Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) AGOSTO 2016

Si Johannes Rauthe nga nagsangyaw, tingali sa katuigan sa 1920

 GIKAN SA AMONG ARCHIVES

“Akong Giani ang Bunga nga Nakahatag ug Kadayeganan Kang Jehova”

“Akong Giani ang Bunga nga Nakahatag ug Kadayeganan Kang Jehova”

“ANG tanang gubat kaniadto . . . wala ra sa kumingking kon itandi sa grabeng paggubatay sa Europe.” Mao nay paghubit sa Septiyembre 1, 1915 nga The Watch Tower sa unang gubat sa kalibotan, nga sa ngadtongadto mga 30 ka nasod ang nalangkit. Tungod sa paggubatay, ang The Watch Tower nag-ingon: “Medyo nababagan ang pag-alagad sa Gingharian, ilabina sa Germany ug France.”

Tungod kay halos tanang nasod ang nalangkit sa gubat, ang mga Estudyante sa Bibliya wala kaayo makasabot sa prinsipyo sa Kristohanong neyutralidad. Pero, determinado sila nga imantala ang maayong balita. Kay gustong makigbahin sa pag-alagad sa Gingharian, si Wilhelm Hildebrandt nag-order ug mga kopya sa The Bible Students Monthly sa French. Wala siya moadto sa France ingong colporteur (bug-os panahong magsasangyaw) kondili, ingong German nga sundalo. Kining kaaway unta, nga nagsul-ob ug uniporme sa sundalo, naghatag ug mensahe sa pakigdait ngadto sa nahibulong nga mga French.

Ang mga sulat nga gipatik sa The Watch Tower nagpakita nga daghan sa German nga mga Estudyante sa Bibliya ang gustong mosangyaw sa maayong balita sa Gingharian samtang nagsundalo. Si Brader Lemke, nga usa ka navy, miingon nga lima sa iyang kaubang mga tripulante ang interesado. “Bisag naglawig mi, akong giani ang bunga nga nakahatag ug kadayeganan kang Jehova,” siya misulat.

Si Georg Kayser miadto sa panggubatan ingong sundalo ug miuli ingong alagad sa matuod nga Diyos. Unsay nahitabo? Siya nakadawat ug publikasyon sa mga Estudyante sa Bibliya, kinasingkasing nga midawat sa kamatuoran sa Gingharian, ug mihunong sa pagpakiggubat. Dayon midawat siyag trabaho nga wala malangkit sa pagpakiggubat. Human sa gubat, madasigon siyang nagpayunir sulod sa daghang katuigan.

Bisan tuod ang mga Estudyante sa Bibliya wala kaayo makasabot sa isyu bahin sa neyutralidad, ang ilang panghunahuna ug panggawi lahi kaayo nianang sa mga tawo nga miuyon sa gubat. Samtang ang mga  politiko ug mga lider sa simbahan nagpaluyo sa gubat, ang mga Estudyante sa Bibliya midapig sa “Prinsipe sa Pakigdait.” (Isa. 9:6) Bisag dili bug-os ang pagkaneyutral sa pipila, sila susamag baroganan sa Estudyante sa Bibliya nga si Konrad Mörtter, “Tin-aw nakong nakat-onan sa Pulong sa Diyos nga dili angayng mopatay ang usa ka Kristohanon.”Ex. 20:13. *

Gigamit ni Hans Hölterhoff kini nga cart aron ipaila ang The Golden Age

Sa Germany, diin ang balaod wala maghatag ug eksemsiyon niadtong dili magsundalo tungod sa konsensiya, kapig 20 ka Estudyante sa Bibliya ang midumili nga malangkit sa militar. Ang pipila kanila giklasipikar ingong nalisoan sa pangisip, sama kang Gustav Kujath, kinsa gibutang sa ospital sa mga buang ug gipainom ug tranquilizer. Si Hans Hölterhoff, kinsa wala usab magsundalo, gipriso, ug sa prisohan gidumilian niya ang tanang buluhaton nga nalangkit sa gubat. Gisul-oban siya sa mga guwardiya ug straitjacket hangtod naminhod ang iyang mga bukton. Dihang wala sila molampos sa pagbungkag sa iyang baroganan, gipatuo siya sa mga guwardiya nga patyon na siya. Bisan pa niana, si Hans lig-ong mibarog panahon sa gubat.

Ang ubang igsoon nga gipatawag aron magsundalo midumili sa paggamit ug armas ug mihangyo nga hatagan silag trabaho nga dili direktang nalangkit sa pagpakiggubat. * Usa si Johannes Rauthe kanila ug siya gipatrabaho diha sa mga riles. Si Konrad Mörtter giasayn ingong atendant sa ospital, ug si Reinhold Weber nagtrabaho ingong nars. Si August Krafzig nalipay nga wala siya maasayn sa panggubatan. Sila ug ang ubang Estudyante sa Bibliya determinadong moalagad kang Jehova base sa ilang pagsabot sa gugma ug pagkamaunongon.

Tungod sa ilang baroganan panahon sa gubat, ang mga Estudyante sa Bibliya gisukitsukit. Sa misunod nga katuigan, ang mga Estudyante sa Bibliya sa Germany kinahanglang moatubang ug libolibong kaso sa korte tungod sa ilang buluhatong pagsangyaw. Aron tabangan sila, ang sangang buhatan sa Germany nagpormag legal department sa Bethel sa Magdeburg.

Ang mga Saksi ni Jehova anam-anam nga nag-usab sa ilang pagsabot sa isyu maylabot sa Kristohanong neyutralidad. Pagbuto sa ikaduhang gubat sa kalibotan, sila nagpabiling neyutral pinaagi sa dili gayod pag-apil sa militar. Busa, sila giisip ingong mga kaaway sa gobyerno sa Germany ug grabeng gilutos. Apan ang maong mga kasinatian hisgotan sa sunod nga serye sa “Gikan sa Among Archives.”Gikan sa among archives sa Central Europe.

^ par. 7 Tan-awa ang asoy bahin sa British nga mga Estudyante sa Bibliya panahon sa Gubat sa Kalibotan I sa artikulong “Gikan sa Among Archives—Sila Lig-ong Mibarog sa ‘Takna sa Pagsulay’” sa Mayo 15, 2013 nga gula sa Bantayanang Torre.

^ par. 9 Gisugyot kini sa Tomo VI sa Millennial Dawn nga serye (1904) ug sa German nga edisyon sa Zion’s Watch Tower sa Agosto 1906. Ang The Watch Tower sa Septiyembre 1915 nag-usab sa maong panglantaw ug nagsugyot nga ang mga Estudyante sa Bibliya dili angayng moapil sa militar. Pero, kining artikuloha wala diha sa German nga edisyon.

Pagkat-og Dugang