Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! NUM. 6 2016

 ANG HUNAHUNA SA BIBLIYA

Pag-abot sa Untop nga Oras

Pag-abot sa Untop nga Oras

Bisan kadtong maulahi kanunay ug abot nagtuo nga maayong moabot gayod sa untop nga oras. Ang Bibliya naghatag ug praktikal nga tambag bahin niini.

Nganong importante ang pag-abot sa untop nga oras?

KON NGANONG ANGAY KANG MAHIBALO

Nakita sa uban nga ang pag-abot ug sayo sa gikasabotang oras makamenos sa tensiyon. Ang pag-abot sa untop nga oras makahatag sa usa ug mas maayong reputasyon. Sa unsang paagi?

Ang pag-abot sa untop nga oras nagpakita nga ang usa organisado. Kon moabot ka sa eksaktong oras, kini nagpadayag nga ikay nagkontrolar sa imong kinabuhi imbes ikay gikontrolar sa mga situwasyon mao nga dili na nimo mabuhat ang mga butang nga gusto nimong buhaton.

Ang pag-abot sa untop nga oras nagpakita nga ang usa kasaligan. Niini nga kalibotan diin ang mga saad sagad dili tumanon ug ang mga kasabotan sagad balewalaon, ang mga tawo malipay niadtong motuman sa ilang gipanaad. Ang tawong kasaligan ginatahod sa ilang mga higala ug pamilya. Garbo sa mga tigpangempleyo ang empleyado nga sayong moabot sa trabaho ug makahuman sa trabaho sa gitagal nga oras. Ang kasaligang mga empleyado may purohan pa gani nga mahatagag dakodakong suweldo ug dugang pagsalig.

ANG GIINGON SA BIBLIYA

Dunay mga teksto sa Bibliya nga naghisgot bahin sa eksaktong panahon. Pananglitan, ang Bibliya nag-ingon: “Himoa ang tanang butang nga may kahapsay ug pinaagig kahikayan.” (1 Corinto 14:40) Kon ang duha ka tawo nagkasabot nga mag-abot sa espesipikong oras ug lugar, haom ug angay lang nga moabot silag sayo. Ang Bibliya usab nag-ingon: ‘Dunay tinudlong panahon alang sa tanang butang, usa ka panahon alang sa matag kalihokan ilalom sa mga langit.’ (Ecclesiastes 3:1) Ang konteksto niining bersikuloha nag-ingon nga dunay “panahon sa pagtanom ug panahon sa pag-ibot sa gitanom.” (Ecclesiastes 3:2) Ang mga mag-uuma magtanom sa hustong panahon aron daghan silag maani. Sa ato pa, ang ilang pagsunod sa hustong panahon sa pagtanom maayog resulta.

Ang Bibliya naghatag ug mas maayong rason kon nganong importante ang pag-abot sa untop nga oras: Kini nagpakitag pagtahod sa uban ug sa ilang bililhong panahon. (Filipos 2:3, 4) Sa kasukwahi, kadtong kanunay lang malangan ug magpahulat sa uban sama rag nangawat ug panahon sa uban.

‘Tan-awa dili lang ang imong kaugalingong kaayohan kondili ang kaayohan usab sa uban.’Filipos 2:4, Ang Biblia, NCV.

 Unsay imong himoon aron makaabot ka sa untop nga oras?

ANG GIINGON SA BIBLIYA

Ang Bibliya nagdasig nga angay kitang magplano daan. (Proverbio 21:5) Kon nabatasan na nimo nga kanunay kang ulahing moabot sa gikasabotang oras, tingali daghan ra kaayo kag kalihokan. Nganong dili nimo menosan ang imong panahon sa wala kinahanglanang mga kalihokan? Paghatag ug igong panahon sa matag appointment, ug paningkamot nga makaabot kag sayo. Kini makatabang aron dili ka maulahi tungod sa wala damhang mga situwasyon, sama sa grabeng trapik ug sa dili maayong panahon.

Ang Bibliya usab nagdasig ug pagkamakasaranganon. (Proverbio 11:2) Kini nagpasabot nga atong ilhon ang atong limitasyon. Hunahunaa usa kon duna ka pa bay panahon para usa ka appointment una nimo kini dawaton. Kon sobra ka daghan ang imong appointment, mosamot lang ang tensiyon ug kahigawad—nimo ug sa uban!

Ang Bibliya usab nag-ingon nga pahimuslan nato ang atong panahon. (Efeso 5:15, 16) Unaha ang labing importante. (Filipos 1:10) Pananglitan, samtang nagsakay ug publikong sakyanan o naghulat sa uban, pahimusli ang imong panahon pinaagi sa pagbasa o kaha pagplano kon unsay imong himoon nianang adlawa.

“Ang mga plano sa kugihan mosangpot gayod sa kaayohan.”Proverbio 21:5.