Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Pagmata!  |  Hunyo 2015

 ANG HUNAHUNA SA BIBLIYA

Pagpanapaw

Pagpanapaw

Bisan tuod dalayegon ang pagpabiling maunongon sa kapikas, ang pagpanapaw padayong nakabungkag ug daghang pamilya.

Unsa ang pagpanapaw?

ANG GIINGON SA MGA TAWO

Sa ubang kultura, dili ra daotan ang pagpakigsekso sa dili kapikas, ilabina sa bahin sa bana. Ug para sa uban, ang kaminyoon kono dili permanente.

ANG GIINGON SA BIBLIYA

Sa Bibliya, ang pagpanapaw nagtumong sa tinuyo nga pagpakigsekso sa usa ka tawong minyo ngadto sa dili niya bana o asawa. (Job 24:15; Proverbio 30:20) Ang pagpanapaw dulumtanan sa Diyos. Sa karaang Israel, kamatayon ang silot niini. (Levitico 18:20, 22, 29) Gisugo ni Jesus ang iyang mga sumusunod sa dili pagpanapaw.—Mateo 5:27, 28; Lucas 18:18-20.

KON NGANONG ANGAY KANG MAHIBALO

Gilapas sa mga mananapaw ang seryosong panumpa nga ilang gibungat sa adlaw sa ilang kasal. Kini usab ‘sala batok sa Diyos.’ (Genesis 39:7-9) Tungod sa pagpanapaw, ang mga anak mahimong mabulag gikan sa ilang ginikanan. Dugang pa, ang Bibliya nagpasidaan nga “hukman sa Diyos . . . ang mga mananapaw.”—Hebreohanon 13:4.

“Himoa nga dungganon ang kaminyoon taliwala sa tanan, ug ang higdaanan sa kaminyoon nga dili mahugawan.”Hebreohanon 13:4.

 Makatapos ba sa kaminyoon ang pagpanapaw?

ANG GIINGON SA BIBLIYA

Ang Bibliya nagtugot sa tawo sa pagtapos sa iyang kaminyoon kon ang iyang kapikas makahimog seksuwal nga imoralidad. (Mateo 19:9) Sa ato pa, human sa usa ka buhat sa pagluib, anaa ra sa giluiban nga asawa o bana kon siya magpabilin o makigbulag sa nakasala nga kapikas. Personal kini nga desisyon.—Galacia 6:5.

Pero sa mata sa Diyos, ang kaminyoon maoy balaan ug tibuok kinabuhing panag-ubanay. (1 Corinto 7:39) Dulumtanan sa Diyos kon ang usa makigbulag tungod lang sa mabaw nga rason, sama pananglit kon siya dili na malipayon sa iyang kapikas. Busa, ang pagpakigbulag maoy usa ka seryoso nga desisyon.—Malaquias 2:16; Mateo 19:3-6.

“Ako magaingon kaninyo nga ang matag usa nga nagdiborsiyo sa iyang asawa, gawas kon tungod sa pakighilawas, magladlad kaniya sa pagpanapaw.”Mateo 5:32.

Mapasaylo ba ang nakasala ug panapaw?

ANG GIINGON SA BIBLIYA

Oo. Ang Bibliya nag-ingon nga ang Diyos mopasaylo sa mga tawo nga maghinulsol ug mobiya sa ilang mga sala—lakip sa pagpanapaw. (Buhat 3:19; Galacia 5:19-21) Gani, ang Bibliya naghisgot ug mga lalaki ug babaye nga mihunong na sa pagpanapaw ug dayon nahimong mga higala sa Diyos.—1 Corinto 6:9-11.

Gikaluy-an sa Diyos si Haring David sa karaang Israel. Si David nanapaw sa asawa sa usa sa iyang mga opisyales sa kasundalohan. (2 Samuel 11:2-4) Ang Bibliya nag-ingon nga “daotan sa mga mata ni Jehova ang gibuhat ni David.” (2 Samuel 11:27) Human sa pagbadlong, siya naghinulsol ug gipasaylo sa Diyos. Pero, naani niya ang mapait nga bunga sa iyang pagpakasala. (2 Samuel 12:13, 14) Sa ulahi, gipamatud-an sa maalamong hari nga si Solomon nga “ang manapaw walay maayong panabot.”—Proverbio 6:32, Maayong Balita Biblia.

ANG IMONG MAHIMO

Kon nakapanapaw ka, kinahanglang mangayo kag pasaylo sa Diyos ug sa imong kapikas. (Salmo 51:1-5) Dumti ang pagpanapaw sama sa pagdumot sa Diyos niini. (Salmo 97:10) Likayi gayod ang pornograpiya, paghanduraw sa sekso, pagbirigbirig, o bisan unsa nga makapukaw sa imong gana sa pagpakigsekso sa uban nga dili nimo kapikas.—Mateo 5:27, 28; Santiago 1:14, 15.

Kon biktima ka sa pagpanapaw sa imong kapikas, makasalig ka nga ang Diyos nakasabot sa imong gibati. (Malaquias 2:13, 14) Pangamuyo sa iyang paghupay ug paggiya, ug “siya magasapnay kanimo.” (Salmo 55:22) Kon ugaling imong pasayloon ang imong kapikas ug padayong makig-uban kaniya, kinahanglang maningkamot kamo sa paglig-on sa inyong kaminyoon.—Efeso 4:32.

“Si Jehova, sa baylo, nagpasaylo sa imong sala,” matod pa ni manalagnang Natan ngadto kang David nga naghinulsol human makapanapaw.2 Samuel 12:13.