Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Pagmata!  |  Num. 6 2016

 GIDISENYO BA KINI?

Ang Bungot-bungot sa Amahong

Ang Bungot-bungot sa Amahong

SAMA sa sisi, ang amahong motapot sa mga bato, kahoy, o kasko sa barko. Pero, lahi sa sisi nga modikit pag-ayo sa taptan niini, ang amahong magbitay gikan sa taptan niini pinaagi sa mga bungot-bungot nga gitawag ug byssus. Kini nga pagbitay dakog tabang sa pagpangitag pagkaon ug pagbalhin-balhin niini, bisan pag ang bungot-bungot morag huyang kaayong tan-awon nga daling maputol inighapak sa balod. Sa unsang paagi ang bungot-bungot nakatabang sa amahong sa pagtapot ug dili madala sa balod?

Hunahunaa: Ang bungot-bungot lig-on sa usa ka tumoy, pero humok ug mainat-inat sa pikas tumoy. Nakita sa mga researcher nga ang eksaktong proporsiyon sa materyal sa bungot-bungot—80 porsiyento nga gahing materyal ug 20 porsiyento nga humok—gikinahanglan aron kini makatapot ug maayo. Busa ang bungot-bungot dili daling maputol bisag lamba-lambahan pa sa kusog nga balod.

Si Professor Guy Genin miingon nga ang mga nadiskobrehan “katingalahan” kaayo, ug siya midugang: “Katingalahan ang bungot-bungot sa amahong kay maayo kaayo ang pagkakombinar sa humok ug gahi nga mga parte niini.” Ang mga siyentista nagtuo nga ang disenyo sa bungot-bungot sa amahong daghag kagamitan, sama sa pagpatapot ug mga himan diha sa mga bilding ug mga sakyanan nga pang-ilalom sa dagat, pagpatapot sa mga luta-luta ngadto sa bukog, ug pagtahi sa mga dinisdisan sa operasyon. “Ang kinaiyahan daghan kaayog impormasyon bahin sa mga pamaagi sa pagdikit,” miingon si J. Herbert Waite, propesor sa University of California sa Santa Barbara, U.S.A.

Unsay imong hunahuna? Ang bungot-bungot ba sa amahong mitungha pinaagig ebolusyon? O kini ba gidisenyo?

Pagkat-og Dugang

LIBRO UG BROSYUR

Gilalang ba ang Kinabuhi?

Hinungdanon kon unsay imong tuohan kon sa unsang paagi nagsugod ang kinabuhi.