Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! NUM. 3 2016

 PANGUNANG TOPIKO

Pagbungkag sa Babag Karon—Ang Proseso sa Paghubad

Pagbungkag sa Babag Karon—Ang Proseso sa Paghubad

“Wala nay mas lisod pa nga buluhaton kay sa paghubad.” —“The Cambridge Encyclopedia of Language.”

UNA pa magsugod paghubad, ang mga publikasyon sa mga Saksi ni Jehova planohon pag-ayo, panukidukion, ug unya isulat. Sa maong proseso, susihon pag-ayo sa Writing Department sa hedkuwarter sa tibuok kalibotan sa New York ang katukma sa mga impormasyon sa tanang artikulo, ug kon husto ba ug komon ang gigamit nga mga pulong. *

Dayon, ipadala sa Writing Department ang mga artikulo ngadto sa gatosan ka tem sa mga maghuhubad sa tibuok kalibotan—ang kadaghanan nagpuyo ug nagtrabaho sa dapit diin sila maghubad sa materyal ngadto sa pinulongan sa maong dapit. Kadaghanan kanila maghubad diha sa ilang kaugalingong pinulongan. Kinahanglang masabtan nila pag-ayo ang Iningles nga artikulo ug ang nahubad nga artikulo.

Unsay paagi sa mga maghuhubad sa paghubad?

Si Geraint, kinsa maghuhubad didto sa Britain, miingon: “Kauban ko sa usa ka tem, busa gikinahanglan ang kooperasyon. Maghunahuna kami ug paagi kon unsaon paghubad sa lisod nga mga materyal. Sa maghubad, among sabton dili lang ang tagsatagsa ka pulong kondili ang hugpong sa mga pulong. Among timbangtimbangon ang kahulogan ug ang katuyoan niini, nga hinumdoman kon para kang kinsa gitumong ang matag artikulo.”

Unsay inyong tumong ingong maghuhubad?

“Tumong namo nga masabtan sa mga magbabasa ang materyal nga daw gisulat gayod kini diha sa iyang kaugalingong pinulongan, nga morag dili hinubad. Busa maningkamot kami sa paggamit ug simple ug komon nga mga pulong. Busa makuha namo  ang interes sa magbabasa ug siya magpadayon sa pagbasa nga morag nagkaon ug lamiang pagkaon nga sayon tunlon.”

Unsay mga bentaha sa pagpuyo sa dapit diin gigamit ang pinulongan?

“Ang pagpuyo uban sa lokal nga mga molupyo dakog tabang. Adlaw-adlaw namong madunggan ang among pinulongan. Makapangutana usab kami kon natural, masabtan, ug maayo ba ang mga termino ug ekspresyon nga among gigamit. Kini nakatabang namo sa paghubad sa tukmang kahulogan sa orihinal nga materyal.”

Giunsa pag-organisar ang inyong buluhaton?

“Usa ka tem hatagag tagsatagsa ka proyekto. Una, basahon sa matag usa ang orihinal nga materyal aron masabtan ang artikulo ug kon para kang kinsa kini gitumong ug kon unsay estilo sa pagkabalay niini. Among pangutan-on ang among kaugalingon: ‘Unsay gustong itudlo niini nga artikulo? Unsa ang tema ug katuyoan niini? Unsay akong makat-onan gikan niini?’ Kini nga paagi makapalihok sa among imahinasyon.

“Sunod, ang mga membro sa tem magbayloay sa ilang hunahuna, nga makakat-on gikan sa usag usa. Nasabtan ba gyod namo ang materyal? Unsaon namo paghubad nga masundog ang estilo sa pagkabalay sa artikulo diha sa orihinal nga materyal? Among tumong nga kon unsay reaksiyon nga gusto sa magsusulat nga masinatian sa iyang magbabasa, mao poy reaksiyon niadtong mobasa sa among hubad.”

Sa unsang paagi magtinabangay ang tem?

“Paneguroon namo nga sa unang pagbasa pa lang, masabtan dayon sa mga magbabasa ang artikulo. Busa among basahog kusog ang matag nahubad nga parapo sa daghang beses.

“Ang maghuhubad magtayp sa parapo diha sa lokal nga pinulongan, nga makita sab namo sa among computer screen. Among susihon kon wala bay nasayloan o nadugang nga ideya. Tan-awon usab namo kon dili ba balikwaot pagkabalay ang parapo ug kon husto ba ang espeling ug grammar. Dayon usa namo magbasag kusog sa parapo, kon siya masango, mangutana kami kon ngano. Dihang mahuman na paghubad ang tibuok artikulo, usa ka membro magbasag kusog niini samtang ang  uban magmatikod sa mga bahin nga kinahanglang pauswagon.”

Dili kana sayon nga trabaho!

“Bitaw. Inigkahuman sa tibuok adlaw, kapoy na gyod. Busa pagkabuntag among tan-awon pag-usab ang artikulo nga nahubad sanglit nakapahulay na kami. Paglabayg pipila ka semana, padalhan kami ug final correction sa artikulo gikan sa Writing Department. Dayon basahon namog otro ang among nahubad ug pauswagon pa kini.”

Unsang mga computer tool ang inyong gigamit?

“Ang computer dili makapuli sa mga maghuhubad. Pero ang mga Saksi ni Jehova nakahimog mga computer tool nga makatabang sa pagpadali sa paghubad. Usa niini mao ang diksiyonaryo diin natigom diha niana ang mga termino ug mga pulong nga komon namong gigamit. Duna pay laing computer tool nga among gigamit sa pagpanukiduki sa tanang nahubad na sa among tem ug sa pagsusi kon giunsa paghubad diha sa nangaging artikulo ang lisod nga mga sentence.”

Unsay imong panglantaw bahin sa inyong buluhaton?

“Giisip namo ang among buluhaton ingong regalo ngadto sa publiko. Ug gusto namo nga kini maayong pagkapresentar. Malipay kami sa paghunahuna nga ang usa ka artikulo sa magasin o sa webpage makatandog sa kasingkasing sa magbabasa ug makahatag ug kaayohan sa iyang kinabuhi.”

 Mga Kaayohan nga Molungtad Hangtod sa Hangtod

Sa tibuok kalibotan, minilyon ang nakabenepisyo gikan sa publikasyon sa mga Saksi ni Jehova diha sa ilang kaugalingong pinulongan. Ang kaalam nga mapupo gikan sa ilang mga literatura ug video, ingon man diha sa ilang website, ang jw.org, gibase sa Bibliya. Dugang pa, nianang balaang libro, ang Diyos, kansang ngalan mao si Jehova, nagsugo kanato nga ang iyang mensahe ipadayag ngadto sa mga tawo sa “matag nasod ug tribo ug pinulongan.”—Pinadayag 14:6. *

^ par. 4 Ang mga artikulo giandam sa Iningles.

^ par. 25 Tan-awa ang www.jw.org/ceb alang sa mga basahon, audio, ug video nga publikasyon diha sa imong kaugalingong pinulongan ug sa ginatos pang pinulongan.