Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! MAYO 2015

 ANG HUNAHUNA SA BIBLIYA

Kapintasan

Kapintasan

Napuno sa kapintasan ang kasaysayan. Magpadayon ba kini hangtod sa hangtod?

Unsay hunahuna sa Diyos bahin sa kapintasan?

ANG GIINGON SA MGA TAWO

Para sa daghan, lakip niadtong relihiyoso, natural lang nga mobalos ang tawo kon pasakitan. Ug para sa milyonmilyon, wala ray daotan kon motan-aw ug pintas nga mga pelikula ug salida sa TV.

ANG GIINGON SA BIBLIYA

Duol sa siyudad sa Mosul, sa amihanang Iraq, makita ang kagun-oban sa kanhing dakong siyudad—ang Nineve, kaulohan sa Imperyo sa Asirya. Samtang mauswagon pa kini nga siyudad, gitagna sa Bibliya nga “himoon [sa Diyos] ang Nineve nga awaaw.” (Sofonias 2:13) “Ipahimutang ko ikaw ingon nga talan-awon,” nag-ingon ang Diyos. Ngano? Kay ang Nineve maoy “siyudad nga nagaula ug dugo.” (Nahum 1:1; 3:1, 6) Ug “ang tawo nga [mapintas] ginadumtan ni Jehova,” matod sa Salmo 5:6. Gipamatud-an sa mga kagun-oban sa Nineve nga gituman sa Diyos ang iyang giingon.

Ang kapintasan naggikan sa pangunang kaaway sa Diyos ug sa tawo—si Satanas nga Yawa, kinsa gitawag ni Jesu-Kristo nga “usa ka mamumuno.” (Juan 8:44) Ug kay “ang tibuok kalibotan nailalom sa gahom sa usa nga daotan,” ang iyang mga kinaiya makita diha sa tinamdan sa mga tawo bahin sa kapintasan, lakip ang pagkahilig sa mapintas nga mga salida, dula, ug musika. (1 Juan 5:19) Aron malipay ang Diyos, kinahanglan natong dumtan ang kapintasan ug higugmaon kon unsay gihigugma sa Diyos. * Mahimo ba nimo kana?

“Bisan kinsa nga nahigugma sa kapintasan ginadumtan gayod [ni Jehova].”Salmo 11:5.

Mausab pa ba ang pintas nga mga tawo?

ANG GIINGON SA MGA TAWO

Bahin na sa atong pagkatawo ang kapintasan, ug dili na kana mausab pa.

ANG GIINGON SA BIBLIYA

Isalikway ninyo ang “kapungot, kasuko, pagkadaotan, mapasipalahong sinultihan, ug malaw-ayng pulong.” Kini usab nag-ingon: “Hukasa ang daang pagkatawo uban ang mga buhat niini, ug isul-ob ang bag-ong pagkatawo.” (Colosas 3:8-10) Sobra ra ba ang gipangayo sa Diyos? Dili. Ang tawo mahimong mausab. * Sa unsang paagi?

Una, kinahanglan ang pagkuhag tukmang kahibalo sa Diyos. (Colosas 3:10) Dihang  ang maayog kasingkasing nga tawo mahibalo sa makapadaning mga hiyas ug sukdanan sa atong Maglalalang, siya masuod sa Diyos ug gusto niyang pahimut-an siya.—1 Juan 5:3.

Ikaduha, angayng mopilig mga higala. “Ayaw pagpakig-uban kang bisan kinsa nga masuk-anon; ug sa tawo nga daling mosilaob sa kaaligutgot dili ka makigkuyog, aron dili ka masinati sa iyang mga dalan ug makabaton ug lit-ag alang sa imong kalag.”—Proverbio 22:24, 25.

Ikatulo, gikinahanglan ang lalom nga pagsabot. Kinahanglan natong masabtan nga ang pagkahilig sa kapintasan maoy usa ka seryosong kahuyangan nga nagpaila nga ang usa walay pagpugong sa kaugalingon. Sa kasukwahi, ang makigdaiton dunay kalig-on. “Siya nga mahinay sa kasuko mas maayo pa kay sa tawong gamhanan,” nag-ingon ang Proverbio 16:32.

“Tinguhaa ang pagpakigdait uban sa tanang tawo.”Hebreohanon 12:14.

Matapos pa ba ang kapintasan?

ANG GIINGON SA MGA TAWO

Mentras buhi ang tawo, ang kapintasan magpadayon.

ANG GIINGON SA BIBLIYA

“Sa dili na madugay, ug ang daotan mawala na . . . Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:10, 11) Aron maluwas ang mga maaghop ug makigdaiton, himoon sa Diyos ngadto sa mga mahiligon sa kapintasan ang gihimo niya sa karaang Nineve. Dili na gayod madaot pa sa kapintasan ang yuta!—Salmo 72:7.

“Ang mga malumog-buot, . . . magapanunod sa yuta.”Mateo 5:5

Busa, panahon na karon nga tinguhaon ang pag-uyon sa Diyos pinaagi sa pag-ugmad ug makigdaiton nga tinamdan. “Si Jehova . . . mapailobon kaninyo tungod kay siya wala magtinguha nga adunay malaglag apan nagtinguha nga ang tanan makakab-ot sa paghinulsol,” nag-ingon ang 2 Pedro 3:9, 10.

“Ilang pagasalsalon ang ilang mga espada nga mga punta sa daro ug ang ilang mga bangkaw nga mga galab.”Isaias 2:4.

^ par. 7 Gitugotan sa Diyos ang karaang Israel nga makiggubat aron panalipdan ang ilang teritoryo. (2 Cronicas 20:15, 17) Pero nausab kana dihang gitapos sa Diyos ang iyang pakigsaad sa Israel ug gitukod ang Kristohanong kongregasyon, nga wala nay utlanan nga kinahanglang panalipdan.

^ par. 11 Ang kaagi sa mga tawo nga nagbag-o sa ilang kinabuhi mabasa sa serye sa “Ang Bibliya Makabag-o sa Kinabuhi,” sa magasing Ang Bantayanang Torre.

Pagkat-og Dugang

Solusyon sa Pagkadagmalan ug Kapikas

Sa unsang paagi ang mga prinsipyo sa Bibliya makatabang bisan sa bayolente kaayong tawo sa pagbag-o?