Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! AGOSTO 2014

 TABANG ALANG SA PAMILYA | PAGMATUTO UG MGA ANAK

Kon Unsaon Pag-ingon ug Di Puwede

Kon Unsaon Pag-ingon ug Di Puwede

ANG PROBLEMA

Ang imong anak dili gayod magpabalibad. Pag-ingon nimog dili puwede, siya magmanya dayon ug kini makasulay sa imong pasensiya. Walay bisan unsa nga makapakalma kaniya, busa mosurender ka na lang. Kay gikapoy na ka sa pagsigeg sulti ug dili puwede, imo na lang siyang pasinungtan bisag kontra sa imong buot.

Imong mahunong kana nga makapikal nga batasan. Apan, palandonga una ang pipila ka butang bahin sa pag-ingon ug dili puwede.

ANG ANGAY NIMONG MAHIBALOAN

Ang pag-ingon ug dili puwede, dili daotan. Ang ubang ginikanan dili mouyon niini, tingali sila moingon nga kinahanglang pasabton nimo ang bata, isulti ang imong rason, o kaha makigsabot ka kaniya. Apan ayaw gayod pag-ingon ug dili puwede, sila miingon, kay kana makapahambin ug kasuko sa bata.

Tingali sa primero, ang imong bata sapoton sa pag-ingon nimo ug dili puwede. Apan kini nagtudlo kaniya ug hinungdanong leksiyon—nga sa tinuod nga kinabuhi, duna gayoy mga limitasyon. Sa laing bahin, kon mosurender ka, gipahuyang nimo ang imong awtoridad isip ginikanan ug nagtudlo sa imong anak sa pagdominar kanimo pinaagi sa pagmanya matag higayon nga duna siyay pangayoon. Sa kadugayan, kon siya imong patumanan, maghambin siyag kasuko kanimo. Hunahunaa, matahod kaha sa anak ang sayon maniobrahon nga ginikanan?

Ang pag-ingon ug dili puwede mag-andam sa bata sa iyang pagkatin-edyer ug pagkahamtong. Kini magtudlo kaniya nga dunay kaayohan kon siya dili patumanan sa tanan niyang gusto. Ang bata nga makakat-on nianang hinungdanong leksiyon lagmit dili madala sa presyur sa pagdroga o pagpakigsekso dihang siya matin-edyer na.

Ang imong pag-ingon ug dili puwede mag-andam kaniya sa pagkahamtong. “Sa pagkatinuod, kita [nga mga hamtong] dili kanunay makapatuman sa atong gusto,” miingon si Dr. David Walsh. “Dili makakat-on ang atong mga anak nga dili tanan makuha nila kon ato silang patuyangan sa ilang gusto matag higayong duna silay yangongoon.” *

 ANG IMONG MAHIMO

Paninguha sa pagkab-ot sa imong tumong. Gusto nimo nga ang imong anak modako nga makabarog sa kaugalingon, hamtong ug emosyon, ug malamposon. Apan dili kini mahitabo kon patumanan nimo siya sa iyang gusto. Ang Bibliya nag-ingon nga kon ang usa ‘patuyangan sa gusto sukad sa pagkabatan-on, siya mahimong ingrato sa ulahi.’ (Proverbio 29:21) Busa, ang pag-ingon ug dili puwede maoy bahin sa epektibong pagdisiplina. Kini nga pagbansay makatabang sa imong anak, dili makadaot kaniya.—Prinsipyo sa Bibliya: Proverbio 19:18.

Kon moingon ka ug dili puwede, barogi kana. Ang imong anak dili nimo katumbas. Busa dili kinahanglang debatehan pa ang imong pag-ingon ug dili nga morag nagkinahanglan ka sa iyang pag-uyon. Siyempre, sa magkadako ang mga bata, kinahanglang mabansay ang ilang “gahom sa pagsabot aron sa pag-ila sa maayo ug sa daotan.” (Hebreohanon 5:14) Busa dili sayop kon mangatarongan ka sa bata. Pero, ayaw pakiglalis kanila kon nganong miingon kag dili puwede. Kon makiglalis ka, ang imong pag-ingon ug dili mora na hinuon ug pangutana paminawon imbes desisyon.—Prinsipyo sa Bibliya: Efeso 6:1.

Pabilin sa imong desisyon. Tingalig sulayon sa imong anak ang imong hugot nga desisyon pinaagi sa pagmanya o pagpakiluoy. Kon mahitabo kana sa balay, unsay imong himoon? “Ibulag ang imong kaugalingon sa bata,” nag-ingon ang librong Loving Without Spoiling. “Sultihi siya, ‘Kon magmanya ka, bahala ka, pero dili ko gustong mamati sa imong manya-manya. Sulod sa imong kuwarto. Hala, didto pagmanya hangtod mapul-an ka.’” Sa primero, kining imong hugot nga desisyon morag dili nimo maako—ug dili usab madawat sa imong anak. Apan ang iyang pagmanya basig mawala ra sa dihang makaamgo siya nga dili gyod ka niya madala.—Prinsipyo sa Bibliya: Santiago 5:12.

Ayaw pag-ingon ug dili puwede aron lang ipakita sa imong anak nga ikaw ang matuman isip ginikanan

Magmakataronganon. Ayaw pag-ingon ug dili puwede aron lang ipakita sa imong anak nga ikaw ang matuman isip ginikanan. Hinunoa, “ipaila ang inyong pagkamakataronganon.” (Filipos 4:5) Dunay mga panahon nga mahimong patumanan nimo ang imong anak—basta dili tungod kay nagmanya siya ug kon maayo ra pod ang gipangayo sa imong anak.—Prinsipyo sa Bibliya: Colosas 3:21.

^ par. 10 Gikan sa librong No: Why Kids—of All Ages—Need to Hear It and Ways Parents Can Say It.

Pagkat-og Dugang

Kon Unsay Himoon Kon ang Imong Bata Magmanya

Unsay imong himoon kon magmanya ang imong anak? Ang mga prinsipyo sa Bibliya makatabang nimo.

Pagmatutog Buotang mga Anak Niining Kalibotan nga Kaugalingon ray Gihunahuna

Sayra ang tulo ka butang nga makatabang nimo aron dili ka makapadakog mga anak nga kaugalingon ray gihunahuna.

Tudloi ang mga Anak sa Pagsugot

Ikaw ba ug ang imong anak magtigi kanunay kon kinsay masunod ug siya pirme ang makadaog? Ang lima ka sugyot makatabang kanimo.