Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

PAGMATA! HUNYO 2014

Sakit sa Lagos—Nameligro Ka ba Niini?

Sakit sa Lagos—Nameligro Ka ba Niini?

USA kini sa komon nga sakit sa baba. Sa primero, kining sakita tingali walay mga simtoma. Busa, peligroso kaayo kini. Ang International Dental Journal naglista sa periodontal disease o sakit sa lagos nga usa sa mga sakit sa baba nga makahatag ug “dakong problema sa panglawas.” Kini midugang nga ang epekto niini diha sa “mga tawo ug komunidad kon bahin sa kasakit ug pag-antos, kalisod sa pag-usap ug pagkawala sa kalipay sa kinabuhi, dili gayod lalim.” Ang pagkahibalo bahin niining sakita tingalig makatabang kanimo aron imong malikayan ang sakit sa lagos.

Impormasyon Bahin sa Sakit sa Lagos

Lainlain ang stage (kagrabehon) sa sakit sa lagos. Ang unang stage, nga gitawag ug gingivitis, maoy pagpanghubag sa lagos. Ang pagdugo sa lagos tingali maoy usa sa mga simtoma niini. Kini magdugo bisag walay hinungdan o dihang manepilyo ug mag-floss. Ang pagdugo sa lagos dihang eksaminon mahimong simtoma usab sa gingivitis.

Kon ang gingivitis mograbe, kini mahimong periodontitis. Niini nga stage, ang bukog o mga tisyu nga nagsangga sa ngipon magsugod pagkadaot. Kining matanga sa sakit sa lagos tingali walay mga simtoma gawas kon mograbe na. Ang pipila ka simtoma niini tingali mao ang pagkang-a sa ngipon gikan sa lagos; pagkahingo; gihang diha sa mga ngipon; baho nga gininhawa; pagkuyos sa lagos nga tungod niini ang ngipon taas tan-awon; ug pagdugo sa lagos.

Hinungdan ug Epekto sa Sakit sa Lagos

Daghan ang hinungdan sa sakit sa lagos. Ang dental plaque, o nagdikitdikit nga mga bakterya nga motapot sa ngipon, mao ang labing komon. Kon kini dili tangtangon, ang lagos manghubag tungod sa bakterya. Dihang kini mograbe, ang lagos anam-anam nga mokang-a gikan sa ngipon mao nga ang plaque nga  punog bakterya manuksok taliwala sa lagos ug ngipon. Sa makasuksok na ang bakterya, mosamot ang pagpanghubag kay daoton niini ang tisyu sa bukog ug lagos. Ang dental plaque, sa ibabaw man o sa sulod sa lagos, mogahi ug mahimong tartar o taliti. Ang tartar puno usab ug bakterya, ug kay kini gahi man ug dukot sa ngipon, lisod kining tangtangon kay sa plaque. Busa ang bakterya padayong magdaot sa lagos.

Duna pay laing hinungdan sa sakit sa lagos. Lakip niini ang dili maayong batasan sa pagpanghinlo sa ngipon, mga tambal nga makaluya sa sistema sa imyunidad, impeksiyon gumikan sa virus, tensiyon, dili makontrolar nga diabetes, sobrang pag-inom, pagpanigarilyo, ug kausaban sa hormone tungod sa pagsabak.

Ang mga epekto sa sakit sa lagos makahatag ug laing problema. Tungod sa pagngutngot sa ngipon o pagkapangag gumikan sa sakit sa lagos, lisod na ang pag-usap sa pagkaon ug pag-enjoy niini. Apektado usab ang imong pagsulti ug panagway. Gipakita usab sa panukiduki nga ang lig-ong ngipon ug lagos makatabang sa pagbaton ug maayong panglawas.

Pagdayagnos ug Pagtambal sa Sakit sa Lagos

Unsaon nimo pagkahibalo nga duna kay sakit sa lagos? Kon nakamatikod ka nga ikaw may mga simtoma nga gihisgotan niining artikuloha, maayong magpakonsulta kag espesyalista.

Matambalan ba ang sakit sa lagos? Oo, kon sayo pa. Kon ang sakit sa lagos mograbe ug mahimong periodontitis, kinahanglan kining santaon aron dili madaot ang bukog ug tisyu nga nagsangga sa ngipon. Ang mga espesyalista dunay mga gamit nga makatangtang sa plaque ug tartar sa imong ngipon, sa ibabaw ug sulod sa lagos.

Bisag dili ka makapakonsulta ug espesyalista, duna kay mahimo aron imong malikayan kining sakita. Ang husto ug regular nga pag-atiman sa imong lagos ug ngipon mao ang labing maayong paagi sa paglikay sa sakit sa lagos.