbisog.

10 Dihang kauban nato ang atong mga igsoon sa pagtuo, ang atong sininaan kinahanglang makatampo sa moral nga kahinlo sa kongregasyon. Mapadapat kana dihang magtambong ug tigom o maglulinghayaw. May kagawasan kitang mamili kon unsay atong isul-ob. Bisan pa niana, kitang tanan dunay responsabilidad sa pagsul-ob ug  sinina nga makapasayon sa uban sa pagpabiling putli ug paghupot sa sukdanan sa Diyos sa pagkabalaan diha sa hunahuna, pulong, ug buhat. (1 Ped. 1:15, 16) Ang tinuod nga gugma “dili bastos, dili mangita sa kaugalingong kaayohan niini.”—1 Cor. 13:4, 5.

PAGSUL-OB KON UNSAY HAOM SA OKASYON UG LUGAR

11, 12. Unsay tagdon dihang mamili kon unsay isul-ob?

11 Dihang mamili kon unsay isul-ob, angayng tagdon sa mga alagad sa Diyos nga “adunay panahon alang sa matag kalihokan ug . . . matag buluhaton.” (Eccl. 3:1, 17) Tinuod nga ang lainlaing klima ug pag-usab-usab sa panahon makaapektar sa atong isul-ob, maingon man ang lainlaing situwasyon. Bisan pa niana, ang sukdanan ni Jehova dili mag-usab-usab.—Mal. 3:6.

12 Sa init nga klima, mas lisod ang pagpilig estilo sa sinina nga desente ug makasaranganon ug nagpakitag maayong panghukom. Busa, pabilhan gayod sa atong mga igsoon sa pagtuo kon dili ta mosul-ob ug sinina nga fitting o luag kaayo nga madayag na ang pribadong mga parte sa lawas. (Job 31:1) Dugang pa, dihang mangaligo sa dagat o sa swimming pool, ang atong pangkaligo kinahanglang makasaranganon. (Prov. 11:2, 20) Bisag daghan sa kalibotan ang magsul-ob ug seksi kaayong pangkaligo, kita nga nag-alagad kang Jehova kinahanglang magmahunahunaon sa paghatag ug pasidungog sa balaang Diyos nga atong gihigugma.

13. Nganong ang tambag sa 1 Corinto 10:32, 33 makaapektar sa atong pagpilig sinina?

13 Duna pay laing importanteng prinsipyo nga makatabang kanato sa pagpilig haom nga sinina. Kana mao ang pagtagad sa konsensiya sa uban—Saksi man o dili. (Basaha ang 1 Corinto 10:32, 33.) Ato gayong responsabilidad ang dili pagsul-ob ug sinina nga makapandol sa uban. “Magpahimuot ang matag usa kanato sa iyang silingan sa kon unsay maayo aron sa paglig-on kaniya,” si Pablo misulat. Ug gidugang niya kini nga rason: “Kay bisan gani si Kristo wala magpahimuot sa iyang kaugalingon.” (Roma 15:2, 3) Oo, giuna ni Jesus ang pagtabang sa uban kay sa iyang gusto—importanteng bahin kini sa iyang pagbuhat sa kabubut-on sa Diyos. Busa, likayan nato ang estilo sa sinina nga atong gusto pero makapugong sa mga tawo sa pagpamati sa atong mensahe.

14. Unsaon pagbansay sa mga ginikanan ang ilang mga anak sa paghimaya sa Diyos pinaagi sa ilang sininaan?

14 Ang Kristohanong mga ginikanan may responsabilidad sa pagtudlo sa ilang mga anak sa pagpadapat sa mga prinsipyo sa Bibliya. Kini naglakip sa pagseguro nga sila ug ang ilang mga anak maningkamot sa pagpahimuot sa Diyos pinaagi sa makasaranganong sinina ug pamostura. (Prov. 22:6; 27:11) Matudloan sa mga ginikanan ang ilang mga anak nga motahod sa balaang Diyos nga ilang gisimba pinaagi sa pagpakitag maayong ehemplo ug paghatag ug mahigugmaon ug praktikal nga mga instruksiyon. Maalamon gayod nga tudloan sa mga ginikanan ang ilang mga anak kon asa mamili ug kon unsaon pagpilig haom nga sinina! Kini nagpasabot sa pagpili, dili lang kon unsay ilang gusto, kondili kon unsay makatabang nila sa pagtuman sa ilang pribilehiyo nga magrepresentar kang Jehova nga Diyos.

GAMITA SA MAALAMONG PAAGI ANG IMONG KAGAWASAN SA PAGPILI

15. Unsay makatabang nato sa pagpilig sinina?

15 Ang Pulong sa Diyos naghatag ug praktikal nga giya nga makatabang nato sa pagpilig sinina nga makahimaya sa Diyos. Bisan pa niana, makapili ta kon unsay atong isul-ob.  Lainlain tag gusto ug ikaarang sa pagpalit. Pero ang atong sinina kinahanglang hapsay, hinlo, desente, haom sa okasyon, ug dalawaton sa atong lugar.

16. Nganong dili kawang ang pagpaningkamot sa pagpangitag haom nga sinina?

16 Tinuod, dili kanunayng sayon ang paghimog desisyon nga nagpakitag maayong panghukom ug pagkamakasaranganon, ug nagkonsiderar sa tanan nga angayng tagdon. Daghang tindahan ang namaligyag uso nga sinina, busa nagkinahanglag panahon ug paningkamot ang pagpangitag desenteng sayal, bestida, ug blawos o amerkana ug pantalon nga dili fitting kaayo. Pero, seguradong mamatikdan ug pabilhan sa atong mga igsoon ang atong paningkamot sa pagpangitag nindot ug haom nga sinina. Ug bisag kinahanglan tang magsakripisyo, mobati gyod tag katagbawan dihang mahimaya nato ang atong mahigugmaong langitnong Amahan pinaagi sa atong sininaan.

17. Unsa ang pipila ka butang nga angayng konsiderahon kon ang usa ka brader magpatubo bag bungot o dili?

17 Haom ba sa mga brader nga magpatubog bungot? Ang Moisesnong Balaod nagsugo sa mga lalaki sa pagpatubog bungot. Pero ang mga Kristohanon dili na ilalom niana, ni obligado sila sa pagtuman niana. (Lev. 19:27; 21:5; Gal. 3:24, 25) Sa pipila ka kultura, ang hinlong pagkakorte nga bungot tingali dalawaton ug desenteng tan-awon ug dili makapugong sa mga tawo sa pagpamati sa mensahe sa Gingharian. Gani, ang pipila ka may katungdanang brader dunay bungot. Bisan pa niana, ang pipila tingali midesisyon nga dili magpatubog bungot. (1 Cor. 8:9, 13; 10:32) Sa ubang kultura o lugar, ang pagpatubog bungot dili kostumbre ug dili dalawaton alang sa Kristohanong mga ministro. Gani, basin makababag kana sa usa ka brader sa paghimaya sa Diyos ug makapahimo niyang salawayon.—Roma 15:1-3; 1 Tim. 3:2, 7.

18, 19. Samtang naningkamot kita nga pahimut-an ang Diyos pinaagi sa atong estilo sa sinina, sa unsang paagi makatabang ang Miqueas 6:8?

18 Mapasalamaton kita nga si Jehova wala maghatag ug detalyadong listahan sa mga lagda maylabot sa sinina ug pamostura. Hinunoa, gitugotan ta niya sa paggamit sa atong kagawasan sa pagpili ug sa paghimog maayong desisyon nga giniyahan sa mga prinsipyo sa Kasulatan. Busa bisan sa atong sinina ug pamostura, mapakita nato nga gusto natong ‘molakaw nga makasaranganon uban sa atong Diyos.’—Miq. 6:8.

19 Ang atong pagkamakasaranganon naglakip sa paghimog mapainubsanong pagsusi sa kaugalingon pinasukad sa kaputli ug pagkabalaan ni Jehova, kay bug-os kitang nagdepende kaniya alang sa kinamaayohang giya. Kini naglakip usab sa pagpakitag pagtahod sa pagbati ug opinyon sa uban. Busa, kita ‘makalakaw nga makasaranganon uban sa Diyos’ pinaagi sa pagkinabuhi uyon sa iyang taas nga sukdanan ug sa pagpakitag pagtahod sa konsensiya sa uban.

20. Unsay angayng epekto sa atong sinina ug pamostura ngadto sa uban?

20 Ang atong sininaan kinahanglang magpakita nga kita mga magsisimba ni Jehova. Angayng makita sa mga igsoon ug sa uban nga kita haom nga nagrepresentar sa atong matarong nga Diyos. Siya may taas nga sukdanan, ug kalipay nato ang pagsunod niana. Angayng komendahan ang mga igsoon kansang maayong pamostura ug panggawi nakadani sa sinserong mga tawo ngadto sa nagaluwas ug kinabuhing mensahe, ug naghimaya ug nakapalipay kang Jehova. Ang maalamong pagpili kon unsay isul-ob seguradong makahatag ug kahimayaan sa Usa nga nagbesti sa iyang kaugalingon uban ang “dignidad ug pagkahalangdon.”—Sal. 104:1, 2.