Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! HULYO 2015

 KAYUTAAN UG KATAWHAN

Pagbisita Ngadto sa Mongolia

Pagbisita Ngadto sa Mongolia

SI Genghis Khan, usa ka isog nga manggugubat niadtong ika-12 nga siglo, maoy nagtukod sa dakong Imperyo sa mga Mongol. Ang Mongolia, nga natung-an sa Russia ug China, gamay na karon kon itandi sa orihinal nga gidak-on sa maong imperyo ug usa sa mga nasod nga kinagamyan ug populasyon.

Ang Mongolia lagpad ug kapatagan, may bakilirong kasagbotan, habog nga kabukiran, kasubaan, ug kasapaan. Sa habagatan, makita ang Gobi Desert nga nabantog sa nakalotang mga bukog sa mga dinosaur nga tibuok gihapon ug porma. Ang Mongolia may gihabogon nga 1,580 metros gikan sa lebel sa dagat, ug kini gitawag sa mga molupyo didto ug “Yuta sa Asul nga Kalangitan.” Haom kining ngalana kay ang Mongolia dunay kapin sa 250 ka adlaw sa usa ka tuig nga hayag kanunay ang panahon!

Snow leopard

Sobra ka init ug sobra ka tugnaw ang klima didto. Sa ting-init, ang temperatura mosaka ug 40°Celsius,  samtang sa tingtugnaw kini moubos ug -40°Celsius. Halos tulo ka bahin sa molupyo sa Mongolia magsigeg balhin ug puyo. Kada buntag, ang mga tawo didto maggatas ug kanding, baka, ug kabayo. Kasagaran sa pagkaon sa Mongolia maoy mga produkto gikan sa gatas ug karne, ug kinaham nila ang karne sa karnero.

Lagpad nga nanibug-ok nga gatas, o aaruul, gibulad

Maabiabihon ang mga taga-Mongolia. Ang ilang puy-anang tolda nga gitawag ug gers mabalhin-balhin, nga ilang pasagdang bukas aron ang mga lumalabay makapahulay ug makakaon sa pagkaon nga gituyo pagbilin para nila. Ang mga bisita sagad dalitan ug tsa nga timplahag gatas ug gamayng asin.

Kadaghanan sa taga-Mongolia karon maoy mga Budhista. Ang relihiyon sa uban maoy shamanismo, Islam, ug Kristiyanismo, pero daghan ang walay relihiyon. Sa Mongolia, dunay kapin sa 350 ka Saksi ni Jehova nga nagtudlo ug Bibliya sa kapig 770 ka tawo.

Ang kamelyong Bactrian nga duhay bugdo nga bukobuko kargahag kargamento bisan sa tingtugnaw