Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) AGOSTO 2016

Nganong Kinahanglan Kang Mouswag sa Espirituwal?

Nganong Kinahanglan Kang Mouswag sa Espirituwal?

“Magmakugihon diha sa publikong pagbasa, sa pagpanambag, sa pagpanudlo.”1 TIM. 4:13.

AWIT: 45, 70

1, 2. (a) Sa unsang paagi natuman ang Isaias 60:22 niining panahon sa kataposan? (b) Unsay mga panginahanglan karon sa yutan-ong bahin sa organisasyon ni Jehova?

“ANG diyutay mahimong usa ka libo, ug ang gamay usa ka gamhanang nasod.” (Isa. 60:22) Ang maong tagna padayong nagakatuman niining kataposang mga adlaw. Gani, sa 2015 nga tuig sa pag-alagad, 8,220,105 ka magmamantala sa Gingharian ang aktibong nagsangyaw sa tibuok kalibotan! Ang kataposang bahin sa maong tagna dakog epekto sa matag Kristohanon kay ang atong langitnong Amahan nag-ingon: “Ako, si Jehova, magpadali niini sa kaugalingong panahon niini.” Samag mga pasahero sa sakyanan nga nagkakusog ang dagan, atong mamatikdan ang paspas nga pag-uswag sa buluhatong paghimog mga tinun-an. Miduyog ba ta sa maong pag-uswag? Gibuhat ba nato ang tanan ingong madasigong magsasangyaw sa Gingharian? Daghang igsoon ang nag-aplay ingong regular o oksilyare payunir. Ug dili ba makapalipay nga daghan ang misanong sa awhag nga mag-alagad diin mas dako ang panginahanglan o makigbahin sa ubang buluhaton sa organisasyon?

2 Sa susama, nakita nato ang panginahanglan sa dugang magsasangyaw. Mga 2,000 ka kongregasyon ang matukod kada tuig. Kon 5 ka ansiyano ang mag-alagad sa matag bag-ong kongregasyon, 10,000 ka ministeryal nga alagad ang kinahanglang mokuwalipikar  ingong ansiyano kada tuig. Nagpasabot kini nga libolibong brader ang kinahanglang mokuwalipikar ingong ministeryal nga alagad. Dugang pa, kita man brader o sister, kita “kanunayng puliki diha sa buluhaton sa Ginoo.”1 Cor. 15:58.

UNSAY GIKINAHANGLAN ARON MOUSWAG SA ESPIRITUWAL?

3, 4. Para nimo, unsay kahulogan sa pag-uswag sa espirituwal?

3 Basaha ang 1 Timoteo 3:1. Ang Gregong pulong nga gihubad ug “magapangab-ot” nagkahulogan ug pagpaningkamot nga makab-ot ang usa ka butang. Sa paggamit sa maong pulong, gipasiugda ni Pablo nga gikinahanglan ang pagpaningkamot aron mouswag sa espirituwal. Hunahunaa ang usa ka brader nga namalandong sa iyang kaugmaon diha sa kongregasyon. Lagmit dili pa siya ministeryal nga alagad, pero iyang naamgohan nga kinahanglan niyang pauswagon ang iyang espirituwal nga mga katakos. Una, maningkamot siyang mokuwalipikar ingong ministeryal nga alagad. Ngadtongadto, naglaom siya nga mokuwalipikar ingong ansiyano. Sa maong mga kahimtang, maningkamot siya nga makab-ot ang mga kuwalipikasyon nga gikinahanglan sa pag-abaga ug dugang responsabilidad sa kongregasyon.

4 Sa susama, ang mga brader ug sister nga gustong magpayunir, mag-Bethelite, o moboluntaryo sa pagpanukod ug mga Kingdom Hall naningkamot aron makab-ot ang ilang mga tumong. Atong hisgotan kon sa unsang paagi ang Pulong sa Diyos nagdasig sa tanan nga mouswag diha sa matuod nga pagsimba.

PANINGKAMOT NGA MOUSWAG PA SA ESPIRITUWAL

5. Sa unsang paagi magamit sa mga batan-on ang ilang kusog sa buluhaton sa Gingharian?

5 Ang mga batan-on daghag mahimo sa pag-alagad kang Jehova kay sila kusgan ug himsog. (Basaha ang Proverbio 20:29.) Ang pipila ka batan-ong brader nga nag-alagad sa Bethel nakatabang sa pag-imprentag Bibliya ug mga literatura sa Bibliya. Daghang batan-ong brader ug sister ang nakigbahin sa pagpanukod ug pagmentinar sa mga Kingdom Hall. Kon may katalagman, ang mga batan-on, kauban sa mas eksperyensiyadong mga Saksi, miboluntaryo sa paghatag ug hinabang. Ug daghang batan-ong payunir ang mitabang sa pagsangyaw ngadto sa mga tawong lumad ug nagsultig laing pinulongan.

6-8. (a) Sa unsang paagi nausab ang panglantaw sa usa ka batan-on maylabot sa pag-alagad sa Diyos, ug unsay resulta? (b) Sa unsang paagi nato ‘matilawan ug makita nga si Jehova maayo’?

6 Seguro, giapresyar nimo ang kaimportante sa tibuok kasingkasing nga pag-alagad sa Diyos. Pero, komosta kon mibati kag sama sa gibati kanhi sa batan-ong si Aaron? Bisag nagdako sa Kristohanong pamilya, siya miangkon, “Laayan ko sa mga tigom ug sa pagsangyaw.” Gusto niyang magmalipayon sa pag-alagad sa Diyos pero naghunahuna siya kon nganong wala siya mibati niana. Unsay iyang gihimo?

7 Si Aaron naningkamot sa paghimog espirituwal nga rutina nga naglakip sa pagbasa sa Bibliya, pagpangandam sa tigom, ug pagkomento. Labaw sa tanan, regular na siyang mag-ampo. Samtang nagkadako ang iyang gugma kang Jehova, nagkauswag pod ang iyang espirituwalidad. Sukad niadto, si Aaron malipayong nagpayunir, nagboluntaryo sa paghatag ug hinabang panahon sa katalagman, ug nagsangyaw sa laing nasod. Karon, si Aaron nag-alagad sa Bethel ug usa na ka ansiyano. Unsay hunahuna niya sa kinabuhi nga iyang gipili? “Akong ‘natilawan ug nakita nga si Jehova maayo.’ Tungod sa iyang panalangin, mibati kog utang kabubut-on niya ug napalihok sa paghimog labaw pa diha sa pag-alagad kaniya, ug kini miresultag dugang mga panalangin.”

8 Ang salmista miawit: “Silang nagapangita kang Jehova, dili sila makulangan ug bisan  unsang butang nga maayo.” (Basaha ang Salmo 34:8-10.) Oo, dili gayod pakyason ni Jehova ang madasigong nag-alagad kaniya. Atong ‘matilawan ug makita nga si Jehova maayo’ samtang ginabuhat nato ang tanan sa pag-alagad kaniya. Ug kon tibuok kinabuhi natong alagaron si Jehova, maeksperyensiyahan nato ang kalipay nga way sama.

AYAWG SURENDER

9, 10. Nganong importante nga magpakitag “mahulatong tinamdan”?

9 Samtang naningkamot ka sa pagkab-ot sa imong tumong, ipakita ang “mahulatong tinamdan.” (Miq. 7:7) Kanunayng tabangan ni Jehova ang iyang matinumanong mga alagad, bisag usahay tugotan niyang maghulat sila una mahatagag pribilehiyo o mahimong paborable ang kahimtang. Gisaaran niyag anak si Abraham, pero kinahanglang magpakita ang patriarka ug pagtuo ug pailob. (Heb. 6:12-15) Bisag dugay siyang naghulat hangtod matawo si Isaac, si Abraham wala mawad-ig paglaom, ug wala siya pakyasa ni Jehova.Gen. 15:3, 4; 21:5.

10 Dili sayon ang paghulat. (Prov. 13:12) Kon magsige tag hunahuna sa atong kapakyasan, kita maluya pag-ayo. Hinunoa, mas maalamong gamiton nato ang atong panahon sa pagpauswag sa atong espirituwal nga mga katakos. Matikdi ang tulo ka paagi sa pagbuhat niana.

11. Unsang espirituwal nga mga katakos ang puwede natong ugmaron, ug nganong importante kana?

11 Ugmara ang espirituwal nga mga katakos. Pinaagi sa pagbasa ug pagpamalandong sa Pulong sa Diyos, maugmad nato ang kaalam, pagsabot, maayong panghukom, kahibalo, katakos sa panghunahuna, ug maayong panghunahuna. Kana nga mga katakos importante alang niadtong nagapanguna sa matuod  nga pagsimba. (Prov. 1:1-4; Tito 1:7-9) Ug samtang magbasa tag binase sa Bibliya nga mga publikasyon, mahibaloan nato ang panghunahuna sa Diyos bahin sa daghang butang. Matag adlaw, kita kinahanglang mohimog mga desisyon maylabot sa kalingawan, sinina ug pamostura, paggamit sa kuwarta, ug pagpakiglabot sa uban. Pinaagi sa pagpadapat sa atong nakat-onan sa Bibliya, makahimo tag desisyon nga makapalipay kang Jehova.

12. Sa unsang paagi mapamatud-an sa mga membro sa kongregasyon nga sila kasaligan?

12 Pamatud-i nga kasaligan ka. Kita man brader o sister, kinahanglang buhaton nato ang tanan sa pag-atiman sa atong mga responsabilidad. Ingong gobernador, si Nehemias kinahanglang magtudlog mga lalaki nga moatiman sa lainlaing responsabilidad taliwala sa katawhan sa Diyos. Kinsay iyang gitudlo? Gipili niya kadtong mahinadlokon sa Diyos ug kasaligan. (Neh. 7:2; 13:12, 13) Karon usab, “ang gipangita diha sa mga piniyalan mao nga ang usa ka tawo makaplagang matinumanon.” (1 Cor. 4:2) Mamatikdan gyod ang maayong mga binuhatan.Basaha ang 1 Timoteo 5:25.

13. Sa unsang paagi masundog nimo si Jose kon dili patas ang pagtratar kanimo?

13 Tugoti si Jehova nga magdalisay kanimo. Unsay imong himoon kon dili patas ang pagtratar kanimo? Tingali puwede kang mangatarongan. Pero kon pirme kang mangusog sa pagdepensa sa kaugalingon, mosamot ang problema. Si Jose gidaogdaog sa iyang mga igsoon pero wala siya magdumot nila. Sa ulahi si Jose gipasanginlan ug gipriso bisag wala siyay sala. Bisan pa niana, siya nagpagiya kang Jehova niadtong malisod nga mga panahon. Unsay resulta? “Ang mga pulong ni Jehova nagdalisay kaniya.” (Sal. 105:19) Dihang natapos ang maong mga pagsulay, si Jose mikuwalipikar para sa espesyal nga asaynment. (Gen. 41:37-44; 45:4-8) Dihang mag-antos kag mapait nga mga problema, pag-ampo alang sa kaalam, lihok ug sulti uban ang kalumo, ug pangayog kusog sa Diyos. Tabangan gyod ka ni Jehova.—Basaha ang 1 Pedro 5:10.

PAUSWAGA ANG IMONG MINISTERYO

14, 15. (a) Nganong kinahanglan natong ‘tagdon kanunay’ ang atong paagi sa pagsangyaw? (b) Sa unsang paagi makapahaom ta sa mga kausaban sa kahimtang? (Tan-awa ang hulagway sa sinugdan sa artikulo ug ang kahon nga “ Andam Ka Bang Mosulay ug Lahi nga Paagi?”)

14 Giawhag ni Pablo si Timoteo: “Magmakugihon diha sa publikong pagbasa, sa pagpanambag, sa pagpanudlo. Tagda kanunay ang imong kaugalingon ug ang imong pagpanudlo.” (1 Tim. 4:13, 16) Eksperyensiyado na nga magsasangyaw si Timoteo. Bisan pa niana, ang iyang ministeryo mahimo lang epektibo kon iyang ‘tagdon kanunay’ ang iyang paagi sa pagpanudlo. Dili niya dahomon nga kanunayng mosanong ang mga tawo sa iyang naandang paagi sa pagpanudlo. Aron padayon niyang matandog ang ilang kasingkasing, kinahanglan niyang ipahaom ang iyang paagi sa pagpanudlo sa ilang panginahanglan. Ingong mga magsasangyaw sa Gingharian, kinahanglang buhaton usab nato kana.

15 Sagad, dili nato maabtan ang mga tawo sa ilang balay dihang magsangyaw ta. Sa pipila ka dapit, dili ta makasulod sa mga condominium ug guwardiyadong subdibisyon. Kon ingon ana ang inyong teritoryo, nganong dili sulayan ang lainlaing paagi sa pagsangyaw?

16. Sa unsang paagi epektibo ang pagsangyaw sa publikong mga dapit?

16 Ang pagsangyaw sa publikong mga dapit maoy usa sa maayong mga paagi sa pagpaambit sa maayong balita. Daghang Saksi ang epektibo niining buluhatona ug malipayong nakig-ambit niini. Naggahin silag panahon aron duolon ang mga tawo sa mga estasyon sa tren ug bus, sa merkado ug parke, ug sa ubang publikong dapit. Gamit ang maayong panghukom, ang usa ka Saksi makasugod pagpakig-estorya sa usa ka tawo pinaagi sa paghisgot bahin sa balita, paghatag ug komendasyon sa iyang anak, o pagpangutana bahin sa trabaho.  Samtang maglami ang estorya, ang magmamantala mahimong mokutlog teksto ug mangutana sa kaestorya kon unsay iyang ikasulti bahin niana. Ang komento sa kaestorya mahimong moresultag dugang panaghisgot sa Bibliya.

17, 18. (a) Sa unsang paagi mouswag ang imong kompiyansa sa pagsangyaw sa publikong mga dapit? (b) Sa unsang paagi makatabang sa imong ministeryo ang awit ni David sa pagdayeg kang Jehova?

17 Kon malisdan ka sa pagsangyaw sa publikong mga dapit, ayawg surender. Si Eddie, payunir nga taga-New York City, nagduhaduha sa pagpakig-estorya sa mga tawo sa publiko. Pero wala madugay, nakabaton siyag kompiyansa. Unsay nakatabang niya? Siya miingon: “Sa among pamilyahanong pagsimba, kami sa akong asawa manukiduki aron mahibaloan namo ang angayng isulti kon dunay mosupak ug mopahayag sa ilang opinyon. Mangayo sab mig sugyot gikan sa ubang Saksi.” Karon, ganahan nang mosangyaw si Eddie sa publikong mga dapit.

18 Samtang mouswag ang imong kahanas ug kompiyansa sa pagsangyaw, ang imong espirituwal nga pag-uswag madayag. (Basaha ang 1 Timoteo 4:15.) Dugang pa, seguradong dayegon nimo ang atong langitnong Amahan sama sa gibuhat ni David, kinsa miawit: “Pagadayegon ko si Jehova sa tanang panahon; ang pagdayeg kaniya maanaa kanunay sa akong baba. Diha kang Jehova manghambog ang akong kalag; ang mga maaghop makadungog ug managmaya.” (Sal. 34:1, 2) Ug lagmit ingong resulta sa imong ministeryo, ang sinserong mga tawo malipayong moduyog nimo sa matuod nga pagsimba.

HIMAYAA ANG DIYOS PINAAGI SA PAG-USWAG SA ESPIRITUWAL

19. Nganong angayng magmalipayon ang maunongong alagad ni Jehova bisan pag lisod ang iyang kahimtang?

19 Si David miawit usab: “Ang tanan nimong mga buhat magadayeg kanimo, Oh Jehova, ug ang mga maunongon kanimo magadayeg kanimo. Sila magahisgot mahitungod sa himaya sa imong pagkahari, ug sila magasulti mahitungod sa imong pagkagamhanan, aron ipahibalo ang iyang gamhanang mga buhat ngadto sa mga anak sa mga tawo ug ang himaya sa kahalangdon sa iyang pagkahari.” (Sal. 145:10-12) Kana sab ang gibati sa tanang maunongong Saksi ni Jehova. Pero, komosta kon malimitahan ang imong ministeryo tungod sa sakit ug pagkatigulang? Hinumdomi kanunay nga dihang imong sangyawan ang mga nars o doktor, ang imong sagradong pag-alagad naghimaya sa atong kahibulongang Diyos. Kon napriso ka tungod sa imong pagtuo, lagmit gipaambit nimo ang kamatuoran kon itugot sa kahimtang, ug kana makapalipay kang Jehova. (Prov. 27:11) Tinuod usab kana kon ang imong pamilya lainlain ug relihiyon pero nagpadayon ka sa imong espirituwal nga rutina. (1 Ped. 3:1-4) Bisag anaa sa lisod nga kahimtang, makadayeg ka kang Jehova ug mouswag sa espirituwal.

20, 21. Kon gihatagan kag dugang buluhaton sa organisasyon ni Jehova, sa unsang paagi mahimo kang panalangin sa uban?

20 Seguradong panalanginan ka ni Jehova kon padayon kang mohimog espirituwal nga pag-uswag. Tingali pinaagi sa paghimog kausaban sa imong eskedyul o paagi sa pagkinabuhi, mas dako ang imong mahimo sa pagpaambit sa kamatuoran ngadto sa mga tawong nanginahanglag paglaom. Dugang pa, ang imong espirituwal nga pag-uswag ug pagsakripisyo sa kaugalingon makahatag ug dakong kaayohan sa imong mga isigkamagtutuo. Ug tungod sa imong mapainubsanong paghago diha sa kongregasyon, seguradong mahalon ka, apresyahon, ug paluyohan niadtong mga nahigugma kang Jehova.

21 Kita man dugay nang nag-alagad kang Jehova o bag-ohan pa, kitang tanan makapauswag pa sa atong pag-alagad. Pero unsaon pagtabang sa hamtong nga mga Kristohanon ang mga bag-ohan aron mouswag sa espirituwal? Hisgotan kana sa sunod nga artikulo.