Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) ENERO 2017

“Kining mga Butanga Ipiyal sa Matinumanong mga Tawo”

“Kining mga Butanga Ipiyal sa Matinumanong mga Tawo”

“Kining mga butanga ipiyal sa matinumanong mga tawo, nga, sa baylo, makabaton ug igong katakos sa pagpanudlo sa uban.”2 TIM. 2:2.

AWIT: 123, 53

1, 2. Unsay panglantaw sa daghan sa ilang trabaho?

ANG mga tawo sagad maghubit sa ilang kaugalingon base sa ilang trabaho. Para sa daghan, ang importansiya sa usa ka tawo nagdepende sa iyang trabaho o posisyon. Sa pipila ka kultura, aron mailhan ang usa ka tawo, ang usa sa unang ipangutana mao, “Unsa may imong trabaho?”

2 Usahay ang Bibliya maghubit sa mga tawo pinaagi sa ilang trabaho. Kini naghisgot kang “Mateo nga maniningil ug buhis”; “Simon, [nga] usa ka magtitinag-panit”; ug kang “Lucas nga hinigugmang mananambal.” (Mat. 10:3; Buh. 10:6; Col. 4:14) Ang mga tawo mailhan usab pinaagi sa espirituwal nga asaynment o pribilehiyo. Atong mabasa ang bahin kang Haring David, propetang Elias, ug kang apostol Pablo. Gipabilhan niining mga tawhana ang ilang asaynment gikan sa Diyos. Kon duna tay mga pribilehiyo sa pag-alagad, angay sab natong pabilhan kana.

3. Nganong kinahanglang bansayon sa mga tigulang ang mga bata-bata pa? (Tan-awa ang hulagway sa sinugdan sa artikulo.)

3 Daghan kanato ang ganahan sa atong mga pribilehiyo ug gusto natong buhaton kana hangtod sa hangtod. Apan ikasubo nga sukad sa mga adlaw ni Adan, ang matag henerasyon matigulang ug pulihag  lain. (Eccl. 1:4) Ning bag-o pa, kini nga kausaban nagpahinabog talagsaong mga hagit alang sa matuod nga mga Kristohanon. Ang buluhaton sa katawhan ni Jehova nagkadako ug nag-anam ka komplikado. Dihang sugdan ang bag-ong mga proyekto, bag-o sab ang mga pamaagi—sagad naglangkit sa paggamit ug modernong teknolohiya. Ang pipila ka tigulang malisdan tingali sa pagsunod sa kanunayng nagauswag nga teknolohiya. (Luc. 5:39) Bisag dili pirmeng ingon niana ang kahimtang, ang mga bata-bata pa mas kusgan ug abtik kay sa mga tigulang. (Prov. 20:29) Busa, mahigugmaon ug praktikal gayod nga bansayon sa mga tigulang ang mga bata-bata pa sa pag-abaga ug dugang responsibilidad.Basaha ang Salmo 71:18.

4. Nganong malisdan ang pipila sa pagdelegar? (Tan-awa ang kahong “ Kon Nganong ang Pipila Dili Modelegar.”)

4 Kadtong dunay mga katungdanan malisdan tingali sa pagdelegar sa buluhaton ngadto sa mga bata-bata pa. Ang pipila mahadlok nga mawala nila ang pribilehiyo nga ilang gimahal. Ang uban dili gusto nga ipiyal sa mga bata-bata pa ang buluhaton kay basig dili kini magkadimao. Ang pipila mangatarongan nga wala silay panahon sa pagbansay sa uban. Sa laing bahin, ang mga bata-bata pa kinahanglang magmapailobon kon dili sila mahatagag dugang buluhaton.

5. Unsang mga pangutana ang hisgotan niining artikuloha?

5 Hisgotan nato ang pagdelegar base sa duha ka panglantaw. Una, sa unsang paagi matabangan sa mga tigulang ang mga bata-bata pa sa pag-abaga ug dugang responsibilidad, ug nganong importante kini? (2 Tim. 2:2) Ikaduha, nganong importante nga huptan sa mga bata-bata pa ang hustong panglantaw dihang tabangan nila ang mga brader nga mas eksperyensiyado, ug nganong angay silang mokat-on gikan sa maong mga brader? Aw, susihon una nato kon sa unsang paagi giandam ni Haring David ang iyang anak sa pag-abaga sa usa ka bug-at nga responsibilidad.

GIANDAM UG GIPALUYOHAN NI DAVID SI SOLOMON

6. Unsay gustong buhaton ni Haring David, ug unsay giingon ni Jehova?

6 Human magtagotago sulod sa katuigan, si David nahimong hari ug nagpuyo sa usa ka komportableng balay. Kay nabalaka siya nga  walay “balay,” o templo, nga gipahinungod kang Jehova, gusto niyang magtukod ug balay alang Kaniya. Busa giingnan niya si Natan nga propeta: “Ania, ako nagpuyo sa usa ka balay nga sedro, apan ang arka sa pakigsaad ni Jehova anaa ilalom sa mga tabil sa tolda.” Si Natan mitubag: “Ang tanan nga anaa sa imong kasingkasing buhata, kay ang matuod nga Diyos nagauban kanimo.” Apan, lahi ang gisulti ni Jehova. Iyang giingnan si Natan nga sultian si David: “Dili ikaw ang magtukod alang kanako sa balay nga pagapuy-an.” Bisag mahigugmaong gipasaligan ni Jehova si David nga padayon siyang panalanginan, si Jehova miingon nga ang iyang anak nga si Solomon maoy motukod sa templo. Unsay reaksiyon ni David?1 Cron. 17:1-4, 8, 11, 12; 29:1.

7. Unsay reaksiyon ni David sa gisulti ni Jehova?

7 Wala mangluod si David nga dili siya ang mapasidunggan sa pagtukod sa templo. Gani, ang tinukod nailhan ingong templo ni Solomon, dili kang David. Bisan tingalig nahigawad si David nga dili matuman ang iyang pangandoy, bug-os niyang gisuportahan ang maong proyekto. Nag-organisar dayon siyag mga grupo sa mga trabahador ug nagtigom ug puthaw, tumbaga, plata, bulawan, ug mga kahoy nga sedro. Dugang pa, gidasig niya si Solomon: “Karon, anak ko, hinaot si Jehova magauban kanimo, ug ikaw magmalamposon gayod ug magtukod sa balay ni Jehova nga imong Diyos, ingon sa iyang gisulti mahitungod kanimo.”1 Cron. 22:11, 14-16.

8. Nganong gibati tingali ni David nga dili kuwalipikado si Solomon, bisan pa niana unsay iyang gibuhat?

8 Basaha ang 1 Cronicas 22:5. Lagmit gibati ni David nga dili kuwalipikado si Solomon nga modumala nianang dakong proyekto. Kon buot hunahunaon, kinahanglan nga ang templo mahimong “labi gayod ka halangdon,” ug nianang panahona si Solomon “batan-on ug linghod pa.” Bisan pa niana, nahibalo si David nga tabangan ni Jehova si Solomon sa pagdumala sa maong buluhaton. Busa gihimo ni David ang tanan sa pagtabang kaniya, nga nag-andam ug daghan kaayong materyales.

MAGMALIPAYON SA PAGBANSAY SA UBAN

Makapalipay gayong makita ang bata-bata pang mga brader nga nag-abaga ug dugang responsibilidad (Tan-awa ang parapo 9)

9. Sa unsang paagi magmalipayon ang mga tigulang sa pagpasa sa ilang mga responsibilidad? Iilustrar.

9 Ang tigulang nga mga brader dili angayng maguol dihang kinahanglan na nilang ipasa ang ilang asaynment ngadto sa bata-batang mga brader. Hinunoa, mas makatabang sa buluhaton kon bansayon ang mga bata-bata pa sa pagdumala sa mga responsibilidad. Ang tinudlong mga brader angayng malipay dihang ang bata-batang mga brader nga ilang gibansay mahimong kuwalipikado sa pag-abaga sa buluhaton. Sa pag-ilustrar, hunahunaa ang usa ka amahan nga nagtudlo sa iyang anak sa pagdrayb ug sakyanan. Kon gamay pa ang anak, maniid ra siya sa iyang amahan. Kon dako-dako na ang bata, isaysay sa amahan ang iyang ginabuhat. Dayon kon naa na sa hustong edad ang anak, siya nay mokupot sa manibela samtang ang iyang amahan maghatag ug dugang instruksiyon. Usahay, magpulipuli tingali silag drayb, pero sa ngadtongadto ang anak na ang sagad nga magdrayb, o kaha siya  na lang gyoy magdrayb para sa iyang tigulang nga amahan. Ang maalamong amahan malipay nga mopulig drayb ang iyang anak ug dili siya mobati nga kinahanglang siya gyod ang pirmeng modrayb. Sa susama, ang tigulang nga mga brader malipay dihang ilang mabansay ang bata-batang mga brader nga moabaga sa teokratikanhong mga responsibilidad.

10. Unsay pagbati ni Moises labot sa kadungganan ug awtoridad?

10 Ang mga tigulang angayng magbantay batok sa kasina. Matikdi ang reaksiyon ni Moises dihang may pipila sa kampo sa Israel ang migawi ingong mga propeta. (Basaha ang Numeros 11:24-29.) Gusto silang pugngan ni Josue, nga luyoluyo ni Moises. Dayag, naghunahuna siya nga makapamenos kini sa kadungganan ug awtoridad ni Moises. Pero miingon si Moises: “Nangabugho ka ba alang kanako? Ayaw, nanghinaot ako nga ang tanang katawhan ni Jehova mga manalagna, tungod kay si Jehova magabutang sa iyang espiritu diha kanila!” Nakita ni Moises nga pagbuot kadto ni Jehova. Imbes magtinguhag kadungganan, gusto ni Moises nga ang tanang alagad ni Jehova makadawat ug susamang espirituwal nga mga gasa. Sama kang Moises, malipay ba ta dihang ang uban makadawat ug mga pribilehiyo nga puwede pod untang ihatag kanato?

11. Unsay giingon sa usa ka brader bahin sa pagpasa sa iyang responsibilidad?

11 Karon dunay mga brader nga madasigong nag-abaga sa ilang responsibilidad sulod sa daghang katuigan ug nagbansay sa uban sa pagdawat ug dugang responsibilidad. Usa ka pananglitan mao si Peter kinsa kapig 74 ka tuig na sa bug-os panahong pag-alagad, diin ang 35 niana diha sa sangang buhatan sa Europe. Sulod sa dugayng panahon, siya ang tigdumala sa Service Department. Karon si Paul, usa ka bata-batang brader nga kauban ni Peter sa maong departamento sa ubay-ubayng katuigan, mao nay nag-atiman sa maong responsibilidad. Dihang gipangutana si Peter kon unsay iyang gibati bahin niini nga kausaban sa asaynment, siya mitubag, “Nalipay kaayo ko nga dunay mga brader nga nabansay sa pag-abaga ug mas dakong responsibilidad ug nag-atiman pag-ayo sa maong buluhaton.”

PABILHI ANG MGA TIGULANG

12. Unsay atong makat-onan sa asoy bahin kang Rehoboam?

12 Human sa kamatayon ni Solomon, ang iyang anak nga si Rehoboam maoy nahimong hari. Dihang nagkinahanglag tambag si Rehoboam kon unsaon pagdumala ang iyang mga responsibilidad, gipangutana una niya ang tigulang nga mga lalaki. Pero gisalikway niya ang ilang tambag! Hinunoa, gisunod niya ang tambag sa bata-batang mga lalaki nga popareho niyag edad ug mga tig-alagad sab niya. Dili gyod maayo ang resulta. (2 Cron. 10:6-11, 19) Unsay atong makat-onan? Maalamon nga mangayog tambag sa tigulang, eksperyensiyadong mga igsoon ug pamalandongon kana. Bisag dili angayng mapresyur ang mga bata-bata pa nga sundon ang kinaraang mga pamaagi, dili pod nila angayng isalikway dayon ang tambag sa mga tigulang.

13. Sa unsang paagi ang mga bata-bata pa makigkooperar sa mga tigulang?

13 Karon, ang pipila ka bata-batang mga brader nag-atiman tingalig mga responsibilidad diin may tigulang nga mga brader ilalom sa ilang pagdumala. Bisag ang mga bata-bata pa ang nagdumala, makabenepisyo gihapon sila sa kaalam ug eksperyensiya sa mga tigulang dihang mohimog mga desisyon. Si Paul nga gihisgotan ganiha, kinsa mipuli kang Peter ingong tigdumala sa usa ka departamento sa Bethel, miingon, “Mangayo gyod kog tambag kang Peter, ug dasigon nako ang uban diha sa departamento sa paghimo usab niana.”

14. Unsay atong makat-onan sa pagtinabangay ni Timoteo ug apostol Pablo?

14 Si Timoteo, usa ka bata-bata pa nga Kristohanon, nag-alagad uban kang apostol Pablo sulod sa daghang katuigan. (Basaha ang Filipos  2:20-22.) Si Pablo misulat sa mga taga-Corinto: “Akong gipadala si Timoteo nganha kaninyo, sanglit siya akong hinigugma ug matinumanong anak diha sa Ginoo; ug iyang ibutang sa inyong hunahuna ang akong mga pamaagi labot kang Kristo Jesus, ingon nga sa tanang dapit ako nagatudlo diha sa tanang kongregasyon.” (1 Cor. 4:17) Kining mga pulonga nagpakita nga nagtinabangay gayod si Pablo ug Timoteo. Si Pablo migahin ug panahon sa pagtudlo kang Timoteo sa iyang “mga pamaagi labot kang Kristo Jesus.” Nakakat-on gayod si Timoteo ug naangkon niya ang pagmahal ni Pablo, ug masaligon si Pablo nga atimanon ni Timoteo ang espirituwal nga panginahanglan sa mga taga-Corinto. Masundog usab sa mga ansiyano karon ang maong ehemplo samtang bansayon nila ang ubang brader sa pagpanguna sa kongregasyon.

KITANG TANAN DUNAY IMPORTANTENG PAPEL

15. Sa unsang paagi ang tambag ni Pablo sa mga Kristohanon sa Roma makatabang nato dihang maapektohan ta sa kausaban?

15 Nagkinabuhi kita sa makapalipayng panahon. Ang yutan-ong bahin sa organisasyon ni Jehova nagauswag sa daghang paagi. Tungod niini, gikinahanglan ang mga kausaban. Dihang maapektohan ta sa maong mga kausaban, hinaot nga magmapainubsanon ta, ug unahon ang intereses sa Gingharian, dili ang atoa. Ang pagbuhat niana makapahiusa kanato. Si Pablo misulat sa mga Kristohanon sa Roma: “Ako magasulti sa tanan dinha sa inyong taliwala nga dili maghunahuna ug labaw bahin sa iyang kaugalingon kay sa angay nga hunahunaon; kondili maghunahuna sa paagi nga makabaton sa maayong panghunahuna, ang matag usa sumala sa gihatag sa Diyos kaniya nga sukod sa pagtuo. Kay ingon nga kita sa usa ka lawas adunay daghang sangkap, apan ang mga sangkap dili tanan managsamag kagamitan, sa ingon kita, bisan tuod daghan, maoy usa ka lawas nga nahiusa kang Kristo.”Roma 12:3-5.

16. Unsay buhaton sa mga tigulang ug bata-bata pa, maingon man sa ilang mga asawa, aron magpabiling malinawon ug magkahiusa ang organisasyon ni Jehova?

16 Nan, bisag unsay atong kahimtang hinaot nga maningkamot kita sa pagpauswag sa intereses sa halangdong Gingharian ni Jehova. Mga tigulang, bansaya ang mga bata-bata pa. Mga bata-bata pang brader, dawata ang responsibilidad, magmakasaranganon, ug magmatinahoron sa mga tigulang. Ug kamong mga asawa, sundoga ang asawa ni Aquila nga si Priscila, kinsa matinumanong miuban ug misuportar kang Aquila bisag nausab ang ilang kahimtang.Buh. 18:2.

17. Unsang pagsalig ang gipakita ni Jesus sa iyang mga tinun-an, ug nganong gibansay niya sila?

17 Maylabot sa pagbansay sa uban aron moabaga ug dugang responsibilidad, si Jesus ang kinamaayohang ehemplo. Nahibalo siya nga ang iyang pagministeryo sa yuta matapos ra ug ang uban maoy mopadayon sa iyang buluhaton. Bisag dili hingpit ang iyang mga tinun-an, siya misalig kanila ug giingnan sila nga mas labaw pa ang ilang mahimo kay kaniya. (Juan 14:12) Gibansay niya sila pag-ayo, ug ilang giwali ang maayong balita sa tanang nasod niadtong panahona.Col. 1:23.

18. Unsang buluhaton ang anaa sa umaabot, ug unsay puwede natong himoon karon?

18 Human sa iyang kamatayon, si Jesus nabanhaw ngadto sa langit diin siya gihatagag dugang buluhaton uban ang awtoridad “nga labaw kaayo sa tanang kagamhanan ug awtoridad ug gahom ug pagkaginoo.” (Efe. 1:19-21) Kon kita mamatay nga matinumanon sa dili pa moabot ang Armagedon, mabanhaw ta sa matarong nga bag-ong kalibotan, diin duna unyay daghang makapatagbawng buluhaton. Bisan pa niana, dunay importanteng buluhaton karon diin kitang tanan puwedeng makigbahin—ang pagsangyaw sa maayong balita ug paghimog mga tinun-an. Hinaot kitang tanan, bata man o tigulang, “kanunayng puliki diha sa buluhaton sa Ginoo.”1 Cor. 15:58.