Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) DISYEMBRE 2016

Gantihan ni Jehova ang Matinuorong Nagapangita Kaniya

Gantihan ni Jehova ang Matinuorong Nagapangita Kaniya

“Siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.”—HEB. 11:6.

AWIT: 85, 134

1, 2. (a) Sa unsang paagi konektado ang gugma ug pagtuo? (b) Unsang mga pangutana ang atong hisgotan?

NAHIGUGMA ta kang Jehova “kay siya unang nahigugma kanato.” (1 Juan 4:19) Ingong usa ka pasundayag sa pagmahal ni Jehova, siya mihimog unang tikang sa pagpanalangin sa iyang maunongong mga alagad. Samtang modako ang atong gugma sa Diyos, mas molig-on ang atong pagtuo nga siya naglungtad ug seguradong magganti niadtong iyang gihigugma.—Basaha ang Hebreohanon 11:6.

2 Ang pagkahimong tigganti maoy importanteng bahin sa personalidad ni Jehova ug sa iyang ginabuhat. Dili bug-os ang atong pagtuo kon dili ta kombinsido nga ang Diyos magganti niadtong matinuorong nagapangita kaniya, kay “ang pagtuo mao ang masaligan nga pagpaabot sa mga butang nga gilaoman.” (Heb. 11:1) Oo, ang pagtuo nagpasabot ug pagkakombinsido nga matuman ang gisaad sa Diyos nga mga panalangin. Apan sa unsang paagi makahatag natog kaayohan ang paglaom sa usa ka ganti? Sa unsang paagi gigantihan ni Jehova ang iyang mga alagad, kaniadto ug karon? Atong tan-awon.

 NAGSAAD SI JEHOVA NGA PANALANGINAN ANG IYANG MGA ALAGAD

3. Unsang saad ang makita sa Malaquias 3:10?

3 Giobligar ni Jehova nga Diyos ang iyang kaugalingon sa pagganti sa iyang matinumanong mga alagad, busa giawhag ta niya sa pagpaningkamot nga maangkon ang iyang panalangin. Atong mabasa: “‘Sulayi ako, palihog, . . .’ miingon si Jehova sa mga panon, ‘kon dili ko ba buksan nganha kaninyo ang mga ganghaan sa tubig sa kalangitan ug magbubo nganha kaninyo sa panalangin hangtod nga wala nay panginahanglan.’” (Mal. 3:10) Atong gipakita ang dakong pagpabili ug pagpasalamat kon dawaton nato ang gitanyag ni Jehova.

4. Nganong makasalig ta sa gisaad ni Jesus diha sa Mateo 6:33?

4 Si Jesus nagpasalig sa iyang mga tinun-an nga kon unahon nila ang Gingharian, sila paluyohan sa Diyos. (Basaha ang Mateo 6:33.) Segurado si Jesus sa iyang gisaad kay gibase kini sa hingpit nga rekord ni Jehova sa pagkakasaligan. Si Jesus nahibalo nga ang mga saad sa Diyos dili gayod mapakyas. (Isa. 55:11) Sa baylo, makaseguro ta nga kon bug-os tang mosalig kang Jehova, tumanon niya ang iyang saad: “Dili ko gayod ikaw pagabiyaan ni sa bisan unsang paagi pagatalikdan.” (Heb. 13:5) Ikakonektar nato kanang saara sa giingon ni Jesus bahin sa pagpangita pag-una sa Gingharian ug sa pagkamatarong sa Diyos.

Gipakita ni Jesus nga ang iyang mga tinun-an pagagantihan tungod sa ilang mga sakripisyo (Tan-awa ang parapo 5)

5. Nganong makapalig-on sa pagtuo ang giingon ni Jesus kang Pedro?

5 Dihay higayon nga si apostol Pedro nangutana kang Jesus: “Gibiyaan namo ang tanang butang ug nagsunod kanimo; unsa man gayod unya ang among makuha niana?” (Mat. 19:27) Imbes kasab-an si Pedro tungod sa maong pangutana, giingnan ni Jesus ang iyang mga tinun-an nga pagagantihan sila sa ilang  mga sakripisyo. Ang matinumanong mga apostoles ug ang uban pa magmando uban niya sa langit. Pero bisag karon, duna nay ganti nga madawat. Si Jesus miingon: “Ang matag usa nga nagbiyag mga balay o mga igsoong lalaki o mga igsoong babaye o amahan o inahan o mga anak o mga yuta tungod sa akong ngalan magadawat ug pilo-pilo pa ug makapanunod sa kinabuhing walay kataposan.” (Mat. 19:29) Maangkon sa iyang mga tinun-an ang mga panalangin nga labaw pa sa ila tingaling isakripisyo. Dili ba ang espirituwal nga mga amahan, inahan, igsoon, ug anak mas bililhon pa kay sa bisan unsa nga atong gitalikdan o gibiyaan tungod sa Gingharian?

“ANGKLA SA KALAG”

6. Nganong gisaaran ni Jehova ug ganti ang iyang mga magsisimba?

6 Pinaagi sa pagsaad ug ganti sa iyang mga magsisimba, si Jehova nagtabang kanila nga makalahutay sa mga pagsulay. Gawas pa sa pagtagamtam ug dagayang espirituwal nga mga panalangin karon, ang matinumanong mga alagad ni Jehova nga Diyos naghinamhinam sa mas dagkong panalangin sa umaabot. (1 Tim. 4:8) Oo, ang atong pagkakombinsido nga si Jehova “maoy tigganti sa mga matinuorong nagapangita kaniya” makatabang nato sa pagbarog nga malig-on sa pagtuo.—Heb. 11:6.

7. Sa unsang paagi ang paglaom magsilbing angkla?

7 Sa Wali sa Bukid, si Jesus miingon: “Pagmaya ug lukso sa kalipay, sanglit dako ang inyong ganti sa mga langit; kay nianang paagiha sila naglutos sa mga manalagna nga nauna kaninyo.” (Mat. 5:12) Gawas niadtong makadawat ug ganti sa langit, ang paglaom nga mabuhi sa walay kataposan sa paraisong yuta maoy usa gayod ka rason nga ‘magmaya ug molukso sa kalipay.’ (Sal. 37:11; Luc. 18:30) Langitnon man o yutan-on, ang atong paglaom magsilbing “angkla sa kalag, nga seguro ug malig-on.” (Heb. 6:17-20) Maingon nga ang angkla makatabang aron ang barko dili mapadpad sa bagyo, ang seguradong paglaom sa ganti makatabang nato nga mahuptan ang emosyonal, mental, ug espirituwal nga kalig-on. Kini makatabang nato sa paglahutay sa mga kalisdanan.

8. Sa unsang paagi ang paglaom makapamenos sa kabalaka?

8 Ang atong binase sa Bibliyang paglaom makapamenos sa atong kabalaka karon. Ang mga saad sa Diyos samag espirituwal nga haplas nga makapahupay sa atong kabalaka. Makapahupay gayod ang ‘pagtugyan sa atong palas-anon kang Jehova,’ kay nahibalo ta nga ‘siya magasapnay kanato’! (Sal. 55:22) Kombinsido ta nga ang Diyos “makabuhat ug labaw pa sa hilabihan kamadagayaon nga lapaw sa tanang butang nga atong gipangayo o gihunahuna.” (Efe. 3:20) Hunahunaa ra—dili lang madagayaon o hilabihan kamadagayaon, kondili “labaw pa sa hilabihan kamadagayaon”!

9. Unsa ta ka kombinsido sa mga panalangin ni Jehova?

9 Aron madawat ang ganti, kita kinahanglang magpasundayag ug bug-os nga pagtuo kang Jehova ug magmatinumanon sa iyang mga sugo. Giingnan ni Moises ang nasod sa Israel: “Si Jehova sa walay pakyas magpanalangin kanimo sa yuta nga ihatag ni Jehova nga imong Diyos ingong panulondon sa pagpanag-iya niini, kon ikaw sa walay pakyas magpatalinghog lamang sa tingog ni Jehova nga imong Diyos nga magmatngon sa pagbuhat niining tibuok kasugoan nga akong gisugo kanimo niining adlawa. Kay si Jehova nga imong Diyos magpanalangin gayod kanimo ingon sa iyang gisaad kanimo.” (Deut. 15:4-6) Kombinsido ka ba nga panalanginan ka ni Jehova kon padayon kang mag-alagad kaniya nga matinumanon? Duna kay balidong rason nga magmakombinsido.

SI JEHOVA ANG ILANG TIGGANTI

10, 11. Sa unsang paagi gigantihan ni Jehova si Jose?

10 Ang Bibliya gisulat alang sa atong kaayohan. Narekord niana ang daghang asoy kon sa unsang paagi gigantihan sa Diyos ang iyang  matinumanong mga alagad. (Roma 15:4) Usa sa kinamaayohang ehemplo mao si Jose. Tungod sa panagkunsabo sa iyang mga igsoon ug sa ulahi sa pagtraydor sa asawa sa iyang agalon, siya napriso sa Ehipto. Nahimulag ba siya sa iyang Diyos? Wala gayod! “Si Jehova nagpadayon sa pag-uban kang Jose ug nagpadayon sa pagpakitag mahigugmaong-kalulot kaniya . . . Si Jehova nag-uban kang Jose ug ang iyang ginabuhat gipalampos ni Jehova.” (Gen. 39:21-23) Niadtong malisod nga mga panahon, si Jose naghulat nga mapailobon sa iyang Diyos.

11 Katuigan sa ulahi, gibuhian ni Paraon si Jose, ug kining ubos nga ulipon gihimong ikaduha sa kinatas-ang magmamando sa Ehipto. (Gen. 41:1, 37-43) Dihang nanganak ug duha ka anak nga lalaki ang iyang asawa, “si Jose nagtawag sa ngalan sa panganay nga Manases, tungod kay, sa pagkutlo kaniya, ‘Ang Diyos nagpahikalimot kanako sa tanan nakong kalisdanan ug sa tibuok balay sa akong amahan.’ Ug ang ngalan sa ikaduha siya nagtawag nga Epraim, tungod kay, sa pagkutlo kaniya, ‘Ang Diyos naghimo kanako nga mabungahon diha sa yuta sa akong pagkaalaot.’” (Gen. 41:51, 52) Kay nagmaunongon si Jose sa Diyos, siya gigantihag mga panalangin nga miresultag kaluwasan sa mga Israelinhon ug mga Ehiptohanon. Ang punto mao, giila ni Jose nga si Jehova ang nagganti ug nagpanalangin kaniya.—Gen. 45:5-9.

12. Sa unsang paagi si Jesus nagmatinumanon bisan pa sa mga pagsulay?

12 Sa susama, si Jesu-Kristo nagmatinumanon sa Diyos bisan pa sa nagkadaiyang mga pagsulay, ug siya gigantihan. Unsay nakatabang niya sa paglahutay? Ang Pulong sa Diyos nag-ingon: “Tungod sa kalipay nga gibutang sa iyang atubangan siya nag-antos sa estaka sa pagsakit, nga wala igsapayan ang kaulaw.” (Heb. 12:2) Seguradong kalipay ni Jesus ang pagbalaan sa ngalan sa Diyos. Dugang pa, gigantihan sab siya sa iyang Amahan ug pag-uyon ug daghang talagsaong pribilehiyo. Ang Bibliya nag-ingon nga siya “milingkod sa tuong kamot sa trono sa Diyos.” Ug ang laing teksto nag-ingon: “Ang Diyos nagbayaw kaniya ngadto sa usa ka labaw nga katungdanan ug malulotong naghatag kaniya sa ngalan nga labaw sa tanang uban pa nga ngalan.”—Filip. 2:9.

SI JEHOVA DILI MALIMOT SA ATONG GIBUHAT

13, 14. Unsay pagbati ni Jehova sa atong gibuhat alang kaniya?

13 Makaseguro kita nga pabilhan ni Jehova ang tanan natong paningkamot sa pag-alagad kaniya. Siya makasabot kon kulang tag kompiyansa sa kaugalingon o magduhaduha sa atong mga katakos. Siya magmabination dihang malimitahan ang atong sagradong pag-alagad tungod sa kalisod sa pinansiyal, sakit, o depresyon. Ug makasalig ta nga pabilhan ni Jehova ang tanang paningkamot sa iyang mga alagad nga magmatinumanon kaniya.—Basaha ang Hebreohanon 6:10, 11.

14 Hinumdomi usab nga makaduol ta sa “Tigpatalinghog sa pag-ampo” ug makasalig nga paminawon ta niya. (Sal. 65:2) “Ang Amahan sa malumong mga kaluoy ug ang Diyos sa tanang paghupay” madagayaong maghatag kanatog emosyonal ug espirituwal nga tabang, lagmit pinaagi sa atong mga isigkamagsisimba. (2 Cor. 1:3) Matandog ang kasingkasing ni Jehova kon magmabination ta sa uban. “Siya nga nagapakitag kaluoy sa timawa nagapahulam kang Jehova, ug Siya magabayad kaniya sa iyang gibuhat.” (Prov. 19:17; Mat. 6:3, 4) Busa, kon kita mahinatagon ug matinabangon sa mga nanginahanglan, isipon ni Jehova ang atong maayong buhat ingong pagpahulam Kaniya. Ug siya nagsaad nga gantihan ta niya tungod sa atong gipakitang kaayo.

MGA GANTI KARON UG HANGTOD SA HANGTOD

15. Unsang mga ganti ang imong gilaoman? (Tan-awa ang hulagway sa sinugdan sa artikulo.)

15 Ang dinihogan sa espiritung mga Kristohanon napalig-on sa paglaom nga makadawat sa “purongpurong sa pagkamatarong, nga ihatag . . . sa Ginoo, ang matarong nga maghuhukom, isip ganti nianang adlawa.” (2 Tim. 4: 7, 8) Pero dili ka angayng mobati nga naalkanse kon gihatagan ka sa Diyos ug lahi nga paglaom. Minilyon sa “ubang mga karnero” ni Jesus naghinamhinam sa umaabot nga ganti nga kinabuhing walay kataposan sa paraisong yuta. Didto, “sila makakaplag gayod sa ilang tumang kalipay sa kadagaya sa pakigdait.”—Juan 10:16; Sal. 37:11.

16. Sa unsang paagi mahupayan ta sa 1 Juan 3:19, 20?

16 Usahay, mobati tingali ta nga wala kaayo tay nalampos, o magduhaduha kon nalipay ba si Jehova sa atong mga paningkamot. Tingali magduhaduha pa gani ta kon takos ba tang modawat ug bisan unsang ganti. Pero angay natong hinumdoman nga “ang Diyos mas labaw kay sa atong mga kasingkasing ug nahibalo sa tanang butang.” (Basaha ang 1 Juan 3:19, 20.) Kon kita moalagad kang Jehova tungod sa atong pagtuo ug gugma kaniya, makaseguro ta nga gantihan ta niya bisan pag para nato gamay ra ang atong nahimo.—Mar. 12:41-44.

17. Unsa ang pipila ka ganti nga atong natagamtam karon?

17 Bisan niining mangitngit nga kataposang mga adlaw sa daotang sistema ni Satanas, si Jehova nagpanalangin sa iyang katawhan. Giseguro niyang mouswag ang iyang matuod nga mga magsisimba diha sa ilang espirituwal nga kahimtang, diin talagsaon kaayo ang espirituwal nga kadagaya. (Isa. 54:13) Ingon sa gisaad ni Jesus, gigantihan ta ni Jehova karon pinaagi sa pagtugot kanato nga mahimong bahin sa mahigugmaong pamilya sa espirituwal nga mga igsoon, usa ka internasyonal nga pamilya. (Mar. 10:29, 30) Dugang pa, kadtong matinuorong nagapangita sa Diyos gigantihan ug way samang panalangin nga kalinaw sa hunahuna, katagbawan, ug kalipay.—Filip. 4:4-7.

18, 19. Unsay pagbati sa mga alagad ni Jehova labot sa mga ganti nga ilang nadawat?

18 Ang mga alagad ni Jehova sa tibuok kalibotan makapamatuod sa talagsaong mga ganti nga ilang nadawat gikan kaniya. Pananglitan, si Bianca nga taga-Germany miingon: “Mapasalamaton kaayo ko kang Jehova sa iyang pagtabang kanako sa akong mga kabalaka ug sa pag-uban kanako matag adlaw. Ang kalibotan gubot ug walay paglaom. Pero, samtang kauban nako si Jehova, mobati kog kasegurohan. Kon mohimo gani kog mga sakripisyo para niya, iya kong gantihan ug abunda kaayong panalangin.”

19 O kaha tagda ang 70 anyos nga si Paula nga taga-Canada, kansang paglihoklihok nalimitahan pag-ayo tungod sa sakit nga spina bifida. “Ang limitadong paglihoklihok wala magpasabot ug limitadong ministeryo,” siya miingon. “Akong gipahimuslan ang lainlaing matang sa pagministeryo sama sa pagsangyaw pinaagig telepono ug impormal nga pagsangyaw. Aron madasig ko, naa koy notbok nga gisulatag mga teksto ug mga punto gikan sa atong mga publikasyon nga akong matan-aw matag karon ug unya. Gitawag nako nig ‘Akong Notbok sa Paglahutay.’ Temporaryo lang ang kahigawad kon magpokus ta sa mga saad ni Jehova. Kanunayng andam si Jehova sa pagtabang kanato, bisag unsay atong kahimtang.” Ang imong kahimtang lahi tingali nianang kang Bianca o Paula. Bisan pa niana, makahunahuna ka tingalig mga paagi diin si Jehova nagganti nimo ug sa uban. Maayo gayong pamalandongan kon giunsa ka pagganti ni Jehova karon ug kon sa unsang paagi ka niya gantihan sa umaabot!

20. Unsay atong malaoman kon padayon tang mag-alagad kang Jehova nga tibuok kalag?

20 Ayaw gayod kalimti nga ang imong kinasingkasing nga mga pag-ampo ug may kagawasang pagpakigsulti sa Diyos dunay “dakong ganti.” Makaseguro ka nga ‘human ka makabuhat sa kabubut-on sa Diyos, ikaw makadawat sa katumanan sa saad.’ (Heb. 10:35, 36) Busa, padayon natong palig-onon ang atong pagtuo ug tibuok kalag nga mag-alagad kang Jehova. Mahimo nato kini, kay kombinsido ta nga si Jehova magganti kanato.—Basaha ang Colosas 3:23, 24.