Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! NUM. 1 2017

“Kami Natandog Pag-ayo sa Gipakitang Pagmahal”

“Kami Natandog Pag-ayo sa Gipakitang Pagmahal”

SA Sabado, Abril 25, 2015, giuyog sa 7.8 nga gikusgong linog ang Nepal, usa ka bukirong nasod sa amihanan sa India. Ang linog nahitabo mga 80 kilometros sa amihanan-kasadpan sa kaulohan, sa Kathmandu. Sa pagkaalaot, kapin sa 8,500 ka tawo ang nakalas, kini ang kinagrabehang kalamidad nga nahitabo sukad sa Nepal kay daghan kaayo ang nangamatay. Kapin sa tunga ka milyong balay ang nangaguba. Adunay 2,200 ka Saksi ni Jehova sa Nepal, ug ang kadaghanan kanila nagpuyo sa naapektohang lugar. Makapasubo, usa ka Saksi ug ang iyang duha ka anak namatay.

“Ang linog nahitabo dihang ang mga kongregasyon sa naapektohan pag-ayong mga lugar naghimo sa ilang Kristohanong mga tigom,” miingon ang Saksi nga ginganlag Michelle. “Kon ang linog nahitabo pa panahon diin daghan ang anaa ra sa balay, seguradong daghan pa ang mangamatay.” Nganong ang mga nanambong wala maapektohi? Ang disenyo sa Kingdom Hall dako kaayong tabang.

“KARON NAKITA NA NAMO ANG MGA KAAYOHAN!”

Ang bag-ong mga Kingdom Hall sa Nepal gidisenyo nga lig-on kaayo nga dili daling mahugno sa linog. Si Man Bahadur, nga nalangkit sa pagpanukod ug Kingdom Hall, miingon: “Daghan ang nangutana namo kon nganong lig-on kaayog pundasyon ang among gipanukod para sa gamay lang nga bilding. Karon nakita na namo ang mga kaayohan!” Pagkahuman sa linog, ang permiso sa paggamit sa Kingdom Hall giaprobahan ingong temporaryong mga estaranan. Bisag duna gihapoy ginagmayng linog, ang mga Saksi ni Jehova ug ang ilang mga silingan dakog pagsalig nga luwas sila didto.

Ang mga Saksi ni Jehova ug ang mga silingan midangop sa mga Kingdom Hall

Gipangita dayon sa Kristohanong mga ansiyano ang mga membro sa kongregasyon nga wala pa mahibaloi kon hain na. “Giuna sa mga ansiyano ang kaayohan sa kongregasyon imbes ang kaayohan sa mga ansiyano,” miingon ang usa ka Saksi nga ginganlag Babita. “Kami natandog pag-ayo sa gipakitang pagmahal.” Paglabayg usa ka adlaw, tulo ka membro sa komite nga nagdumala sa buluhaton sa mga Saksi ni Jehova sa Nepal, ug ang nagapanawng mga ministro o mga tigdumala sa sirkito, miduaw dayon sa mga kongregasyon sa pagpakisayod sa panginahanglan ug sa pagtabang sa mga ansiyano sa maong dapit.

Si Gary Breaux, sa hedkuwarter sa mga Saksi ni Jehova sa tibuok kalibotan, mibisita sa mga naapektohan

Paglabayg unom ka adlaw, si Gary Breaux, nga gikan sa hedkuwarter sa mga Saksi sa tibuok kalibotan didto sa United States, miadto sa Nepal uban sa iyang asawa nga si Ruby. Si Reuben, nga membro sa gihisgotan na nga komite, miingon: “Tungod sa kaguliyang sa Kathmandu, ug sa ginagmayng linog nga nagakahitabo, wala kami makaseguro kon makaabot ba gyod si Brader Breaux. Pero porsigido siya sa pag-anhi dinhi—ug miabot ra gyod siya! Ang mga Saksi dinhi mapasalamaton kaayo sa iyang pagbisita.”

‘KAMI MAS NASUOD PA’

Si Silas, nga nag-alagad sa opisina sa mga Saksi sa Nepal miingon: “Pagkabalik gyod sa koneksiyon sa among telepono, adlaw ug gabii kining nagsigeg kiring! Ang isigka-Saksi sa ubang nasod nabalaka namo. Bisag wala kami makasabot sa sinultihan sa pipila kanila, among nabati ang ilang gugma kanamo ug ang ilang pagkaandam sa pagtabang.”

Gitabangan sa medical team sa mga Saksi gikan sa Europe ang mga naapektohan

 Sulod sa daghang adlaw human sa linog, ang lokal nga mga Saksi naghatod ug pagkaon diha sa mga Kingdom Hall sa pag-apod-apod niini ngadto sa uban nga nanginahanglan. Dugang pa, giporma ang Disaster Relief Committee, ug nagsugod pagpangabot ang mga hinabang, ang kadaghanan niini gikan sa Bangladesh, India, ug Japan. Paglabayg pipila ka adlaw, ang medical team gikan sa Europe nangabot ug ang usa sa mga Kingdom Hall ilang gihimong hedkuwarter. Sila milihok dayon, ilang gisusi dili lang ang pisikal nga kahimtang sa naapektohan sa linog kondili gitabangan usab sila sa pagsagubang sa ilang mapait nga kasinatian.

Nagpadayag sa gibati sa daghan, usa ka babaye nga ginganlag Uttara miingon: “Ang linog grabe kaayo ug makahadlok. Apan human sa linog, kami mas nasuod pa karon sa among espirituwal nga pamilya.” Oo, ang linog wala makapahuyang sa gugma sa katawhan ni Jehova alang kaniya ug alang sa usag usa. Apan nakapalig-on hinuon kini niana nga gugma.

Pagkat-og Dugang

Motabang ba ang mga Saksi ni Jehova sa mga Naapektohan sa Katalagman?

Sayra kon sa unsang paagi kami nagtaganag praktikal nga tabang alang sa mga isigkamagtutuo ug sa uban nga naapektohan sa katalagman.