Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) HULYO 2016

Si Eric ug Amy

Sila Kinabubut-ong Nagtanyag sa Ilang Kaugalingon—Sa Ghana

Sila Kinabubut-ong Nagtanyag sa Ilang Kaugalingon—Sa Ghana

DUNA ka bay kaila nga igsoon nga mibalhin sa laing nasod, diin nanginahanglan ug dugang magsasangyaw? Sagad tawgon nato silag mga need-greater. Napangutana na ba nimo ang imong kaugalingon: ‘Unsay nakapalihok nila aron didto mag-alagad sa laing nasod? Unsang pagpangandam ang ilang gihimo? Mahimo ba sab nako nâ?’ Siyempre, aron matubag kana, sila mismo ang atong pangutan-on.

UNSAY NAGPALIHOK NILA?

Nganong nahunahunaan nimo nga didto mag-alagad sa laing nasod diin mas dako ang panginahanglan? Si Amy karon mga 35 anyos na ug gikan sa United States. Siya miingon: “Sulod sa katuigan, naghunahuna kong moalagad sa laing nasod, pero morag dili gyod nako mahimo.” Unsay nakapausab sa iyang panglantaw? “Niadtong 2004, giimbitar ko sa magtiayong nag-alagad sa Belize nga bisitahon sila ug giawhag ko nilang magpayunir ug usa ka bulan uban nila. Gihimo nako to ug giganahan ko pag-ayo! Paglabayg usa ka tuig, mibalhin ko sa Ghana aron didto magpayunir.”

Si Aaron ug Stephanie

Pipila ka tuig kanhi, si Stephanie, karon hapit nang mag-30 anyos ug gikan sa United States, namalandong sa iyang kahimtang: ‘Maayo kog panglawas ug walay obligasyon sa pamilya. Makahimo kog labaw pa alang kang Jehova kay sa akong ginabuhat karon.’ Ang matinud-anong pagsusi sa kaugalingon nakapalihok niya nga mobalhin sa Ghana aron mouswag pa ang iyang ministeryo. Si Filip ug Ida, edaran nga magtiayong payunir nga gikan sa Denmark, nangandoy nga mobalhin sa lugar nga dunay dakong panginahanglan. Nangita silag paagi nga matuman ang ilang pangandoy. “Dihang may kahigayonan,” matod ni Filip, “samag miingon si Jehova: ‘Sige adto na!’” Niadtong 2008, sila mibalhin sa Ghana ug nag-alagad didto sulod sa kapig tulo ka tuig.

Si Brook ug Hans

 Si Hans ug Brook, magtiayong payunir nga kapig 30 anyos, nag-alagad sa United States. Niadtong 2005, mitabang sila sa mga nabiktima sa Hurricane Katrina. Sa ulahi, miaplay sila para sa internasyonal nga pagpanukod pero wala matawag. “Dayon,” si Hans nahinumdom, “nadunggan namo sa pakigpulong sa kombensiyon ang bahin kang Haring David diin iyang gidawat nga dili siya ang magtukod sa templo, maong giusab ni David ang iyang tumong. Nakatabang to namo nga masabtang dili daotan nga usbon ang among espirituwal nga mga tumong.” (1 Cron. 17:1-4, 11, 12; 22:5-11) Si Brook midugang, “Gusto ni Jehova nga manuktok mi sa laing pultahan.”

Dihang nakadungog ug nindot nga mga eksperyensiya gikan sa ilang mga higala nga nakaalagad sa ubang nasod, si Hans ug Brook nadasig nga magpayunir sa laing nasod. Niadtong 2012, nangadto sila sa Ghana aron tabangan ang sign language nga kongregasyon sulod sa upat ka bulan. Bisag kinahanglang mobalik sa United States, ang ilang eksperyensiya didto sa Ghana nakapalalom sa ilang tinguha nga unahon kanunay ang Gingharian. Sukad niadto, nakatabang sila sa pagtukod sa sangang buhatan sa Micronesia.

PAGPANGANDAM ARON MAKAB-OT ANG TUMONG

Sa unsang paagi ka nangandam aron makaalagad sa dapit diin dako ang panginahanglan? “Nag-research ko ug mga artikulo diha sa Bantayanang Torre bahin sa pag-alagad diin mas dako ang panginahanglan,” miingon si Stephanie. * “Gisulti nako sa mga ansiyano, sa tigdumala sa sirkito, ug sa iyang asawa ang akong tinguha sa pag-alagad sa laing nasod. Labaw sa tanan, pirme nako ning iapil sa akong pag-ampo kang Jehova.” Sa samang higayon, gipasimple ni Stephanie ang iyang kinabuhi aron makatigom ug pangsuporta sa iyang kaugalingon kon mobalhin na siya sa laing nasod.

Si Hans miingon: “Nag-ampo mi kang Jehova aron magiyahan mi kon asa  angayng moadto. Among giapil sa pag-ampo ang espesipikong petsa kon kanus-a namo buhaton ang among plano.” Ang magtiayon nagpadalag sulat sa upat ka sangang buhatan. Dihang nakadawat silag maayong tubag gikan sa sangang buhatan sa Ghana, sila mibiyahe didto ug nagplanong moestar sa duha ka bulan. “Ganahan kaayo ming magsangyaw kauban sa mga igsoon,” miingon si Hans, “maong nagdugay mi didto.”

Si Adria ug George

Si George ug Adria, magtiayon nga hapit nang mag-40 anyos ug gikan sa Canada, kanunayng naghunahuna nga panalanginan ni Jehova ang maayong desisyon, dili lang ang maayong intensiyon. Busa, mihimo silag mga paagi aron makab-ot ang ilang tumong. Ilang gikontak ang usa ka sister nga nag-alagad sa Ghana, ug daghan silag pangutana kaniya. Gisulatan sab nila ang sangang buhatan sa Canada ug sa Ghana. “Ug,” si Adria miingon, “naningkamot ming mas mapasimple pa ang among kinabuhi.” Ang maong mga desisyon nakatabang nila sa pagbalhin sa Ghana niadtong 2004.

PAGSAGUBANG SA MGA PROBLEMA

Unsang mga problema ang imong naatubang pagbalhin nimo, ug giunsa nimo kana pagsagubang? Para kang Amy, ang una niyang problema mao ang kamingaw. “Ang tanan lahi gyod kaayo sa akong naandan.” Unsay nakatabang niya? “Dihang tawgan ko sa akong pamilya ug ingnan ko nila nga giapresyar nila ang akong pag-alagad, nakatabang ni nako nga mahunahunaan kanunay ang rason sa akong pagbalhin. Kadugayan, tawgan ko nila pinaagig video call. Kay makita namo ang usag usa, samag naa ra sila  sa duol.” Si Amy miingon nga ang pagpakigsuod sa hamtong nga sister nakatabang niya nga masabtan ang laing kostumbre. “Ang akong amiga nahimo nakong duolanan dihang dili nako masabtan ang reaksiyon sa uban. Sa iyang tabang, akong nakat-onan kon unsay angay ug dili angayng buhaton. Importante kaayo ni aron magpabilin kong malipayon sa ministeryo.”

Si George ug Adria miingon nga pagbalhin nila sa Ghana, ilang gibati nga mora silag mibalik sa karaang panahon. “Imbes mag-washing machine, mogamit mig balde. Mas dugay ug 10 ka beses ang pag-andam ug pagkaon kay sa among naandan,” miingon si Adria. “Pero wala madugay, ang lisod nga mga situwasyon nahimo rang bag-ong mga eksperyensiya.” Si Brook miingon: “Bisag daghang babag ang naatubang namong mga payunir, kontento kaayo mi. Kon among hinumdoman ang matag makapadasig nga mga eksperyensiya, sama kinig nindot nga pungpong sa bulak nga gimahal namo pag-ayo.”

MAKAPATAGBAW NGA MINISTERYO

Nganong irekomendar nimo sa uban kini nga pag-alagad? “Makapalipay kaayo ang pagsangyaw sa teritoryo diin daghan ang gustong makakat-on sa kamatuoran ug gustong magpatuon ug Bibliya kada adlaw,” miingon si Stephanie. “Ang pag-alagad sa lugar nga dunay dakong panginahanglan maoy usa sa maayong mga desisyon nga akong nahimo sukad!” Pagka-2014, si Stephanie naminyo kang Aaron, ug sila nag-alagad karon sa sangang buhatan sa Ghana.

“Maayo kaayo ni nga eksperyensiya,” miingon si Christine, payunir gikag Germany ug kapig 30 anyos na. Si Christine nag-alagad sa Bolivia sa wala pa mobalhin sa Ghana. Siya miingon: “Kay layo sa akong pamilya, pirme kong magpatabang kang Jehova. Mas nahimo siyang tinuod sa ako karon. Ako sab nakita ang talagsaong panaghiusa sa katawhan ni Jehova. Nakahatag ni nakog katagbawan.” Dili pa dugay, si Christine naminyo kang Gideon, ug nag-alagad sila karon sa Ghana.

Si Christine ug Gideon

Gisaysay ni Filip ug Ida kon unsay ilang gihimo aron mouswag ang ilang Bible study. “Sa una, diha mi 15 o kapin pang Bible study, pero among gilimitahan sa 10 aron maatiman namo sila pag-ayo.” Nakabenepisyo ba ang ilang mga Bible study? Si Filip miingon: “Gitun-an nakog Bibliya ang batan-ong si Michael. Puwede ming magtuon kada adlaw ug nangandam siya pag-ayo maong nahuman namo ang librong Gitudlo sa Bibliya sa usa ka bulan. Human niadto, si Michael nahimong dili bawtismadong magmamantala. Sa unang adlaw niya sa pagsangyaw, gipangutana ko niya, ‘Puwede ba ko nimong tabangan sa akong mga Bible study?’ Nasorpresa ko! Miingon si Michael nga nakasugod siyag tulo ka Bible study ug magpatabang siya sa pagdumala niini.” Hunahunaa lang, dako kaayo ang panginahanglan nga bisag ang mga Bible study nagdumala nag pagtuon sa Bibliya!

Si Ida ug Filip

Gihisgotan ni Amy kon sa unsang paagi nakita dayon niya nga may dakong panginahanglan: “Pag-abot namo sa Ghana, misangyaw mi sa gamayng baryo aron mangitag amang. Dili lang usa ka amang ang among nakita, kondili walo ka amang sa usa lang ka baryo!” Kasamtangan, si Amy naminyo kang Eric, ug silang duha nag-alagad ingong espesyal payunir. Sila naa sa sign language nga kongregasyon aron tabangan ang kapig 300 ka amang nga magmamantala ug interesado sa maong nasod. Para kang George ug Adria, samag natilawan nila ang kinabuhing misyonaryo tungod sa pag-alagad sa Ghana. Puwerte gyod nilang lipaya dihang naimbitar sila sa ika-126 nga klase sa Gilead School! Karon, mga misyonaryo na sila sa Mozambique.

NAPALIHOK SA GUGMA

Makapadasig nga makita ang daghang igsoon gikan sa lainlaing nasod nga makugihong nagtinabangay sa lokal nga mga igsoon sa buluhatong pagpangani. (Juan 4:35) Kada semana, 120 ang aberids nga mabawtismohan sa Ghana. Sama sa 17 ka need-greater nga mibalhin sa Ghana, libolibo ka magmamantala sa tibuok kalibotan ang napalihok sa gugma kang Jehova aron ‘itanyag ang ilang kaugalingon nga kinabubut-on.’ Sila namalhin sa mga lugar nga nagkinahanglag dugang magsasangyaw. Makapalipay gayod kang Jehova ang ilang kinabubut-ong pag-alagad!—Sal. 110:3; Prov. 27:11.

^ par. 9 Pananglitan, tan-awa ang mga artikulong “Makaalagad Ka ba Diin Dako ang Panginahanglan sa mga Magmamantala sa Gingharian?” ug “Makaadto Ka ba sa Macedonia?Bantayanang Torre, Abril 15 ug Disyembre 15, 2009.