Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! DISYEMBRE 2014

Pagpaniid sa Kalibotan

Pagpaniid sa Kalibotan

Israel, Jordan, ug Palestine

Ang Dead Sea nagkahubas ug mga usa ka metro matag tuig. Ang uban nabalaka nga ang lanaw basig mauga sa tuig 2050. Ang mga opisyales nangitag solusyon. Usa ka opsiyon nga gisusi mao ang paghimo sa tubig gikan sa Red Sea nga tab-ang aron magamit sa tawo ug dayon ang biya niini, tubig nga espiso sa asin, ipaagos pinaagig tubo ngadto sa Dead Sea. Ang mga kritiko nabalaka nga kana makadaot sa talagsaong ekosistema sa Dead Sea.

Germany

Sumala sa surbi sa usa ka kompaniya sa insyurans, mas daghan ug mga 30 porsiyento ang maospital tungod sa atake sa kasingkasing sa Adlaw sa Pasko kon itandi sa ubang adlaw sa tuig. Nag-ingon ang kompaniya nga ang pangunang mga hinungdan niini mao ang grabeng tensiyon sa pagpamalit ug mga regalo ug sobra nga pagdahom sa pamilya ug mga higala.

Britain

Gipahibalo sa mga siyentista sa Britain nga usa ka tuway sa Iceland, nga gituohang mga 405 anyos, nag-edad diay ug 507 dihang ahat nga namatay niadtong 2006. Kini mao ang kinatas-ag kinabuhi nga mananap * nga narekord sukad. Namatay ang tuway dihang gi-freeze kini sa mga siyentista aron mapadala sa laboratoryo.

Latin America ug Caribbean

Sa usa ka komperensiya nga gihimo didto sa Havana, Cuba, niining tuiga, gideklarar sa 33 ka nasod nga membro sa Community of Latin American and Caribbean States nga usa ka ‘peace zone’ ang ilang lugar kay sila nagkauyon sa paghusay sa panagbingkil nga dili gamitag puwersa. Usa sa mga mitambong mao ang United Nations Secretary-General nga si Ban Ki-moon.

^ par. 7 Dinhi ang terminong “kinatas-ag kinabuhi nga mananap” wala maglakip sa mga organismo nga magpundokpundok sa pagpuyo, sama sa gasang, nga gituohang mabuhi sa linibo ka tuig.