Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre—Tun-anang Edisyon  |  Pebrero 2017

Ang mga payunir nga si George Rollston ug Arthur Willis mihunong aron butangag tubig ang radyetor sa ilang awto.—Northern Territory, 1933

 GIKAN SA AMONG ARCHIVES

“Walay Libaong o Gilay-on nga Makababag”

“Walay Libaong o Gilay-on nga Makababag”

NIADTONG Marso 26, 1937, duha ka tawo nga gikapoy sa biyahe ang hinayhinayng nagdrayb sa ilang abogon nga trak padulong sa Sydney, Australia. Sukad sa ilang pagbiya sa siyudad sa miaging tuig, nakabiyahe na sila ug kapig 19,300 kilometros latas sa pipila sa kinahilitan ug kinalisorang biyaheon nga bahin sa kontinente. Sila dili mga eksplorador o adbenturero. Si Arthur Willis ug Bill Newlands maoy duha lamang sa masibotong mga payunir nga determinadong isangyaw ang maayong balita sa Gingharian sa Diyos sa halapad, hilit nga mga dapit (outback) sa Australia.

Hangtod sa ulahing bahin sa katuigan sa 1920, ang gamayng grupo sa mga Estudyante sa Bibliya * sa Australia sagad magsangyaw sa mga siyudad ug lungsod nga duol sa dagat. Sa tungatunga niini nga nasod nahimutang ang outback nga wala kaayoy namuyo, usa ka ugang rehiyon nga kapig katunga sa gidak-on sa United States. Bisan pa niana, nahibalo gayod ang mga igsoon nga ang mga sumusunod ni Jesus kinahanglang magpamatuod bahin kaniya “hangtod sa kinalay-ang dapit sa yuta,” lakip na sa outback sa Australia. (Buh. 1:8) Apan, sa unsang paagi mapalampos nila kanang dako kaayong buluhaton? Uban ang bug-os nga pagtuo nga panalanginan ni Jehova ang ilang paningkamot, determinado silang buhaton ang ilang kinamaayohan.

MGA PAYUNIR MAOY NAGSUGOD

Sa 1929, ang mga kongregasyon sa Queensland ug Western Australia naghimog ubay-ubayng sakyanan nga kompletog kahimanan alang sa ilang pagkobre sa hilit nga mga rehiyon. Gidrayb kadto sa mga payunir nga maayog panglawas nga makasugakod sa malisod nga mga kahimtang ug makaayo sa sakyanan kon kini maaberya. Sila miduaw sa daghang lugar nga wala pa masangyawi sukad.

Ang mga payunir nga dili makaarang sa pagpalit ug sakyanan mibiyahe sa outback gamit ang bisikleta. Pananglitan, niadtong 1932, ang 23 anyos nga si Bennett Brickell migikan sa Rockhampton, Queensland aron sugdan ang lima ka bulang pagsangyaw latas sa hilit, amihanang bahin sa maong estado. Kargado ang iyang bisikleta ug mga habol,  sinina, pagkaon, ug daghang libro. Dihang nahilis ang ligid sa iyang bisikleta, siya mipadayon, masaligon nga si Jehova maggiya kaniya. Gitulod niya ang iyang bisikleta sa nahibiling 320 kilometros, latas sa mga lugar diin daghan ang nangamatay sa kauhaw. Sulod sa 30 ka tuig human niadto, si Brader Brickell mibiyaheg gatosan ka libong milya sa tibuok Australia pinaagig bisikleta, motorsiklo, ug awto. Iyang gisugdan ang buluhatong pagsangyaw taliwala sa mga Aborigine. Siya nakatabang usab sa pagtukod ug bag-ong mga kongregasyon ug nahimong ilado ug tinahod sa tibuok outback.

PAGSAGUBANG SA KALISDANAN

Ang Australia maoy usa sa kinagamyag populasyon sa kalibotan, ug ilabina gyod ang outback. Busa, ang katawhan ni Jehova determinado sa pagpangitag mga tawo niadtong hilit nga mga bahin sa kontinente.

Ang mga payunir nga si Stuart Keltie ug William Torrington nagpakita nianang matanga sa determinasyon. Niadtong 1933, ilang gitabok ang Simpson Desert, usa ka lapad nga desyerto nga may mga bungtodbungtod sa balas, aron sangyawan ang lungsod sa Alice Springs, sa kinatung-an sa kontinente. Dihang naguba ang ilang gamayng awto ug kinahanglan nang biyaan, si Brader Keltie—kinsa may artipisyal nga tiil nga gama sa kahoy—mipadayon sa iyang pagsangyaw, apan sakay na sa kamelyo! Nagbunga ang paningkamot sa mga payunir dihang ilang nahimamat ang manedyer sa hotel sa William Creek, usa ka hilit nga estasyon sa tren. Ang manedyer sa hotel, si Charles Bernhardt, sa ulahi midawat sa kamatuoran, nagbaligya sa iyang hotel, ug nagpayunir nga nag-inusara sulod sa 15 ka tuig diha sa pipila sa kinaughan ug kinahilitang bahin sa Australia.

Si Arthur Willis nangandam sa iyang mga dad-onon sa pagsangyaw sa halapad nga outback sa Australia.—Perth, Western Australia, 1936

Ang unang mga payunir seguradong nanginahanglag kaisog ug kamalahutayon aron masagubang ang daghang kalisdanan. Sa ilang pagsangyaw sa outback, dihay higayon nga si Arthur Willis ug Bill Newlands, nga gihisgotan sa introduksiyon, naabtan ug duha ka semana sa pagbiyaheg 32 kilometros kay ang desyerto nahimong kalapokan tungod sa kusog nga ulan. Usahay, sila panington ug magbudlay ilalom sa naglagiting nga kainit aron itulod ang ilang trak latas sa mga bukidbukid sa balas. Motabok sab sila sa batoong mga walog ug balasong mga sapa. Kon maguba ang ilang trak, nga pirmeng mahitabo, sila magbaktas o magbisikletag pipila ka adlaw ngadto sa kinadul-ang lungsod ug maghulat sulod sa pipila ka semana alang sa bag-ong mga piyesa. Bisan pa sa maong mga kalisdanan, sila nagpabiling positibo. Sa ulahi, gihisgotan ni Arthur Willis ang giingon sa usa ka gula sa The Golden Age: “Walay libaong o gilay-on nga makababag sa Iyang mga saksi.”

Ang dugay nang payunir nga si Charles Harris nag-ingon nga ang kahilit ug kalisod sa outback mas nakapasuod niya kang Jehova. Siya midugang: “Mas maayong magkinabuhi nga gamay rag kabtangan. Kon si Jesus andam nga matulog sa gawas kon gikinahanglan, nan angayng malipay sab ta sa pagbuhat sa susama kon gikinahanglan kana sa atong asaynment.” Kanay gihimo sa daghang payunir. Tungod sa ilang padayong paningkamot, ang maayong balita nakaabot sa tanang bahin sa kontinente, nga nakatabang sa daghan sa pagdapig sa Gingharian sa Diyos.

^ par. 4 Gisagop sa mga Estudyante sa Bibliya ang ngalang mga Saksi ni Jehova niadtong 1931.Isa. 43:10.