Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) NOBYEMBRE 2016

 GIKAN SA AMONG ARCHIVES

“Mga Magmamantala sa Britain—Pagmata!!”

“Mga Magmamantala sa Britain—Pagmata!!”

DIHAY tin-aw ug dinaliang awhag: “Mga Magmamantala sa Britain—Pagmata!!” (Informant, * Disyembre 1937, London nga edisyon) Ang makapahinuklog nga sub-ulohan midugang: “Walay Dakong Pag-uswag Sulod Na sa 10 ka Tuig.” Ang unang panid nga nagpakita sa 10 ka tuig nga report sa pag-alagad gikan sa 1928 hangtod sa 1937 nagpamatuod niana.

DAGHAN RA KAAYONG PAYUNIR?

Unsay hinungdan nga nawad-ag kadasig sa pagsangyaw ang mga igsoon sa Britain? Mopatim-aw nga nahimo na lang rutina sa mga kongregasyon ang pag-alagad, nga padayong naghimo sa kon unsa nay naandan. Dugang pa, ang sangang buhatan midesisyon nga ang teritoryo igo na alang sa 200 ka payunir, nga nagsangyaw sa hilit nga mga teritoryo imbes uban sa mga kongregasyon. Busa, giingnan sa sangang buhatan kadtong nagplanong magpayunir nga wala nay igong teritoryo sa Britain para nila, ug giawhag sila nga moalagad sa ubang nasod sa Europe. Makapalipay nga daghang payunir ang mibiya sa Britain ug miadto sa ubang nasod sama sa France, bisag gamay ra o wala silay nahibaloan sa pinulongan didto.

“AWHAG NGA MOLIHOK”

Ang 1937 nga artikulo sa Informant nagtakdag tumong alang sa 1938: Usa ka milyong oras! Kana nga tumong sayon rang kab-oton kon ang mga magmamantala mogugol ug 15 ka oras kada bulan sa pagsangyaw ug ang mga payunir, 110 ka oras. Ang mga sugyot naglakip sa pag-organisar ug mga grupo nga mosangyaw ug lima ka oras sa usa ka adlaw ug sa pagbalikduaw, ilabina sa mga gabii sa tungatunga sa semana.

Madasigong mga payunir nga puliki sa ministeryo

Kining pagpasiugda pag-usab sa ministeryo nakadasig sa daghan. “Usa kadto ka awhag gikan sa hedkuwarter, nga gipangandoy sa kadaghanan namo ug sa wala madugay nagpatunghag maayong mga resulta,” miingon si Hilda Padgett. * Si Sister E. F. Wallis mireport: “Maayo kaayo ang sugyot nga mosangyaw ug lima ka oras sa usa ka adlaw! May lain pa bang makapalipay kay sa paggahin ug enterong adlaw sa pag-alagad sa Ginoo? . . . Tingali, manguli mi nga gikapoy, pero malipayon!” Gibati sa batan-ong si Stephen Miller ang pagkadinalian ug misanong siya sa awhag. Gusto niya kining buhaton samtang may kahigayonan siya! Nahinumdom siya sa mga grupong magbisikleta nga manangyaw sa tibuok adlaw, ug sa ting-init magpatokar ug rekording sa mga pakigpulong panahon sa kagabhion. Sila madasigong nakigbahin sa information march gamit ang plakard ug nanagtag ug magasin sa kadalanan.

Ang Informant naghisgot usab ug bag-ong awhag: “Gikinahanglan ang 1,000 ka payunir.” Usa ka bag-ong instruksiyon nag-ingon nga ang mga payunir dili na mosangyaw nga silasila ra kondili kauban na sa mga kongregasyon, nga mosuportar ug magdasig kanila. “Daghang igsoon ang nakaamgo nga kinahanglan silang magpayunir,” nahinumdom si Joyce Ellis  (Barber sa dalaga pa). “Bisag 13 anyos pa lang ko niadtong panahona,” siya miingon, “mao toy gusto nakong buhaton; gusto kong magpayunir.” Nakab-ot niya ang iyang tumong sa Hulyo 1940, sa edad nga 15. Si Peter, nga sa ulahi nabana ni Joyce, nakadungog sa awhag nga “Pagmata,” nga nagtabang niya sa “pagpamalandong bahin sa pagpayunir.” Sa Hunyo 1940, sa edad nga 17, nagbisikleta siyag 105 kilometros ngadto sa Scarborough, nga iyang bag-ong asaynment ingong payunir.

Usa ka pananglitan sa nagsakripisyo sa kaugalingon nga bag-ong mga payunir mao si Cyril ug Kitty Johnson. Midesisyon silang ibaligya ang ilang balay ug kabtangan aron suportahan ang ilang bug-os panahong ministeryo. Miundang si Cyril sa trabaho, ug sulod sa usa ka bulan andam na silang magpayunir. Nahinumdom siya: “Masaligon kaayo mi. Gibuhat namo kadto nga kinabubut-on ug malipayon.”

PUY-ANAN SA MGA PAYUNIR

Samtang nagkadaghan ang mga payunir, ang mga brader nga may katungdanan naghunahunag praktikal nga mga paagi aron masuportahan sila. Si Jim Carr, nga nag-alagad ingong zone servant (karon gitawag ug tigdumala sa sirkito) niadtong 1938, mituman sa sugyot nga mangitag puy-anan sa mga payunir diha sa mga siyudad. Ang grupo sa mga payunir gidasig nga mag-uban pagpuyo ug pagtrabaho, sa ingon mamenosan ang gasto. Sa Sheffield, giabangan nila ang usa ka dakong balay, nga gidumala sa usa ka responsableng brader. Ang lokal nga kongregasyon miamot ug kuwarta ug muwebles. Nahinumdom si Jim: “Ang tanan nagtinabangay aron molampos.” Napulo ka kugihang payunir ang nagpuyo didto, nga naghupot ug maayong espirituwal nga rutina. “Ang [inadlawng] teksto hisgotan kada pamahaw,” ug “ang mga payunir moadto kada adlaw sa ilang teritoryo diha sa lainlaing bahin sa siyudad.”

Midaghan ang bag-ong payunir sa Britain

Ang mga magmamantala ug payunir misanong sa awhag, ug nakab-ot ang tumong nga usa ka milyong oras niadtong 1938. Gani, ang report nagpakitag pag-uswag sa tanang bahin sa buluhaton sa kanataran. Sulod sa lima ka tuig, halos natriple ang gidaghanon sa mga magmamantala sa Britain. Ang pagpasiugda pag-usab sa buluhaton sa Gingharian nagpalig-on sa katawhan ni Jehova sa pagsagubang sa mga kalisdanan sa moabotay nga mga tuig sa gubat.

Karon, ang gidaghanon sa mga payunir sa Britain miuswag na usab, samtang nagkaduol ang gubat sa Diyos sa Armagedon. Sa milabayng 10 ka tuig, padayong nag-uswag ang gidaghanon sa mga payunir, nga miabot ug 13,224 niadtong Oktubre 2015. Kini nga mga payunir nagmata gayod o nakaamgo nga ang bug-os panahong ministeryo maoy usa sa labing maayong mga paagi sa paggamit sa ilang kinabuhi.

^ par. 3 Sa ulahi gitawag ug Atong Ministeryo sa Gingharian.

^ par. 8 Ang Bantayanang Torre sa Oktubre 1, 1995, panid 19-24, nagpakita sa sugilanon sa kinabuhi ni Sister Padgett.