Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

PAGMATA! OKTUBRE 2015

Dihang ang Imong Minahal Magsakit

Dihang ang Imong Minahal Magsakit

“Dihang mogawasay na sa ospital si Daddy, among gipatan-aw pag-usab sa iyang doktor ang resulta sa iyang mga blood test. Ang doktor miingon nga normal ang mga resulta, apan iya ra gihapon kining gitan-aw. Sa iyang katingala, duha sa mga resulta dili diay normal! Nangayo siyag pasensiya ug mitawag ug espesyalista. OK na si Daddy karon. Maayo na lang kay nangutana kami.”—Maribel.

Una pa magpakonsulta, isulat ang mga simtoma ug mga tambal nga gitomar

Ang pagpakonsultag doktor ug pagpaospital makapabalaka kaayo. Sama sa gipakita sa kasinatian ni Maribel, ang pagpaluyo sa usa ka higala ug pamilya dakog tabang ug posible pa ganing makaluwas ug kinabuhi. Sa unsang paagi ka makatabang sa imong minahal?

Sa dili pa magpakonsulta. Tabangi ang pasyente pinaagi sa pagsulat sa iyang mga simtoma, mga tambal, o suplemento nga gitomar. Isulat usab ang gusto niyang ipangutana sa doktor. Pahinumdomi siya sa mga detalye sa iyang kondisyon o sa bisan unsang sakit sa pamilya. Ayaw paghunahuna nga ang doktor nahibalo na niini nga mga detalye o mangutana bahin niini.

Pamati, pangutana nga matinahoron, ug isulat ang gusto nimong mahinumdoman

Panahon sa pagpakonsulta. Paneguroa nga ikaw ug ang pasyente nakasabot sa gipanulti sa doktor. Pangutana pero ayaw pag-insister. Tugoti ang pasyente sa pagpangutana ug pasultiha siya sa iyang gimulo. Pamati ug isulat ang angay nga hinumdoman. Pangutana kon unsa pay ubang pamaagi sa pagtambal nga kapilian. Sa ubang kaso, maayong isugyot sa pasyente nga siya magpa-second opinion sa laing doktor.

Sublia ang mga instruksiyon ug mga reseta sa doktor

Human magpakonsulta. Sublia sa pasyente ang gipanulti sa doktor. Paneguroa nga hustong tambal ang iyang matomar. Awhaga siya sa pagtomar niini sumala sa gireseta ug pahibaloa dayon ang doktor kon dunay dili maayong epekto ang tambal. Dasiga ang pasyente nga magmapositibo sa iyang panglantaw, ug awhaga siya sa pagsunod sa dugang instruksiyon, sama sa pagpakigkita pag-usab sa doktor. Tabangi siya sa pagkuhag dugang impormasyon bahin sa iyang sakit.

 Sa Ospital

Paneguroa nga hustong impormasyon ang masulat diha sa admittance form

Pabiling kalmado ug alerto. Ang pasyente nga magpaospital tingali nabalaka pag-ayo ug mobating walay mahimo. Kon kalmado ka ug alerto, ang mga tawo sa imong palibot kalmado pod ug dili magkasayop-sayop. Paneguroa nga hustong impormasyon ang masulat diha sa admittance form. Tahora ang katungod sa pasyente sa paghimog kaugalingong desisyon. Kon siya dili na makadesisyon kay grabe na ang iyang kahimtang, tumana ang iyang sinulat nga mga tugon ug tahora ang katungod sa iyang pamilya o ang health-care agent nga iyang gitudlo nga maoy modesisyon para niya. *

Matinahorong isulti sa doktor ug nars ang imong mga obserbasyon

Himoa ang unang lakang. Ayaw kahadlok sa pagpakigsulti. Ang imong maayong pamostura ug pamatasan makapaagni sa mga nars ug doktor sa pag-asikasog maayo sa pasyente ug makaaghat pa gani kanila sa pagpauswag sa kalidad sa ilang pag-atiman kaniya. Diha sa daghang ospital, lainlaing doktor ang mosusi sa pasyente. Makatabang ka kanila pinaagi sa pagsulti kon unsay giingon sa ubang doktor ug nars. Nakaila ka sa pasyente, busa isulti ang mga kausaban nga imong namatikdan sa iyang panglawas o panghunahuna.

Himoa ang imong maarangan pero ayaw pagsupak-supak

Magmatinahoron ug magmapasalamaton. Ang trabaho sa mga doktor ug nars makatensiyon. Pakitai silag kaayo sama sa gusto nimo nga ipakita nila kanimo. (Mateo 7:12) Tahora ang ilang propesyon ug kasinatian, salig sa ilang katakos, ug pasalamati sila. Kon ikaw mapasalamaton, malipay sila sa paghimo sa ilang labing maayo.

Tanang tawo magkasakit. Pero pinaagi sa pagplano ug pagkaandam motabang, ikaw makasuportar sa imong higala o paryente sa iyang lisod nga situwasyon.Proverbio 17:17.

^ par. 8 Ang mga balaod ug naandang batasan bahin sa katungod ug obligasyon sa pasyente magkalahi sa matag dapit. Paneguroa nga ang mga dokumento bahin sa mga tugon sa pasyente kompleto ug bag-o ang mga detalye.

Pagkat-og Dugang

PAGMATA!

Ang Hunahuna sa Bibliya Bahin sa Panglawas

Sayra kon unsay giingon sa Bibliya bahin sa sakit ug sa pagpanambal.