Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! OKTUBRE 2015

 TABANG ALANG SA PAMILYA | MGA BATAN-ON

Kon Ikaw Kinahanglang Mopuyog Balik sa Balay

Kon Ikaw Kinahanglang Mopuyog Balik sa Balay

ANG PROBLEMA

Dunay mga batan-on nga nanghawa sa balay ug misulay pagkinaugalingon pero nagkalisodlisod ug napugos sa pagpauli. Nakaagi ka ba niana?

Bisan pag gimahal nimo ang imong Mama ug Papa, subidahon ang pagpauli. Pananglitan, si Sarah * miingon: “Sa nagkinaugalingon ko, midako ang akong kompiyansa sa kaugalingon kay dili na ko magsalig sa uban. Pero pagpuyo nakog balik sa balay, paminaw nako mora na sab kog bata.” Ingon usab niana ang gibati ni Richard. “Dili ko gustong mouli,” matod niya, “pero dili na ko makasuportar sa akong kaugalingon. Gibati nako nga wala gyod koy ayo.”

Kon ingon niini ang imong kahimtang, kini nga artikulo makatabang nimo.

MGA HINUNGDAN

Problema sa kuwarta. Daghang batan-on makamata sa mapait nga kamatuoran dihang ilang masinati nga mahal diay kaayong magkinaugalingon. “Nahurot ang tanan nakong tinigom,” miingon si Richard, nga gihisgotan sa sinugdan. Ingon usab niini ang nahitabo kang Shaina, nga mihawa sa balay sa edad 24 ug mipauli paglabayg usa ka tuig ug tunga. “Gibadyet unta nakog maayo ang akong kuwarta,” siya miingon. “Mihawa ko sa balay nga walay kuwarta, ug mipauli nga utangan.” *

Kawalay trabaho. Bisan unsa pa ka maayo sa imong plano nga magkinaugalingon, madaot gyod kini kon mawad-an kag trabaho. Kanay nasinatian ni Shaina. “Nakagraduwet ko ug mubo nga kurso sa natad sa medisina, ug nakasulod kog trabaho pinaagig agency,” siya miingon. “Pero dihang natangtang ko, wala na koy mahimo. Probinsiya ang akong gipuy-an ug walay masudlang trabaho sa kurso nga akong natapos!”

Sayop nga panahom. Ang ubang batan-on mosulod ug trabaho nga walay hanaw kon unsa ka lisod ang pagpanarbaho. Abi nilag sayon ang ilang trabaho. Pero napalaw sila kay ilang nakita nga ang ilang gidahom nga kagawasan dili diay ingon niana ka nindot. Wala gayod sila magdahom nga lisod diayng magkinabuhi ingong hamtong.

 ANG IMONG MAHIMO

Pakigsulti sa imong ginikanan bahin sa imong pagpauli. Hisgoti kini nga mga isyu: Hangtod kanus-a ka mopuyo sa balay? Samtang anaa ka sa balay, sa unsang paagi ka makatabang sa galastohan? Unsang mga buluhaton sa balay ang imong mahimo? Unsay imong himoon aron makabangon ka pag-usab sa pinansiyal? Bisag pila pay imong edad, hinumdomi nga mibalik ka sa poder sa imong ginikanan busa kinahanglang mosunod ka sa ilang balaod.—Prinsipyo sa Bibliya: Exodo 20:12.

Pagtuon sa pagbadyet. Ang librong The Complete Guide to Personal Finance: For Teenagers and College Students nag-ingon: “Makita sa imong paagi sa paggasto kon makahibalo ka bang mobadyet o dili. . . . Importanteng makakat-on ka sa dili pagpalit ug mga butang nga wala kinahanglana.”—Prinsipyo sa Bibliya: Lucas 14:28.

Pangayog maayong tambag. Ang mga ginikanan ug ang ubang hamtong makatudlo kanimo kon unsaon sa pagpakigtransaksiyon sa bangko, pagbadyet, ug pagbayad sa balayronon. “Kinahanglang mosugod ko sa uno,” miingon si Marie. “Gitabangan ko sa akong higala sa paglista sa mga butang nga gikinahanglan ug wala kinahanglana. Dili ko makatuo kay kadaghanan sa akong galastohan wala kinahanglana! Nakakat-on sab ko sa pagdisiplina sa kaugalingon—usa ka hiyas nga importante dihang magkinaugalingon.”—Prinsipyo sa Bibliya: Proverbio 13:10.

Dili importante kon unsay imong trabaho, kondili nga mahanas ka sa imong trabaho

Pangitag trabaho. Gamita ang imong panahon sa pagpangaplay ug trabaho. Pahinumdom: Ang uban motambag kanimo nga “kab-ota ang imong mga pangandoy.” Pero kon ang imong ‘gipangandoy nga trabaho’ mao ray imong pangitaon, lagmit dili nimo makita ang mga oportunidad nga anaa sa imong atubangan! Imbes mag-usik ug panahon sa pagpangitag usa lang ka partikular nga trabaho, ayaw pamili ug trabaho. Hinumdomi, dili importante kon unsay imong trabaho, kondili nga mahanas ka sa imong trabaho. Gani, nakita nga kon mas hanas ug eksperyensiyado ang trabahante, mas malingaw sila sa ilang trabaho. Bisag dili nimo gusto ang usa ka trabaho, makakat-on ra ka sa pagmahal niini!

^ par. 5 Ang mga ngalan niini nga artikulo giilisan.

^ par. 8 Sama niini ka pait ang naeksperyensiyahan sa mga estudyante sa kolehiyo sa United States. Sumala sa The Wall Street Journal, ang usa ka estudyante mograduwar nga sagad may utang nga $33,000.

Pagkat-og Dugang

Kon Unsay Giingon sa Bibliya Bahin sa Trabaho

Importante ba kon unsa ang imong trabaho?