Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! AGOSTO 2015

Iyang Gibarogan ang Iyang Pagtuo

Iyang Gibarogan ang Iyang Pagtuo

Sa 11 anyos pa si Song Hee, ang iyang inahan nakamatikod nga hiwi ang likod sa iyang anak. Nadayagnos sa doktor nga si Song Hee may scoliosis, pakilid nga pagkurba sa dugokan nga pormag letrang “C” o “S.” Ang kondisyon ni Song Hee migrabe, siya kinahanglang operahan. Pero si Song Hee dili magpaabonog dugo. Giinterbiyo siya sa “Pagmata!” bahin sa iyang kasinatian.

Sa nadayagnos ka, natabangan ba ka sa mga doktor?

Mga tulo ka tuig ko nga giobserbahan sa duha ka doktor, apan misamot pagkurba ang akong dugokan. Gani, naduot na niini ang akong kasingkasing ug baga, nga maglisod na kog ginhawa. Wala na koy kapaingnan kondili operasyon.

Misugot ba ka nga operahan?

Oo. Pero gisultihan ko nga lisod kaayo ang operasyon. Niadtong tungora, 116 degrees na ang pagkahiwi sa akong dugokan, sa ato pa, grabe na kaayo kini. Pero sa akong kaso, mas komplikado ang operasyon. Tungod sa akong relihiyosong pagtuo nga binase sa Bibliya, ako dili magpaabonog dugo. *

Nakakita ba mog doktor nga andam moopera nga dili moabono ug dugo?

Kami sa akong inahan nakakitag espesyalista sa among lugar sa Florida, U.S.A. Pero, pagsulti nako nga dili ko magpaabonog dugo, siya miingon nga walay doktor nga moopera sa ingon niini kakomplikado nga operasyon kon dili magpaabonog dugo. Miingon pa gyod siya nga basin dili ko kaabtag 20 anyos kon dili operahan. Katorse pa lang ko niadto.

Imo bang gisultihan siya kon nganong dili ka magpaabonog dugo?

Oo. Ako siyang giingnan nga ang akong dili pagpaabonog dugo gibase sa Bibliya, ug nangatarongan nga gilantaw sa Diyos ang dugo ingong sagrado, dugo man kini sa tawo o sa mananap. * Kon ang usa ka Israelitas mokaog dugo, siya silotan ug kamatayon! * Gipabasa usab nako kaniya ang Buhat 15:19, 20. Gisulti para sa mga Kristohanon, kini nag-ingon: ‘Ayri ang dugo.’ Sa ato pa, ang dugo dili gayod ipasulod sa lawas—ipaagi man sa baba o indyeksiyon.

Unsay tubag sa doktor?

Siya miinsistir gihapon nga abonohan ko ug dugo. Ug nakurat ko kay ang ospital miingon pa nga kon magpaabono kog dugo, walay bayad ang akong operasyon.

Pagkamaayo niana nga tanyag! Unsay inyong gihimo?

Bisan tuod daw walay doktor nga mosugot sa pag-opera nga walay  dugo, kami hugot nga mibarog sa among pagtuo. Dayon, misamot kakomplikado ang situwasyon kay sa balaod, menor de edad pa ako. Kay nagkagrabe ang akong kondisyon, gisang-at sa korte ang akong kaso. Maayo na lang kay ang piskal sa Florida mihatag namog 30 ka adlaw nga lugway sa pagpangitag doktor nga moopera nga dili moabonog dugo.

May nakit-an ba mo?

Duna! Gikontak sa Hospital Liaison Committee sa mga Saksi ni Jehova sa Florida ang espesyalista sa scoliosis sa New York kinsa misugot sa pag-opera nga walay dugo. Busa among naabot ang gitagal sa korte. *

Komosta ang operasyon?

Malamposon kaayo ang operasyon! Aron matul-id ang akong dugokan, gitaoran ni Dr. Robert M. Bernstein ug ma-adjust nga metal ang sulod sa akong likod. Kaduha ko niyang gioperahan nga duha ka semana ang kal-ang.

Nganong kaduha man?

Kon daghan kaayong dugo ang mawala sa unang operasyon, ang duha ka semana nga kal-ang igo na aron ang akong lawas makagamag dugang pulang selula sa dugo una pa sa sunod operasyon. Sa duha nako ka operasyon gamayng dugo lang ang nawala tungod sa maayong pagkaplano, kahanas, ug maampingong paagi sa pag-opera sa team. Dali ra kong naulian kay wala akoy mga komplikasyon nga resulta sa pagpaabono ug dugo. *

Unsay gibati sa doktor sa resulta?

Kinahanglang konsiderahon sa mga doktor ang tinuohan ug mga prinsipyo sa pasyente

Nalipay siya! “Ang pagtambal sa pasyente,” matod pa niya, “dili kay basta pag-opera lang.” Siya miingon nga kinahanglang konsiderahon sa mga doktor ang tinuohan ug mga prinsipyo sa iyang mga pasyente. Daghang dili mga Saksi ni Jehova uyon niana nga panglantaw.

^ par. 7 Saksi ni Jehova ang inahan ni Song Hee. Saksi usab si Song Hee nga nabawtismohan niadtong 2012 sa edad 16.

^ par. 17 Ginatabangan sa mga Hospital Liaison Committee ang mga pasyenteng Saksi sa pagpangitag mga doktor nga mosugot sa pag-opera nga dili mag-abonog dugo.

^ par. 21 Sa artikulo bahin sa mga risgo sa pag-abono ug dugo, ang Clinical Excellence Commission, New South Wales (Australia) Health, nag-ingon: “Ang pag-abono ug dugo maoy pag-transplant ug buhi nga tissue. Bisan unsa pay i-transplant, awtomatikong isalikway sa lawas sa tawo ang bisan unsa nga dili parte niini. Dako kinig kalabotan sa kahilwas sa pasyente.”

Pagkat-og Dugang

Mga Pasyenteng Saksi Mas Daling Maulian

Sumala sa mga report, ang mga pasyente nga dili magpaabonog dugo mas daling maulian ug dili magdugay sa ospital.