Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! NOBYEMBRE 2015

 ANG HUNAHUNA SA BIBLIYA

Kataposan sa Kalibotan

Kataposan sa Kalibotan

“Ang kalibotan nagakahanaw ingon man ang tinguha niini,” nag-ingon ang 1 Juan 2:17. Unsa kana nga “kalibotan”? Sa unsang paagi ug kanus-a kini mahanaw?

Unsa nga “kalibotan” ang matapos?

ANG GIINGON SA BIBLIYA

Sanglit ang kalibotan nga gihisgotan dunay ‘tinguha’ nga dili makapahimuot sa Diyos, dayag nga wala kini magtumong sa literal nga yuta. Hinunoa, kini nga kalibotan nagtumong sa katawhan nga nagsalikway sa Diyos, nga nakapahimo kanila nga iyang kaaway. (Santiago 4:4) Ang mga tawo niana nga kalibotan “makaagom sa hudisyal nga silot sa walay kataposang kalaglagan.” (2 Tesalonica 1:7-9) Sa laing bahin, ang mga tawo nga nagpabiling “dili bahin sa kalibotan,” agig pagsunod kang Jesu-Kristo, dunay palaaboton nga kinabuhing walay kataposan.—Juan 15:19.

Gani, ang 1 Juan 2:17 nag-ingon: “[Ang usa] nga nagabuhat sa kabubut-on sa Diyos magpabilin hangtod sa kahangtoran.” Oo, siya adunay palaaboton nga kinabuhing walay kataposan dinhi mismo sa yuta, matod pa sa Salmo 37:29: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”

“Ayaw ninyo higugmaa ang kalibotan o ang mga butang nga anaa sa kalibotan. Kon adunay mahigugma sa kalibotan, ang gugma sa Amahan wala diha kaniya.”1 Juan 2:15.

Sa unsang paagi matapos ang kalibotan?

ANG GIINGON SA BIBLIYA

Ang kataposan moabot sa duha ka hugna. Una, laglagon sa Diyos ang bakak nga relihiyon, nga gilarawan ingong babayeng bigaon nga ginganlag “Dakong Babilonya.” (Pinadayag 17:1-5; 18:8) Samtang nangangkon nga maunongon sa Diyos, siya nakigkunsabo sa mga lider sa politika sa kalibotan. Pero siya atakehon niini nga mga magmamando. “Sila magadumot sa bigaon ug magalaglag ug magahubo kaniya, ug magakaon sa iyang unod [o mga bahandi] ug magaugdaw kaniya sa kalayo.”—Pinadayag 17:16.

Dayon, atakehon sa Diyos ang mga lider sa politika—“mga hari sa tibuok gipuy-ang yuta.” Uban sa daotang mga tawo, sila laglagon sa “dakong adlaw sa Diyos nga Labing Gamhanan,” nga gitawag usab ug Armagedon.—Pinadayag 16:14, 16.

“Pangitaa ninyo si Jehova, kamong tanang maaghop sa yuta, . . . Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.”Sofonias 2:3.

 Kanus-a matapos ang kalibotan?

ANG GIINGON SA BIBLIYA

Ang kataposan moabot dihang mapasidan-an na ang mga tawo pinaagi sa pagwali sa Gingharian sa Diyos—usa ka tibuok kalibotang gobyerno nga maoy mopuli sa pagmando sa tawo. (Daniel 7:13, 14) Si Jesu-Kristo miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Kana nga pagsangyaw, nga nagpakita sa hustisya ug kaluoy sa Diyos, maoy usa sa “ilhanan” nga nagpaila sa panahon sa kataposan. Lakip usab sa ilhanan mao ang mga gubat sa nagkalainlaing nasod, mga linog, kagutom, ug sakit.—Mateo 24:3; Lucas 21:10, 11.

Gawas nga nagtagna sa mga panghitabo sa kalibotan, ang Bibliya naghisgot usab bahin sa mga kinaiya sa mga tawo sa “kataposang mga adlaw.” Kini nag-ingon: “Moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, magmahigugmaon sa salapi, . . . dili-masinugtanon sa mga ginikanan, . . . walay pagpugong-sa-kaugalingon, mabangis, walay gugma sa pagkamaayo, . . . mga mahigugmaon sa kalipayan inay nga mga mahigugmaon sa Diyos.” *2 Timoteo 3:1-5.

Kining presenteng daotang kalibotan, sa dili madugay ‘mahanaw.’—1 Juan 2:17

Kanang tanan nagtimaan sa yugto sa panahon nga nagsugod sa Gubat sa Kalibotan I sa 1914. Dugang pa, sukad nianang tuiga, ang Gingharian sa Diyos giwali sa tanang suok sa kalibotan, ug giisip sa mga Saksi ni Jehova nga usa ka kadungganan nga mailhan sa mga tawo nga maoy nagtuman niini nga buluhaton. Gani, ang ilang pangunang basahon mao ang magasing Ang Bantayanang Torre Nagapahayag sa Gingharian ni Jehova.

‘Busa, padayon sa pagbantay tungod kay wala kamo mahibalo sa adlaw ni sa takna.’Mateo 25:13.

^ par. 14 Alang sa dugang impormasyon, tan-awa ang kapitulo 9 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova. Anaa usab sa www.jw.org/ceb.

Pagkat-og Dugang

Kataposang mga Adlaw—Tukmang Tagna sa Bibliya

Duna bay linaing kahulogan ang panghitabo karon sa kalibotan? Susiha ang pito ka tagna nga nagpakita nga talagsaon ang atong panahon.

Unsay Gipakita sa Kronolohiya sa Bibliya Bahin sa Tuig 1914?

Ang tagna bahin sa “pito ka panahon” sa Daniel kapitulo 4 nagtumong sa kritikal nga panahon sa pagmando sa tawo.

Daghan ang Maluwas sa Kataposan—Puwede sab Ka

Apan unsaon? Pinaagi ba sa pagpondog mga suplay o paghimog uban pang pagpangandam?