Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) NOBYEMBRE 2016

Giorganisar Uyon sa Basahon sa Diyos

Giorganisar Uyon sa Basahon sa Diyos

“Si Jehova pinaagi sa kaalam nagtukod sa yuta. Siya lig-ong nagpahimutang sa kalangitan pinaagi sa katakos sa pag-ila.”—PROV. 3:19.

AWIT: 105, 107

1, 2. (a) Unsay reaksiyon sa pipila bahin sa ideya nga ang Diyos dunay organisasyon? (b) Unsay atong hisgotan niining artikuloha?

DUNA bay organisasyon ang Diyos? “Wala ka magkinahanglag organisasyon nga mogiya nimo,” moingon tingali ang pipila. “Ang gikinahanglan lang mao ang personal nga relasyon sa Diyos.” Husto ba ang maong panglantaw? Unsay gipakita sa mga ebidensiya?

2 Niining artikuloha, atong hisgotan ang mga ebidensiya nga si Jehova, ang Diyos sa kahusay, mao ang Tig-organisar nga walay sama. Konsiderahon usab nato kon sa unsang paagi kita mosanong sa instruksiyon gikan sa organisasyon ni Jehova. (1 Cor. 14:33, 40) Sa unang siglo C.E. ug sa atong adlaw, ang Kasulatan nakatabang sa yutan-ong bahin sa organisasyon ni Jehova sa pagbuhat sa dakong buluhaton nga pagmantala sa maayong balita. Tungod kay kanunay tang nagsalig sa Bibliya ug nagsunod sa mga instruksiyon sa organisasyon, kita nagpalambo sa kahinlo, kalinaw, ug panaghiusa sa tibuok kongregasyon.

SI JEHOVA, ANG TIG-ORGANISAR NGA WALAY SAMA

3. Unsay nakapakombinsir nimo nga si Jehova ang Tig-organisar nga walay sama?

3 Ang kalalangan nagpamatuod nga ang Diyos mao ang  Tig-organisar nga walay sama. “Si Jehova pinaagi sa kaalam nagtukod sa yuta,” nag-ingon ang Bibliya. “Siya lig-ong nagpahimutang sa kalangitan pinaagi sa katakos sa pag-ila.” (Prov. 3:19) Ang atong nahibal-an maoy “kadaplinan lamang sa . . . dalan [sa Diyos],” ug “hunghong ra ang atong nadungog bahin kaniya.” (Job 26:14) Bisan pa niana, ang atong gamayng nahibal-an bahin sa mga planeta, bituon, ug galaksiya magpalihok nato sa pag-ila nga kining mga butang sa kawanangan organisado kaayo. (Sal. 8:3, 4) Ang mga galaksiya dunay milyonmilyong bituon—ang tanan hapsay nga naglihok. Gani, ang mga planeta sa atong solar system nagsubay sa mga orbit libot sa adlaw nga daw nagsunod sa balaod sa trapiko! Way duhaduha nga ang makapahinganghang kahapsay sa uniberso motabang nato nga makita nga si Jehova, kinsa hanas kaayong “nagbuhat sa kalangitan” ug sa yuta, takos sa atong pagdayeg, pagkamaunongon, ug pagsimba.—Sal. 136:1, 5-9.

4. Nganong daghang pangutana ang wala matubag sa siyensiya?

4 Ang siyensiya nagpadayag ug daghang impormasyon bahin sa uniberso ug sa Yuta, ug naghatag kinig mga kaayohan sa lainlaing bahin sa atong kinabuhi. Apan daghang pangutana ang wala matubag sa siyensiya. Pananglitan, ang mga astronomo dili tukmang makapatin-aw kon sa unsang paagi ang uniberso milungtad o kon nganong ania kita sa Yuta diin dagaya ang kinabuhi. Dugang pa, ang katawhan sa katibuk-an dili makapatin-aw kon nganong gusto kaayo natong mabuhi hangtod sa hangtod. (Eccl. 3:11) Nganong daghan kaayong importante apan wala matubag nga mga pangutana? Usa sa mga hinungdan mao nga daghang siyentipiko ug uban pa ang nagpasiugda sa panghunahuna nga walay Diyos ug nag-endorso sa teoriya sa ebolusyon. Apan sa iyang Basahon, gitubag ni Jehova ang mga pangutanang nakapabalaka sa mga tawo bisan diin.

5. Sa unsang mga paagi kita nagdepende sa mga balaod sa kinaiyahan?

5 Kita nagdepende sa kasaligan ug dili mausab nga mga balaod sa kinaiyahan nga gimugna ni Jehova. Ang mga elektrisyan, tubero, inhenyero, piloto, ug tig-opera nagdepende niini nga mga balaod aron mahimo ang ilang trabaho. Pananglitan, ang mga tig-opera nagdepende sa kamatuoran nga ang mga parte sa lawas sa tawo dili magbalhinbalhin. Busa ang tig-opera dili na kinahanglang mangita kon asa nahimutang ang kasingkasing sa pasyente. Ug kitang tanan nagtahod sa balaod sa kinaiyahan. Kon atong supakon ang balaod sa grabidad, kini mahimong moresulta sa kamatayon!

GIORGANISAR SA DIYOS

6. Nganong angay natong dahomon nga mahimong organisado ang mga magsisimba ni Jehova?

6 Maayo gayong pagkaorganisar ang uniberso. Busa, angay natong dahomon nga gusto ni Jehova nga mahimong organisado ang iyang mga magsisimba. Gani, ang Diyos nagtagana kanato sa Bibliya ingong giya. Ang pagkinabuhi nga walay giya sa organisasyon sa Diyos ug sa iyang mga sukdanan moresulta sa kagul-anan.

7. Unsay nagpakita nga ang Bibliya maayo kaayong pagkaorganisar nga basahon?

7 Ang Bibliya dili kay usa lang ka koleksiyon sa lainlaing basahon sa mga Hudiyo ug Kristohanon. Hinunoa, kini usa ka maayong pagkaorganisar nga basahon—inspirado sa Diyos nga obra maestra. Ang matag basahon sa Bibliya konektado sa usag usa. Gikan sa Genesis hangtod sa Pinadayag, usa ray tema sa Bibliya—ang pagbindikar sa pagkasoberano ni Jehova ug ang katumanan sa iyang katuyoan sa yuta pinaagi sa iyang Gingharian ubos ni Kristo, ang gisaad nga “binhi.”—Basaha ang Genesis 3:15; Mateo 6:10; Pinadayag 11:15.

8. Nganong makaingon ta nga ang mga Israelinhon maayong pagkaorganisar?

8 Ang karaang Israel maoy panig-ingnan sa pagkaorganisado. Pananglitan, ubos sa Moisesnong Balaod, dihay mga “babaye nga naghimog  organisadong pag-alagad sa ganghaan sa tolda nga tagboanan.” (Ex. 38:8) Ang pagbalhinbalhin sa kampo ug tabernakulo sa Israel gihimo sa hapsayng paagi. Sa ulahi, giorganisar ni Haring David ang mga Levihanon ug mga saserdote ngadto sa mga dibisyon. (1 Cron. 23:1-6; 24:1-3) Ug dihang gituman nila si Jehova, ang mga Israelinhon gipanalanginan ug kahapsay, kalinaw, ug panaghiusa.—Deut. 11:26, 27; 28:1-14.

9. Unsay nagpakita nga organisado ang Kristohanong kongregasyon sa unang siglo?

9 Ang Kristohanong kongregasyon sa unang siglo organisado, ug kini nakabenepisyo sa instruksiyon sa nagamandong lawas, nga sa sinugdan gilangkoban sa mga apostoles. (Buh. 6:1-6) Sa ulahi, may mga brader nga gidugang niana nga nagamandong lawas. (Buh. 15:6) Ang mga tambag ug instruksiyon gitagana usab pinaagi sa inspiradong mga sulat gikan sa mga brader nga membro o kaha nag-alagad uban sa unang siglong nagamandong lawas. (1 Tim. 3:1-13; Tito 1:5-9) Sa unsang paagi nakabenepisyo ang mga kongregasyon sa pagsunod sa instruksiyon sa nagamandong lawas?

10. Unsay resulta dihang gisunod sa mga kongregasyon sa unang siglo ang mga sugo nga gidesisyonan sa nagamandong lawas? (Tan-awa ang hulagway sa sinugdan sa artikulo.)

10 Basaha ang Buhat 16:4, 5. Ang mga brader nga nagapanaw ingong representante sa nagamandong lawas nagpahibalo sa “mga sugo nga gidesisyonan sa mga apostoles ug mga ansiyano nga didto sa Jerusalem.” Dihang gisunod sa mga kongregasyon ang maong mga sugo, sila “padayong nalig-on diha sa pagtuo ug miuswag sa gidaghanon adlaw-adlaw.” Kini ba nga asoy sa Bibliya dunay leksiyon nga ikapadapat nato sulod sa organisasyon sa Diyos karon?

MOSUNOD KA BA SA INSTRUKSIYON?

11. Unsay angayng buhaton sa gitudlong mga brader dihang makadawat silag instruksiyon gikan sa organisasyon sa Diyos?

11 Unsay angayng buhaton sa mga membro sa Komite sa Sangang Buhatan o Country Committee, tigdumala sa sirkito, ug mga ansiyano sa kongregasyon dihang sila makadawat ug instruksiyon gikan sa organisasyon sa Diyos karon? Ang Basahon ni Jehova nag-awhag natong tanan nga magmasinugtanon ug magmapinasakopon. (Deut. 30:16; Heb. 13:7, 17) Walay dapit diha sa organisasyon sa Diyos ang pagkahinawayon o pagkarebelyoso, kay ang maong kinaiya makabungkag sa atong mahigugmaon, malinawon, ug nahiusang mga kongregasyon. Siyempre, walay maunongong Kristohanon ang gustong mosundog kang Diotrefes, kinsa dili matinahoron ug dili maunongon. (Basaha ang 3 Juan 9, 10.) Mahimong pangutan-on nato ang kaugalingon: ‘Gidasig ba nako ang mga igsoon nga magmaunongon kang Jehova? Gipadapat ug gisuportahan ba dayon nako ang instruksiyon nga gihatag sa mga brader nga nagapanguna?’

12. Unsang kausaban ang gihimo maylabot sa pagtudlog mga ansiyano ug ministeryal?

12 Konsideraha ang di pa dugayng desisyon nga gihimo sa Nagamandong Lawas. Ang “Mga Pangutana Gikan sa mga Magbabasa” sa Nobyembre 15, 2014 nga Bantayanang Torre, naghisgot sa kausaban kon sa unsang paagi itudlo ang mga ansiyano ug ministeryal nga alagad. Sumala sa maong artikulo, ang nagamandong lawas sa unang siglo naghatag ug awtoridad sa nagapanawng mga magtatan-aw sa paghimo niana. Base sa maong sumbanan, sukad sa Septiyembre 1, 2014, ang mga tigdumala sa sirkito na ang nagtudlog mga ansiyano ug ministeryal. Sination sa tigdumala sa sirkito ang mga brader nga girekomendar ug mosangyaw siya uban nila kon posible. Obserbahan sab niya ang pamilya sa brader nga girekomendar. (1 Tim. 3:4, 5) Konsiderahon pag-ayo sa mga ansiyano sa kongregasyon ug sa tigdumala sa sirkito ang Kasulatanhong kuwalipikasyon para sa ministeryal ug ansiyano.—1 Tim. 3:1-10, 12, 13; 1 Ped. 5:1-3.

13. Sa unsang paagi ikapakita nato nga atong gisuportahan ang instruksiyon gikan sa mga ansiyano?

 13 Kinahanglan natong sundon ang binase sa Bibliyang instruksiyon gikan sa mga ansiyano. Kining maunongong mga magbalantay sulod sa organisasyon sa Diyos gigiyahan sa “makapahimsog,” o mapuslanon, nga instruksiyong makita sa Basahon sa Diyos. (1 Tim. 6:3) Hinumdomi ang tambag ni Pablo bahin sa mga badlonganon sa kongregasyon. Ang pipila “wala gayod magtrabaho apan nanghilabot sa mga butang nga wala silay labot.” Seguradong gitambagan sila sa mga ansiyano apan padayong gibalewala ang tambag. Sa unsang paagi makiglabot ang kongregasyon sa maong mga tawo? Si Pablo nagsugo: “Timan-i ninyo siya, hunong na sa pagpakig-uban kaniya.” Balanse ang maong tambag kay wala kini mag-ingon nga isipon ang maong tawo nga kaaway. (2 Tes. 3:11-15) Karon, ang mga ansiyano mahimong mohatag ug pakigpulong ingong pasidaan kon dunay padayong magkinabuhi sa paagi nga makadaot sa reputasyon sa kongregasyon, sama nianang pagpakigdeyt sa dili Saksi. (1 Cor. 7:39) Unsay imong reaksiyon dihang ang mga ansiyano mohatag sa maong pakigpulong? Kon nahibalo ka sa kahimtang nga gihisgotan sa pakigpulong, likayan ba nimo ang pagpakigsuod sa maong indibiduwal? Ang imong gugma ug lig-ong baroganan mahimong magpalihok kaniya sa pagbiya sa dili maayong binuhatan. [1]

MENTINAHA ANG KAHINLO, KALINAW, UG PANAGHIUSA

14. Sa unsang paagi kita makaamot sa kahinlo sa kongregasyon?

14 Makaamot ta sa espirituwal nga kahinlo sa kongregasyon pinaagi sa pagsunod sa instruksiyon gikan sa Pulong sa Diyos. Tagda ang situwasyon sa karaang Corinto. Gihimo ni Pablo ang tanan sa pagsangyaw nianang siyudara, ug gihigugma niya ang iyang kaubang “mga balaan” didto. (1 Cor. 1:1, 2) Busa lagmit naguol siya pag-ayo dihang nahibal-an niya ang problema bahin sa seksuwal nga imoralidad nga gitugotan sulod sa kongregasyon! Gisugo ni Pablo ang mga ansiyano sa pagtugyan sa maong imoral nga tawo ngadto kang Satanas—o sa pagpalagpot kaniya. Aron magpabiling hinlo ang kongregasyon, kinahanglang tangtangon sa mga ansiyano ang “lebadura.” (1 Cor. 5:1, 5-7, 12) Dihang atong suportahan ang desisyon sa mga ansiyano sa pagpalagpot sa dili mahinulsolong makasasala, mitabang ta sa pagmentinar sa kahinlo sa kongregasyon ug tingali mapalihok ang usa sa paghinulsol ug sa pagpangayo sa kapasayloan ni Jehova.

15. Sa unsang paagi mamentinar nato ang kalinaw sa kongregasyon?

15 May lain pang problema sa Corinto. Gidemanda sa pipila ka igsoon ang ilang isigkamagtutuo. Si Pablo nangutana kanila: “Nganong dili hinuon ninyo tugotan nga kamo mabuhatan ug sayop?” (1 Cor. 6:1-8) Ang susamang kahimtang naglungtad karon. Usahay, matugaw ang kalinaw tali sa mga igsoong magkasosyo kon mabangkrap ang negosyo o may akusasyon sa pagpanglimbong. Gidemanda sa pipila ang ilang mga igsoon, apan ang Basahon sa Diyos nagtudlo kanato nga mas maayong magpaalkanse imbes maghatag ug kaulawan sa ngalan sa Diyos o makatugaw sa panaghiusa sa kongregasyon. [2] Aron masulbad ang seryosong mga problema ug dili pagsinabtanay, angay natong ipadapat ang tambag ni Jesus. (Basaha ang Mateo 5:23, 24; 18:15-17.) Kon buhaton nato kana, atong mapalambo ang panaghiusa taliwala sa mga magsisimba ni Jehova.

16. Nganong angay natong dahomon nga mahiusa ang katawhan sa Diyos?

16 Ang Basahon ni Jehova nagpakita kon nganong angay natong dahomon nga magkahiusa ang iyang katawhan. Ang salmista miawit: “Tan-awa! Pagkamaayo ug pagkamakalilipay nga ang mga igsoon mag-uban pagpuyo  diha sa panaghiusa!” (Sal. 133:1) Dihang sila nagmasinugtanon kang Jehova, ang mga Israelinhon organisado ug nahiusa. Sa pagtagna bahin sa kahimtang sa iyang katawhan sa umaabot, ang Diyos mipahayag: “Hiusahon ko sila, sama sa usa ka panon sa mga karnero diha sa toril.” (Miq. 2:12) Dugang pa, si Jehova nagtagna pinaagi kang propetang Sofonias: “Ihatag ko sa mga katawhan ang kausaban ngadto sa putli nga pinulongan [sa Kasulatanhong kamatuoran], aron silang tanan magatawag sa ngalan ni Jehova, aron magaalagad kaniya abaga sa abaga [o, magasimba kaniya nga magkahiusa].” (Sof. 3:9) Makapalipay gayod ang pagsimba kang Jehova nga nagkahiusa!

Ang mga ansiyano maningkamot sa paghatag ug espirituwal nga tabang niadtong nakahimog sayop nga lakang (Tan-awa ang parapo 17)

17. Aron mamentinar ang panaghiusa ug kahinlo sa kongregasyon, unsay angayng buhaton sa mga ansiyano kon dunay makahimog seryosong sala?

17 Aron mamentinar ang panaghiusa ug kahinlo sa kongregasyon, kinahanglang atimanon dayon sa mga ansiyano ang hudisyal nga mga kaso ug himoon nila kini sa mahigugmaong paagi. Nasayod si Pablo nga ang gugma sa Diyos wala giyahi sa basta pagbati lang, ug dili Siya magpakabuta sa kasal-anan. (Prov. 15:3) Busa si Pablo wala magpanuko sa pagsulat sa Unang Corinto, usa ka prangka pero mahigugmaong sulat. Ang Ikaduhang Corinto, nga gisulat pipila ka bulan human niana, nagpakita nga may pag-uswag kay gipadapat sa mga ansiyano ang mga instruksiyon ni Pablo. Kon ang usa ka Kristohanon makahimog sayop nga lakang sa dili pa niya kini mamatikdan, angayng paningkamotan sa kuwalipikadong mga lalaki nga ipasibo siya pag-usab diha sa espiritu sa kalumo.—Gal. 6:1.

18. (a) Sa unsang mga paagi ang tambag sa Pulong sa Diyos nakatabang sa mga kongregasyon sa unang siglo? (b) Unsay hisgotan sa sunod nga artikulo?

18 Tin-aw nga ang tambag sa Basahon sa Diyos nakatabang sa mga Kristohanon sa Corinto ug sa bisan diin sa pagmentinar sa kahinlo, kalinaw, ug panaghiusa sa ilang mga kongregasyon. (1 Cor. 1:10; Efe. 4:11-13; 1 Ped. 3:8) Ingong resulta, ang atong mga igsoon niadtong panahona nagmalamposon sa ministeryo. Gani, si Pablo nakaingon nga ang maayong balita ‘nawali sa tibuok kalalangan ilalom sa langit.’ (Col. 1:23) Karon, tungod sa paningkamot niadtong sakop sa nagkahiusang organisasyon, ang kahibalo sa talagsaong katuyoan sa Diyos ginasangyaw sa tibuok kalibotan. Ang sunod nga artikulo mohatag ug dugang nga pamatuod nga sila nagpabili gayod sa Bibliya ug determinadong magpasidungog sa Soberanong Ginoong Jehova.—Sal. 71:15, 16.

^ [1] (parapo 13) Tan-awa ang Organisado Aron Buhaton ang Kabubut-on ni Jehova, p. 134-136.

^ [2] (parapo 15) Alang sa impormasyon bahin sa mga situwasyon diin ang usa ka Kristohanon modesisyon tingali nga idemanda ang laing igsoon, tan-awa ang Magpabilin Kamo sa Gugma sa Diyos, p. 223, ftn.