Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Pagmata!  |  Num. 3 2016

 GIDISENYO BA KINI?

Ang Liog sa Hulmigas

Ang Liog sa Hulmigas

ANG mga mechanical engineer nahingangha sa kusog sa hulmigas sa pagtangag ug mga butang nga mas bug-at pa kay sa ilang lawas. Aron kini masabtan, gitun-an sa mga inhenyero sa Ohio State University, U.S.A., ang pipila ka parte sa lawas sa hulmigas, kinaiyahan sa lawas niini, ug obra sa hulmigas pinaagi sa pagdisenyog artipisyal nga hulmigas diha sa computer. Ang maong hulmigas gihimo pinaagig X-ray cross-sectional images (micro CT scans) ug palihokon aron maestudyohan kon unsa ka kusgan ang hulmigas sa magtangag ug karga.

Ang importante kaayong parte sa lawas sa hulmigas mao ang iyang liog, nga maoy magdala sa kabug-at sa karga nga iyang gitangag. Ang humok nga mga tissue sulod sa liog nga nagtapot sa gahi nga kabhang sa iyang lawas ug ulo nahisama sa pag-akobay sa mga tudlo ug kamot. “Ang disenyo ug gambalay niini nga panag-akobay maoy nakahatag ug kusog sa liog,” miingon ang usa sa mga tigdukiduki. “Ang talagsaong pagtapotay sa humok ug gahi nga mga tissue lagmit maoy nakapalig-on sa koneksiyon sa taludtod sa liog ug tingali maoy nakahatag ug kusog sa liog nga tungod niana ilang madaog ang bug-at nga karga.” Ang mga tigdukiduki naglaom nga ang tin-awng pagsabot sa mekanismo sa liog sa hulmigas makatabang sa pagpauswag sa disenyo sa mekanismo sa mga robot.

Unsay imong hunahuna? Ang liog ba sa hulmigas nga komplikado kaayo ug ang talagsaong pagtapotay sa parte sa lawas ug liog nga nakapakusgan niini mitungha pinaagig ebolusyon? O kini ba gidisenyo?

Pagkat-og Dugang

LIBRO UG BROSYUR

Gilalang ba ang Kinabuhi?

Hinungdanon kon unsay imong tuohan kon sa unsang paagi nagsugod ang kinabuhi.