Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Pagmata!  |  Oktubre 2015

 ANG HUNAHUNA SA BIBLIYA

Ebolusyon

Ebolusyon

Ang ubang tawo nagtuo nga ang kinabuhi mitungha pinaagig ebolusyon. Ang uban moinsister nga Diyos ray nagsugod sa paglalang, pero ebolusyon nay nagpadayon niini. Unsay giingon sa Bibliya?

Posible kaha nga ang uniberso nagsugod pinaagig big bang?

Ang Bibliya igo lang nag-ingon: “Sa sinugdan gilalang sa Diyos ang mga langit ug ang yuta.” (Genesis 1:1) Kini wala maghisgot kon giunsa gayod paglalang sa Diyos ang tanang butang. Busa kon ang uniberso resulta man ugaling sa big bang o usa ka kusog nga pagbuto didto sa kawanangan, dili kana sukwahi sa giingon sa Bibliya. Hinunoa, ang Genesis 1:1 motubag sa pangutana, Kinsay nagpahinabo sa big bang?

Sa pagkatinuod, daghang siyentista nagtuo nga ang big bang basta na lang nahitabo ug wala tuyoa nga miresulta sa pag-ipon-ipon sa mga partikulo sa materya ug nahimong mga bituon ug mga planeta paglabay sa daghang panahon. Kini nga panglantaw sukwahi sa giingon sa Bibliya kay kini nag-ingon nga ang Diyos mao gyoy naghimo sa uniberso, gipaagi man niya kinig dakong pagbuto didto sa kawanangan o ubang paagi sa paglalang.

“Sa sinugdan gilalang sa Diyos ang mga langit ug ang yuta.”Genesis 1:1.

May giingon ba ang Bibliya nga nagpakita nga ang buhing mga butang mausab paglabay sa panahon?

Oo. Ang Bibliya nag-ingon nga gilalang sa Diyos ang tanang butang “sumala sa ilang mga matang.” (Genesis 1:11, 12, 21, 24, 25) Ang kausaban ba puwedeng mahitabo diha sa usa ka matang? Oo. Pero ang kausaban ba diha sa usa ka matang nagpakita nga sa paglabay sa panahon mahimong motungha ang bag-ong matang? Dili.

Tagda ang usa ka pananglitan: Sa 1970, gitun-an sa mga tigpanukiduki ang usa ka matang sa maya sa Galápagos Islands. Ilang namatikdan nga dihang nausab ang klima, ang mas taas ug sungo nga mga maya mas nakalahutay. Busa ang uban nakaingon nga kini maoy ebidensiya sa ebolusyon. Pero ebidensiya ba gyod kini sa ebolusyon, o pagpahiangay lang sa mga kausaban sa palibot? Paglabay sa katuigan, ang mga maya nga mugbo ug sungo mao na poy midaghan. Tungod niini nga eksperimento, si Jeffrey H. Schwartz, propesor sa anthropology, nakahinapos nga bisan tuod ang pagpahiangay nakatabang sa mga mananap nga makalahutay sa mga kausaban sa kahimtang, “dili kini makapatungha ug bag-ong matang.”

 Puwede bang ipangatarongan nga nagkahiuyon ang Bibliya ug ang teoriya sa ebolusyon?

Ang Bibliya nag-ingon nga “gilalang [sa Diyos] ang tanang butang.” (Pinadayag 4:11) Wala siya “mipahulay” hangtod iyang natapos ang pagpanglalang. (Genesis 2:2) Tin-aw ang punto: Ang Diyos wala maglalang ug usa ka simpleng organismo ug dayon nagpahulay samtang ang maong organismo nausab pinaagig ebolusyon sulod sa minilyong katuigan ug nahimong lainlaing matang sa isda, aliwas, ug tawo. * Kana nga ideya, nga gitawag ug macroevolution, wala moila nga dunay Maglalalang, nga sumala sa Bibliya maoy ‘nagbuhat sa langit ug sa yuta, sa dagat ug sa tanan nga anaa niana.’Exodo 20:11; Pinadayag 10:6.

“Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang.”Pinadayag 4:11.

Pagkat-on pag dugang: Ang Bibliya nag-ingon nga ang “dili-makita nga mga hiyas [sa Diyos] . . . , tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo.” (Roma 1:20) Ang pagkat-on bahin sa Diyos makahatag ug tinuod nga kahulogan sa kinabuhi, kay siya adunay mahigugmaong katuyoan para sa tanan nga sinserong mangita kaniya. (Ecclesiastes 12:13; Hebreohanon 11:6) Alang sa dugang impormasyon, tan-awa ang www.jw.org/ceb o kontaka ang mga Saksi ni Jehova. Tan-awa ang MGA DOKTRINA SA BIBLIYA > TUBAG SA MGA PANGUTANA BAHIN SA BIBLIYA.

^ par. 12 Lahi sa gitudlo sa mga creationist, ang Bibliya wala magsuportar sa ideya nga gilalang sa Diyos ang yuta sulod sa unom ka tag-24-oras nga adlaw. Alang sa dugang impormasyon, tan-awa ang panid 24-27 sa brosyur nga Gilalang ba ang Kinabuhi? nga gipatik sa mga Saksi ni Jehova ug libreng ma-download sa www.jw.org/ceb.

Pagkat-og Dugang

LIBRO UG BROSYUR

Gilalang ba ang Kinabuhi?

Hinungdanon kon unsay imong tuohan kon sa unsang paagi nagsugod ang kinabuhi.