Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! NUM. 1 2017

Ang babayeng maalamon mamati sa iyang konsensiya

 ANG HUNAHUNA SA BIBLIYA

Aborsiyon

Aborsiyon

Milyonmilyong bata nga gisabak pa ang gipakuha tuigtuig—mas daghan pa kini kay sa populasyon sa daghang nasod.

Personal nga desisyon o isyu bahin sa moralidad?

ANG GIINGON SA UBAN

Ang mga inahan nga nagpakuha sa gisabak naghimo niini tungod sa nagkalainlaing hinungdan, lakip na ang kalisod sa panalapi, problema sa relasyon, pagpangagpas ug taas nga edukasyon o karera, o dili gustong mahimong solo nga ginikanan. Apan giisip sa uban ang aborsiyon ingong daotan—paglapas sa obligasyon sa babaye sa pag-atiman sa iyang gisabak.

ANG GIINGON SA BIBLIYA

Sa mata sa Diyos, ang tawhanong kinabuhi balaan. (Genesis 9:6; Salmo 36:9) Kini nga prinsipyo mapadapat diha sa bata nga nagtubo sa tagoangkan, usa ka dapit nga gidisenyo sa Diyos nga luwas nga puy-anan sa bata. Ang usa ka magsusulat sa Bibliya miingon: “Gisalipdan mo ako sa sulod sa tiyan sa akong inahan. Ang imong mga mata nakakita bisan sa binhi pa ako sa tagoangkan, ug ang tanan nga bahin niini nahisulat diha sa imong basahon, mahitungod sa mga adlaw sa dihang kini sila naumol.”Salmo 139:13, 16.

Ang hunahuna sa Diyos bahin sa kinabuhi sa wala pa matawong bata makita usab diha sa iyang Balaod ngadto sa nasod sa Israel ug sa atong hinatag sa Diyos nga tanlag. Ang Balaod sa Diyos nag-ingon nga ang tawo nga managmal ug mabdos ug makapatay sa iyang gisabak, silotan ug kamatayon—kinabuhi sa nakapatay ang ibayad sa kinabuhi nga iyang gipatay. (Exodo 21:22, 23) Siyempre konsiderahon sa mga maghuhukom ang mga motibo ug sirkumstansiya.Numeros 35:22-24, 31.

Ang tawo gihatagag konsensiya. Kon pamation sa babaye ang iyang konsensiya, pinaagi sa pagtahod sa kinabuhi sa iyang gisabak, linaw ang iyang konsensiya. * Kon iyang lapason ang iyang konsensiya, tulisokon siya niini. (Roma 2:14, 15) Gani, ang pagtuon nagpakita nga ang mga babayeng nagpakuha mas dakog purohan nga mahimong mabalak-on kaayo ug ma-depress.

Apan komosta kon ang pagpadakog anak daw sagubangonon kaayo, ilabina kon mamabdos nga wala sa plano? Matikdi ang makapalipayng saad sa Diyos para niadtong matinumanong magkinabuhi sa iyang mga prinsipyo. Kini nag-ingon nga ang tawo nga magmaunongon kang Jehova, iyang pakitaag pagkamaunongon, ang lalaki o babaye nga matarong, iyang pakiglabotan pinaagig pagkamatarong. (Salmo 18:25) “Si Jehova mahigugmaon sa hustisya, ug dili niya pagabiyaan ang mga maunongon kaniya,” nag-ingon ang Salmo 37:28.

‘Ang ilang tanlag nagpamatuod kanila, ug tali sa ilang kaugalingong mga panghunahuna, sila ginasumbong o ginapalingkawas.’Roma 2:15.

 Komosta kon nakapakuha ka nag batang gisabak?

ANG GIINGON SA UBAN

Si Ruth, nga solo nga ginikanan, miingon: “Duna na koy tulo ka gagmayng anak ug dili na ko makaatiman kon madugangan pa kinig usa. Apan sa gipakuha nako ang akong gisabak, lain kaayo kog gibati nga daw nakahimo kog daotan kaayong butang.” * Pero ang iya bang gihimo dili mapasaylo sa Diyos?

ANG GIINGON SA BIBLIYA

Gipadayag ni Jesus ang hunahuna sa Diyos bahin niini dihang siya miingon: “Ako mianhi aron sa pagtawag, dili sa mga tawong matarong, kondili sa mga makasasala aron maghinulsol.” (Lucas 5:32) Oo, kon maghinulsol gayod kita sa atong daotang nahimo ug mangayog pasaylo sa Diyos, siya andam mopasaylo—bisan sa dagkong sala. (Isaias 1:18) Ang “kasingkasing nga gun-ob ug dugmok, Oh Diyos, dili mo pagatamayon,” nag-ingon ang Salmo 51:17.

Gawas sa hinlong konsensiya, ang Diyos mohatag sa naghinulsol ug kalinaw sa hunahuna dihang siya mapaubsanong mosangpit kaniya diha sa pag-ampo. “Pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip,” nag-ingon ang Filipos 4:6, 7. * Dihang nakatapos sa pagtuon sa Bibliya ug nakaampo sa Diyos, ang hunahuna ni Ruth nagmalinawon. Iyang nakat-onan nga ang Diyos mopasaylo gayod.Salmo 130:4.

“Dili kita niya [Diyos] silotan sumala sa angay kanato; dili kita niya paninglan sumala sa atong mga sala ug kalapasan.”Salmo 103:10, Maayong Balita Biblia.

^ par. 8 Ang posibleng kadaot sa panglawas sa inahan o sa bata dili rason aron ipakamatarong ang aborsiyon. Kon may problemang motungha panahon sa pagpanganak diin ang magtiayon kinahanglang papilion tali sa kinabuhi sa inahan ug sa bata, ang magtiayon kinahanglang modesisyon. Kay uswag na man ang natad sa medisina diha sa daghang datong mga nasod, ang ingon niini nga mga situwasyon talagsa rang mahitabo.

^ par. 12 Ang ngalan giilisan.

^ par. 14 Ang paglaom sa pagkabanhaw makahatag sab ug kalinaw sa hunahuna. Tan-awa ang “Mga Pangutana Gikan sa mga Magbabasa” sa Abril 15, 2009, nga gula sa Bantayanang Torre nga naghisgot sa mga prinsipyo sa Bibliya bahin sa posibilidad nga mabanhaw ang gisabak nga bata nga namatay.